Ta ko Jar ko Am Rej Kwalok kin Kõtan eo Am Iben Anij?

“O Kwe kwoj roñjake jar, ñõn Kwe kõniek otemjej e naj itok.”​—SAM 65:2.

1, 2. Etke dri korijer ro an Jeova remaroñ jar ñõn E ilo liki?

 JEOVA ejjab kejekron jar ko an ro dri korijeran. Jemaroñ liki bwe ej roñjake kij. Meñe elõñ million Dri Kennan ro an Jeova rej jar ñõn Anij ilo juõn wõt ien, ak Jeova emaroñ roñ jar ko air kajjojo.

² Ilo an dri jeje sam, Devid, liki bwe Anij ear roñjake jar ko an, ear al im ba: “O Kwe kwoj roñjake jar, ñõn Kwe kõniek otemjej e naj itok.” (Sam 65:2) Kar uaki jar ko an Devid kinke ear juõn dri korijer etiljek an Jeova. Jej aikwij kajitõkin kij mõke, ‘Jar ko aõ rej ke kwalok bwe ij liki Jeova im bwe kabuñ eo emol ej men eo eaurõktata ilo mour eo aõ? Ta ko jar ko aõ rej kwalok kin iõ?’

Jar ñõn Jeova kin Juõn Buru Etã

3, 4. (a) Lemnok rõt eo ej aikwij or iber ñe jej kebake Anij ilo jar? (b) Ta eo jej aikwij kõmõne elañe “lemnok ko ar” kin jerawiwi eo elap jar kõmõne rej kainebataik kij?

³ Elañe jekõnan bwe Jeova en uaki jar ko ar, jej aikwij jar ñõn Anij kin juõn buru etã. (Sam 138:6) Jen kajitõk iben Jeova ñõn etale kij, einwõt an kar Devid kõmõne ke ear ba: “O Anij, kwon etale iõ im jelã buruõ; Kwon melejjoñe iõ im kile lemnak ko aõ. Kwon lale elañe eor mon ilo ña, im kwon tel iõ ilo ial eo ej ñõn indrio.” (Sam 139:23, 24, UBS) Jen jab jar wõt ak jej aikwij bareinwõt kõtlok bwe Anij en etale kij im jej aikwij bokake nan in kakabilek ko an ilo Baibel. Jeova emaroñ tel kij ñõn “ial eo ej ñõn indrio” ilo an jibõñ kij ñõn jibarek ial eo me ej tellok kij ñõn mour in drio.

⁴ Ta elañe “lemnok ko ar” rej kaiñtan kij kinke jej inebata kin juõn jerawiwi elap jar kõmõne? (Riit Sam 32:​1-5.) Einwõt an juõn wijki mõrãlok ilo ien dret, eindrein an naj joko ar kajur ñe jej kajeoñ in kabwijrõk an abnõnõ bõklikõt eo ar. Kin an kar Devid jerawiwi, ear luji lõñliñ eo an im men in emaroñ kar kõmõn an nañinmij. Bõtab, elikin wõt an kar kwalok bwir ko an ñõn Anij, ear lukkun ainemõn! Lemnok kin joñõn lõñliñ eo an Devid ke ear kile bwe Jeova ear “jolok bwir ko an.” Ñe armij eo ear jerawiwi ej kwalok bwir ko an ñõn Jeova, men in enaj bõktok ainemõn ñõn e, im jibõñ eo jen elder ro enaj bareinwõt kõmõn bwe en bar kajurlok kõtan eo an iben Jeova.​—Ken. 28:13; Jem. 5:​13-​16.

Akwelap ñõn Anij im Kamolol E

5. Ta melelen akwelap ñõn Jeova?

⁵ Elañe eor jabrewõt un me ej kõmõn ar lukkun inebata, jen jerbale nan in kakabilek eo an Paul: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij.” (Pil. 4:6) Ñõn “akwelap” ej melelen “kajitõk kin juõn buru etã.” Elaptata ilo ien ko jej ber ilo kauwatata ak matõrtõr, jej aikwij akwelap ñõn Jeova bwe en jibõñ im tel kij.

