1. Etke jemaroñ ba bwe men otemjej rej an Jeova? (Lale pija eo itulõñ.)

AOLEP men rej an Jeova! ‘Ijoko reutiejtata ilañ rej an Irooj, im lal̦ in ej bareinwõt an im men otemjej ilowaan.’ (Dt. 10:14, UBS; Rev. 4:11) Kõnke Jeova ear kõm̦anm̦an men otemjej, men otemjej rej an ekoba kõj armej. (Sam 100:3) Bõtab ibwiljin armej ro otemjej me rar mour ilo lal̦ in tok ñan rainin, elõñ armej ro Anij ej kããlõt er bwe ren armej ro an ilo juon wãween ejejuwaan.

2. Ekkar ñan Baibõl̦, wõn ro Jeova ear kããlõt er ilo juon wãween ejejuwaan bwe ren armej ro an?

² Ñan waanjoñak, Sam 135 ej kwal̦o̦k kõn rũkarejar ro retiljek an Jeova ilo kar aelõñin Israel eo etto bwe rej armej “ro doon.” (Sam 135:4, UBS) Bareinwõt Hoseia ear kanaan bwe ewõr jet armej ro me rejjab RiIsrael renaaj erom armej ro an Jeova. (Hos. 2:23, UBS) Kanaan in ear jejjet kũtien ke Jeova ear jino kããlõt armej ro rar jab jãn Israel bwe ren irooj ippãn Christ ilañ. (Jrb. 10:45, UBS; Rom 9:23-26, UBS) Ro rar kapit er kõn jetõb kwõjarjar, kar n̦aetaer “aelõñ eo eokkwõjarjar,” im rej “armej ro an” Jeova. (1 Pi. 2:9, 10, UBS) Ak ta kõn aolep Kũrjin ro retiljek rainin me kõjatdikdik eo aer ej ñan mour indeeo ijin ioon lal̦? Jeova ej bareinwõt n̦aetan armej  rein “ro doõ” im “ro Iar kããlõt er.”​—Ais. 65:22.

3. (1) Wõn ro ewõr aer jem̦jerã epaak ippãn Jeova? (2) Ta eo jenaaj etale ilo katak in?

³ Ilo raan kein, ‘bwij eo edik,’ ak ro me kõjatdikdik eo aer ej ñan mour indeeo ilañ, im ‘jiip ro jet,’ ak ro me kõjatdikdik eo aer ej ñan mour indeeo ijin ioon lal̦, rej kabuñ ñan Jeova ippãn doon ãinwõt “juon wõt bwij.” (Luk 12:32; Jon 10:16) Jekõn̦aan lukkuun kwal̦o̦k ad kam̦m̦oolol Jeova kõnke ewõr juon ad jem̦jerã epaak ippãn. Ilo katak in, jenaaj etale ewi wãween ad maroñ kwal̦o̦k ad kam̦m̦oolol Jeova kõn jeraam̦m̦an in ear letok ñan kõj.

4. Ewi wãween ad maroñ kwal̦o̦k ad kam̦m̦oolol Jeova kõn an kõtl̦o̦k bwe en wõr ad jem̦jerã epaak ippãn, im ewi wãween an kar Jesus bar kõm̦m̦ane men in?

⁴ Jej kwal̦o̦k ad kam̦m̦oolol Jeova ñe jej ajel̦o̦k mour eo ad ñane im peptaij. Ilo ad kõm̦m̦ane men in, jej kaalikkar ñan aolep armej bwe jej armej ro an Jeova im jekõn̦aan pokake e. (Hi. 12:9, UBS) Jesus ear bar kõm̦m̦ane men in ke ear peptaij. Ej ãinwõt ñe ear ba ñan Jeova: “O aõ Anij, el̦ap wõt aõ kõn̦aan kõm̦m̦an ankilaam̦!” (Sam 40:7, 8, UBS) Ilo m̦ool, jãn ke Jesus ear l̦otak, em̦õj kadede an uwaan aelõñ eo Jeova ear kããlõte. Meñe ãindein, ak ear kwal̦o̦k bwe ear kõn̦aan kõm̦anm̦an ankilaan Jeova.

