Juõn Nan in Kir ñõn Aolep!

JUÕN nan in kir ñõn ta? Ñõn lolok juõn ian obij ko an Dri Kennan ro an Jeova, etan mõkein ej Betel. Eor 118 obij ko an Dri Kennan ro an Jeova ibelakin lõl in. Ekkã an dri lolok ro kwalok air kamolol kin jerbal ko rej kõmõni ilo Betel.

Elikin an lo an dri jerbal ro kate ir im jerbal ñõn Jeova ilo mõnõnõ ilo obij eo an Dri Kennan ro an ilo Jeova ilo Mexico, juõn likao eo ej katak Baibel ear kajitõk: “Ta ko ij aikwij kõmõni bwe in maroñ jerbal ijin?” Rar uake likao in im ba: “Moktata, kwoj aikwij baptais. Inem, emõn elañe kwoj bõk jerbal in kwalok nan full-time.” Likao in ear lore nan in rejañ kein, im ruo yiõ ko tokelik, kar kir e bwe en jerbal ilo Betel eo ilo Mexico. Roñoul yiõ ko remotlok ak ej jerbal wõt ijin.

Ta in Betel?

Ilo kajin Hibru, ‘Betel’ ej melelen “Imõn Anij.” (Jen. 28:19, UBS) Mõkein ilo ailiñ kein kajjojo rej kajerbali ñõn kõmõn im ajeji Baibel im buk ko ñõn jibõñ armij ro katak kin Anij ilo elõñlok jen 100,000 congregation ko ibelakin lõl in. Enañin 20,000 eman im kõra ro im eoktõk ailiñ im wãwen mour ko air, rej jolok ien ko air ñõn jerbal ñõn Jeova im dri Kristian ro jeir im jãtir. Ridto ro im elõñ yiõ in air jerbal ijin, rej jerbal iben jodrikdrik ro. Ilo joten im weekend ko, ro uan baamle in Betel rej kobalok iben dri Kristian ro jet mõtair ilo ien kwelok ko im ilo jerbal in kwalok nan. Rej bareinwõt kajerbal ien ko jet rebellok ñõn air katak Baibel ibeir mõke, kakije im mõnõnõ, im lale aikwij ko jet air.

Kajjojo aliñ, dri jerbal ro ilo Betel rej bõk jidrik jããn in jibõñ. Rej mõña ekan ko renno im reũne, im jikin jokwe ko air rerreo im emõn. Imõn jokwe ko ilo Betel rejjab mõn dri mweie ro, bõtab rekwon im jejit. Dri lotok ro ñõn mõkein rej bwilõñ kin an emõn air kejbãrok mõkein kin an rolul eo jerbal ilo burukuk. Rej bareinwõt bwilõñ kinke elap joij im burukuk ej walok iben dri jerbal ro ilo Betel. Meñe aolep rej boub ilo jikin jerbal ko air, rej bõk jidrik ien ñõn air yokyokwe dri lotok ro air. Ilo Betel, aolep rej joñair wõt juõn im ejelok rej bõk lemnok eo bwe reutiejlok jen ro jet kin wõt jerbal eo air. Aolep jerbal ko kajjojo raurõk meñe ej jerbal in karreo, ilo jikin kallip ko, kõmat, ak jerbal ko ilo jikin kõmõn buk ak obij ko. Dri jerbal rein ilo Betel rej jerbal iben dron ñõn kowõnmanlok jerbal in kwalok nan eo an Dri Kennan ro an Jeova.​—Kol. 3:​23.