6, 7. Etke jej aikwij kobaik nan in kamolol ko ñe jej jar?

⁶ Bõtab, elañe jej jar wõt ilo ien eo jej ber  ilo aikwij, ta eo men in ej kalikar kin kõtan eo ar iben Jeova? Paul ear ba bwe jen kwalok kajitõk ko ar ñõn Anij, “kab kamolol” E. Emol, eor un ko iber ñõn kwalok ar kamolol einwõt Devid, eo ear ba: “Am, O Jeova, lapen, im kajur, im maroñ, im aibujuij, im anjo, im utiejen: bwe aolepen men ko ilo lõñ im ilo lõl, Am; Am ailiñ eo, O Jeova, im Kwoj utiej im einwõt bõran men otemjej. . . . amuij Anij, kim kamolol Yuk, im nebar etõm e aibujuij.”​—1 Kron. 29:11-​13.

⁷ Jisõs ear kamolol Anij kin mõña ko im kin bred im wain eo kar kajerbali ilo ien Kejota eo an Iroij. (Mat. 15:36; Luk 22:18, 19) Ijellokin ar kwalok kamolol rõt kein, jen “kammolol Iroij [Jeova] . . . kin men ko rekabwilõñlõñ ear kõmmõni” ñõn ro nejin armij, ‘kin ekajet ko An rewãnik,’ im kin ennan eo an me ej ber ilo Baibel eo.​—Sam 107:15, UBS; 119:62, 105.

Jar kin ro Jet

8, 9. Etke jej aikwij jar kin dri Kristian ro jeer im jãter?

⁸ Ejelok berre bwe kij aolep jej jar kin kij mõke, ak jar ko ar rej aikwij kitibuj ro jet, ekoba dri Kristian ro me jejjab jela kajeir. Meñe dri jilik Paul ear jab jela kajen aolep dri tõmak ro ilo Kolosse, ear je: “Kimij kamolol Anij Jemen ar Iroij Jisõs Kraist, im ien otemjej kim jar kin kom, bwe kim ar roñ kin ami liki Kraist Jisõs, im kin yokwe eo ibemi ñõn ro remõn otemjej.” (Kol. 1:​3, 4) Paul ear bareinwõt jar kin dri Kristian ro ilo Tessalonika. (2 Tes. 1:​11, 12) Ar jar ilo wãwen in ej kalikar kin kain armij rõt kij im kin wãwen ar lemnok kin dri tõmak ro jeer im jãter.

⁹ Jar ko ar kin Kristian dri kabit ro im “s̃ip” ro jet mõtair rej kalikar bwe jej kaurõk rolul eo an Anij. (Jon 10:16) Paul ear kajitõk iben dri tõmak ro jein im jãtin ñõn jar bwe Anij ‘en lelok ñõn e nan bwe en beran in kwalok men eo etino in gospel.’ (Ep. 6:​17-​20) Jej ke jar kin dri Kristian ro jet ilo ejja wãwen in?

10. Ar jar kin ro jet emaroñ jelet kij ilo wãwen it?

¹⁰ Ar jar kin ro jet emaroñ ukot lemnok eo ar kin ir. Elañe jej jar kin armij eo jejjab lukkun ebake e, lemnok ko ar kin e enaj oktõk. (1 Jon 4:​20, 21) Jar ilo wãwen in ej menin kõkãtõk im ej kowõnmanlok burukuk eo iben ro jeer im jãter. Bareinwõt, jar rõt kein rej kalikar bwe jej kajeoñwe yokwe eo an Kraist. (Jon 13:34, 35) Karkar in ej mõtõn leen jitõb eo an Anij. Kij kajjojo jej ke jar kin jitõb kwojarjar eo, ilo ar kajitõk iben Jeova bwe en jibõñ kij kwalok leen jitõb eo einwõt, yokwe, lõñliñ, ainemõn, meanwõr, joij, lejokmen, tiljek, inemõn im jadõr? (Luk 11:13; Gal. 5:​22, 23) Elañe eindrein, nan im kõmõn ko ar renaj kwalok bwe jej etetal im mour ekkar ñõn jitõb eo an Anij.​—Riit Dri Galetia 5:​16, 25.

