KATAK 6
Ta eo Enaaj Wal̦o̦k ñan Ro Remej?
1. Ta ennaan eo em̦m̦an kõn ro remej?
Ke Jesus ear pãd ioon lal̦ in, juon raan l̦eo jeran etan Lazerõs ear mej. Lazerõs ear jokwe ilo Betani, juon bukwõn epaake Jerusalem. Ke Jesus ear tõkãkl̦o̦k Betani, el̦ak de emãn raan in an Lazerõs kar mej. Kõn men in, ear etal ñan wũliej eo ippãn Marta im Meri, lim̦aro jein Lazerõs. Ãlikin jidik iien, ear lõñtok armej ñan ijo. L̦õmn̦ak m̦õk kõn joñan an kar Marta im Meri lukkuun m̦õn̦õn̦õ ke Jesus ear kõmour Lazerõs jãn mej!—Riit Jon 11:21-24, 38-44.
Marta ear jel̦ã kadede kõn ennaan eo em̦m̦an kõn ro remej. Ear katak jãn Naan in Anij im ear jel̦ã bwe Jeova enaaj kõm̦m̦an bwe ro remej ren bar mour im jokwe ilo lal̦ in.—Riit Job 14:14, 15, UBS.
2. Ta eo ej wal̦o̦k ñe juon armej ej mej?
Anij ear ba ñan Adam: “Bwidej kwe, im ñan bwidej kwõnaaj jepl̦aak.”—JENESIS 3:19.
Anij ear kõm̦anm̦an armej jãn bwidej. (Jenesis 2:7; 3:19) Ejjel̦o̦k ad jetõb. Ñe juon armej ej mej, ejjel̦o̦k jabdewõt men ilowaan im ej mour m̦aanl̦o̦k wõt. Ñe jej mej, kamelij eo ad ej bar mej. Kõn men in, ejjel̦o̦k ad l̦õmn̦ak ñan jidik. Eñin unin, ke Lazerõs ear bar mour, ear jab ba jabdewõt kõn ta eo ear wal̦o̦k ñan e ke ear mej kõnke ro remej ejjel̦o̦k men en̦ rejel̦ã kake.—Riit Sam 146:4; Ekklisiastis 9:5, 6, 10.
Anij ej ke kaeñtaan armej ro ilo jikin kijeek? Ejjab! Baibõl̦ eo ej ba bwe ro remej ejjel̦o̦k aer jel̦ã ñan jidik. Kõn men in, katak eo bwe Anij ej kaeñtaan armej ro ilo kijeek ej juon katak eriab im ej kananaik Anij. Jeova eban kaeñtaan armej ro ilo kijeek kõnke elukkuun jõjõik men in.—Riit Jeremaia 7:31.
3. Ro remej remaroñ ke kõm̦m̦ao ippãd?
Ro remej rejjab maroñ kõnnaan ak roñjake. (Sam 115:17) Bõtab ewõr jet enjel̦ ro renana. Jet iien enjel̦ rein rej arin ro remej im kõnono ippãn armej ro. (2 Piter 2:4) Jeova ejjab kõn̦aan bwe jabdewõt armej en kajjioñ kõm̦m̦ao ak kõnono ippãn ro remej.—Riit Duteronomi 18:10, 11, UBS.
4. Wõn ro renaaj bar mour?
Elõñ milien armej ro me rar mej renaaj bar mour ijin ioon lal̦. Ro me rar kõm̦m̦ani men ko renana kõn aer kar jaje kõn Anij renaaj bar mour.—Riit Jerbal 24:15, UBS.
Ro renaaj bar mour renaaj katak kõn Anij im kwal̦o̦k bwe rej tõmak Jesus ilo aer pokake e. (Revelesõn 20:11-13) Rein im renaaj bar mour im kõm̦m̦ani men ko rem̦m̦an, renaaj mour ñan indeeo ijin ioon lal̦.—Riit Jon 5:28, 29, UBS.
