“Kwalok Nan ko an Anij ilo Beran”

“Rar obrak kin Jitõb Kwojarjar, im jino air kwalok nan ko an Anij ilo beran.”​—JERB. 4:​31, UBS.

1, 2. Etke jej aikwij kate kij bwe jen bolemen ilo jerbal in kwalok nan eo ar?

 JILU ran mokta jen an Jisõs mij, ear jiroñ dri kalor ro an: “Naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” Bareinwõt, elikin an kar jerkakbiji, Jisõs ear kakien dri kalor ro an mokta jen an kar wõnliñlok ñõn lõñ bwe ren ‘kõmõn dri ailiñ ko otemjej bwe ren dri kaloran, katakin ir bwe ren bokake nan ko otemjej ear jiroñ ir.’ Ear kalimuri ir bwe enaj ber ibeir “ien otemjej ñõn jemlokõn lõl.”​—Matu 24:14; 26:​1, 2; 28:19, 20.

² Einwõt Dri Kennan ro an Jeova, jej kijejeto ilo ar bõk kwonad ilo juõn jerbal ear ijjino ilo ebeben eo ken kajuõn. Ejelok bar juõn jerbal me eaurõklok jen jerbal in lomor eo kin kwalok kin Ailiñ eo im kõmõn dri kalor ro. Inem, ekanuij aurõk bwe jen bolemen ilo jerbal in kwalok nan eo ar! Ilo katak in, jenaj lo wãwen tel eo jen jitõb kwojarjar ej jibõñ kij ñõn konono ilo beran ñe jej bõk kwonad ilo jerbal in kwalok nan. Katak ko tok ruo renaj kwalok kin wãwen jitõb eo an Jeova emaroñ tel kij bwe jen kabel ilo ar katakin im kwalok nan ilo tiljek.

Jej Aikwij Beran

3. Etke ar bõk kwonad ilo jerbal in kwalok nan kin Ailiñ eo ej kitibuj beran?

³ Jerbal eo me Anij ear letok ñõn keañ kin Ailiñ eo ej juõn jerammõn jejjab maroñ keiri. Bõtab, jet ien ebin. Meñe jet rej mõnõnõ in roñjake nuuj eo emõn kin Ailiñ eo an Anij, elõñ rej einwõt armij ro ilo ran ko an Noa. Jisõs ear ba bwe rar “jaje ñõn ter eo ibij liplip ej itok, im bõklok ir otemjej.” (Matu 24:38, 39) Bareinwõt eor ro jet rej kajirere im jumae kij. (2 Pit. 3:3) Jumae emaroñ itok  jen ro reutiej, jen dri jikuul im dri jerbal ro, im bareinwõt jen ro uan baamle ko ar. Kobalok iben men in ej mõjino ko ar mõke, einwõt jok im mijõk ñe rej kejekron kij. Elõñ men ko me remaroñ kõmõn bwe en bin ar konono kin nan in Anij ilo “beran.” (Ep. 6:​19, 20) Ar kijenmij in kennan kin nan in Anij ej kitibuj beran. Ta eo emaroñ jibõñ kij ñõn beran?

4. (a) Ta in beran? (b) Ewi wãwen an kar Paul beranlok ñõn kwalok nan ñõn ro ilo Tessalonika?

⁴ Nan in Grik eo me kar ukote ñõn “beran” ej melelen “jab mijõk in kwalok buruer im lemnok ko ar.” Bõtab beran ejjab melelen jab konono ilo joij ak lej ilo ar kennan. (Kol. 4:6) Jekõnan bareinwõt ainemõn iben armij otemjej ñe jej kwalok beran. (Rom 12:18) Bareinwõt, ñe jej kwalok nan kin nuuj eo emõn kin Ailiñ eo an Anij, jej aikwij jokkin wõt juõn ilo ar kwalok beran im kajerbal lolokjen bwe jen jab jirullok im kaillu armij ro. Emol, kwalok beran ej kitibuji karkar ko me jej aikwij kate kij ñõn kadreki. Bõtab, ñõn kadrek karkar in beran jejjab maroñ atartar ion kajur ak maroñ ko ar mõke. Elikin air kar kokkure dri jilik Paul im ro mõtõn ilo Pilippai, ewi wãwen rar “beranlok” ñõn kwalok nan ñõn ro ilo Tessalonika? Paul ear je im ba, ikijen “am Anij.” (1 Dri Tessalonika 2:2.) Jeova Anij emaroñ jolok ar mijõk im kaberan kij ilo ejja wãwen in wõt.

