Kejbãrok Juõn “Buru Erreo” ilo Ran Kein Renana

JUÕN dri jeje bwebwenato an Catholic etan Vittorio Messori ear ba nan kein elikin an kar etale im lo bwe elap mour etton ilo kabuñ in Catholic eo ilo Italy. Ear ba: “Enañin aolep renaj errã bwe mour erreo ej juõn abañ ilo kabuñ [in Catholic] ranin. Air jolok kakien eo bwe dri tel ro an kabuñ in rejjab aikwij belele eban kamarmire abañ in kinke eor 80 bõjjããn in abnõnõ ko rar walok kin mour in Sodom, abnõnõ kein ej kin an pris ro kokkure eman ro im ladrik ro jimor.”​—La Stampa newspaper.

An laplok nana ejelok berre ej kakõlen “ran ko eliktata” an jukjuk im ber in. (2 Tim. 3:​1-5) Einwõt an nuuj ko kwalok, an driklok mwil emõn ejjab baj jelet wõt aolep armij ro ak bareinwõt ro rej ba rej jerbal ñõn Anij. Kin an nana im etton burueir, ej kamakõt ir ñõn kõmõni men ko rejakkar. (Ep. 2:⁠2) Eñin unin Jisõs ear kakkil “bwe lemnok ko renana, uror ko, lũñ ko, ablip ko, kwot ko, riõp ko, konono nae ko, rej itok jen buru.” (Matu 15:19) Bõtab, Jeova Anij ekõnan bwe dri korijer ro an ren yokwe “buru erreo.” (Ken. 22:11) Kin men in, ewi wãwen juõn dri Kristian emaroñ kejbãrok juõn buru erreo ilo ran kein renana?

Melelen ‘Erreo ilo Buru’

Ekkã an Baibel eo kajerbal nan in “buru” ilo kõkkar. Ekkar ñõn juõn buk in kemelele ej ba bwe nan in “buru” ilo Baibel ej kwalok kin “iñjake ko remũlõl tata an juõn armij. Ej men eo eaurõktata iben Anij im ej kõmõn bwe juõn armij en ejaake juõn kõtan iben Anij im kamakõt e ñõn kwalok mwil emõn.” Buru eo ej kwalok kin kain lukkun armij rõt kij. Einwõt kar kwalok ilo nan ko itulõñ, buru ej men eo Jeova ej etale im kaurõke iben armij ro an.​—1 Pit. 3:⁠4.

Ilo Baibel eo, “erreo” ej kalikar kin erreo ilo enbwin. Ak nan in emaroñ bareinwõt jerbal ñõn men ko rerreo ilo mwil im ilo jitõb. Ilo Katak eo an ion Tol eo, Jisõs ear ba: “Emõnõnõ ro erreo burueir.” Ilo mol, ear jitõñlok ñõn ro erreo burueir. (Matu 5:8) Erreo iñjake ko air, kõnan im kõtõbar ko air. Kin air yokwe Jeova im kamolol e, men in ej kamakõt ir ñõn yokwe e kin juõn buru emol im ejelok mon ie. (Luk 10:27) Kwojjab ke kõnan erreo ilo wãwen in?

Ejjab Juõn Men Ebiruru ñõn Kejbãrok Juõn “Buru Erreo”

Juõn eo ej korijer ñõn Jeova ejjab aikwij baj “erreo” wõt ilo kõmõn ko an, ak ej aikwij bareinwõt erreo “buruen.” (Sam 24:​3, 4) Bõtab, ranin elaplok an bin ñõn dri korijer ro an Anij ñõn kejbãrok wõt bwe en erreo “burueir.” Setan im lõl in me ej ber iomin kajur eo an, koba iben jab wãppen eo ar rej lukkun jibed kij ñõn kejibil kij jen Jeova. Ñõn bõprae ijjibed kein, elukkun aurõk bwe jen yokwe “buru erreo” im beek ilo buruer ñõn kejbãroke wõt. Men in enaj kejbãrok im jibõñ kij ñõn drebij wõt jimjera eo ar iben Anij. Ewi wãwen jemaroñ kejbãrok juõn buru erreo?