11. Etke kwomaroñ ba bwe ej juõn men ekkar ñõn kajitõk iben ro jet bwe ren jar kin kij?

¹¹ Elañe jejela bwe ajiri ro nejir rej iion ijjibed ko ñõn kwot ilo ien test ko ilo jikin jikuul,  jej aikwij jar kin ir im bareinwõt lelok nan in kakabilek ko jen Baibel eo ñõn jibõñ ir bwe ren mol air jerbal im jab kõmõni men ko renana. Paul ear ba ñõn dri Kristian ro ilo Korint: “Kim jar ñõn Anij bwe komin jab kõmõnmõn nana.” (2 Kor. 13:7) Jar rõt kein me rej kwalok etã buru rej kamõnõnõik Jeova im kwalok bwe jej juõn armij emõn. (Riit Jabõn Kennan Ko 15:8.) Jemaroñ kajitõk iben ro jet ñõn air jar kin kij, einwõt an kar dri jilik Paul kõmõne. Ear je: “Komin jar kin kim: bwe kimij rel bwe emõn bõklikõt eo am, im kim kõnan bwe am kõmõn en jime ilo men ko otemjej.”​—Hib. 13:18.

Jar ko Ar Rej Kwalok Men ko Jet kin Kij

12. Ta men ko raurõk jej aikwij jar kaki?

¹² Jar ko ar rej ke kalikar bwe jej Dri Kennan ro an Jeova me remõnõnõ im kijejeto? Rej ke kalikar bwe men ko elap ar kaurõki rej jerbal in kwalok nan kin Ailiñ eo, kõmõnmõn ankilan Anij, kamol an jime iroij potata eo an Jeova, im kokwojarjar ãt eo etan? Men kein ren kar men ko raurõk jej jar kaki einwõt Jisõs ear kwalok kake ilo jar eo an, eo ej jino kin nan kein: “Jememuij i lõñ, En kwojarjar Etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.”​—Mat. 6:​9, 10.

13, 14. Jar ko ar rej kwalok ta kin kij?

¹³ Jar ko ar ñõn Anij rej kwalok unin jej kõmõni men ko, men ko jej itoklimo kaki, im kõnan ko ar. Jeova ejela kain armij rõt kij. Jabõn Kennan Ko 17:3, UBS ej ba: “Armij rej kakilene gold im silver kin kijeek, ak Iroij ej melejjoñe buruen armij.” Anij ej lo ta eo ej ber ilo buruer. (1 Sam. 16:7) Ejela iñjake ko ar kin kwelok ko, ar jerbal in kwalok nan, im ro jeer im jãter ilo congregation eo. Jeova ejela lemnok ko ar kin ro ‘jãtin’ Kraist. (Mat. 25:40) Ej bareinwõt jela elañe emol kõnan eo ar kin men eo jej jar kake ak jej baj eliji wõt jet nan ko. Jisõs ear ba, “Im ñe komij jar, komin jab elij bata einwõt ro dri pegan: bwe [ilo bwir] rej lemnok naj roñjake ir kin an lõñ air konono.”​—Mat. 6:7.

¹⁴ Nan ko jej kajerbali ilo jar ko ar rej bareinwõt kwalok kin ewi joñõn ar atartar ion Anij. Devid ear ba kin Jeova, “Bwe Kw’ar juõn jikin tilekek ñõn iõ, juõn imõn bar ekajur jen ro dri kijirãt. I naj jokwe ilo imõn kaber eo Am ñõn in drio, I naj ko ñõn ken tõrak in peiõm ko.” (Sam 61:​3, 4) Ilo kõkkar, ñe Anij ej ‘kaimweim kij ilo mweo imõn,’ jenaj iñjake ar jokõne im lõñliñ kin an kejbãrok kij. (Rev. 7:​15) Ej juõn menin kainemõn elap ñe jej kebake Jeova ilo jar im liki bwe ‘ej bed ibbed’ ilo ien ko jej iion melejoñ kin tõmak eo ar!​—Riit Sam 118:​5-9.

