• Juon eo ej kããlõt in Anij. “Ñaij kairooj aõ Irooj . . . Inaaj lewaj ri-aelõñ ko ñan eok bwe ren am̦ jolõt, im ijoko rettol̦o̦ktata ilal̦ bwe ren am̦.”​—Sam 2:6, 8.

• Ri-Jolõt an Kiiñ Devid. “Ñan kõj el̦otak juon l̦addik, ñan kõj em̦õj letok juon nejid em̦m̦aan . . . Enaaj ejjel̦o̦k jem̦l̦o̦kin orl̦o̦kin menin irooj eo an im ineem̦m̦an, ioon tũroon eo an Devid, im ioon men in kiiñ eo an bwe en kapene.”​—Aiseia 9:6, 7.

• L̦otak ilo Betleem. “Betleem . . . , jãn kwe enaaj itok ñan Eõ eo enaaj Irooj . . . An utiej enaaj tõpar jem̦l̦o̦kin lal̦.”​—Maika 5:2, 4.

• Juon eo renaaj kõjekdo̦o̦ne im m̦ane. Kar “kõjekdo̦o̦ne . . . im kõj jaar jab kaorõke . . . Em̦õj wãkare e kõn jerawiwi ko ad, im kakinejneje kõn bõd ko ad.”​—Aiseia 53:3, 5.

• Jerkak jãn mej im bõk an aiboojoj. “Kwõjãmin likũt aõ ilo Sheol [“Lõb,” NW]; im kwõjãmin likũt eo Am̦ bwe en lo kõt. . . . Ianmoon̦ũm̦ men ko men in m̦õn̦õn̦õ ñan indeeo.”​—Sam 16:10, 11.

Ilo aolep bwebwenatoon armej, juon wõt armej ekkar ñan an Tõl, im armej in ej Jesus Christ. Ilo m̦ool, juon enjel̦ ear ba ñan Meri, jinen Jesus: “Anij enaaj lel̦o̦k ñane tũroon eo an Devid, eo jemãn, . . . im Aelõñ eo an ejjãmin jako.”​—Luk 1:31-33.

Jesus ejjañin kar juon eo ej ri-tõl ilo lal̦ in. Bõtab, enaaj tõl armej ro jãn lañ ãinwõt juon eo ej Kiiñ in Aelõñ eo an Anij. Ta eo ej kõm̦m̦an bwe en juon ri-Tõl eo ejejjet im ekkar? L̦õmn̦ak kõn ta ko Jesus ear kõm̦m̦ani ke ear pãd ioon lal̦ in.

•   Jesus ear kea kõn armej. Jesus ear jipañ em̦m̦aan im kõrã ro, ro reddik im ro rerũtto, jekdo̦o̦n wõn er kab kain baam̦le rot eo rej itok jãne ak joñan jel̦ãl̦o̦kjen̦ ko ippãer. (Matu 9:36; Mark 10:16) Ke juon ri-lõba ear akwel̦ap ñane im ba: “El̦aññe kokõn̦aan, kwõmaroñ kõm̦m̦an bwe in erreo,” Jesus ear em̦m̦akũt kõn an tũriam̦o kake im ear kõmouri jãn nañinmej eo an.​—Mark 1:40-42.

• Jesus ear katakin kõj wãween ñan kabuñbũruon Anij. Ear ba: “Kom̦ij jab maroñ karejar ñan Anij im ilo ejja iien eo wõt karejar ñan M̦weiuk.” Ear bar ba bwe jej aikuj kõm̦m̦an ñan ro jet ilo wãween eo jekõn̦aan bwe ro jet ren bar kõm̦m̦an ñan kõj—juon naanin kakapilõklõk me el̦ap an aorõk. Bareinwõt ear kwal̦o̦k bwe Anij ej itoklimo, ejjab kõn men ko wõt jej kõm̦m̦ani bõtab bar wãween ad l̦õmn̦ak im eñjake. Innem ñan kabuñbũruon Anij, jej aikuj kõjparok im lale ta ko ilo bũruod. (Matu 5:28; 6:24; 7:12) Jesus ear kaalikkar ñan kõj bwe jen lo m̦õn̦õn̦õ eo em̦ool, jej aikuj katak kõn ta eo Anij ekõn̦aan bwe jen kõm̦m̦ane innem jen kõm̦m̦ane.​—Luk 11:28.

• Jesus ear katakin ta mel̦el̦ein ñan yokwe ro jet. Naan im kõm̦m̦an ko an Jesus rar l̦ap aer kajoor im rar tõpar bũruon ro rej roñjake e. “Ear l̦ap an jarlepju eo bwilõñ kõn wãween an katakin er, kõnke ear katakin er ãinwõt juon eo ewõr maroñ ippãn.” (Matu 7:28, 29) Ear katakin er im ba: “Yokwe ro rej kõjdate kom̦.” Ear bareinwõt jar kõn jet iaan ro me rar kõm̦m̦an bwe en mej, im ear ba: “Jema, kwõn jol̦o̦k aer bõd kõnke rejaje ta eo rej kõm̦m̦ane.”​—Matu 5:44; Luk 23:34.

Jesus ej juon eo elukkuun jejjet im ekkar ñan Tõl lal̦ in kõnke el̦ap an jouj im ejel̦ã jipañ armej. Bõtab ñããt eo enaaj jino tõl?