1. Ta jeraam̦m̦an ko jemaroñ bũki ikijjeen katok in mour eo an Jijej?

 KATOK in mour eo an Jijej ear kõm̦m̦an bwe jen maroñ bõk elõñ jeraam̦m̦an ko. Ikijjeen katok in mour eo an, ro nejin Adam me rej yokwe men ko rejim̦we renaaj maroñ in bar m̦õttan baam̦le eo an Anij. Katok in mour eo an Kũraij ej bar letok juon kõjatdikdik ñan ad reim̦aanl̦o̦k ñan iien eo jenaaj m̦õn̦õn̦õ im mour ñan indeeo. Bõtab, ebar wõr men ko jet men in ej kajejjeti ijello̦kun an baj bũktok jeraam̦m̦an ko ñan armej ro rej pokake. An kar Jijej m̦õn̦õn̦õ in mej im tiljek wõt ñan kien ko rejim̦we an Jeova, ej bar kwal̦o̦k kõn men ko rel̦ap aer aorõk ñan aolep ro ilañ im ioon lal̦ in.​—Hi. 1:9, UBS; Sam 45:6, UBS.

2. (1) Ta men ko rel̦ap aer aorõk ñan aolep ro ilañ im ioon lal̦ me Jijej ear kwal̦o̦k ilo jar eo an? (Lale pija eo itulõñ.) (2) Ta ko jenaaj etali ilo katak in?

² Tarrin ruo iiõ m̦okta jãn an kar Jijej mej im katok kõn mour eo an kõn kõj, ear katakin rũkal̦oor ro an ñan jar im ba: “Jememwõj ilañ, En Kwõjarjar Etam̦. En itok Am̦ aelõñ. Ren kõm̦anm̦an ankilaam̦ ãinwõt ilañ, bareinwõt ioon lal̦.”  (Matu 6:9, 10) Ñan kal̦apl̦o̦k ad kam̦m̦oolol kõn katok in mour eo an Jijej, jen etale ewi wãween an men in jipañ ñan kokkwõjarjar etan Anij, bõktok jeraam̦m̦an ko ium̦win tõl eo an Aelõñ eo an Anij, im jipañ kajejjet ankilaan Anij.

3. Etan Jeova ej jutak kõn ta, im ewi wãween an kar Setan kananaik etan?

³ Ilo jar eo an Irooj, men eo jinointata Jijej ear kwal̦o̦k kake ej bwe en kwõjarjar etan Anij. Etan Jeova ej jutak kõn Jeova make im kõn kain Anij rot e. E eo ekajoor bõtata im wãnõk ijoko otemjej ilañ im ioon lal̦. Ilo bar juon an Jijej jar, ear ba kõn Jeova: “Jema Kwõjarjar.” (Jon 17:11) Kõnke Jeova eokkwõjarjar, aolep kien ko im naanin kakapilõk ko rej itok jãne rekkwõjarjar im jim̦we. Bõtab ilo kar jikin kallib Iden, Setan ear etao ilo wãween an kar jum̦ae maroñ eo an Anij ñan kõm̦m̦an kien ko ñan armej ro. Ilo an kar ba naan ko reriab kõn Jeova, Setan ear kananaik etan Anij.​—Jen. 3:1-5.

4. Ewi wãween an kar Jijej kwal̦o̦k bwe ear jipañ kokkwõjarjar etan Anij?

⁴ Bõtab, Jijej ear lukkuun yokwe etan Jeova. (Jon 17:25, 26) Men ko ear kõm̦m̦ani rar jipañ kokkwõjarjar etan Anij. (Riit Sam 40:8-10.) Ilo an kar tiljek wõt ke ear pãd ioon lal̦ in, ear kam̦ool bwe kien ko Jeova ej litok rejim̦we im rej ñan jipañ kõj. Meñe Setan ear kõm̦m̦an bwe ren m̦an Jijej ilo juon wãween ekaeñtaanan, ak Jijej ear lukkuun tiljek wõt ñan Jemãn ilañ. Ilo an kar tiljek wõt jekdo̦o̦n ta, ear kam̦ool bwe juon armej eo eweeppãn emaroñ in pokake kien ko rewãnõk an Anij.