Jej lo nan in kakkil in ilo Dri Hibru 3:12: “Komin kejbãrok kom, ro jãtiõ, im en jab ilo jabrewõt iami buru enana im jab tõmak, im eo ej illok jen Anij emour.” Ejjab maroñ erreo  ‘buruer’ elañe jej kadrek juõn buru edrik an “tõmak.” Ta lemnok ko rebwir Setan ej kajededi ñõn kadriklok an armij ro tõmak ilo Anij? Setan ej kowõnmanlok lemnok in bwe men otemjej rar mõke jidre im walok, ejelok juõn kien kin ta eo emõn im enana, im ej bareinwõt kõmõn bwe armij ro ren berre bwe Baibel eo ej kakõrmol in Anij. Jejjab aikwij kõtlok bwe lemnok kein renana ren jelet kij. (Kol. 2:8) Jemaroñ jumae lemnok kein ilo ar riiti Baibel eo ran otemjej im kalomõnlokjen kin men ko jej riiti. Jelalokjen eo ejime kin Nan in Anij enaj kalaplok yokwe im melele eo ar kin wãwen an kõmõn ñõn armij. Eaurõk bwe jen kõmõn eindrein elañe jekõnan bõprae lemnok kein rebwir im kakajur tõmak eo ar bwe jen maroñ kejbãrok juõn buru erreo.​—1 Tim. 1:​3-5.

Wãwen Kejbãrok Juõn “Buru erreo” Ñe Jej Jelmae Kõnan ko an Kõniek

Bar juõn abañ jej jelmae ilo ar kajeoñ drebij juõn “buru erreo” ej itok jen kõnan ko an kõniek im arõk mweiuk. (1 Jon 2:​15, 16) Arõk dala im mweiuk ko emaroñ kokkure buruen juõn dri Kristian, im tellok e ñõn an kõmõni men ko rej nae ankilan Anij. Jet armij rej riõp ilo jikin jerbal, mone ro jet, ak kwot jããn ak men ko mweien ro jet.​—1 Tim. 6:​9, 10.

Ijo turãjet, jej kwalok bwe jej yokwe “buru erreo” ilo ar kadrek juõn jitõb in mijõk ñõn kaburomõj Jeova, yokwe ekajet jime, im kate kij ñõn drebij juõn bõklikõt emõn. Yokwe in ej kamakõt kij bwe jen wõnmanlok wõt im “kõmmõni men ko rejimwe ien otemjej.” (Hib. 13:18, UBS) Ñe jej jerbal ilo jime im mol, men in emaroñ kebellok juõn ien emõn ñõn kwalok nan. Emilio, juõn Dri Kennan an Jeova jen Itali im ej kattõr wa ilo jikin jerbal eo an, ear loe juõn wallet eor $680 iloan. Dri jerbal ro mõtõn rar bwilõñ ke ear lelok wallet eo ñõn booj eo an, im tokelik booj eo an ear karole ñõn armij eo an. Jet iair rar lokjenair kin an emõn mwilin im rar itoklimo kin Baibel eo im rar jino katak. Jen wõt kar men in, jiljilimjuõn armij ro jen  ruo baamle ko rar dreloñe tok mol eo. Aet, jerbal ilo jime jen juõn buru erreo emaroñ kamakõt ro jet bwe ren nebar Anij.​—Tait. 2:​10.

Bar juõn men me emaroñ katton buruen juõn dri Kristian ej lemnok eo ebwir im etton kin mour in belele. Emol bwe men kein im ekkã an walok iben armij ro einwõt belele mokta jen mare, ellolo jen eo belen, im kõra ñõn kõra im man ñõn man emaroñ kattone buruen juõn dri Kristian. Juõn eo ej bõk kwonan ilo mour kein retton enaj tellok e ñõn an kõmõni men ko renana ak ej jerbal ñõn Anij, im noji jerawiwi ko an. Emol, men kein rejjab kalikar juõn “buru erreo.”

