Mark 1:1-45
-
Jon ri-Peptaij ej kwal̦o̦k naan (1-8)
-
An Jesus peptaij (9-11)
-
An Setan kajjioñ kapo Jesus (12, 13)
-
Jesus ej jino kwal̦o̦k naan ilo Galili (14, 15)
-
Ri-kal̦oor ro jinointata kar kũr er (16-20)
-
An kadiwõjl̦o̦k juon jetõb ettoon (21-28)
-
Jesus ej kõmour elõñ ilo Kaperneum (29-34)
-
An jar ilo juon jikin ej make iaan ie (35-39)
-
Ej kõmour juon ri-lõba (40-45)
1 Eñin ej jinoin ennaan eo em̦m̦an kõn Jesus Christ, eo ej Nejin Anij.
2 Ãinwõt an kar ri-kanaan Aiseia je im ba: “(Ij jilkinl̦o̦k ri-keeañ eo aõ im̦aam̦,* eo im enaaj kõpooj ial̦ eo am̦.)
3 Juon ainikien ej lam̦õj jãn ãne jem̦aden im ba: ‘Kõpooj ial̦ eo an Jeova!* Kajim̦we ial̦ eo an.’”
4 Ãindein, Jon ri-Peptaij ear pãd ilo ãne jem̦aden im kwal̦o̦k ñan armej ro bwe rej aikuj peptaij ñan kaalikkar aer ukel̦o̦k bwe Anij en maroñ jol̦o̦k jerawiwi ko aer.
5 Im aolep armej in Judia kab aolep armej in Jerusalem rar jibadekl̦o̦ke. Im ear peptaiji er* ilo Reba Jordan im rar kwal̦o̦k jerawiwi ko aer.
6 Nuknuk eo an Jon ej kõm̦m̦an jãn kool̦an kamel̦, im kañũr eo an ej kõm̦m̦an jãn kilin menninmour, im ear m̦õñã jel̦o* im honey.
7 Im ear kwal̦o̦k naan im ba: “Ewõr juon eo ekajoorl̦o̦k jãn ña enaaj itok ãlikũ, im ijekkar ñan jillo̦k im jel̦ate to in juuj ko an.
8 Iar peptaiji kom̦ ilo dãn, ak enaaj peptaiji kom̦ kõn jetõb kwõjarjar.”**
9 Ilo iien in, Jesus ear etal jãn Nazeret ilo Galili ñan Reba Jordan im Jon ear peptaiji.
10 Im ilo iien eo ej kajju ato jãn dãn eo, ej lo an lañ pel̦l̦o̦k im jetõb kwõjarjar* ear itok ioon ãinwõt juon m̦ul̦e.
11 Im juon ainikien jãn lañ ear ba: “Kwe Nejũ jitõnbõro ippa im ebuñbũruõ kõn kwe.”
12 Innem em̦õkaj an jetõb kwõjarjar* tõle ñan ãne jem̦aden,
13 im ear pãd ilo ãne jem̦aden ium̦win 40 raan. Setan ear kajjioñ kapoiki ke ear pãd ilo ãne jem̦aden, im ekar lõñ menninmour ko rawiia ijo. Bõtab tokãlik enjel̦ ro rar itok im jipañe.
14 Ãlikin aer kar kalbuuji Jon, Jesus ear etal ñan Galili im kwal̦o̦k kõn ennaan eo em̦m̦an jãn Anij
15 im ba: “Ejejjet iien kiiõ im Aelõñ eo an Anij* ej epaaktok. Kõn men in, kom̦win ukel̦o̦k im likũt ami tõmak ilo ennaan eo em̦m̦an.”
16 Ke ear etal iturinl̦o̦k Lom̦al̦o in Galili,* ear lo Saimõn* im Andru rej doorlal̦l̦o̦k ok ko aer n̦a ilo̦jet. Em̦m̦aan rein rej ri-eo̦ñõd im erro ej jemjein jemjati.
17 Innem Jesus eba ñan erro: “Kom̦win l̦oor eõ, im inaaj kõm̦m̦an bwe kom̦win ri-eo̦ñõd armej.”
18 Im em̦õkaj aerro likũt ok ko aerro im l̦oore.*
19 Ke ear etal jãn ijo, ear lo l̦õm̦aro nejin Zebedi etaer Jemes im Jon rej pãd ioon wa eo waer im to̦uk* ok ko aer,
20 im ear m̦õkaj im kũrl̦o̦k er. Innem erro kar etal jãn ippãn jemãer, Zebedi, im ri-jerbal ro an ilo wa eo bwe erro en l̦oore.
21 Im rar etal ñan Kaperneum.
Innem ke ej raanin Jabõt,* ear ilo̦k ñan juon im̦õn kabuñ im katakin armej ro.
22 Armej ro rar lukkuun bwilõñ kõn wãween an katakin kõnke ear katakin er ãinwõt juon eo ewõr maroñ ippãn, im jab ãinwõt skraib* ro.
23 Ilo iien in, ear wõr juon em̦m̦aan ilowaan im̦õn kabuñ eo jetõb ettoon* ear mo̦k* n̦a ippãn. Em̦m̦aan in ear lam̦õj im ba:
24 “Jesus ri-Nazeret, ta n̦e kokõn̦aan jãn kõm? Kwaar itõn kaeñtaan kõm ke? Ilukkuun jel̦ã wõn kwe, kwe ri-Karejar eo Eokkwõjarjar an Anij!”
