Luk 11:1-54
11 Juon iien, Jesus ear pãd ilo juon jikin im jar. Ke ear m̦õj an jar, juon iaan ri-kal̦oor ro an ear ba ñane: “Irooj, kwõn katakin kõm kilen jar ãinwõt an kar Jon katakin ri-kal̦oor ro an.”
2 Kõn men in, ear ba ñan er: “Jabdewõt iien ñe kom̦ij jar, kom̦win ba: ‘Jememwõj ilañ, en kwõjarjar etam̦, en itok am̦ Aelõñ.*
3 Letok kijem* ekkar ñan joñan eo kõmij aikuji kajjojo raan.
4 Im jol̦o̦k ammim bõd kõnke kõmij bar jol̦o̦k an ro jet bõd ñe rej bõd n̦ae kõm. Jipañ kõm bwe kõmin jab po ilo menin kapo ko.’”
5 Bareinwõt ear ba: “Jen ba bwe juon iaami ewõr m̦õttan im ear etal ñan ippãn armej eo m̦õttan ke ej lukwõn boñ im ba, ‘Jera, kwõn letok jilu pilawã
6 kõnke juon iaan ro m̦õtta ej kab itok jãn juon jikin ettol̦o̦k ak ejjel̦o̦k jabdewõt m̦õñã ippa ñan aõ lel̦o̦k ñane.’
7 Bõtab ej uwaake jãn ilowaan m̦weo im̦õn im ba: ‘Em̦õj n̦e am̦ kabõn̦õn̦õik eõ. Em̦õj an l̦ak kõjãm n̦e im ajri ro nejũ rã ippa rej kiki. Ijjab maroñ jutak im lewaj jabdewõt.’
8 Ij jiroñ kom̦ bwe jekdo̦o̦n ñe e m̦õttan ak eban jutak bwe en lel̦o̦k jabdewõt ñane. Bõtab kõn an l̦eo jab ebbeer in kajjitõk, eo m̦õttan enaaj jutak im lel̦o̦k jabdewõt men ej aikuji.
9 Kõn men in, ij ba ñan kom̦: Jab bõjrak jãn ami kajjitõk im naaj lewaj ñan kom̦, jab bõjrak jãn ami kappok im kom̦ naaj loe, jab bõjrak jãn ami kal̦l̦al̦l̦al̦ im naaj kõpel̦l̦o̦k ñan kom̦.
10 Bwe jabdewõt eo ej kajjitõk enaaj bõke, jabdewõt eo ej kappok enaaj loe, im jabdewõt eo ej kal̦l̦al̦l̦al̦ naaj kõpel̦l̦o̦k ñane.
11 Ewõr ke em̦m̦aan ibwiljimi enaaj lel̦o̦k jineik ñan ajri eo nejin ñe ej kajjitõk kijen ek?
12 Ak enaaj ke lel̦o̦k mãdepep ñane ñe ej kajjitõk kijen lep?
13 Meñe kom̦ ri-nana ak kom̦ jel̦ã bwe kom̦win lel̦o̦k menin lel̦o̦k ko rem̦m̦an ñan ro nejimi. El̦aññe ãindein, innem ekanooj l̦apl̦o̦k an Jememi ilañ naaj lel̦o̦k jetõb kwõjarjar* eo an ñan ro rej kajjitõk ippãn kake!”
14 Tokãlik ear kadiwõjl̦o̦k juon jetõb ettoon* me ear mo̦k* n̦a ippãn juon em̦m̦aan im kõm̦m̦an an jaje kõnnaan. Ãlikin an jetõb ettoon eo diwõjl̦o̦k jãne, em̦m̦aan eo ear maroñ kõnnaan, im jarlepju eo ear kanooj bwilõñ.
15 Ak jet iaaer rar ba: “Ej kadiwõjl̦o̦k jetõb ko rettoon ikijjeen Beelzebub,* ri-tõl eo an jetõb ko rettoon.”
16 Im ro jet rar mãlejjoñe ilo aer kajjitõk bwe en kõm̦m̦ane juon menin kabwilõñlõñ* ilo etan Anij.
17 Jesus ear jel̦ã l̦õmn̦ak ko aer, innem ear ba ñan er: “Juon aelõñ enaaj jorrããn ñe armej ro ie rej jum̦aik doon, im juon baam̦le enaaj jorrããn ñe armej ro ie rej jum̦aik doon.
18 Ilo ejja wãween in wõt, ñe Setan ej jum̦aik e make, enaaj jako an tõl. Bwe kom̦ij ba bwe ij kadiwõjl̦o̦k jetõb ko rettoon ikijjeen Beelzebub.
19 El̦aññe Beelzebub eo ear kõmaroñ eõ ñan kadiwõjl̦o̦k jetõb ko rettoon, wõn eo ear kõmaroñ ro nejimi bwe ren kadiwõjl̦o̦k jetõb ko rettoon? Eñin unin renaaj ekajete kom̦.
20 Ak ñe iar kadiwõjl̦o̦k jetõb ko rettoon kõn addiin pein Anij,* innem mel̦el̦ein bwe Aelõñ eo an Anij* epãd ijin ak kom̦ij jab kile.