15, 16. Ikijen kõnan eo ar ñõn jibarek erro ko relaplok ilo congregation eo, jar emaroñ jibõñ kij ñõn kile ta?

¹⁵ Jar ñõn Jeova jen juõn buru emol kin unin jej kõmõni men ko emaroñ jibõñ kij ñõn kile unin kõtõbar ko ar. Ñõn wanjoñok, ñe jej lukkun kõnan bõk jerbal in lolorjake congregation eo, men in ej walok ke jen juõn kõnan ejelok jitõbõn in utiej buru ie ñõn jibõñ im kõmõn joñõn wõt ar maroñ ñõn kowõnmanlok men ko an Ailiñ eo? Ak emaroñ ke itok jen juõn kõnan ñõn “iroij ioir”? Men in ejjab aikwij walok ibwiljin armij ro an Jeova. (Riit 3 Jon 9, 10; Luk 22:24-​27.) Ar kwalok buruer ñõn Jeova ilo jar enaj  kalikar elañe kõnan ko ar rebwir im jibõñ kij ñõn kõmõn oktõk mokta jen an naj bin ñõn ar kajimeiki.

¹⁶ Kristian limaro dri belele remaroñ kõnan bwe lõmaro beleir ren bõk jerbal in ministerial servant im bwelen tokelik erom overseer ro, ak elder ro. Sister rein remaroñ jerbal ekkar ñõn kõnan ko air me rar jar kaki jen burueir ilo air kate ir ñõn kwalok joñok ko remõn. Men in elukkun aurõk kinke wãwen air kennan im mwilin baamle eo ej jelet wãwen an congregation eo lemnok kin e.

Jar Ilobwilij ilo Etan ro Jet

17. Etke jekõnan mõkelok iar ñe jej jar iber mõke?

¹⁷ Elõñ ien Jisõs ear kamõkelok ian jen jar ko relap bwe en maroñ jar ñõn Jemen. (Mat. 14:13; Luk 5:​16; 6:​12) Eor iber ejja aikwij in wõt ñõn mõkelok iar ñe jej jar. Ñe jej jar iomin wãwen ko rainemõn, ekkã ar naj kõmõn bebe ko me rej kabuñburuen Jeova im kõmõn bwe jen kajur wõt ilo kabuñ eo ar ñõn e. Bõtab, Jisõs ear bareinwõt jar ilobwilij, im emõn bwe jen etale ewi wãwen jemaroñ kõmõne men in ilo juõn wãwen ekkar.

18. Ta jet ian men ko brother ro rej aikwij kememeji ñe rej jar ilobwilij ilo etan congregation eo?

¹⁸ Ilo kwelok ko ar, eman ro retiljek rej jar ilobwilij ilo etan aolep ro ilo congregation eo. (1 Tim. 2:8) Elikin jar eo, dri tõmak ro jet ilo kwelok eo rej aikwij ba “amen,” melelen “en eindrein.” Bõtab, ñõn air maroñ kõmõne men in, rej aikwij errã kin jar eo. Ilo jar eo Jisõs ear katakin dri kalor ro an kake, kar ejelok jabrewõt men me ear kailbõk ak lõkatipe armij ro. (Luk 11:​2-4) Bareinwõt, ear jab kwalok ilo tibrikin aolep aikwij ko ak abañ ko an kajjojo dri roñjake ro an. Ekkar bwe jen kobaiki men kein ilo jar ko ar mõke im jab ñe jej jar ilobwilij. Im ñe jej jar ilo etan juõn kumi, jej aikwij kejbãrok bwe jen jab kobaik men ko retino ilo jar ko ar.