5. Ewi wãwen Jeova ear kaberan Piter, Jon, im dri kalor ro jet?

⁵ Ke Piter im Jon rar iion jumae jen “iroij ro [an armij ro], im elder ro, im skraib ro” rar ba: “Elañe ejime iman mejen Anij bwe kimin eoroñ kom elap jen Anij, komin ekajete. Bwe kim jab maroñ in jab konono men ko kim ar loi im roñjaki.” Ijellokin air kar jar ñõn Anij bwe en kabwijrõk jumae eo, irro im dri tõmak ro mõtair rar kajitõk im ba: “O Iroij, kwon lale air nan in kalelñoñ: im letok ñõn ro dri korijerõm, bwe kin elap beran ren kwalok Am in nan.” (Jerb. 4:​5, 19, 20, 29) Ewi wãwen Jeova ear uake kajitõk eo air? (Riit Jerbal 4:​31, UBS.) Jeova ear jibõñ ir ñõn beranlok ikijen jitõb eo an. Jitõb eo an Anij emaroñ bar kõmõn eindrein ñõn kij. Kin men in, ewi wãwen jemaroñ bõk jitõb eo an Anij, im ewi wãwen an tel kij ilo jerbal in kwalok nan?

Wãwen Jemaroñ Beran

6, 7. Ta wãwen eo emõntata ñõn ar bõk jitõb kwojarjar eo an Anij? Kwalok wanjoñok ko.

⁶ Wãwen eo emõntata ñõn bõk jitõb kwojarjar eo an Anij ej bwe jen kajitõk kake. Jisõs ear jiroñ ro rar roñjake e: “Elañe komeo dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:13) Emol, jej aikwij niknik in jar kin jitõb kwojarjar. Elañe jej mijõk in kwalok nan turin ial, ilo ien emõntok, ak ilo jikin business ko, jemaroñ jar ñõn Jeova kin jitõb eo an bwe en jibõñ kij ñõn beran.​—1 Tes. 5:​17.

⁷ Eñin men eo juõn Kristian kõra etan Rosa ear kõmõne. * Juõn ran ke Rosa ear ber ilo jikin jerbal eo an, juõn dri kaki me ear jerbal iben ear riiti juõn ennan kin an ro jet kõmõni men ko renana ñõn dri jikuul ro ilo bar juõn jikuul. Joñõn an dri kaki eo lukkun nana an mour kin men eo ear riiti, ear lamij im ba, “Etke elukkun nanalok men ko ilo lõl in?” Rosa ear jab maroñ kejekron ien in emõn ñõn an kwalok nan ñõn e. Ta eo ear kõmõne bwe en beran in konono iben? Rosa ej ba, “Iar jar ñõn Jeova bwe en letok jitõb eo an ñõn jibõñ iõ.” Ear maroñ kwalok nan ñõn e im karõk juõn ien bwe en bar bwebwenato iben. Lemnok bareinwõt kin juõn ledrik lailim an yiõ, etan Milane me ej jokwe ilo New York City. Milane ej ba: “Mokta jen aõ etal ñõn jikuul, aolep ien  kimro mama ej jar ñõn Jeova.” Rej jar kin ta? Rej jar kin beran bwe Milane en jutõk bin im kennan kin Anij eo an! Jinen ej ba, “Men in ear jibõñ Milane ñõn an kemelele kin an jab bõk kwonan ilo kemem ko im ran in kwojkwoj ko an lõl in ilo ien eo rej kõmõni men kein.” Wanjoñok kein rej kalikar bwe jar ej jibõñ kij ñõn ar beran.