21 Ñe juon em̦m̦aan ekajoor im epojak an kein tarin̦ae ej waje m̦weo im̦õn, ejjel̦o̦k en̦ emaroñ ko̦o̦te men ko m̦weien.
22 Bõtab ñe juon eo ekajoorl̦o̦k jãne ej itok im ire ippãn im anjo̦ jãne, enaaj bõk aolep kein tarin̦ae ko em̦m̦aan in ear kõjatdikdik kaki. Innem enaaj ajeji men ko ear bũki jãne ñan ro jet.
23 Jabdewõt eo ejjab rejetake ña ej jum̦aik eõ, im jabdewõt eo ejjab jipañ eõ aintok armej ro ñan ippa, ej ubaakel̦o̦k armej ro jãn ña.
24 “Ñe juon jetõb ettoon ej diwõjl̦o̦k jãn juon armej, ej etal ñan ãne jem̦aden im kappok jikin an pãd. Bõtab ñe ejjab ellolo, ej ba, ‘Inaaj bar ro̦o̦l ñan m̦weo im̦õ, ijo iar itok jãne.’
25 Innem ke ear tõparl̦o̦k m̦weo, ej lo bwe erreo im eaiboojoj.
26 Innem ej etal im bõktok jimjuon jetõb ettoon me el̦apl̦o̦k aer nana jãne, im rej mo̦k ilo ãnbwinnin armej eo im pãd ie. Innem ear nanal̦o̦k wõt an armej eo pãd jãn kar m̦okta.”
27 Ej ba wõt men kein ak juon kõrã ibwiljin armej ro ear lam̦õjl̦o̦k ñane im ba: “Ejeraam̦m̦an kõrã eo ear keotak eok, im kaninnin eok!”
28 Bõtab ear ba: “Ejjab, ejeraam̦m̦an armej ro rej roñjake naanin Anij im pokake!”
29 Ke jarlepju in armej ro rar kobatok, ear ba: “Epepen in ej juon epepen enana. Armej ro ie rej kappok kõkal̦l̦e, bõtab ejjel̦o̦k kõkal̦l̦e enaaj wal̦o̦k ijello̦kun wõt menin kabwilõñlõñ* eo ear wal̦o̦k ñan Jona.
30 Men eo ear wal̦o̦k ñan Jona ear juon kõkal̦l̦e ñan ri-Nineva ro. Ilo ejja wãween in wõt, Nejin armej* enaaj juon menin kõkal̦l̦e ñan epepen in.
31 Ilo naaj iien ekajet en̦, lerooj eo an ijoko iturõk enaaj jerkak jãn mej ippãn armej in epepen in im liaakel̦o̦k er kõnke ear itok jãn juon jikin ettol̦o̦k bwe en roñjake naan ko rekapeel an Solomon. Ak ij jiroñ kom̦ bwe ewõr juon eo eutiejl̦o̦k jãn Solomon im ej pãd ijin.
32 Ilo naaj iien ekajet en̦, armej in Nineva renaaj jerkak jãn mej ippãn armej in epepen in im liaakel̦o̦k er kõnke ri-Nineva ro rar ukel̦o̦k ke Jona ear kwal̦o̦k naan ñan er. Ak ij jiroñ kom̦ bwe ewõr juon eo eutiejl̦o̦k jãn Jona im ej pãd ijin.
33 Ãlikin an juon armej tile juon l̦aam̦, ejjab likũti ilo ijo ettino im ejjab kalbubuuki kõn iep.* Bõtab, ej likũti ilo ijo jikin l̦aam̦ bwe ro rej del̦o̦ñ ren maroñ lo an meram.
34 Mejam̦ ej ãinwõt l̦aam̦ ñan ãnbwinnũm̦. Ñe mejam̦ ej kalimjek juon wõt men, aolepen ãnbwinnũm̦ enaaj meram. Ak ñe eobrak kõn ebbanban,* aolepen ãnbwinnũm̦ enaaj marok.
35 Kwõn kanooj lale bwe meram eo ilo kwe en jab oktak im marok.
36 Innem ñe aolepen ãnbwinnũm̦ emeram im ejjel̦o̦k jidik marok ie, enaaj lukkuun meram ãinwõt ñe meramin l̦aam̦ ej rome eok.”
37 Ke ej dedel̦o̦k an ba men in, juon Parisi ear kajjitõk bwe en etal im kõjota ippãn. Innem ear etal ñan m̦weo im̦õn im kõjota ippãn.
38 Parisi eo ear bwilõñ ke ej lo bwe Jesus ear jab kwal̦ pein* m̦okta jãn an m̦õñã.
39 Ak Irooj ear ba ñane: “Kom̦ Parisi ro, kom̦ij ãinwõt kõnno̦ ko erreo itulikier bõtab ettoon ilowaaer. Bũruomi eobrak kõn arõk im men ko renana.
