Kajitõk ko jen Ro Rej Riit

Eor ke kejatrikrik kin jerkakbiji ñõn juõn niñniñ ej mij ilo lojen jinen?

Ñõn ro me rejañin kar luji juõn niñniñ me ear mij ilo lojen jinen, emaroñ bin air melele kin iñjake ko an ro im rar iion wãwen in. Jet jemen im jinen rej lukkun buromõj ñe ej jibuñ niñniñ eo nejiir. Juõn kõra ear mij lojen im luji ajiri ro nejin lailim mokta jen air kar lotak. Tokelik, ear lo an jerammõn kinke ear maroñ or ruo nejin ladrik rejmour. Bõtab, ear jab meloklok kajuju ian niñniñ ro me rar mij. Toõn wot an kar mour, ear jela ewi ridtõn niñniñ eo ear lotaktok im mij im niñniñ ro me rar jibuñ elañe ren kar mour. Dri Kristian ro me rar iion wãwen in, eor ke juõn un ñõn air kejatrikrik bwe niñniñ ro rej jibuñ ak rej lotaktok im mij renaj jerkakbiji?

Uak eo ñõn kajitõk in ej bwe jejjab jela. Baibel eo ejjab kajju kwalok kin jerkakbiji ñõn niñniñ ro me rar lotaktok im mij ak rar joko kin air kar jibuñ. Bõtab, Nan in Anij ej letok nan in kakabilek ko rekkar ñõn kajitõk in im rej menin kainemõn.

Jen etale ruo kajitõk ko rej ekkejel iben dron. Moktata, ekkar ñõn lemnok eo an Jeova, ñãt eo mour eo an juõn armij ej ijjino, ilo ien etta ke ak ilo ien lotak? Kein karuo, ewi wãwen an Jeova watõk niñniñ eo ejañin lotak, juõn armij ejej uan ke ak baj juõn men ejañin erom armij? Nan in kakabilek ko ilo Baibel rej letok uak ko ralikar kin kajitõk kein ruo.

Kien eo Anij ear letok ikijen Moses ear kwalok bwe mour ear ijjino, jab ilo ien lotak, ak moktalok jen ien in. Ilo wãwen it? Ear kwalok bwe an juõn armij mõn juõn niñniñ ejañin lotak ej tellokin bwe en mij. Kien eo ej ba: “Kwo naj nawõnan mour kin mour.” * (Ex. 21:22, 23) Inem, niñniñ eo ej ber iloan lojen jinen ej mour im ej juõn armij. Kin air melele kin mol eo bwe niñniñ eo ejañin lotak ej juõn armij, men in ear kõmõn bwe million dri Kristian ro ren drike mõnit eo kin mõn loje kinke rej kile bwe ej juõn jerawiwi elap nae Anij.

Emol, niñniñ eo ejañin lotak ej juõn mour, bõtab ewi joñõn an Jeova kaurõk mour eo an? Kien eo kar kwalok kake ilõñ ej lukkun kalikar bwe rar aikwij mõne ñõn mij armij eo ear kõmõn bwe niñniñ eo ejañin lotak en mij. Inem ealikar bwe mour eo an niñniñ eo ejañin lotak elap an aurõk iman mejen Anij. Bareinwõt, elõñ eon ko ilo Baibel rej kwalok bwe Jeova ej kalimjek niñniñ eo ejañin lotak einwõt juõn armij ejej uan. Ñõn wanjoñok, Kiñ Devid ear emmakit ilo an ba kin Jeova: “Kw’ar kalibubu iõ ke I ar ber i lojien jinõ. . . . Mejõm r’ar lo enbwiniõ ke e jañin ’mwij kõmõne: ilo buk eo Am ar jeje kake ra ko raõ, ar kõmõnmõni ran im ran ien eo ke ejelok iair.”​—Sam 139:13-​16; Job 31:14, 15.

Jeova ej bareinwõt lo bwe eor karkar ko ejej uair iben niñniñ ro rejañin lotak im bwe remaroñ erom ro rekabel ilo ilju im jeklaj. Ke Rebeka, lio belen Aisak ear bõroro kin bo ro nejin, Jeova ear kanan kin ladrik ro ruo me rej ire iloan lojen ilo an kalikar bwe ear lo karkar ko ibeir me renaj kar jelet juõn jar in armij ilo ien ko tokelik.​—Jen. 25:22, 23; Rom. 9:​10-​13.

Bwebwenato eo kin Jon dri Baptais ej bareinwõt kaitoktoklimo. Buk in gospel eo ej ba: “Im ke Elisabet ej roñ yokyokwe an Meri, niñniñ ej lienen ilo lojien; im Elisabet ej obrõk kin Jitõb Kwojarjar.” (Luk 1:​41) Ilo an kwalok kin wãwen in ear walok, Luk, eo ear juõn taktõ ear kajerbal nan in Grik eo me emaroñ kar jitõñlok ñõn juõn niñniñ ejañin lotak ak juõn niñniñ emwij an lotak. Ear kajerbal ejja nan eo wõt me ej jitõñlok ñõn Jisõs ke ear niñniñ im ej babu ilo menjer eo.​—Luk 2:​12, 16; 18:15.

