YOMARA im l̦addik ro jatin—Marcelo im Hiver—rej jokwe ilo juon bukwõn jidikdik ilo Guatemala. Yomara ear jino katak Baibõl̦ ippãn Ri-Kõnnaan ro an Jeova, im ejjabto tokãlik, l̦addik ro jatin rar bareinwõt kobal̦o̦k ippãn im jino katak. Bõtab ekar wõr juon apañ. Aolepeer jilu im pilo, im rar jab maroñ riit bok ko ñan ri-pilo (braille). Kõn men in, ri-katakin Baibõl̦ eo aer ekõn riiti l̦o̦k kobban bok eo rej katak kake, ekoba eoon ko ie.

Rar bareinwõt iioon apañ ikijjeen aer kobal̦o̦k ilo iien kweilo̦k ko an eklejia. Ear ejjel̦o̦k aer maroñ ñan etal ñan Im̦õn Kweilo̦k eo epaaktata me ear 40-minit ettol̦o̦k jãn ijo rar jokwe ie. Bõtab ro jeid im jatid ilo eklejia eo rar kõm̦m̦an karõk ñan bõk erjel ñan aolep kweilo̦k ko. Im ke erjel jilu rar jino kõm̦m̦ani katak ko im̦aan ilo kweilo̦k eo lukwõl̦pãn wiik, ro jeid im jatid rar jipañ erjel ñan kiili baat ko aer.

Ilo kar Mãe 2019 eo, kar jino kõm̦m̦ani kweilo̦k ko an eklejia ilo bukwõn eo erjel ear jokwe ie. Ilo tõre in, em̦õj an kar ruo rippãlele me rej rekũl̦ar bainier em̦m̦akũt ñan bukwõn in. Rippãlele rein rar kõm̦m̦an bwe en aer mejãnkajjik ñan katakin erjel ñan riit im jeje ilo braille, meñe erro make rar jaje kilen kõm̦m̦ane men in. Kõn men in, erro ar etal ñan l̦ãibrãre eo im ebbõk bok ko kõn braille bwe erro en maroñ katak kilen kõjerbale innem katakin ro jet.

Ium̦win jejjo wõt allõñ, ear pidodo an Yomara im l̦addik ro jatin riit braille, men in ear kõm̦m̦an bwe en l̦apl̦o̦k aerjel kõm̦m̦an wõnm̦aanl̦o̦k. a Kiiõ Yomara, Marcelo, im Hiver rej jerbal ãinwõt rekũl̦ar bainier ro. Im Marcelo ej juon rijjipañ ilo eklejia eo. Kajjojo wiik, elukkuun l̦ap aer poub ilo men ko l̦oor jetõb. Kõn aer kijejeto ilo aer karejar ñan Jeova, men in ej kõm̦akũt ro jet ñan bar kijejeto ilo aer karejar ñan E.

Yomara im l̦addik ro jatin rej lukkuun kam̦m̦oolol kõn an eklejia eo aer kwal̦o̦k yokwe im jipañ er. Yomara ej ba, “Jãn iien eo kõmjeel ear iioone Ri-Kõnnaan ro an Jeova, rar kwal̦o̦k yokwe eo em̦ool an Kũrjin ro.” Marcelo ej ba, “Ro m̦õttad ilo eklejia eo relukkuun jouj, im kõmjeel ej uwaan juon doulul in jemjein jemjati ipel̦aakin lal̦ in me rej bõrokuk ippãn doon kõn wõt yokwe.” Yomara im l̦addik ro jatin rej lukkuun reim̦aanl̦o̦k ñan raan eo me erjel naaj loe an lal̦ in oktak im erom juon pedetaij.—Sam 37:10, 11; Ais. 35:5.