5, 6. (1) Ta eo Jeova ear ba ke Jesus ear peptaij? (2) Ta waanjoñak eo emaroñ jipañ kõj ñan jel̦ã kõn eñjake eo an Jeova ñe jej ajel̦o̦k mour eo ad ñane?

⁵ Ewi wãween an kar Jeova eñjake ke Jesus ear peptaij? Baibõl̦ ej ba: “Im ke em̦õj an Jesus peptaij, em̦õkaj An ato jãn dãn; im lo, emejal̦l̦o̦k lañ ñan E, im Ej lo Jetõb an Anij ej kãlal̦tak ãinwõt m̦ul̦e, im jok ioon; Im lo, ainikien jãn lañ ej ba, ‘E in Nejũ jitõnbõro ippa, Ij m̦õn̦õn̦õ kake.’” (Matu 3:16, 17) Meñe em̦õj an Jesus juon iaan armej ro an Anij kadede, ak Jeova ear lukkuun m̦õn̦õn̦õ ke ear lo an Jesus kõn̦aan kõjerbal mour eo an ñan jerbal ñan E wõt. Ãindeinl̦o̦k wõt, Jeova ej bar m̦õn̦õn̦õ ñe jej ajel̦o̦k mour eo ad ñane im enaaj kõjeraam̦m̦an kõj.​—Sam 149:4, UBS.

⁶ Bõtab aolep men rej an Jeova! Innem ta eo jemaroñ lel̦o̦k ñane? L̦õmn̦ak m̦õk kõn juon em̦m̦aan me ewõr juon an atake. Juon raan l̦adik eo nejin ear etal im bõk juon iaan leen keinikkan ko ilo atake eo im lel̦o̦k bwe en m̦õñã. Meñe leen keinikkan in ear itok jãn atake eo an, ak ear lukkuun m̦õn̦õn̦õ kõn menin lel̦o̦k in jãn l̦adik eo nejin. Men in l̦adik in ear kõm̦m̦ane ej kaalikkar an yokwe jemãn. El̦apl̦o̦k an jemãn m̦õn̦õn̦õ kõn leen keinikkan in me l̦adik eo ear lel̦o̦k ñane jãn keinikkan ko jet ilo atake eo an. Ãindeinl̦o̦k wõt, Jeova ej lukkuun m̦õn̦õn̦õ ñe jekõn̦aan ajel̦o̦k mour eo ad ñane.​—Ex. 34:14.

7. Ewi wãween an Malakai jipañ kõj ñan mel̦el̦e kõn eñjake ko an Jeova kõn ro rej m̦õn̦õn̦õ in karejar ñan e?

⁷ Riit Malakai 3:16. Etke elukkuun aorõk bwe kwõn ajel̦o̦k mour eo am̦ ñan Jeova im peptaij? Em̦ool bwe jãn tõre eo kwaar l̦otak, mour eo am̦ ej an Jeova kõnke ear kõm̦anm̦an eok. Bõtab l̦õmn̦ak kõn ewi joñan an naaj Jeova m̦õn̦õn̦õ ñe kwõj kããlõte bwe en am̦ Rũtõl im ñe kwõj ajel̦o̦k mour eo am̦ ñane. (JK. 23:15) Jeova ejel̦ã wõn ro rekõn̦aan karejar ñane, im ej je etaer ilo ‘bokin ememej’ eo an.

8, 9. Ta eo Jeova ekõn̦aan bwe ro em̦õj an je etaer ilo ‘bokin ememej’ eo an ren kõm̦m̦ane?

