MEN IN EJ JUON JERAAM̦M̦AN EKABWILÕÑLÕÑ! Em̦õj an Rũkõm̦anm̦an eo kallim̦ur bwe enaaj letok ñan kõj mour indeeo, ijin ioon lal̦. Bõtab, elõñ armej epen aer tõmake men in. Rej ba: ‘Jem̦l̦o̦kin juon armej ej mej.’ Im rej bar ba bwe ‘ãindein mour, jej l̦otak, rũttol̦o̦k, im mej.’ Ro jet rej l̦õmn̦ak bwe jemaroñ mour indeeo, bõtab ejjab ijin ioon lal̦. Rej ba bwe jemaroñ bõk wõt mour indeeo ãlikin ad mej im wanlõñl̦o̦k ñan lañ. Ak kwe, ta l̦õmn̦ak eo am̦?

Eokwe m̦okta jãn am̦ uwaake kajjitõk in, em̦m̦an kwõn etale uwaak ko jãn Baibõl̦ ñan kajjitõk kein jilu: Ke Anij ear kõm̦anm̦an kõj, ewi aetokan an kar kõn̦aan bwe jen mour? Kar ta karõk eo an Anij jãn jinoin ke ear kõm̦anm̦an lal̦ in im armej ro? Ta eo bwe mej en kar wal̦o̦k im jelõt aolep armej?

Iaan aolep menin kõm̦anm̦an ko an Anij ioon lal̦ in, armej ro rej make wõt im oktaktata. Ewi wãween? Baibõl̦ ej kwal̦o̦k bwe armej ro wõt, Anij ear kõm̦anm̦ane er ilo nemãmeen im “ilo wãween wõt E.” (Jenesis 1:26, 27) Ta mel̦el̦ein men in? Ej mel̦el̦ein bwe Anij ear kõm̦anm̦an armej bwe ren maroñ kwal̦o̦k wãween ko ippãn ãinwõt yokwe im ekajet jim̦we.

Bareinwõt, ear lel̦o̦k ñan er kapeel im maroñ ñan kõl̦mãnl̦o̦kjen̦. Anij ear bar lel̦o̦k maroñ eo ñan jel̦ã ta eo em̦m̦an im ta eo enana, im kõn̦aan eo ñan jel̦ã kõn e im ejaake juon jem̦jerã ippãn. Eñin unin em̦m̦an ippãd ñe jej lo an aiboojoj iju ko ilañ im menin kõm̦anm̦an ko jet, im jej m̦õn̦õn̦õ ñe jej lo jiña ko, roñjake ainikien al im kõjañjañ ko, im riiti naan ko raiboojoj me rej kõm̦akũt bũruod. Ilõñin men otemjej, armej ro wõt ewõr aer maroñ ñan kabuñ ñan Rũkõm̦anm̦an eo. Wãween kein rej kõm̦m̦an bwe armej ren lukkuun oktak jãn aolep menin kõm̦anm̦an ko jet an Anij ioon lal̦ in.

Kõn men in, l̦õmn̦ak m̦õk kõn kajjitõk in: El̦aññe Anij ear kõn̦aan bwe armej ren mour ium̦win jidik wõt iien, en ke kar likũt kadkad kein ippãer im lel̦o̦k maroñ eo ñan aer kwal̦o̦ki im kal̦apl̦o̦k aer kõm̦m̦ani? Alikkar eban kar. Ilo m̦ool, Anij ear lel̦o̦k kadkad kein rem̦m̦an im maroñ kein ñan er bwe ren maroñ m̦õn̦õn̦õ im mour ioon lal̦ in ñan indeeo.

Bõtab, jet remaroñ l̦õmn̦ak bwe ekar jab bũl̦ããn im karõk eo an Anij in bwe jen mour ñan indeeo ioon lal̦ in. Rej ba ear kõm̦anm̦an lal̦ in bwe jen jokwe ie ium̦win jidik wõt iien im bwe ej juon jikin ñan mãlejjoñe armej ro wõn iaaer emaroñ etal ñan lañ im mour indeeo ie ippãn Anij. Ak el̦aññe en kar m̦ool men in, innem ej ãinwõt ñe rej n̦aruon Anij im  ba bwe E eo ej kõm̦m̦ani men ko renana ilo lal̦ in. Eokwe, l̦õmn̦ak in ej jum̦ae men eo Baibõl̦ ej ba kõn Anij. Baibõl̦ ej ba: “An jerbal eweeppãn; bwe ial̦ ko An otemjej rewãnõk. Juon Anij in tiljek im ejjel̦o̦k nana Ippãn, Ewãnõk im jim̦we wõt.”​—Duteronomi 32:4.