5. Ewi wãween ad maroñ bõk kun̦aad im jipañ bwe en kwõjarjar etan Anij?

⁵ Ewi wãween ad kwal̦o̦k bwe jej yokwe etan Jeova? Ikijjeen m̦wilid im kõm̦m̦an ko ad. Jeova ej kõtmãne bwe jen kwõjarjar. (Riit 1 Piter 1:15, 16.) Mel̦el̦ein men in bwe jej kabuñ ñan Jeova wõt im jej pokake e kõn aolepen bũruod. Meñe renaaj jum̦ae im kaeñtaan kõj, ak jenaaj lukkuun kate kõj ñan mour ekkar ñan kien ko im naanin kakapilõk ko an rewãnõk. Ilo ad kõm̦m̦ani men ko rejim̦we, jej kõtl̦o̦k bwe ad meram en romaak im bõktok aiboojoj ñan ãt eo etan Jeova. (Matu 5:14-16, UBS) Ãinwõt armej ro rekkwõjarjar, jej kam̦ool ilo aolepen wãween ad mour bwe kien ko an Jeova rem̦m̦an im bwe naan ko an Setan reriab. Ñe jej kõm̦m̦an bõd, ãinwõt an aolep bar kõm̦m̦an bõd, eokwe jen m̦ool ilo ad ukel̦o̦k im oktak jãn men ko renana me rej kattoon etan Jeova.​—Sam 79:9.

6. Etke Jeova emaroñ watõk kõj ãinwõt ro rewãnõk, meñe jejjab weeppãn?

⁶ Ikijjeen pedpedin katok in mour eo an Kũraij, Jeova ej jol̦o̦k bõd ko an ro rej kwal̦o̦k aer tõmak. Ej m̦õn̦õn̦õ in bõk ro rej ajel̦o̦k mour ko aer ñane bwe ren uwaan ro rej kabuñ ñane. Jeova ej kowãnõk rũkkapit ro bwe ren ro nejin ak ej kowãnõk ‘jiip ro jet’ bwe ren ro jeran. (Jon 10:16; Rom 5:1, 2, UBS; Jem. 2:21-25, UBS) Ñan kiiõ, katok in mour eo an Jijej ej kõmaroñ kõj bwe en em̦m̦an etad ippãn Jemãd ilañ im bwe en wõr kun̦aad ñan jipañ bwe en kwõjarjar etan Jeova.

7. Ta jeraam̦m̦an ko Aelõñ eo an Anij enaaj bũktok ñan armej ro ikijjeen katok in mour eo an Jijej?

⁷ Ilo jar eo an Irooj, Jijej ear bar ba: “En itok Am̦ aelõñ.” Ewi wãween an katok in mour eo an Jijej ekkejell̦o̦k ippãn Aelõñ eo an Anij? Katok in mour eo an Jijej ej kõmaroñ ro 144,000 ñan aer kiiñ im bũrij ippãn Kũraij ilañ. (Rev. 5:9, 10; 14:1) Jijej im rein renaaj irooj ippãn ilañ, ej ro me rej  ejaake kien eo an Anij. Er eo renaaj bõktok jeraam̦m̦an ko ñan armej ro rej pokake Anij ium̦win naaj juon to̦ujin iiõ. Lal̦ in enaaj oktak ñan juon pedetaij im aolep armej ro retiljek renaaj weeppãn. Baam̦le eo an Anij ilañ im ioon lal̦ renaaj kiiõ bar bõrokuk ippãn doon. (Rev. 5:13; 20:6) Jijej enaaj ko̦kkure bõran jedpãnit eo im jol̦o̦k aolep men ko renana me rar wal̦o̦k jãn an kar Setan jum̦ae Jeova.​—Jen. 3:15.

8. (1) Ewi wãween an kar Jijej jipañ rũkal̦oor ro an ñan lo joñan an aorõk Aelõñ eo an Anij? (2) Ewi wãween ad kwal̦o̦k ad rejetake Aelõñ eo an Anij rainin?