⁸ Ebar wõr juon men jej aikuj kõm̦m̦ane  el̦aññe jekõn̦aan bwe ãt eo etad en pãdwõt ilo ‘bokin ememej’ eo an Jeova. Malakai ear ba bwe jej aikuj mijak Jeova im kõl̦mãnl̦o̦kjen̦ kõn ãt eo etan. El̦aññe jej bar kabuñ ñan juon men ak armej, innem Jeova enaaj jol̦o̦k etad jãn bokin ememej eo an!​—Ex. 32:33; Sam 69:28, UBS.

⁹ Kõn men in, jejjab aikuj kallim̦ur wõt bwe jenaaj kõm̦anm̦an ankilaan Jeova im peptaij. Juon wõt alen ad kõm̦m̦ani men kein, ak ad kabuñ ñan Jeova ej juon men jej aikuj wõnm̦aanl̦o̦k wõt im kõm̦m̦ane. Aolep raan toun wõt ad mour, en alikkar ilo kõm̦m̦an ko ad bwe jej pokake Jeova.​—1 Pi. 4:1, 2, UBS.

10. Ta oktak eo ej aikuj alikkar ikõtaan ro rej karejar ñan Jeova im jãn ro rejjab?

¹⁰ Ilo katak eo l̦o̦k, jaar katak bwe Kein, Solomon, im RiIsrael ro rar ba bwe rej kabuñ ñan Jeova ak rar jab tiljek ñane. Waanjoñak kein rej katakin kõj bwe jejjab aikuj ba wõt bwe jej kabuñ ñan Jeova. Jej aikuj bar dike men ko renana im yokwe men ko rem̦m̦an. (Rom 12:9) Jeova ej ba bwe enaaj lukkuun alikkar oktak eo ‘ikõtaan ro rewãnõk im ro renana, im ikõtaan eo ej jerbal ñan Anij im eo ejjab jerbal ñan E.’​—Mal. 3:18.

11. Etke ej aikuj alikkar ñan aolep armej bwe jej kabuñ ñan Jeova wõt?

¹¹ El̦ap ad kam̦m̦oolol Jeova kõn an kar kããlõt kõj bwe jen armej ro an! Ej aikuj alikkar ñan aolep armej bwe jej rejetake Jeova. (Matu 5:16, UBS; 1 Ti. 4:15, UBS) Kajjitõk ippam̦ make: ‘Ro jet remaroñ ke lo bwe ij lukkuun tiljek ñan Jeova? Ij ke m̦õn̦õn̦õ in kwal̦o̦k ñan ro jet bwe ij juon iaan Ri Kõnnaan ro an Jeova?’ Eokwe l̦õmn̦ak kõn joñan an naaj Jeova bũrom̦õj ñe jej jook in kwal̦o̦k ñan ro jet bwe jej juon iaan armej ro an.​—Sam 119:46; riit Mark 8:38.

12, 13. Ewi wãween an kar jet jeid im jatid kõm̦m̦an bwe en pen an ro jet kile bwe rej Ri Kõnnaan ro an Jeova?

¹² Ekabũrom̦õjm̦õj bwe ewõr jet Ri Kõnnaan  ro an Jeova rej l̦oor l̦õmn̦ak im m̦anit ko an lal̦ in. Tokjãn men in, rejjab kaalikkar aer lukkuun oktak jãn ro rejjab kabuñ ñan Jeova. (1 Ko. 2:12, UBS) L̦õmn̦ak im m̦anit ko an lal̦ in rej kõm̦m̦an bwe armej ro ren l̦õmn̦ak wõt kõn kõn̦aan ko aer make. (Ep. 2:3, UBS) Ñan waanjoñak, jet iaan rein rej wõnm̦aanl̦o̦k im kããlõt ñan kõn̦ak nuknuk ko rejekkar meñe elõñ naanin kakapilõklõk ko em̦õj litok ñan kõj kõn men in. Rej kõn̦aki nuknuk ko relukkuun bab im nuknuk ko rekabwilo̦klo̦k mãj. Joñan, rej kõn̦aki nuknuk kein ilo iien kweilo̦k ko. Bareinwõt wãween aer m̦wijbare bõraer im kõl̦are elukkuun tarjen joñan. (1 Ti. 2:9, 10) Kõn aer kõm̦m̦ani wãween kein, emaroñ pen an ro jet kile bwe rej Ri Kõnnaan ro an Jeova.​—Jem. 4:4.