Baibõl̦ ej lukkuun kaalikkar karõk eo an Anij jãn jinoin kõn lal̦ in ilo naan kein: “Lañ ko rej lañ ko an Jeova, a lal̦ Ear letok ñan ro nejin armej.” (Sam 115:16) Kõn men in, Anij ear kõm̦anm̦an lal̦ in bwe en juon jikin kallib eaiboojoj im letok bwe en jikin armej ñan indeeo. Im ear koobrake kõn aolep men ko jej aikuji ñan ad mour im m̦õn̦õn̦õ ioon ñan indeeo.​—Jenesis 2:8, 9.

“Lañ ko rej lañ ko an Jeova, a lal̦ Ear letok ñan ro nejin armej.”​—Sam 115:16

Baibõl̦ ej bar lukkuun kaalikkar karõk eo Anij ñan kar armej ro. Ear jiroñ rippãlele ro ruo m̦oktata im ba bwe ren ‘koobrak lal̦, im kajoor jãne; im ren irooj ioon men otemjej rej mour im m̦akũtkũt ioon lal̦.’ (Jenesis 1:28) Ej baj kar em̦m̦an jerbal in aer ñan lale im kõm̦m̦an bwe aolepen lal̦ in en juon Pedetaij! Alikkar bwe jeraam̦m̦an eo ear kõttare Adam im Iv im ro nejierro tokãlik, ej mour indeeo ioon lal̦ in, ejjab ñan mour indeeo ilañ.

Innem etke jej mej? Baibõl̦ ej kwal̦o̦k bwe juon iaan enjel̦ ro nejin Anij ear kajjioñ ko̦kkure bũl̦ããn im karõk eo an Anij ilo jikin kallib Iden. Enjel̦ in ear oktak im erom Setan Tepil̦ eo. Ewi wãween an kar jum̦ae?

Setan ear kapoik ro jemãd im jined jinointata, Adam im Iv, bwe ren kobal̦o̦k ippãn im jum̦ae Anij. Ke Setan ear ba bwe Anij ej dãpiji men ko rem̦m̦an jãn erro, ãinwõt maroñ eo ñan make kããlõt ta eo ejim̦we im ta eo ebõd, rar roñjake Setan im oktak im jum̦ae Anij. Innem ta eo ear wal̦o̦k? Eokwe tokãlik rar mej ãinwõt an kar Anij kakkõl erro bwe renaaj mej el̦aññe rejjab pokake. Rar luuji jeraam̦m̦an eo ñan mour indeeo ilo Pedetaij eo ijin ioon lal̦.​—Jenesis 2:17; 3:1-6; 5:5.

Kõn an kar Adam im Iv jab pokake, men in ear jelõt aolep ro nejierro jãn tõre eo tok ñan raan kein ad. Naanin Anij ej ba: “Kõn juon armej [Adam], jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.” (Rom 5:12) Jej mej kõnke ro jined im jemãd jinointata rar letok jerawiwi im mej ñan kõj. Ejjab unin ad mej ej kõnke eñin kar karõk im bũl̦ããn eo an Anij ñan kõj me ejjel̦o̦k juon emel̦el̦e kake.

Jum̦ae eo ear wal̦o̦k ilo jikin kallib Iden ear jab ukot karõk eo an Anij jãn jinoin kõn lal̦ in im armej ro. Yokwe eo eweeppãn an Anij im an ekajet jim̦we rar kõm̦akũt e ñan kõm̦m̦an ial̦an ad anemkwõj jãn jerawiwi im mej. Rijjilõk Paul ear ba: “Bwe on̦ããn jerawiwi, mej; a menin jouj an Anij, mour indeeo ilo Christ Jesus ad Irooj.” (Rom 6:23) Kõn an Anij yokwe kõj, ear “letok Nejin eo ej make wõt [Jesus Christ], bwe jabdewõt eo ej tõmak ilo e en jab jako, ak en mour indeeo.” (Jon 3:16, UBS) Ilo an kar Jesus m̦õn̦õn̦õ in ajel̦o̦k mour eo an ãinwõt juon menin katok, ear kõl̦l̦ãik on̦ããn im kõjepl̦aaktok aolep jeraam̦m̦an ko Adam ear luuji. a​—Lale kõmel̦el̦e eo itulal̦.

M̦õttan jidik, kallim̦ur eo an Anij bwe aolepen lal̦ in en juon pedetaij enaaj jejjet im m̦ool. Ilju im jekl̦aj in ekanooj aiboojoj emaroñ am̦, el̦aññe kwõnaaj pokake naan kein an Jesus ke ear ba: “Kom̦win del̦o̦ñ ilowaan kõjãm eaidik; bwe edepakpak kõjãm, im el̦ap ial̦ eo ej tõll̦o̦k ñan mej, im elõñ ro rej del̦o̦ñ ie; Bwe erãniñ kõjãm, im eaidik ial̦ eo ej tõll̦o̦k ñan mour, im eiiet ro rej loe.” (Matu 7:13, 14) Kõn men in, ilju im jekl̦aj eo am̦ ej pedped wõt ioon kããlõt eo am̦. Ial̦ ta eo kwõnaaj kããlõte?