8. Ta eo jemaroñ katak jen dri kanan Jeremaia ñõn kõmõn bwe jen beran?

⁸ Lemnok bareinwõt kin men eo ear jibõñ Jeremaia ñõn kadrek karkar in beran. Ke Jeova ear jitõñ e bwe en juõn dri kanan ñõn ailiñ ko, Jeremaia ear uak: “O Iroij Anij, ijaje ta eo in ba, kinke ña ij ajiri wõt.” (Jerm. 1:​4-6, UBS) Bõtab, ejjabto tokelik, joñõn an kar Jeremaia lukkun niknik im kijejeto ilo jerbal in kwalok nan, armij ro rar watõk e bwe ej juõn armij ekkã an konono kin jorran ko. (Jerm. 38:4, UBS) Jeremaia ear beran ilo an kwalok kin ran in ekajet eo an Jeova elõñlok jen 65 yiõ. Joñõn an kar lukkun buñbuñ ilo Israel kin an kar beran ilo kwalok nan, 600 yiõ ko tokelik ke Jisõs ear konono ilo beran, jet rar lemnok bwe e Jeremaia. (Matu 16:13, 14) Ewi wãwen dri kanan Jeremaia, eo me ilo jinoin ear jenliklik, ear anjo jen an ejokok? Ej ba: “Nan ko [an Anij] rej urur einwõt kijeek ilo buruõ im ilo bukuddriũ. Imõk in drebiji.” (Jerm. 20:9, UBS) Aet, Nan eo an Jeova ear lelok kajur ñõn Jeremaia im kamakõt e ñõn kwalok nan.

9. Etke nan in Anij emaroñ jelet kij ilo ejja wãwen eo wõt ear jelet Jeremaia?

⁹ Paul ear je ilo letter eo an ñõn dri Hibru ro: “Nan in Anij ej mour im jerbal wõt, im ekõñ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.” (Hib. 4:​12) Nan eo an Anij emaroñ jelet kij ilo ejja wãwen eo wõt ear jelet Jeremaia. Kememej bwe meñe kar kajerbal man ro ñõn je Baibel eo, aolepen buk ko ie rejjab jen meletlet ko an armij ro, kinke rej kakõrmol in Anij. Ilo 2 Piter 1:​21 ej ba: “Ejelok nan in drikanij e ar itok kin ankil an armij: a armij r’ar konono jen Anij, kin an Jitõb Kwojarjar kokononoik ir.” Elañe jej bõk ien im lukkun katak iber mõke kin Baibel eo, enaj obrõk lemnok ko ar kin ennan ko emwij kakõrmoli ikijen jitõb kwojarjar eo. (Riit 1 Dri Korint 2:​10.) Ennan eo emaroñ “einwõt kijeek ilo buruer,” inem jeban drebiji wõt iber.

10, 11. (a) Ewi wãwen jej aikwij katak Baibel eo bwe jen konono ilo beran? (b) Kwalok juõn wãwen kwoj bebe in kõmõne ñõn kakõmõnmõnlok wãwen am katak ibõm mõke.

¹⁰ Bwe katak iber mõke en lap an jelet kij, jej aikwij katak ilo juõn wãwen me ennan eo ilo Baibel eo ej tõbar buruer, im ej jelet kij. Ñõn wanjoñok, kar kwalok juõn vis̃õn ñõn  dri kanan Ezekiel me kar kajitõk iben bwe en kañe juõn buk limlim eor ennan ko rekajur iloan ñõn an jiroñ armij ro me rar jab mõnõnõ in roñjake. Ezekiel ear aikwij lukkun etale ennan eo im kõmõn bwe en mõtõn mour eo an im kõtlok bwe en jelet iñjake ko an. An kõmõne men in, enaj kar kõmõn bwe ennan eo ej bõklok ñõn armij ro en emõn, einwõt nemen honey.​—Riit Ezekiel 2:8–3:​4, 7-9, UBS.