¹³ Ebar wõr wãween ko jet me jet Ri Kõnnaan ro an Jeova rejjab kaalikkar aer oktak jãn armej ro ilo lal̦ in. Ñan waanjoñak ilo bade ko, ewõr jet rar eb im kõm̦m̦ani m̦anit ko rejjab ekkar ñan Kũrjin ro. Bareinwõt jet rar likũt pija ko aer make ilo weepjait ko armej ro rej m̦õttãik doon ie im kwal̦o̦k l̦õmn̦ak ko aer ilo weepjait kein ilo juon wãween ej kaalikkar aer bõk l̦õmn̦ak ko an lal̦ in. Bõlen rein rejjañin bõk kaje ilo eklejia eo kõn juon bõd el̦ap, ak kõm̦m̦an ko aer remaroñ jelõt ro jeier im jatier ilo eklejia eo me rej lukkuun kate er bwe ren oktak jãn lal̦ in.​—Riit 1 Piter 2:11, 12.

14. Ta eo jej aikuj kõm̦m̦ane ñan kõjparok jem̦jerã eo ad eaorõk ippãn Jeova?

¹⁴ Aolep men ko ilo lal̦ in kar kõm̦m̦ani bwe armej ren l̦õmn̦ak wõt kõn ‘m̦õm̦ ko an kanniõk, m̦õm̦ an mej ko im wõj waan an mour in.’ (1 Jon 2:16) Ak kõnke jej armej ro an Jeova, eñin unin jej oktak jãn ro jet ilo lal̦ in. Jej “kaarmejjete jerawiwi im m̦õm̦ ko an lal̦,” im jej “mour im jatõr im jim̦we wõt, im kwõjarjar ilo lal̦ in.” (Tai. 2:12) Aolep men ko jej kõm̦m̦ani ilo mour eo ad ekoba wãween ad kõnnaan, nuknuk, m̦õñã, idaak, im jerbal, rej aikuj kaalikkar ñan aolep armej bwe jej armej ro an Jeova.​—Riit 1 Korint 10:31, 32, UBS.

15. Etke jej aikuj kwal̦o̦k yokwe im jouj ñan Kũrjin ro jeid im jatid?

¹⁵ Jej kwal̦o̦k ad kaorõk jem̦jerã eo ad ippãn Jeova ilo wãween ad kõm̦m̦an ñan ro jeid im jatid. Ãinwõt bar kõj, ro jeid im jatid rej bar uwaan armej ro an Jeova. El̦aññe jej keememej men in, aolep iien jenaaj kwal̦o̦k jouj im yokwe ñan er. (1 Te. 5:15, UBS) Etke elukkuun aorõk men in? Jesus ear ba ñan rũkal̦oor ro an: “Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.”​—Jon 13:35.