⁸ Ke Jijej ear pãd ioon lal̦, ear jipañ rũkal̦oor ro an ñan lo joñan an aorõk Aelõñ eo an Anij. Ãlikin wõt an kar peptaij, Jijej ear jino an keeañ kõn “Naan Em̦m̦an kõn Aelõñ in Anij” jãn jikin ñan jikin. (Luk 4:43, UBS) Im ilo naan ko an ãliktata ñan rũkal̦oor ro an, m̦okta wõt jãn an kar jepl̦aak ñan lañ, ear jiroñ er bwe ren ri kõnnaan kõn e “ñan ãne eo ettol̦o̦ktata ilal̦.” (Jrb. 1:6-8) Ikijjeen jerbalin kwal̦o̦k naan eo ipel̦aakin lal̦, aolep armej ro ilo lal̦ in remaroñ katak kõn katok in mour eo an Jijej im erom ro doon Aelõñ eo an Anij. Rainin, jej kwal̦o̦k ad rejetake Aelõñ eo ikijjeen ad jipañ ro jatin Kũraij ioon lal̦ in ñan kajeeded nuuj eo em̦m̦aan kõn Aelõñ eo iaolepen lal̦ in.​—Matu 24:14; 25:40, UBS.

9. Etke jemaroñ lõke bwe Jeova enaaj kajejjet karõk eo an ñan armej ro?

⁹ Ta mel̦el̦ein naan ko tok jet an Jijej ke ear ba: “Ren kõm̦anm̦an ankilaam̦”? Eokwe, Jeova ej Rũkõm̦anm̦an eo. Kõn men in, ñe em̦õj an ba bwe juon men enaaj wal̦o̦k, enaaj jejjet im wal̦o̦k. (Ais. 55:11) Eban kõtl̦o̦k bwe an Setan jum̦aik E en ko̦kkure karõk eo An ñan armej ro. Jãn jinoin, ekar ankilaan Jeova bwe lal̦ in en obrak kõn armej ro reweeppãn nejin Adam im Iv. (Jen. 1:28) El̦aññe Adam im Iv rar mej ak ejjel̦o̦k nejierro, karõk eo an Anij bwe lal̦ in en obrak kõn ro nejierro eban kar jejjet. Eñin unin, ãlikin an kar Adam im Iv jerawiwi, Jeova ear kõtl̦o̦k bwe en wõr nejierro. Ikijjeen katok in mour eo an Jijej, Anij ej kõpel̦l̦o̦k juon ial̦ ñan an ro rej kwal̦o̦k aer tõmak ilo Jijej, maroñ weeppãn im mour ñan indeeo. El̦ap an Jeova yokwe armej, im ej ankilaan bwe ro rej pokake e ren mour ilo wãween eo ear kõn̦aan jãn jinoin ke ear kõm̦anm̦an er.

10. Ewi wãween an ro remej bõk tokjãn jãn katok in mour eo an Jijej?

¹⁰ Ak ta kõn elõñ pilien armej ro me rar mej ak rar jab jel̦ã kõn Jeova im karejar ñane? Ikijjeen katok in mour eo an Jijej, Anij enaaj kõmour ro rar mej. Jemãd ilañ, eo el̦ap yokwe ippãn, enaaj kõjerkak rein rar mej im lel̦o̦k juon iien em̦m̦an ñan aer katak kõn karõk eo an im bõk mour indeeo. (Jrb. 24:15, UBS) Alikkar bwe Jeova ekõn̦aan bwe armej ren mour, ejjab kõn̦aan bwe ren mej. Ãinwõt Eo ej Wũnjãn mour, ej Jemãn aolep ro renaaj jerkak im mour. (Sam 36:9, UBS) Elukkuun jejjet men in kõnke Jijej ear katakin kõj ñan jar im ba: “Jememwõj ilañ.” (Matu 6:9) Jeova ear lel̦o̦k maroñ eo ñan Jijej bwe en kõmour ro remej. (Jon 6:40, UBS) Ilo Pedetaij, Jijej enaaj kajejjet eddo in an ãinwõt eo ej “jerkakpeje eo im mour eo.”​—Jon 11:25, UBS.

11. Ta ankilaan Anij ñan jar eo el̦ap?

¹¹ Jeova ejjab kwal̦o̦k jouj eo an ñan jet wõt armej, kõnke Jijej ear ba: “Eo ej kõm̦anm̦an ankilaan Anij, e in jatũ m̦aan im kõrã im jinõ.” (Mark 3:35) Ej ankilaan Anij bwe juon jar el̦ap me ejjel̦o̦k emaroñ bwine oraer im rej itok jãn aelõñ, bwij, im kajin otemjej, ren maroñ uwaan ro rej kabuñ ñane. Ro rej kwal̦o̦k aer tõmak ilo katok  in mour eo an Kũraij im rej kõm̦anm̦an ankilaan Anij, renaaj maroñ kobal̦o̦k ibwiljin ro rej lam̦õj im ba: “Ad lo̦mo̦o̦r ej itok jãn ad Anij, eo ej jijet ioon tũroon eo, kab jãn L̦aam̦ eo!”​—Rev. 7:9, 10, UBS.