 Jen ar etale wãwen kein im eon kein, Baibel eo ej ke kwalok oktõk eo ikõtan juõn niñniñ iloan lojen jinen im eo ear lotaktok im emmenono? Ejjab. Men in ej errã iben katak ko an science ilo ran kein. Ñõn wanjoñok, emwij an dri etale ro katak im loe bwe meñe niñniñ eo ej ber iloan lojen jinen emaroñ iñjake men ko rej walok ibelakin. Kin men in, ejjab menin bwilõñ ñe juõn jinen ej ejaake juõn kõtan ebak iben niñniñ eo ej edreklok iloan lojen.

Ien lotak an kajuju niñniñ ej wawa ion wãwen eo niñniñ ro rej edreklok iloan lojen jineir. Lale wanjoñok in: Juõn kõra ej keutak juõn niñniñ me ejjab uñ an aliñ im jejjo ran tokelik emij niñniñ eo. Bar juõn kõra ej bõroro iomin druatimjuõn aliñ bõtab niñniñ eo nejin ej mij mokta wõt jen an lotak. Kõra eo jinoin eor ke an kejatrikrik bwe niñniñ eo nejin enaj jerkakbiji kin wõt an kar lotaktok im mour jidrik ien meñe ear jab uñ an aliñ, bõtab kõra eo kein karuo ejelok an kejatrikrik rot in?

Kin men in, ñõn kwalok ilo tukaru, Baibel eo ej katakin bwe mour ej ijjino ilo ien etta im Jeova ej watõk niñniñ eo ejañin lotak einwõt juõn armij ejej uan im eaurõk. Kin melele kein remol jen Baibel, jet remaroñ lemnok bwe enaj idaptõk iben Baibel ñõn ba bwe ejelok an niñniñ eo ear mij iloan lojen jinen kejatrikrik kin jerkakbiji. Ilo mol, remaroñ bõk mantak kajitõk ko im ba bwe elañe ejelok an niñniñ eo ear mij kejatrikrik, inem melele in ej nae tõmak eo ar kin jab mõn loje me ej berber ion ejja melele ko wõt ilo Baibel eo.

Ilo ien ko remotlok, kar bõkmantak jet kajitõk ko rekeie ilo Imõniaroñroñ ko ilo kajin Belle me rej kwalok air berre bwe ajiri ro rej jibuñ emaroñ or air kejatrikrik kin jerkakbiji. Ñõn wanjoñok kar bõkmantak kajitõk in, Anij enaj kar ke likiti juõn niñniñ ej kab jino ejaak iloan lojen juõn kõra ilo Paredais? Bõtab, ke Kumi eo ej Tel rolul eo an Dri Kennan ro an Jeova ej wõnmanlok wõt ilo air katak, kalomõnlokjen im jar, rar bebe bwe lemnok rot kein rejjab ekkejel iben kejatdrikdrik eo kin jerkakbiji. Jisõs ear ba: “Anij ej maroñ kin men otemjej.” (Mark 10:27) Nan kein rar jejit kitieir iben Jisõs ke kar bõk mour eo an jen lõñ im likiti ilo lojen juõn virjin, juõn men me ekkar ñõn lemnok eo an armij ejjab maroñ walok.

Inem, ej melelen ke bwe Baibel eo ej katakin bwe niñniñ ro rar mij mokta jen air lotak renaj jerkakbiji? Jej aikwij lukkun kalikar bwe Baibel eo ejjab kwalok uak eo ñõn kajitõk in. Kin men in ejelok unin an armij akwelap im ba bwe niñniñ ro renaj jerkakbiji. Katak in emaroñ bõkmantak elõñ kain kajitõk ko. Inem jej aikwij bõprae ar kajidede. Men eo wõt jejela ej bwe wãwen in ej ber ilo loberin pein Jeova Anij, eo eobrõk kin joij im tiriamo. (Sam 86:15) Ejelok berre bwe ej kõnan eo an ñõn ukot jorran ko rar waloktok jen mij ikijen jerkakbiji. (Job 14:14, 15) Jemaroñ liki bwe ien otemjej ej kõmõni men ko rejime. Enaj jolok men ko otemjej rej kõmetak kij me jej iioni ilo jukjuk im ber in enana ñe ej tel Nejin ilo yokwe bwe “en kokkure jerbal ko an devil.”​—1 Jon 3:8.

[Kamelele ko itulal]

[Pija eo ilo peij 13]

Jeova enaj jolok men ko otemjej rej kõmetak kij