KWÕNAÑIN ke kile an lõñ armej rej l̦õmn̦ak bwe rej aikuj bõk jeraam̦m̦an ko rel̦l̦apl̦o̦k jãn armej ro jet? Jekdo̦o̦n ewi joñan jeraam̦m̦an ko rej bũki ak rej l̦õmn̦ak bwe ejabwe wõt men ko ippãer. Kain l̦õmn̦ak rot in ekũbbon̦ enaaj wal̦o̦k ippãn armej ilo raan ko ãliktata.—2 Tim. 3:2

Em̦ool bwe armej ro rekũbbon̦ rar mour jãn iien ko etto. Adam im Iv rar make pepe ñan kããlõt ta eo em̦m̦an im ta eo enana ñan er make im kõj aolep jej jorrããn kõn pepe eo aer. Elõñ bukwi iiõ ko tokãlik, kiiñ eo an Juda etan Uzzaia ear bõk l̦õmn̦ak in bwe ej tõllo̦kũn an kõm̦m̦an kaijurjur ilo tampel̦ eo, ak ear bõd an l̦õmn̦ak. (2 Kro. 26:​18, 19) Ejja ãindeinl̦o̦k wõt, Parisi ro im Sadusi ro rar tõmak bwe ej tõllo̦kũn aer bõk juon jeraam̦m̦an ejejuwaan jãn Anij kõnke rej jãn bwijjin Ebream.—Matu 3:9.

Jej mour ibwiljin armej ro rekũbbon̦ im utiej bũrueer, im l̦õmn̦ak ko aer remaroñ jelõt kõj. (Gal. 5:26) Jemaroñ jino bõk l̦õmn̦ak in bwe ej tõllo̦kũn ad bõk juon jeraam̦m̦an ejejuwaan ak bõk el̦apl̦o̦k kautiej jãn ro jet. Ewi wãween jemaroñ kõjparok kõj jãn kain l̦õmn̦ak rot in? M̦oktata, jej aikuj mel̦el̦e kõn ta l̦õmn̦ak eo an Jeova kõn men in. Ewõr ruo naanin kakapilõk ko jãn Baibõl̦ me renaaj jipañ kõj.

Jeova ej peek ta ko ej tõllo̦kũn ad bũki. Jen lale jet iaan waanjoñak kein.

• Ilo karõk an baam̦le, l̦eo ej aikuj eñjake an lio pãleen kwal̦o̦k kautiej ñane im lio ej aikuj  eñjake bwe l̦eo pãleen ej yokwe e. (Eps. 5:33) Jeova ej ba bwe rippãlele ro rej aikuj kwal̦o̦k m̦antin pãlele ñan doon wõt im jab ñan ro jet. (1 Kor. 7:3) Ro jemãn im jinen rej kõtmãne bwe ajri ro nejier rej aikuj pokake er, im ajri ro rej aikuj bõk eñjake eo bwe jemãer im jineer rej yokwe im jipañ er.—2 Kor. 12:14; Eps. 6:2.

• Ilo eklejia eo, em̦m̦aan ro rej lale eklejia rej kate er kõn eddo ko aer rej aikuj kile ad nõbar im kautiej er. (1 Tes. 5:12) Bõtab ejjel̦o̦k aer maroñ ñan irooj ioon ro jeier im jatier.—1 Pit. 5:​2, 3.

• Anij ear kõmaroñ kien ko an lal̦ ñan tõltõl eowõj im bõk kautiej jãn armej ro rej irooj ioer.—Rom 13:​1, 6, 7.

Kõn an Jeova yokwe kõj ej letok el̦apl̦o̦k jãn joñan eo ej tõllo̦kid. Ak kõnke kõj rijjerawiwi ej tõllo̦kid ñan mej. (Rom 6:23) Meñe ãindein, ak Jeova ej letok elõñ jeraam̦m̦an ko kõn yokwe eo an em̦ool ñan kõj. (Sam 103:​10, 11) Kajjojo iaan jeraam̦m̦an kein ejjab aikuj litoki ñan kõj ak kõn an kanooj yokwe kõj, ej litoki.—Rom 12:​6-8; Eps. 2:8.

Kõjparok ñan jab jino l̦õmn̦ak ãinwõt armej ro ilo lal̦ in an Setan. M̦okta jãn ad kile men in jemaroñ jino l̦õmn̦ak bwe ej tõllo̦kid ñan bõk elõñl̦o̦k men ko jãn ro jet. Jesus ear kwal̦o̦k kõn joñan an pidodo ad maroñ bõk l̦õmn̦ak in ikijjeen an kar kõjerbal waanjoñak eo kõn ri-jerbal ro me kar kõl̦l̦ãik er juon denariõs. Jet ri-jerbal ro rar jino jãn jibboñtata im wõnm̦aanl̦o̦k im jerbal aolepen raan eo ium̦win det jilõñlõñ; ak ro jet rar jerbal ium̦win juon wõt awa. Kumi eo m̦oktata rar l̦õmn̦ak bwe rej aikuj bõk juon on̦ããn el̦apl̦o̦k jãn kumi eo juon kõnke ear l̦apl̦o̦k aer jerbal. (Matu 20:​1-16) Ilo an kar kõjerbal waanjoñak in, Jesus ear kwal̦o̦k bwe ri-kal̦oor ro an rej aikuj jokwane wõt kõn men ko em̦õj an Anij lel̦o̦k ñan er.

Kwal̦o̦k wõt am̦ kam̦m̦oolol im jab kõtmãne bwe ro jet ren lewaj men ko ñan eok. (1 Tes. 5:18) Anõke rijjilõk Paul, eo me ear jab kajjitõk kõn menin aikuj ko an jãn ro jein im jatin ilo Korint meñe ear tõllo̦kũn an bõk men kein. (1 Kor. 9:​11-14) Jej aikuj kwal̦o̦k  ad kam̦m̦oolol kõn kajjojo iaan jeraam̦m̦an kein ippãd im jab kõtmãne bwe ro jet ren letok men ko jekõn̦aan.

Kwal̦o̦k ettã bõro. Ñe juon ej l̦ap an l̦õmn̦ak wõt kõn e make, ekkã an jino bõk l̦õmn̦ak eo bwe ej tõllo̦kũn an wõr men ko rel̦l̦apl̦o̦k jãn joñan eo ewõr ippãn. Ettã bõro ej bõbrae kõj jãn ad bõk kain l̦õmn̦ak rot in ekauwõtata.

Ri-kanaan Daniel ear likũt juon joñak em̦m̦an ñan kwal̦o̦k ettã bõro. Baam̦le eo an ear utiej, ear juon likao eo ewũlio, emãlõtlõt, im ewõr kapeel ko ippãn im emaroñ kar watõke e bwe ej tõllo̦kũn an bõk elõñl̦o̦k men ko jãn ro jet. (Dan. 1:​3, 4, 19, 20) Bõtab, Daniel ear kwal̦o̦k wõt ettã bõro, im men in ear kõm̦m̦an an Jeova buñbũruon ippãn.—Dan. 2:30; 10:​11, 12.

Jen jum̦aik jitũbõn kũbbon̦ im utiej bõro me ej wal̦o̦k ipel̦aakin lal̦ rainin. Ijello̦kun men in, jen wõnm̦aanl̦o̦k wõt im lañlõñ kõn kajjojo iaan jeraam̦m̦an kein me Jeova ej litoki ikijjeen jouj im yokwe eo an.