16. Ta waanjoñak eo jãn Kien Moses me ej kwal̦o̦k kõn joñan an Jeova yokwe armej ro an?

¹⁶ Ñan jipañ kõj mel̦el̦e kõn wãween ad aikuj kõm̦m̦an ñan ro jeid im jatid ilo eklejia eo, em̦m̦an jen lale juon waanjoñak. Ilo tampel̦ eo an Jeova, ekar wõr kein jerbal ko me kar kõjenolo̦ki ñan kabuñ wõt ñan Jeova. Kien Moses ear kwal̦o̦k kõn wãween an RiLivai ro aikuj kõjparok kein jerbal kein, im jabdewõt eo ejjab l̦oori naanin tõl kein naaj aikuj m̦ane ñan mej. (Bõn. 1:50, 51, UBS) El̦aññe el̦ap an kar Jeova kaorõk wãween an armej ro kõjerbal kein jerbal kein ñan aer kabuñ, alikkar bwe el̦apl̦o̦k an aorõk ippãn wãween an ro jet kõm̦m̦an ñan armej ro rej tiljek ilo aer kabuñ ñan E! Ej jiroñ kõj kõn joñan ad aorõk ippãn ilo an ba: ‘Eo ej uññũr kom̦ ej uññũr iju in Meja.’​—Zk. 2:8.

17. Ta eo Jeova ej lukkuun roñjake im lale?

¹⁷ Malakai ear ba bwe Jeova ej lukkuun roñjake im lale wãween an armej ro an kõm̦m̦an ñan doon. (Mal. 3:16) Jeova “ejel̦ã ro doon.” (2 Ti. 2:19) El̦ap an jel̦ã kõn aolep men ko jej ba im kõm̦m̦ani. (Hi. 4:13, UBS) Jeova ej lo ñe jejjab kwal̦o̦k jouj ñan rũttõmak ro jeid im jatid. Bõtab jemaroñ lõke bwe ñe jej kwal̦o̦k karwainene, jouj, im m̦õn̦õn̦õ in jol̦o̦k an ro jeid im jatid bõd, Jeova ej bar loe men in.​—Hi. 13:16, UBS; 1 Pi. 4:8, 9, UBS.

18. Ewi wãween ad maroñ kwal̦o̦k ad kam̦m̦oolol Jeova kõn an kããlõt kõj bwe jen armej ro an?

¹⁸ Jekõn̦aan kwal̦o̦k ad lukkuun kam̦m̦oolol Jeova kõnke jej armej ro an. Jejel̦ã bwe jaar kõm̦m̦ane pepe eo em̦m̦antata ke jaar ajel̦o̦k mour eo ad ñane. Meñe jej “jokwe ibwiljin armej ro renana im jerawiwi,” ak emaroñ ‘ejjel̦o̦k n̦otaad im erreo’ wõt im jemaroñ romaak “ãinwõt iju ko remeram ilañ.” (Pil. 2:15, UBS) Kõn men in jej lukkuun kate kõj ñan kõjparok bwe jen jab kõm̦m̦ani men ko Jeova ediki. (Jem. 4:7) Im jej yokwe im kautiej ro jeid im jatid kõnke rej bar uwaan armej ro an Jeova.​—Rom 12:10, UBS.

19. Ewi wãween an Jeova kõjeraam̦m̦an armej ro an?

¹⁹ Baibõl̦ ej kallim̦ur im ba: “Irooj ejãmin jol̦o̦k armej ro an.” (Sam 94:14, UBS) Elukkuun m̦ool men in kõnke jekdo̦o̦n ta eo emaroñ wal̦o̦k ñan kõj ak Jeova enaaj pãdwõt ippãd. Im jekdo̦o̦n ñe jenaaj mej, ak eban mel̦o̦kl̦o̦k kõj. (Rom 8:38, 39) “El̦aññe jej mour, jej mour ñan Irooj; ak el̦aññe jemej, ñan Irooj jej mej; innem el̦aññe jej mour ak mej, kõj doon Irooj.” (Rom 14:8) Jej kijooror im reim̦aanl̦o̦k ñan iien eo ñe Jeova enaaj bar kõmour aolep ro jeran retiljek me rar mej. (Matu 22:32) Ak ilo tõrein, el̦ap ad m̦õn̦õn̦õ kõnke elõñ jeraam̦m̦an ko Jeova ej litok ñan kõj. Baibõl̦ ej ba: “Em̦õn̦õn̦õ aelõñ eo an Irooj ej an Anij, em̦õn̦õn̦õ armej ro ear kããlõt er bwe ren doon.”​—Sam 33:12, UBS.