40 Kom̦ lukkuun jajel̦o̦kjen̦! Eo ear kõm̦m̦ane itulik, ear bar kõm̦m̦ane itulowa, ejjab ke?
41 Kom̦win jipañ ro rejeram̦õl jãn tum̦wilal̦in bũruomi, innem kom̦ naaj erreo ilo men otemjej.
42 Jerata ñan kom̦ Parisi ran̦ kõnke kom̦ij lel̦o̦k juon m̦õttan joñoul in mint,* ru,* im aolep keinikkan* ko jet, bõtab kom̦ij kõjekdo̦o̦n ekajet jim̦we im jouj eo an Anij! Em̦ool emenin aikuj bwe kom̦win lel̦o̦k juon m̦õttan joñoul ko ami, bõtab kom̦win jab kõjekdo̦o̦n men ko jet.
43 Jerata ñan kom̦ Parisi ran̦ kõnke kom̦ kõn̦aan jijet ilo jea ko im̦aantata* ilo im̦õn kabuñ ko, im kom̦ kõn̦aan bwe armej ren yokyokwe kom̦ ilo jikin wia ko!
44 Jerata ñan kom̦ kõnke kom̦ij ãinwõt lõb ko rejjab alikkar* im armej rej etetal ioer ak rejaje!”
45 Innem juon iaan ro retijem̦l̦o̦k kõn Kien eo ear ba ñane: “Ri-Kaki, ilo am̦ ba men kein, kwõj kajook bar kõm.”
46 Im eba ñane: “Jerata ñan bar kom̦ ro retijem̦l̦o̦k kõn Kien eo, kõnke kien ko kom̦ij kõm̦m̦ani ñan armej rej ãinwõt men ko reddo ñan kotaki. Bõtab kom̦ make kom̦ij jab kotaki men kein kõn juon iaan addiin peimi!*
47 “Jerata ñan kom̦ kõnke kom̦ij kakõm̦anm̦anl̦o̦k lõb* ko libõn ri-kanaan ro, bõtab ro jim̦m̦ami rar m̦an er!
48 Kom̦ kanooj jel̦ã kõn jerbal ko an ro jim̦m̦ami im kom̦ij rejetaki men ko rar kõm̦m̦ani. Rar m̦an ri-kanaan ro bõtab kom̦ij kakõm̦anm̦anl̦o̦k lõb ko an ri-kanaan rein.
49 Eñin unin kõn an Anij mãlõtlõt ear ba: ‘Inaaj jilkinl̦o̦k ri-kanaan im rijjilõk ro ñan er, im renaaj m̦an jet iaaer im kaeñtaan jet iaaer.
50 Kõn men in, enaaj wõr ruõn epepen in kõn bõtõktõkin aolep ri-kanaan ro kar kato̦o̦rl̦o̦k bõtõktõkier jãn jinoin lal̦,*
51 jãn kar Ebel l̦o̦k ñan Zakeraias, eo rar m̦ane ikõtaan lokatok eo im tampel̦ eo.’ Ij ba ñan kom̦ bwe enaaj wõr ruõn epepen in kõn bõtõktõkier.
52 “Jerata ñan kom̦ ro retijem̦l̦o̦k kõn Kien eo, kõnke kom̦ar bõk ki eo ñan jel̦ãl̦o̦kjen̦. Kom̦ar jab del̦o̦ñ im kom̦ij kajjioñ in bõbrae ro rej del̦o̦ñl̦o̦k!”
53 Innem ke ear diwõjl̦o̦k jãn ijo, skraib im Parisi ro rar kaapool̦e im kajitũkini kõn elõñl̦o̦k kajjitõk,
54 im rar kõttar im lale ta eo enaaj bar ba bwe ren kõm̦m̦an ruõn.
Footnotes
^ Ak “Kien eo am̦.” Lale “Aelõñ eo an Anij” ilo Kõmel̦el̦e Ko.
^ Kajin Grik, “pilawã.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Ak “del̦o̦ñ.”
^ Ãt eo juon etan Setan.
^ Kajin Grik, “kõkal̦l̦e.”
^ Ak “jetõb kwõjarjar.” Lale “Jetõb kwõjarjar” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Kajin Grik, “kõkal̦l̦e.”
^ Lale “Nejin armej” ilo Kõmel̦el̦e Ko.
^ Ak “juon iep in kein joñak.”
^ Mel̦el̦ein, ej kalimjek elõñ men. Kajin Grik, “nana.”
^ Parisi ro im ri-Ju ro jet rekõn kwal̦ peier ekkar ñan wãween m̦anit eo an ri-Ju.
^ Juon kain menin eddek rej kõjerbale ñan kõm̦m̦an uno im rej bar kãre m̦õñã kake.
^ Ak “menin eddek.”
^ Ak “rem̦m̦antata.”
^ Ak “lõb ko ejjel̦o̦k kõkal̦l̦eier.”
^ Emaroñ kõnono kõn aer m̦akoko in kõmeraikl̦o̦k eddo ko armej rej ineeki.
^ Kajin Grik, “libõn keememej.”
^ Ej jitõñl̦o̦k ñan tõre ko an ajri ro nejin Adam im Iv.