Gabriele ear baptais ke ear 15 an yiõ im ilo mõkõj ear jino pioneer. Bõtab, tokelik ear jino jolok ien ko an iben ro enana mwiliir ilo imõn disco im karek ko. (Sam 26:4) Eñin wãwen eo ear tellok ñõn an kõmõni men ko renana ilo ittino im mour in lũñ, im ear aikwij bukwelok jen congregation eo an Kristian. Kain kowe rõt in jen Jeova ear kõmõn an lukkun lemnok. Gabriele ej kememej: “Iar jino kõmõni aolep men ko ikin jab lukkun kõmõni mokta. Ij riiti Baibel eo aolep ran, kajeoñ melele kin men ko Jeova ej ba, im ij lukkun katak buk ko jen dri korijer eo etiljek im meletlet. Iar kile aurõkin ar katak iber mõke im wãwen jemaroñ bõk kajur jen ar riiti Baibel eo im niknik ilo jar.” Men in ear jibõñ Gabriele ñõn an jolok mwil ko retton im ñõn bar ejaake jimjera eo an iben Jeova.

Ranin, Gabriele ej bar bõk jerbal in pioneer, e im lio belen. Men eo ear walok ñõn e ej kamol bwe katak Baibel eo im buk ko jen “dri korijer e tiljek im meletlet” emaroñ jibõñ juõn ñõn an erreo buruen im bõprae mõnit ko retton.​—Matu 24:45; Sam 143:10.

Kejbãrok Juõn “Buru Erreo” Ñe Jej Iion Melejoñ

Ijjibed jen dri jumae ro, abañ kin jããn, im nañinmij ko relap remaroñ kabwer jet ian dri korijer ro an Anij. Ñe rej iion wãwen kein renana ej bar jelet burueir. Kiñ Devid ear iion ejja wãwen in wõt. Ear ba: “Inem aõ e kijelok ilo ña; buruõ ilo ña e men in jeebeplok.” (Sam 143:4) Ta eo ear kamaroñ e ñõn elã ion wãwen in ear iione? Devid ear kalomõnlokjen kin men ko Jeova ear kõmõni ñõn dri korijer ro An im wãwen Devid mõke ear lo an Jeova lomoren e. Ear kalomõnlokjen kin men ko Jeova ear kõmõni kin ãt eo Etan elap. Devid ear jab bwijrõk jen an lemnok kin jerbal ko an Anij. (Sam 143:5) Eindrein, elañe jej kalomõnlokjen kin Dri Kõmõnmõn eo ar im aolep men ko ear kõmõni im ej wõnmanlok wõt im kõmõni ñõn kij, men in enaj jibõñ kij bareinwõt ñe jej iion melejoñ.

Jemaroñ lukkun illu ñe armij ro rej kabwir kij. Elañe jej lemnok wõt kin bwir in ear walok, men in emaroñ kõmõn bwe jen illu im drike ro jeer im jãter. Enaj kõmõn bwe jen kamakelok iar im jab kõnan kõmao iben ro jet, im jab lukkun itoklimo kake ir. Lemnok rõt in emaroñ ke kokkure kõnan eo ar ñõn kejbãrok juõn “buru erreo”? Alikar, jibarbar eo ar bwe en or juõn buru erreo ej kitibuji kõmõn ko ar iben ro jet im wãwen ar emakõt elañe ej or bwok ikõtar im ro jeer im jãter.

Ilo lõl in eobrõk lok kin men ko renana im elaplok mour etton, kij dri Kristian ro remol jej oktõk kinke jej yokwe “buru erreo.” Kõmõnmõn ankilan Anij ej bõktok ñõn kij ainemõn, im men in ej jelet mour ko ar ilo juõn wãwen emõn. Ilõñin men otemjej, jej lõñliñ kin juõn kõtan ebak iben Dri Kõmõnmõn eo ar, Jeova Anij, eo ej yokwe ro “erreo burueir.” (Sam 73:1) Aet, jemaroñ ber ibwiljin ro renaj mõnõnõ, kinke einwõt Jisõs ear kalimur, rein “re naj lo [an] Anij” emakõt im jibõñ ro rej yokwe “buru erreo.”​—Matu 5:⁠8.