ILO juon bukwõn jidikdik in Gujarat, ilo India, jemãn John ear peptaij ilo jem̦l̦o̦kinl̦o̦k 1950 eo im erom juon iaan Ri Kõnnaan ro an Jeova. Ak John im ajri ro 5 jein im jatin kab jineer, rar aolep pãd ilo kabuñ in Katlik eo an RiRom im rar lukkuun kijejeto ilo kabuñ in, im rar jum̦ae tõmak eo an jemãer.

Juon raan, jemãn John ear kajjitõk ippãn bwe en bõkl̦o̦ke juon an lõta ñan juon jein im jatin em̦m̦aan ilo eklejia eo me jemãn ej pãd ie. Ak ilo jibboñõniin raan eo, ear m̦wijm̦wij pein John ke ear kõpel̦l̦o̦ke juon kaajliiñ ekilep. Mekarta, ak kõnke John ear kõn̦aan pokake jemãn, ear lukwõje kinej eo pein kõn juon m̦õttan bwe en jako an bõtõktõk, im ear etal lal̦l̦o̦k im bõkl̦o̦k lõta eo jemãn ear kajjitõk bwe en bõkl̦o̦ke.

Ke John ear tõkeakl̦o̦k m̦weo im̦õn em̦m̦aan eo an lõta eo, kõrã eo pãleen em̦m̦aan eo me ear bar juon iaan Ri Kõnnaan ro an Jeova, ear bõk lõta eo jãn John. Kõrã eo ekar loe an kinejnej pein John im ekar kõn̦aan jipañe im karreoiki kinej eo. Innem, kõrã in ear bõktok kein karreo kinej im karreoik kinej eo kõn juon uno im kore addiin pein John. Ãlikin, ear kõm̦m̦ane juon nimen kab in ti mããn̦ãn̦. Im ilo aolepen iien in me ekar kõm̦m̦ani men kein ñan John, ear bwebwenato ippãn kõn Baibõl̦ ilo juon wãween ejouj.

Kõn an kõrã eo kwal̦o̦k jouj ñane, ekar jino oktak eñjake ko an John kõn Ri Kõnnaan ro an Jeova. Innem ear kajjitõk ippãn ruo kajjitõk kõn tõmak ko an Ri Kõnnaan ro an Jeova me reoktak jãn tõmak ko an Kabuñ in Katlik. Ear kajjitõk el̦aññe Jesus ej Anij, im el̦aññe Kũrjin ro rej aikuj jar ñan Meri. Kõnke kõrã eo jeid im jatid ear katak im jel̦ã kajin in an John, kajin Gujarati, ear maroñ uwaaki kajjitõk ko an. Ear kwal̦o̦k ñane uwaak ko jãn Baibõl̦ im lel̦o̦k bok eo etan, “This Good News of the Kingdom.”

Ke John ear riiti bok in, ilo m̦õkaj ear jel̦ã bwe men eo ear riiti ej m̦ool eo. Innem ear jibadekl̦o̦k bũrij eo an im kajjitõk ippãn ejja kajjitõk kein wõt. Joñan an bũrij eo kar lukkuun illu, ear kade l̦o̦k John kõn juon Baibõl̦ im lam̦õj ñane im ba: “Kiiõ em̦õj am̦ oktak im Setan! Kwal̦o̦k ñan ña tuia ilo Baibõl̦ ej ba bwe Jesus ejjab Anij. Im kwal̦o̦k tuia ej ba bwe kwõjjab aikuj kabuñ ñan Meri. Kwal̦o̦ke ñan ña!” John ear lukkuun bwilõñ kõn wãween an bũrij eo kõnono im kõm̦m̦an ñane. Innem ear jiroñl̦o̦k bũrij eo bwe ejjãmin naaj bar jepl̦aakl̦o̦k ñan kabuñ in Katlik. Im em̦ool ear jab!

John ear jino katak ippãn Ri Kõnnaan ro an Jeova, im tõmak bwe eñin ej m̦ool eo, im tokãlik ear jino karejar ñan Jeova. Jejjo uwaan ro ilo baam̦le eo an rar oktak tokãlik im erom Ri Kõnnaan ro an Jeova. Rainin, ej pãdwõt annañin kinej eo ilo addiin pein John ke ear m̦wijm̦wij 60 iiõ ko remootl̦o̦k. Men in ej kakeememeje John kõn jouj eo an juon jeid im jatid kõrã, im eñin men eo ear kõm̦akũt e bwe en kõjerbal aolepen mour eo an im karejar ñan Jeova.​—2 Ko. 6:4, 6, UBS.