 Jet Ian Dri Jerbal in Betel Ro

Jen kalaplok ar jela kajen armij rein rej jerbal ilo Betel ko ibelakin lõl. Ta eo ear kamakõt ir bwe ren kõnan jerbal ilo Betel? Jen lale bwebwenato eo kin Mario. Ke ear erom juõn ian Dri Kennan ro an Jeova, Mario ear jerbal ilo juõn company in kõmõn wa ebuñbuñ ilo Germany, im emaroñ kar bõk jerbal ko reutiejlok. Ejjabto elikin an kar baptais, ear bõk kwonan ñõn jerbal iomin juõn wik ilo Betel. Rar kajitõk iben elañe emaroñ jerbal ilo jikin print buk ko. Mario ear lo oktõk eo ikõtan dri jerbal ro ilo Betel im dri jerbal ro ilo jikin jerbal eo an. Kin men in, ear kanne an peba ñõn an jerbal ilo Betel full-time. Meñe elõñ ro nukin im ro mõtõn ilo jikin jerbal rar jab melele kin kãlet in an, Mario ej kiõ mõnõnõ ilo an jerbal ilo Betel eo ilo Germany.

Elõñ rej itok im jerbal ilo Betel meñe rar jab ber ilo jikuul ko reutiej im rejjab lukkun jela kilen jerbal. Men in ear walok ñõn Abel, eo im 15 yiõ kiõ in an jerbal ilo Betel eo ilo Mexico. Abel ej ba: “Elukkun lõñ men iar katak ilo Betel. Ikar katak ñõn kajerbal kein kõmõn buk ko rekabwokbwok im bin kajerbali. Ijela bwe elañe ij kajerbal jelalokjen eo eor iba kiõ ilo jerbal ko ilikin Betel, enaj lukkun lap aõ kõmõn jããn. Ak ijela bwe mour eo aõ eban einwõt Betel, ij mõnõnõ kinke ejelok inebata im jiaik dron einwõt jikin jerbal ko jet. Iar maroñ bõk jelalokjen eo emõntata, im emaroñ jibõñ iõ ilo kalomõnlokjen im einwõt juõn dri korijeran Anij. Iban kar bõk jerammõn kein elañe iar etal ñõn jikuul ko reutiej.

Kwomaroñ Bõk Kõkãtõk jen Lolok eo Am

Elõñ rar maroñ bõk jibõñ ilo kõtan eo air iben Anij jen wõt air kar lolok Betel. Men in ear walok ñõn Omar ilo Mexico. Jinen ear katakin e mol ko jen Baibel ke ear drik. Bõtab ke ear 17 an yiõ, Omar ear bwijrõk jen an ilok ñõn kwelok ko im jerbal in kwalok nan. Ear koorlok mweiuk ko ñõn e mõke im lorõk ilo mõnit ko renana. Tokelik, ke ear jerbal ñõn juõn company, ear etal ñõn Betel iben bar jet dri jerbal ñõn kwalok kin jet ian kein jerbal  ko rej wiakaki. Omar ear ba: “Elikin am kar kwalok kin kein jerbal ko, kim ar maroñ aluije jikin jerbal ko ilo Betel. Men ko iar loi im wãwen air kar kwalok joij ñõn ña ear kõmõn bwe in bar etale wãwen mour eo aõ im ejenolok jen Jeova. Iar mõkõj im bar kobalok ilo kwelok ko im jino katak Baibel. Jiljino aliñ ko elikin aõ kar lolok Betel, iar baptais. Ij kamolol Jeova kin aõ kar bõk kõkãtõk jen lolok eo aõ ñõn Betel.”

Masahiko, ilo Japan, ear ridtolok ilo juõn baamle im rej Dri Kennan ro an Jeova. Mekarta, ear jino bõk lemnok eo bwe elukkun bin mour in Kristian. Ear lap an boub ilo jikin jikuul eo an im ear bwijrõk jen an kobalok ilo kwelok im bõk kwonan ilo jerbal in kwalok nan. Masahiko ear ba: “Juõn ran, baamle eo aõ im bar jet mõtõm dri Kristian kim ar bebe ñõn ilok im aluije Betel. Kin an kar baamle eo aõ akwelap, iar ilok ibeirlok. Elap aõ kar bõk kõkãtõk ke iar aluije Betel. Ear lukkun lap aõ mõnõnõ ke iar ber im bwebwenato iben dri Kristian ro jet ilo ien in. Im ijañin kar iñjake mõnõnõ in ke iar ber iben ro mõta im rejjab dri Kennan ro an Jeova. Kõnan eo ñõn mour einwõt juõn Kristian ear laplok, im iar kajitõk bwe juõn en katak Baibel iba.” Kiõ, Masahiko ej jerbal einwõt juõn dri kwalok nan full-time ilo congregation eo ej ber ie.