25 Bõtab Jesus ear kauweiki im ba: “Kwõn ikõñ, im kwõn diwõjl̦o̦k jãn em̦m̦aan n̦e!”
26 Im jetõb ettoon eo ear lam̦õj kõn juon ainikien el̦ap im kõm̦m̦an bwe em̦m̦aan eo en lukkuun dibũbbũb. Ãlikin wõt ak ear diwõjl̦o̦k jãne.
27 Armej ro rar lukkuun bwilõñ im rar kõnnaan ñan doon im ba: “Ta in? Elukkuun oktak wãween an katakin! Im meñe jetõb ettoon ko ak ewõr an maroñ ñan kadiwõjl̦o̦k er im rej pokake e.”
28 Innem ennaan eo kõn Jesus ear m̦õkaj an ajeededl̦o̦k ñan aolep jikin ko ilo Galili.
29 Ãlikin aer pãd ilo im̦õn kabuñ eo, rar etal ñan m̦weo im̦õn Saimõn im Andru, im Jemes im Jon rar bar etal ippãerl̦o̦k.
30 Kõrã eo jinen lio pãleen Saimõn ear babu kõn an piba, im rar m̦õkaj im kõnnaanek Jesus kake.
31 Im ear etal im jibwe pein im kejerkake. Innem ear jako an piba, im ear jino kõm̦m̦an kijeer.
32 Im ke ej jota, ãlikin an tulo̦k al̦, armej ro rar bõktok aolep ro renañinmej ñan ippãn im ro emo̦k jetõb ettoon n̦a ippãer.*
33 Aolep armej in jikin eo rar maattok ñan nabõjin m̦weo.
34 Innem ear kõmour ri-nañinmej ro jãn elõñ kain nañinmej im kadiwõjl̦o̦k jetõb ko rettoon. Bõtab ear jab kõtl̦o̦k bwe jetõb kein ren ba jabdewõt kõnke rejel̦ã bwe e Christ.*
35 Jibboñõn raan eo juon, ke ej emmarokrok wõt, ear jerkak im diwõjl̦o̦k im etal ñan juon jikin bwe en make iaan, im ear jino jar.
36 Bõtab Saimõn im ro ippãn rar pukote aolep jikin,
37 im ke rar loe, reba ñane: “Aolep rej kappukot eok.”
38 Ak eba ñan er: “Jen ilo̦k ñan bar juon jikin, ñan bukwõn kan̦ repaak bwe in kwal̦o̦k naan ie, kõnke eñin unin aõ kar itok.”
39 Innem ear deblo̦ke aolep jikin ko ilo Galili im kwal̦o̦k naan ilo im̦õn kabuñ ko, im ear bar kadiwõjl̦o̦k jetõb ko rettoon jãn armej.
40 Juon em̦m̦aan ewõr an nañinmej in lõba ear jãdetok im bukwelõlõ im akwel̦ap ñane im ba: “El̦aññe kokõn̦aan, kwõmaroñ kõm̦m̦an bwe in erreo.”
41 Innem ear tũriam̦okake em̦m̦aan eo im ear lel̦o̦k pein im uñũri im ba: “Ikõn̦aan! Kwõn erreo.”
42 Im em̦õkaj an jako an em̦m̦aan eo lõba im ear erreo.
43 Bõtab m̦okta jãn an em̦m̦aan eo etal, Jesus ear lukkuun kakkõle
44 im ba ñane: “Lale kwaar ba ñan jabdewõt, ak kwõn jãdel̦o̦k ñan ippãn bũrij en̦, innem kwõn lel̦o̦k am̦ menin katok ekkar men ko Moses ear ba, bwe en kein am̦ kam̦ool ñan er bwe kwõrreo.”
45 Bõtab, ãlikin wõt an em̦m̦aan eo ilo̦k jãn ijo, ear l̦ap an kõnnaan kake men in im kajeededl̦o̦k bwebwenato in. Kõn men in, ejjel̦o̦k iien en̦ Jesus ej jãdel̦o̦k ñan jabdewõt bukwõn im armej rejjab kile. Innem ear ilo̦k ñan jikin ko ejjel̦o̦k armej ie, bõtab ear jab bõjrak an armej ro itok ñan ippãn jãn jabdewõt jikin.
Footnotes
^ Kajin Grik, “im̦aan mejam̦.”
^ Lale “Jeova” ilo Kõmel̦el̦e Ko.
^ Ak “katulo̦k er ium̦win dãn.”
^ Ak “lokõs.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ãt eo juon etan Piter.
^ Ak “kiiji.”
^ Lale “Jabõt” ilo Kõmel̦el̦e Ko.
^ Lale “Skraib” ilo Kõmel̦el̦e Ko.
^ Ilo kajin Grik, men in ej jitõñl̦o̦k ñan enjel̦ ro renana.
^ Ak “del̦o̦ñ.”
^ Naan eo ilo kajin Grik ej dai·mo·niʹzo·mai, ej jitõñl̦o̦k ñan ro emo̦k enjel̦ ro renana n̦a ippãer.
^ Ak emaroñ, “rejel̦ã wõn e.”