12. Ewi wãween an alikkar karõk eo an Jeova ñan armej ro rej pokake ilo jar eo Jijej ear katakin rũkal̦oor ro an kake?

¹² Karõk eo an Jeova ñan armej ro rej pokake ej alikkar ilo jar eo Jijej ear katakin rũkal̦oor ro an kake. Jar in ej kaalikkar bwe jej aikuj kate kõj joñan wõt ad maroñ ñan kõm̦m̦an bwe en kwõjarjar im erreo etan Jeova. (Ais. 8:13) Katok in mour eo an Jijej me ej kõmaroñ kõj ñan bõk lo̦mo̦o̦r, ej bar jipañ kokkwõjarjar etan Jeova. Ilo m̦ool, ãt eo etan Jijej make ej mel̦el̦ein “Jeova Ej Lo̦mo̦o̦ren.” Bareinwõt ikijjeen katok in mour eo an Jijej, Aelõñ eo an Anij enaaj bõktok jeraam̦m̦an ko ioon armej ro rej pokake. Jar eo an Irooj ej bar kõkajoor kõj bwe ejjel̦o̦k juon emaroñ bõbraik an jejjet ankilaan Anij.​—Sam 135:6; Ais. 46:9, 10, UBS.

13. Ñe jej peptaij, ta eo men in ej kaalikkare?

¹³ Juon wãween jej kwal̦o̦k ad kam̦m̦oolol kõn katok in mour eo an Jijej, ej ilo ad wũjlepl̦o̦k mour ko ad im peptaij kõn ad tõmak ilo katok in mour eo an. Ad peptaij ej kaalikkar bwe ‘jej doon Irooj,’ mel̦el̦ein bwe mour ko ad rej an Jeova kiiõ. (Rom 14:8) Ñe jej peptaij, jej kajjitõk ippãn Anij kõn juon bõklõkõt erreo. (1 Pi. 3:21) Jeova ej uwaake kajjitõk in ad ilo an karreoik kõj kõn bõtõktõkin Kũraij. Jej lukkuun lõke bwe enaaj letok ñan kõj aolep men ko ear kallim̦ur kaki.​—Rom 8:32, UBS.

14. Etke kar kakien kõj ñan yokwe ro rũturid?

¹⁴ Ebar wõr juon wãween jej kwal̦o̦k ad kam̦m̦oolol kõn katok in mour eo an Jijej.  Kõnke aolep men ko Jeova ej kõm̦m̦ani rej itok jãn an yokwe kõj, ekõn̦aan bwe aolep ro rej kabuñ ñane ren bar kwal̦o̦k yokwe. (1 Jon 4:8-11) Jej kwal̦o̦k ad kõn̦aan bwe jen ‘ro nejin Jemãd ilañ’ ikijjeen ad yokwe ro rũturid. (Matu 5:43-48) Eñin kien eo kein karuo el̦aptata, im joñan an aorõk ej lal̦in wõt kien eo ñan yokwe Jeova. (Matu 22:37-40) Kõn men in, juon wãween jej kwal̦o̦k ad yokwe ro rũturid ej ilo ad pokake naanin jiroñ eo ñan kwal̦o̦k kõn nuuj eo em̦m̦an kõn Aelõñ in Anij. Ilo ad kwal̦o̦k yokwe ñan ro rũturid ak armej ro jet, jej bõktok aiboojoj ñan Anij. Ilo m̦ool, ad “yokwe E ej weeppãnl̦o̦k ilo kõj” ñe jej pokake kien eo ñan yokwe ro jet, el̦aptata ro jeid im jatid ilo tõmak.​—1 Jon 4:12, 20.

15. (1) Ta jeraam̦m̦an ko Jeova ej litok ñan kõj kiiõ? (2) Ta jeraam̦m̦an ko rej kõttar wõt kõj?

