EWÕR KE AM̦ MAROÑ ÑAN MAKE KÃÃLÕT TA NAAJ ILJU IM JEKL̦AJ EO AM̦? Jet armej rej tõmak bwe em̦õj an Anij karõk kadede ta eo enaaj wal̦o̦k ñan mour ko aer. Kõn men in, ejjel̦o̦k aer maroñ ñan make kããlõt ilju im jekl̦aj eo aer. Ñe ejjab tõprak kõttõpar ko aer, rejjab lukkuun inepata kõnke rej l̦õmn̦ak bwe ejjel̦o̦k men en̦ remaroñ kõm̦m̦ane. Ekkã aer ba: “Bõlen ejjab ekkar ñan karõk eo an!”

Bõtab, jet rej ebbeer ñe rej lo bwe ejjel̦o̦k ial̦an aer rõl̦o̦k jãn wãween ko renana ilo lal̦ in jej mour ie. Rej kate er ñan jibadek juon ilju im jekl̦aj bwe en em̦m̦anl̦o̦k mour ko aer, bõtab enañin aolep iien ej wal̦o̦k tarin̦ae, kowadoñ, jorrããn ko rel̦l̦ap, im nañinmej. Innem kõn an men kein renana wal̦o̦k im ko̦kkure bũl̦ããn ko aer, rej ba ippãer make: ‘Ewõr ke unin ad kate kõj?’

Em̦ool bwe wãween ko rej wal̦o̦k remaroñ lukkuun l̦ap aer jelõt bũl̦ããn ko ad kõn ilju im jekl̦aj. (Jemes 4:13, 14) Bõtab, ewõr am̦ maroñ ñan make kããlõt ilju im jekl̦aj eo am̦ me ej ñan indeeo. Ilo m̦ool, Baibõl̦ ej kwal̦o̦k bwe ilju im jekl̦aj eo am̦ ej pedped wõt ioon kããlõt eo am̦. Jen lale ta eo Baibõl̦ ej ba kõn men in.

Moses, eo ear tõl aelõñin Israel, ear kõnono ikijjeen Jeova ñan armej ro me rar pojak in del̦o̦ñe Ãneen Kallim̦ur eo: “Kiiõ ij lewaj bwe kom̦win kããlõt ikõtaan mour im mej, ikõtaan jeraam̦m̦an im jerata, . . . Kom̦win kããlõt mour. Kom̦win yokwe [Jeova] ami Anij, im pokake e im tiljek ñane.”​—Duteronomi 30:15, 19, 20, UBS.

“Kiiõ ij lewaj bwe kom̦win kããlõt ikõtaan mour im mej, ikõtaan jeraam̦m̦an im jerata, . . . Kom̦win kããlõt mour.”​—Duteronomi 30:19, UBS

Jejel̦ã bwe m̦oktal̦o̦k Anij ear lo̦mo̦o̦ren RiIsrael ro jãn aer kõm̦akoko ilo Ijipt, bõtab kiiõ ear likũt juon jeraam̦m̦an im̦aaer ñan del̦o̦ñe Ãneen Kallim̦ur eo me renaaj lo m̦õn̦õn̦õ ie im anemkwõj jãn aer eñtaan. Bõtab, jeraam̦m̦an kein rar jab kajju wal̦o̦k ñan er. Ñan bõk jeraam̦m̦an kein, rar aikuj “kããlõt mour.” Ewi wãween? Ikijjeen aer ‘yokwe Jeova aer Anij, pokake e, im tiljek ñane.’

Rainin, em̦õj lewaj ejja kããlõt in wõt ñan kwe, im wãween am̦ kããlõt enaaj jelõt ilju im jekl̦aj eo am̦. Ilo am̦ kããlõt ñan yokwe Anij, pokake e, im tiljek ñane, ej ãinwõt ñe kwõj kããlõt mour, eo ej jitõñl̦o̦k ñan mour indeeo ilo pedetaij ijin ioon lal̦. Ak ta eo enaaj jipañ eok ñan kõm̦m̦ani men kein jilu?

Yokwe ej kadkad eo el̦aptata kadkadin Anij. Rijjilõk Jon ear je im ba: “Anij yokwe.” (1 Jon 4:8) Eñin unin ke juon armej ear kajjitõk ippãn Jesus ta kien eo el̦aptata, ear uwaak im ba: “Kwõn yokwe Irooj am̦ Anij kõn aolepen bũruom̦ im kõn aolepen am̦, im kõn am̦ l̦õmn̦ak otemjej.” (Matu 22:37) Kõn men in, ad ejaake juon jem̦jerã ippãn Anij ej aikuj pedped ioon yokwe, im ejjab kõnke jej kor im mijake im jej baj pokake wõt e. Etke eaorõk bwe jen kããlõt ñan yokwe e?

Yokwe eo an Jeova ñan armej otemjej ej ãinwõt yokwe eo an rũtto ro ñan ajri ro nejier. Meñe ro jemãn im jinen ajri ro rejjab weeppãn im rej kõm̦m̦an bõd, ak rej katakin, rõjañ, jipañ, im kajim̦we ro nejier kõnke rekõn̦aan bwe ren m̦õn̦õn̦õ im lo jeraam̦m̦an ilo mour ko aer. Bõtab, ta eo rekõn̦aan bwe ajri ro nejier ren kõm̦m̦ane? Eokwe, rekõn̦aan bwe ajri ro nejier ren yokwe er im likũt ilo bũrueer katak ko rar katakin er kaki kõnke renaaj jipañ er. Ejja ãindein wõt bar eñjake eo an Jemãdwõj ilañ.  Ekõn̦aan bwe jen bar kwal̦o̦k ad kam̦m̦oolol e kõn aolep men ko rem̦m̦an ear kõm̦m̦ani ñan kõj.