19. En kar ewi wãwen mwilid ñe jej ber ilo ien eo me juõn ej jar ilobwilij?

¹⁹ Ñe juõn armij ej jar ilobwilij ilo etan congregation eo im ej kitibuj kij, ilo koutiej jej aikwij kwalok ar “mijak Anij.” (1 Pit.2:​17, UBS) Emaroñ or jet men ko emõn ñõn ar kõmõni ilo ien ko im jikin ko rekkar, bõtab ilo ien kwelok ko an Kristian remaroñ jab ekkar. (Ekk. 3:1) Ñõn wanjoñok, jen ba bwe juõn ear kõnan bwe aolep ren jibwe pein dron ilo ien jar. Men in emaroñ kalõkatip ak kamad ro jet, ekoba ro rejjab dri tõmak me rej kobatok iber. Jet dri belele ro remaroñ jibwe pein dron, bõtab elañe rej atbokwõje dron ilobwilij ilo ien jar, ro rej lo ir remaroñ lõkatip. Armij ro jet remaroñ lemnok bwe elaplok an dri  belele rein lemnok kin yokwe eo airro jen airro kwalok koutiej ñõn Jeova. Kin ar lukkun koutiej e, jen “kõmõn men otemjej ñõn aibujuij an Anij” im bõprae ar kõmõni men ko me remaroñ kamad, kailbõk, ak kalõkatip armij ro.​—1 Kor. 10:31, 32; 2 Kor. 6:3.

Jar kin Ta?

20. Ewi wãwen kwomaroñ kemeleleik Dri Rom 8:​26, 27?

²⁰ Jet ien, jemaroñ jaje ta eo jen ba ñe jej jar iber mõke. Paul ear je, “Bwe je jaje ekijkan emõn jen jar; a Jitõb ej akwelap kin kij ilo ñõr ko, je ban konono kaki: Im Eo ej bukot buru ko E jela lemnok an Jitõb.” (Rom. 8:​26, 27) Elõñ jar ko Jeova ear kõmõn bwe ren ber ilo Baibel eo. Ej mõnõnõ in bõk jar kein emwij kakõrmoli einwõt ñe rej jar ko ar mõke im kin men in ej uaki. Anij ejela kin kij im kin melelen men ko me ear kõmõn bwe jitõb eo an en konono kaki ikijen dri jeje Baibel ro. Jeova ej uaki jar ko ar ñe jitõb eo an ej “akwelap,” kin kij. Ak ñe elaplok ar jela kin Nan eo an Anij, men ko jej aikwij jar kaki renaj mõkõjlok air walok ilo lemnok eo ar.

21. Ta eo jenaj etale ilo katak eo tok juõn?

²¹ Einwõt ar kar katak, jar ko ar rej kwalok elõñ men ko kin kij. Ñõn wanjoñok, remaroñ kwalok kin joñõn ar ebake Jeova im ar jela kin Nan eo an. (Jem. 4:8) Ilo katak eo tok juõn, jenaj etali jet jar ko me emwij kar jei ilo Baibel eo. Ilo ar kõmõne men in, ewi wãwen men in enaj jelet ar kebake Anij ilo jar?

Ewi Wãwen Kwonaj Uak?

• Kain lemnok rõt eo ej aikwij or iber ñe jej kebake Jeova ilo jar?

• Etke jej aikwij jar kin ro jeer im jãter ilo tõmak?

• Jar ko ar remaroñ kwalok ta kin kij im kin unin jej kõmõni men ko?

• En kar ewi wãwen mwilid ilo ien eo juõn ej jar ilo etad?

[Kajitõk ko ñan katak]

[Pija eo ilo peij 4]

Kwoj keini ke am nebar im kamolol Jeova?

[Pija eo ilo peij 6]

Ñe jej ber ilo ien eo juõn ej jar ilo etad, ien otemjej mwiliir ej aikwij kalikar bwe jej koutiej Jeova