EL̦AÑÑE kwe juon eo em̦õj an kar mej juon eo ejitõnbõro ippam̦, ejjel̦o̦k pere bwe kwõmaroñ kar bõk jet iaan eñjake kein: bõlen kwaar eñjake am̦ bũrom̦õj im tokãlik kwaar bõk eñjake eo bwe kwõmake iaam̦ im bwe ejjel̦o̦k am̦ maroñ ñan kõm̦m̦an jabdewõt. Im bõlen kwõmaroñ kar bar illu, nana am̦ mour, im mijak. Im bõlen kwõmaroñ kar bar kõl̦mãnl̦o̦kjen̦ el̦aññe ewõr tokjãn ñan mour.

Jouj im keememej bwe bũrom̦õj ejjab juon kõkal̦l̦en m̦õjn̦o̦. An juon bũrom̦õj ej kaalikkar joñan an l̦ap an yokwe eo ejitõnbõro ippãn. Ijoke, juon eo elukkuun bũrom̦õj emaroñ ke lo aenõm̦m̦an?

Meñe kwõmaroñ l̦õmn̦ak bwe eban jem̦l̦o̦k am̦ metak im bũrom̦õj, ak kwõmaroñ lo an naanin kakapilõklõk kein tok ilal̦ kaenõm̦m̦an eok:

JAB DÃPIJ AM̦ BŨROM̦ÕJ

Eokkõtaktak wãween an aolep armej bũrom̦õj jãn doon im eokkõtaktak joñan aetokan aer bũrom̦õj. Meñe ãindein, ak an juon jañ emaroñ lukkuun jipañe ñan kadikl̦o̦k an eddo bũruon. Vanessa, eo me kar kwal̦o̦k naan ko an ilo jinoin, ej ba: “Men eo ekkã aõ kõm̦m̦ane ej jañ wõt, kõnke iaikuj kadiwõjl̦o̦k aõ bũrom̦õj bwe en jako aõ metak.” Sofía, eo me ledik eo jatin ear jidimkij an mej ej ba: “Ñan kwal̦o̦k l̦õmn̦ak e aõ kab bũruõ ej juon men el̦ap an kõmmetak ippa, ej ãinwõt ñe kwõj kõpel̦l̦o̦k mejãn juon kinej im karreoik jorrããn eo. Joñan an kõmmetak, kwõbane an metak, bõtab jidik kõn jidik ej kõm̦m̦an bwe en mol̦o̦k kinej eo.”

KWAL̦O̦K L̦ÕMN̦AK IM EÑJAKE KO AM̦

Ejjel̦o̦k pere bwe ewõr iien kwõmaroñ kõn̦aan make iaam̦. Ijoke, bũrom̦õj ej juon men eddo ak epen ñan make  kake. Jared, juon eo me 17 an iiõ im ear mej jemãn, ej ba: “Ekkã aõ kõnnaan kõn eñjake ko aõ ñan ro jet. Ijel̦ã ke remaroñ jab mel̦el̦e ta ko ij kõnnaan kaki, ak em̦m̦an bwe ikar maroñ kwal̦o̦k bũruõ.” Janice, eo me kar kwal̦o̦k naan ko an ilo katak eo ilo jinoin bok in, ej kwal̦o̦k bar juon un unin an em̦m̦an ñan kwal̦o̦k kõn eñjake eo am̦, ej ba: “Kõnono ippãn ro jet el̦ap an kar kaenõm̦m̦an eõ. Iar bõk eñjake eo bwe remel̦el̦e, im ikar jab eñjake aõ make iaõ.”

M̦ÕN̦ÕN̦Õ IN BÕK JIPAÑ

Juon taktõ ej ba: “Ro me rej bũrom̦õj im rej kõtl̦o̦k an ro m̦õttaer kab ro nukwier jipañ er ilo tõre ko jinoin ãlikin wõt an jako ro rejitõnbõro ippãer, ekkã an pidodo aer kijenmej im dikl̦o̦k aer bũrom̦õj.” Em̦m̦an ñe kwõj kwal̦o̦k ñan ro m̦õttam̦ ta ko remaroñ kõm̦m̦ani ñan jipañ, ekkã an rein kõn̦aan jipañ ak remaroñ jaje ren ita.​—Jabõn Kõnnaan 17:17.

KWÕN KEPAAKEL̦O̦K ANIJ

Tina ej ba: “Ke ear mej l̦eo ippa jãn nañinmej in kããnjer, kiiõ iar jab bar maroñ kwal̦o̦k bũruõ im l̦õmn̦ak ko aõ ñane. Kõn men in, ekkã wõt aõ kwal̦o̦k bũruõ ñan Anij kõn aolep men! Kajjojo raan ij rujlo̦k im kajjitõk ippãn bwe en jipañ eõ ilo aolepen raan eo. Elukkuun lõñ wãween ko Anij ear jipañ eõ ie, joñan ijjab maroñ kwal̦o̦k aolepeer.” Tarsha, eo me kar 22 an iiõ ke jinen ear mej ej ba: “Men eo el̦ap an kar jipañ eõ kajjojo raan ej riit Baibõl̦. Ñe ij riit, ekkã aõ lo juon boin ekõketak im ekõm̦m̦an bwe in kõl̦mãnl̦o̦kjen̦ kake.”

KWÕN PIJAIKL̦O̦K IIEN JERKAKPEJE EO

Tina ej wõnm̦aanl̦o̦k im ba: “Ilo jinoin, kõjatdikdik eo kõn jerkakpeje ear jab kaenõm̦m̦an eõ kõnke ilo tõre eo, iar aikuji l̦eo ippa im l̦adik ro nejũ rar aikuji jemãer. Ak kiiõ, emãn iiõ tokãlik, el̦ap aõ l̦õmn̦ak kõn kõjatdikdik in. Ej juon men ejipañ eõ ñan kijenmej. Ñe ij pijaikl̦o̦k aõ naaj bar loe, men in ekõm̦m̦an bwe in aenõm̦m̦an im m̦õn̦õn̦õ!”

Emaroñ jab m̦õkaj an jako am̦ bũrom̦õj, meñe ãindein ak bwebwenato eo an Vanessa emaroñ jipañ eok. Vanessa ear ba naan kein: “Kwõmaroñ l̦õmn̦ak bwe eban jako am̦ bũrom̦õj, ak jidik kõn jidik enaaj em̦m̦anl̦o̦k.”

Keememej bwe meñe emaroñ jab jako eñjake in bũrom̦õj eo itulowa ak ewõr tokjãn am̦ wõnm̦aanl̦o̦k wõt im mour. Ikijjeen jipañ eo jãn Anij, kwõmaroñ lo wõt m̦õn̦õn̦õ ilo am̦ jem̦jerãik ro jet im kwõmaroñ bõk juon mour eo ekam̦õn̦õn̦õ. M̦õttan wõt jidik Anij enaaj kõmour ro rar mej. Anij ekõn̦aan bwe kwõn bar maroñ in atbo̦kwõj ro rejitõnbõro ippam̦. Innem, metak eo ilo bũruom̦ enaaj jako ñan indeeo!