Ilo Baibõl̦, naan kein “pokake” im “roñjake” ekkã aer juon wõt mel̦el̦eir. Ñan waanjoñak, ñe jej ba ñan juon ajri bwe en “roñjake jinen im jemãn,” jej ba ñane bwe en pokake er. Kõn men in, an juon roñjake Anij ej mel̦el̦ein bwe ej aikuj katak im pokake men ko ej ba. Kõnke jejjab maroñ lukkuun roñ ainikien Anij, wãween eo jej roñjake e ej ilo ad riiti im pokake men ko ej ba ilo Baibõl̦.​—1 Jon 5:3.

Jesus ear kwal̦o̦k aorõkin ad aikuj pokake naan ko an Anij ke ear ba: “Armej ejãmin mour kõn pilawã wõt, a kõn naan otemjej rej wal̦o̦ktok jãn lo̦ñiin Anij.” (Matu 4:4) Jejel̦ã bwe elukkuun aorõk m̦õñã ñan kõj. Eokwe, ejjel̦o̦k oktak jãn ad katak Naanin Anij im bõk jel̦ãl̦o̦kjen̦ eo kõn E. Bõtab, men in el̦apl̦o̦k an aorõk. Etke? Kõnke rũmmãlõtlõt eo, Kiiñ Solomon, ear ba: “Mãlõtlõt e juon menin kouk, ãinwõt m̦ani ej kõm̦m̦an bwe kwõn jab aikuj; a tokjãn jel̦ãl̦o̦kjen̦, eñin, mãlõtlõt ej lo̦mo̦o̦ren eo ej pãd ippãn.” (Ekklisiastis 7:12) Jel̦ãl̦o̦kjen̦ im mãlõtlõt eo jãn Anij enaaj kõjparok kõj rainin im jipañ kõj ñan kõm̦m̦ani pepe ko rejim̦we me renaaj tõll̦o̦k kõj ñan ad bõk mour indeeo ilju im jekl̦aj.

Keememej waanjoñak eo an Jesus ilo kar katak eo l̦o̦k ke ear ba: “Bwe erãniñ kõjãm, im eaidik ial̦ eo ej tõll̦o̦k ñan mour, im eiiet ro rej loe.” (Matu 7:13, 14) Ñan etetal ilo ial̦ rot in eaidik, jej aikuj pãdwõt iturin im l̦oore armej eo ejineete ial̦ in bwe en jipañ kõj ñan tõpar ijo jej kõttõparl̦o̦k, ej mour indeeo. Innem, ewõr unin ad aikuj pãd epaake wõt Anij. (Sam 16:8) Ak ewi wãween ad kõm̦m̦ane men in?

Aolep raan, elõñ men ko jej aikuj kõm̦m̦ani im ebar lõñ men ko jekõn̦aan kõm̦m̦ani. Joñan ad poub im m̦ad kõn men kein, remaroñ kõm̦m̦an bwe en dik ad iien ak ejjel̦o̦k ad iien ñan jidik ñan l̦õmn̦ak kõn men ko Anij ekõn̦aan bwe jen kõm̦m̦ani. Eñin unin Baibõl̦ ej kakeememej kõj im ba: “Kom̦win kanooj lale wãween ami mour. Kom̦win jab mour ãinwõt armej rejajel̦o̦kjen̦, ak kom̦win mour ãinwõt armej rejel̦ãl̦o̦kjen̦. Kom̦win kõjparok iien ko rem̦m̦an otemjej kom̦ij loi, kõnke raan kein rej raan ko renana.” (Epesõs 5:15, 16, UBS) Jej pãd epaake wõt Anij ikijjeen ad likũt bwe jem̦jerã eo ad ippãn en men eo eaorõktata ilo mour eo ad.​—Matu 6:33.

Meñe ejjel̦o̦k am̦ maroñ ñan bar ro̦o̦llikl̦o̦k im kakõm̦anm̦anl̦o̦k men ko kwaar kõm̦m̦ani m̦okta, ak ewõr am̦ maroñ ñan kããlõt ilju im jekl̦aj eo am̦ im an baam̦le eo am̦. Baibõl̦ ej kwal̦o̦k bwe Jemãdwõj ilañ, Jeova Anij, el̦ap an yokwe kõj im ej kwal̦o̦k ta eo ekõn̦aan loe ad kõm̦m̦ane. Ej alikkar men in ilo naan ko an rũkanaan Maika ke ear ba:

“Em̦õj an Irooj jiroñ kõj ta ko rem̦m̦an. Erkein men ko ekõn̦aan jãn kõj: Kõm̦m̦ani men ko rejim̦we, kwal̦o̦k yokwe iien otemjej, im mour ilo ettã bõro im̦aan mejãn ad Anij!”​—Maika 6:8, UBS.

Kwõnaaj ke roñjake naanin kũr in an Jeova ñan etetal ippãn im bõk jeraam̦m̦an ko ej kallim̦ur bwe enaaj lel̦o̦k ñan ro rej pokake e? Eokwe kããlõt eo ej am̦!