¹¹ Jej ber ilo ejja wãwen eo wõt an kar Ezekiel. Ranin, elõñ armij rejjab kõnan roñjake ta eo Baibel ej ba. Elañe jej kate im kijenmij ñõn kwalok kin nan in Anij, eaurõk bwe jen katak kin Jeje ko ilo Baibel eo ilo wãwen eo me jej kõtlok bwe jen lukkun melele im tõmak ta ko rej ba. Jen ekkeini ar katak im jab bwil im molo. Kõnan eo ar en einwõt kar dri jeje sam me ear al: “Nan ko jen loõ, im lemnok ko ilo buruõ, ren emõn iman mejõm, O Jeova aõ dreka im aõ Dri lomor.” (Sam 19:14) Ekanuij in emõn bwe jen bõk ien ñõn kalomõnlokjen kin men ko remol jej riiti ilo Baibel bwe ren maroñ tõbar buruer! Kin men in, jej aikwij kate kij ñõn kakõmõnmõnlok wãwen ar katak iber mõke. *

12. Etke kwelok ko an dri Kristian rej jibõñ bwe jitõb kwojarjar eo en tel kij?

¹² Bar juõn wãwen ñõn bõk tokjen jen jitõb kwojarjar ej ilo ar “lemnak kake dron im jibañ dron, bwe jen kwalok yokwe ñõn dron im kõmmõn emmõn. Jen jab jolok ad kwelok ibben dron.” (Hib. 10:24, 25, UBS) Ar kate kij ñõn ekkeini ar ber ilo kwelok ko an dri Kristian, lukkun roñjake, im jerbale men ko jej katak kaki rej wãwen ko remõn me jitõb kwojarjar ej tel kij. Alikar bwe jitõb eo an Jeova ej tel kij ikijen congregation eo.​—Riit Reveles̃õn 3:6.

Tokjen Ar Beran

13. Ta eo jemaroñ katak jen men ko dri Kristian ro ilo ebeben eo ken kajuõn rar kõtõbrõke ilo jerbal in kwalok nan?

¹³ Jitõb kwojarjar ej kajur eo elaptata ijoko otemjej ilõñ im ilõl, im emaroñ kakajur armij ro ñõn kõmõnmõn ankilan Jeova. Ikijen kajur eo an jitõb kwojarjar, dri Kristian ro ilo ebeben eo ken kajuõn rar kõtõbrõk jerbal eo elap, jerbal in kwalok nan. Rar kwalok kin nuuj eo emõn “ñõn ro otemjej rej ber iomin lõñ.” (Kol. 1:​23) Ñe jej etale bwe enañin aolepeir “rettã im rar jab katak ilo jikul,” jenaj kile bwe juõn kajur elap ear kamakõt ir.​—Jerb. 4:​13, UBS.

14. Ta eo enaj jibõñ kij ñõn ‘bõplolid’ kin jitõb kwojarjar?

¹⁴ Ñe jej mour ekkar ñõn tel eo an jitõb  kwojarjar, enaj kakajur kij im men in enaj kamakõt kij ñõn beran ilo jerbal in kwalok nan. Tokjen ko jej bõki jen ar keini ar jar kin jitõb kwojarjar, niknik ilo ar katak iber mõke, kalomõnlokjen kin men ko jej riiti, im keini ar ber ilo kwelok ko remaroñ jibõñ kij bwe jen ‘bõplolid’ kin jitõb. (Rom 12:11)Ikijen “juõn dri Ju, etan Apolõs, e ar lotak i Alexandria, e dri meletlet, im e kajur ilo nan in Jeje ko, [me] ej itok ñõn Episõs,” Baibel eo ej ba: “Kin an bõplolin, elap an konono im katakin men ko an Iroij.” (Jerb. 18:24, 25) Ilo ar ‘bõplolid’ kin jitõb kwojarjar, jemaroñ beranlok ilo ar kwalok nan jen im ñõn im, bareinwõt ilo ar kwalok nan ilo jabrewõt ien emõntok.