Juõn Dri Kennan an Jeova jen ailiñ in France ear emakõtlok ñõn Moscow ñõn an jerbal. Ke ear ber ijo, ear jab kobalok iben armij ro an Jeova im kõtan eo an iben Anij ear mõjinolok. Ear jino kõmõni mõnit ko renana im ejjabto ear mareik juõn eo ejjab korijer ñõn Jeova. Tokelik juõn Kristian kõra jen France ear lolok e, im rar ilok ñõn air aluije Betel eo ilo St. Petersburg, Russia. Kõra in ear ba: “Rar lukkun karuwaineneik kim, im men in ear kamakõt buruõ. Iar lo an lap ainemõn ijo. Bareinwõt, iar iñjake wãwen an kajur eo an Jeova jerbal. Etke iar iten ilok jen rolul eo an Jeova? Elikin aõ kar lolok Betel, iar jar bwe Jeova en jibõñ iõ, im iar kate iõ ñõn jino katakin ajiri ro nejiõ Baibel eo. Elõñ men ko kar jibõñ kõra in ñõn kakajurlok tõmak eo an, bõtab men eo elaptata ear jibõñ e ñõn an kõmõn wõnmanlok, kar ikijen lolok eo an ñõn Betel.

Elañe ro rejjab jela kin Dri Kennan ro an Jeova rej lolok Betel, ewi wãwen men in emaroñ jelet ir? Ilo yiõ eo 1988, Alberto, juõn eo elap an bõk kwonan ilo makõtkit ko an kien, ear lolok Betel eo ilo Brazil. Ear emakõt buruen kin an erreo, kwon, im aolep jerbal ko ilo Betel rar jab kõmõni ilo ittino. Moktalok jen an kar lolok Betel, ear lolok juõn imõn jikuul an kabuñ im leo jãtin lio iben ej jerbal einwõt juõn pris. Alberto ear kile oktõk ko ilo an ba: “Aolep jerbal ko rar kõmõni ilo jikin jikuul in rar kõmõni ilo ittino. Elikin wõt an kar lolok Betel, ear jino katak Baibel eo, bwijrõk jen an bõk kwonan ilo makõtkit ko an kien, im kiõ ej juõn elder ilo congregation eo ej ber ie.

Itok im Lotok Betel!

Elõñ rar kate ir joñõn wõt air maroñ bwe ren maroñ lolok obij ko an Dri Kennan ro an Jeova ilo ailiñ ko air. Ñõn wanjoñok, ilo Brazil, Paulo im Eugenia rar aikwij kejbãrok jããn ko air iomin emen yiõ ko ñõn air maroñ lolok Betel. Rar aikwij etal 2,000 mail ko ilo juõn bus iomin 2 ran. Rar ba: “Elukkun lap tokjen amro kar kate kimro, kinke elaplok kiõ amro melele kin wãwen an rolul eo an Jeova jerbal. Elañe kimij kemeleleik dri katak ro am kin jerbal ko rej kõmõni ilo Betel, jet ien rej kajitõk, ‘Bwe kom nañin ke ber Betel?’ Kiõ, kimro maroñ uak im ba, aet emwij amro lolok Betel.”

Eor ke juõn obij an Dri Kennan ro an Jeova ak Betel ilo ailiñ eo am ak ailiñ ko iturin? Kimij kir yuk ñõn am lolok jikin kein. Elap air naj karuwaineneik yuk elañe kwonaj lolok Betel, im kwonaj bõk jibõñ ñõn am wõnmanlok wõt im korijer ñõn Jeova.

[Pija ilo peij 18]

Mario

[Pija ilo peij 18]

Abel

[Pija ilo peij 18]

Germany

[Pija ilo peij 18]

Japan

[Pija ilo peij 18]

Brazil