Enañin aolep armej rej errã bwe ewõr jet kõm̦m̦an ko me alikkar bwe relukkuun jim̦we im relukkuun bõd. Ñan waanjoñak, elõñ armej redike uror, an juon ko̦kkure juon armej (rape), im an juon kõm̦m̦ani m̦anit ko rettoon ñan juon ajri. Ijoke, ewõr men ko rem̦m̦an ippãn armej ãinwõt ñe ro jet rej jouj, tũriam̦o, im rejjab kalijekl̦o̦k ilo aer kõm̦m̦an ñan ro jet. Bõtab ewõr men ko jet elõñ armej rej l̦õmn̦ak bwe ejjel̦o̦k bõd ak jim̦we ie—ãinwõt ad kããlõt wõn ro jej babu ippãer, el̦aññe jenaaj kwal̦o̦k m̦ool ak jaab, ak kilen ad katakin im lale ajri ro nejid. Rej l̦õmn̦ak bwe ejjel̦o̦k bõd ilo jabdewõt pepe rej kããlõt. Ekkã an armej kõm̦m̦ani pepe ko ekkar ñan l̦õmn̦ak ko aer im wãween an ro jet ipel̦aakier l̦õmn̦ak. Ejim̦we ke l̦õmn̦ak kein?

Ekkã ad kõm̦m̦ani pepe ko ekkar ñan wãween ad l̦õmn̦ak, ak ekkar ñan bõklõkõt eo ad—men eo itulowa me ej ba ta eo ejim̦we im ebõd. (Rom 2:​14, 15) Meñe reddik, ak ajri ro remaroñ kile ta eo ejim̦we im ta eo ebõd im ewõr iien emaroñ bar nana bõklõkõt ko aer. Jidik kõn jidik ilo ad rũttol̦o̦k, baam̦le ko ad, ro jej aetõl er, ri-kaki ro ad ilo jikuul̦, armej ro ilo jikin eo jej jokwe ie, kabuñ eo ad, im m̦anit ko ad rej jelõt bõklõkõt ko ad. Ñe jej kõm̦m̦an pepe, bõklõkõt ko ad enaaj kaalikkar ñan kõj el̦aññe pepe eo ad em̦m̦an ak jaab.

Ad kile ta ko rejim̦we im rebõd remaroñ kõm̦akũt kõj ñan kwal̦o̦k tũriam̦o, kam̦m̦oolol, im jab kalijekl̦o̦k ilo ad kõm̦m̦an ñan ro jet. Emaroñ bar bõbraik kõj jãn ad kõm̦m̦ani men ko me remaroñ kõmetak ro rejitõnbõro ippãd ak remaroñ kõm̦m̦an ad jook im nana ad mour.

Jemaroñ ke lõke l̦õmn̦ak ko ad ñan tõl kõj? Ke ear juon likao, Garrick ear mour ilo juon wãween me ej ba: “Iar kõn̦aan kããlõt ta ko ij l̦õmn̦ak bwe rejim̦we im rebõd.” Bõtab, ear lo bwe an kar kõm̦m̦ani men ko ear l̦õmn̦ak bwe rejim̦we, rar jab tõll̦o̦ke ñan men ko rem̦m̦an. Tokãlik ear mour ilo juon wãween me ej ba “elukkuun marok kõnke iar mour ettoon, kõjerbali men ko rekkajjoor, kadek, im el̦ap kowadoñ.”

L̦õmn̦ak ko ad rejjab men eo wõt rej jelõt pepe ko ad. L̦õmn̦ak ko an ro jet rej bareinwõt jelõt pepe ko ad. Men in emaroñ jipañ kõj bwe jen bõk tokjãn jãn jel̦ãl̦o̦kjen̦ eo aer im men ko rar iiooni ilo mour ko aer. Baam̦le eo ad, ro m̦õttad, im armej ro iturid rem̦õn̦õn̦õ ñe jej kõm̦m̦ani men ko rej l̦õmn̦ak bwe rejim̦we.

Jemaroñ ke aolep iien lõke l̦õmn̦ak ko an armej? Ke ear juon jiroñ, Priscila ear kõm̦m̦ani men ko rem̦m̦an ippãn ro m̦õttan im ear babu ippãn ro jet. Meñe ãindein, ak ear lo bwe ke ear kõm̦m̦ani men ko me ro jet rar l̦õmn̦ak bwe rejim̦we, ear jab lo m̦õn̦õn̦õ. Ej ba: “Ke iar kõm̦m̦ani men ko ro jet rar kõm̦m̦ani, ear nana aõ mour. Ear tõll̦o̦k eõ ñan kõm̦m̦ani pepe ko rejjab mãlõtlõt im rekauwõtata.”

Ñe jej kããlõt ta ko rejim̦we im ta ko rebõd, l̦õmn̦ak ko ad im l̦õmn̦ak ko an ro jet remaroñ lukkuun jipañ kõj. Bõtab ñe jej atartar wõt ioon men kein, emaroñ jab tõll̦o̦k kõj ñan juon wãween em̦m̦an. Jet iien jemaroñ kõjorrããne kõj make ak ro jet kõnke jaar jab maroñ kõtmãne jem̦l̦o̦kin pepe ko ad. (Jabõn Kõnnaan 14:​12, UBS) Im jejjab maroñ jel̦ã el̦aññe l̦õmn̦ak ko ad ak l̦õmn̦ak ko an ro jet ikijjeen ta ko rejim̦we im rebõd rem̦m̦an im rejejjet, ak bwe ilju im jekl̦aj reban oktak. Ñe jej l̦õmn̦ak kake, ewõr jet m̦anit ko jem̦aan me rar nana ak kiiõ ejjel̦o̦k jorrããn ie. Im ewõr jet m̦anit ko kar watõk bwe rem̦m̦an ak kiiõ ewõr rej watõk bwe rejjab em̦m̦an.

Ewõr ke juon kein jipañ em̦m̦anl̦o̦k me emaroñ jipañ kõj ñan kããlõt ta ko rejim̦we im ta ko rebõd? Ewõr ke juon men jemaroñ l̦oore ñan jipañ kõj jel̦ã ta ko rejim̦we im ta ko rebõd me eban tõll̦o̦k kõj ñan bũrom̦õj ilo iiõ ko m̦aantak?

Kam̦m̦oolol bwe ewõr juon kein jipañ rot in me jemaroñ lõke im ej jerbal ñan aolep armej ro ipel̦aakin lal̦ in. Katak eo tok juon enaaj kwal̦o̦k ia eo jemaroñ lo kein jipañ eo em̦m̦antata me emaroñ jipañ kõj jel̦ã ta ko rejim̦we im rebõd.