15. Ewi wãwen kalaplok ar beran ilo kwalok nan eor tokjen ñõn kij?

¹⁵ Ar kalaplok ar beran ilo jerbal in kwalok nan ej jelet kij ilo juõn wãwen emõn. Emõnlok wãwen ar lemnok kin jerbal in kwalok nan eo ar ñe elaplok ar melele kin aurõkin im tokjen. Elaplok ar itoklimo kinke jej lo lõñliñ ñe jej bolemen ilo jerbal in kwalok nan. Bareinwõt ej kakajur kijejeto eo ar kinke elaplok ar kile aurõkin jerbal in kwalok nan.

16. Ta eo jej aikwij kõmõne elañe edriklok ar kijejeto ilo jerbal in kwalok nan?

¹⁶ Ta elañe ejoko ar kijejeto ilo kwalok nan ak jejjab kijejeto einwõt kar mokta? Inem jen lukkun etale kij mõke. Paul ear je: “Komin mõke melejoñ kom elañe kom ber ilo tõmak eo; komin mõke kamol kom.” (2 Kor. 13:5) Kajitõk ibõm mõke: ‘Ej ke bõplolũ kin jitõb kwojarjar? Ij ke jar ñõn Jeova kin jitõb eo an? Jar ko aõ rej ke kwalok bwe ij atartar wõt ion ñõn kõmõnmõn ankilan? Ij ke kwalok nan in kamolol kin jerbal in kwalok nan eo kar letok ñõn kij ilo jar ko aõ? Ekkeini ke aõ katak iba mõke? Ewi toõn aõ bõk ien ñõn kalomõnlokjen kin men eo ij riiti im roñ kake? Ij ke lukkun roñjake im bõk kwonaõ ilo kwelok ko an congregation?’ Ar kalomõnlokjen kin kajitõk kein emaroñ jibõñ kij ñõn kile ta mõjino eo ar bwe jen maroñ kõmõnmõnlok.

Kõtlok bwe Jitõb eo an Anij En Kaberan Yuk

17, 18. (a) Ewi joñõn an lap jerbal in kwalok nan ranin? (b) Ewi wãwen jemaroñ kwalok “elap beran” ilo jerbal in kwalok nan kin nuuj eo emõn kin Ailiñ eo an Anij?

¹⁷ Jisõs ear jiroñ dri kalor ro an: “Kom naj bõk maroñ ñe emwij an Jitõb Kwojarjar itok iomi: im kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerb. 1:8) Jerbal eo me ear jinoe ilo kar tõre eo emwij an walok ilo juõn joñõn ekanuij lap. Elõñlok jen jiljilimjuõn million Dri Kennan ro an Jeova rej kwalok kin ennan eo an Aliñ eo ilo elõñlok jen 230 ailiñ ko, im rej jolok enañin 1.5 billion auõ ilo juõn yiõ ilo jerbal in kwalok nan. Elap ar mõnõnõ bwe eor kwonad im jej kijejeto ilo jerbal in me ejamin bar walok!

¹⁸ Einwõt ilo ebeben eo ken kajuõn, jej kõmõne jerbal in kwalok nan eo ibelakin lõl ranin iomin tel eo jen jitõb kwojarjar eo an Anij. Elañe jej lor tel eo an jitõb kwojarjar, jenaj kwalok “elap beran” ilo jerbal in kwalok nan. (Jerb. 28:31) Kin men in, jen kõtlok bwe jitõb kwojarjar en tel kij ke jej kwalok nuuj eo emõn kin Ailiñ eo an Anij!

[Kamelele eo itulals]

Ta eo Kwar Katak Kake?

• Etke jej aikwij beran ilo ar kwalok nan kin nan in Anij?

• Ta eo ear jibõñ dri kalor ro ilo jinoin ñõn konono ilo beran?

• Ewi wãwen jemaroñ beran?

• Ewi wãwen jemaroñ bõk tokjen jen ar beran?

[Kajitõk ko ñan katak]

[Kamelele in juõn pija ilo peij 7]

Ewi wãwen ro jemen im jinen remaroñ jibõñ ajiri ro nejiir bwe ren beran?

[Kamelele in juõn pija ilo peij 8]

Am jar ilo tukaru emaroñ jibõñ yuk ñõn beran ilo jerbal in kwalok nan