¹⁵ Wãween eo wõt bwe Anij en lukkuun jol̦o̦k bõd ko ad ej ñe jej kwal̦o̦k ad tõmak ilo katok in mour eo an Jijej. Naanin Anij ej kaenõm̦m̦an kõj ilo an ba bwe Anij enaaj ‘jeoril̦o̦k jerawiwi ko ad.’ (Riit Jerbal 3:19-21, UBS.) Ãinwõt ad kar etale m̦oktal̦o̦k, ikijjeen katok in mour eo an Jijej, Jeova ej bõk rũkkapit ro bwe ren ro nejin me em̦õj an kaajjiririik er. (Rom 8:15-17, UBS) Ak kõn kõj ro me rej uwaan ‘jiip ro jet’ im renaaj mour ioon lal̦ in, jej ãinwõt ro me Jeova ej l̦õmn̦ak in kaajjiririik er. Ej ãinwõt ñe em̦õj an Jeova je etad ilo juon peba in kaajjiriri. Bõtab, ãlikin ad tõpar mour eo eweeppãn im kam̦ool ad tiljek ilo iien mãlejjoñ eo ãliktata, Jeova enaaj jaini peba in kaajjiriri eo im bõk kõj bwe jen nejin. (Rom 8:20, 21, UBS; Rev. 20:7-9) Yokwe eo an Jeova ñan ajri ro nejin me rejitõnbõro ippãn enaaj pãd ñan indeeo. Tokjãn ko jej bũki jãn katok in mour eo an Jijej enaaj ejjel̦o̦k jem̦l̦o̦kier. (Hi. 9:12, UBS) Ejãmin jako an aorõk menin letok in. Im ejjel̦o̦k juon armej ak juon eo ekajoor emaroñ bõke jãn kõj.

16. Ewi wãween an katok in mour eo an Jijej lukkuun kanemkwõj kõj?

¹⁶ Ejjel̦o̦k juon men Tepil̦ eo emaroñ kõm̦m̦ane ñan kabõjrak aolep ro em̦ool aer ukel̦o̦k jãn aer erom ro uwaan baam̦le eo an Jeova. Jijej ear itok ñan lal̦ in im mej “juon wõt alen” kõn armej otemjej. Kõn men in, katok in mour eo an ear kõl̦l̦ãik on̦ãn jerawiwi ko ad bwe ren jako ñan indeeo. (Hi. 9:24-26, UBS) Kõn wõt jerawiwi eo jaar jolõte jãn Adam, kõj aolep jej mej. Bõtab kõn wõt katok in mour eo an Jijej jemaroñ mour ñan indeeo. El̦ap ad kam̦m̦oolol bwe ikijjeen katok in mour eo an Kũraij, jej rõl̦o̦k jãn ad kõm̦akoko ñan lal̦ in me ej pãd ium̦win tõl eo an Setan im jejjab aikuj in mijak mej kiiõ.​—Hi. 2:14, 15.

17. Ñe kwõj l̦õmn̦ak kõn yokwe eo an Jeova ñan kwe, ta eñjake n̦e am̦?

¹⁷ Kallim̦ur ko an Jeova rem̦ool im jemaroñ lõke bwe renaaj jejjet. Ãinwõt an menin kõm̦anm̦an ko an Jeova aolep iien kajejjet kien im laajrak ko ear likũti bwe ren l̦oori, ãindein Jeova enaaj kajejjet kallim̦ur ko an ñan kõj. Jeova ejjab oktak. (Mal. 3:6) Ijello̦kun an kar baj letok mour ñan kõj, ej kwal̦o̦k an yokwe kõj. “Kõj make, jej jel̦ã im tõmak yokwe eo Anij ej yokwe kõj kake. Anij yokwe.” (1 Jon 4:16, UBS) Aolepen lal̦ in enaaj oktak ñan juon pedetaij eaiboojoj, im aolep ro ilo lal̦ in renaaj kwal̦o̦k yokwe ãinwõt Anij. Jej kobal̦o̦k ippãn enjel̦ ro retiljek ilañ ilo aer lam̦õj kõn juon ainikien el̦ap im ba: “Wũjtak, im aiboojoj, im mãlõtlõt, im kam̦m̦oolol, im nõbar, im kajoor, im maroñ, ñan amwõj Anij indeeo im indeeo. Amen.”​—Rev. 7:12.