Awe. Lyonsi tukasimikila ku ng’anda ni ng’anda, nomba tutazumila ukuti ukusimikila u kungalenga tupusuke. (Efeso 2:8) U mulandu ci?

 Elenganyini pa cilangililo cii: Tuti umonsi umwi uwa cikuku walaya ukupeela uwila wa mutengo sana kuli wensi alazanwa pa ncende ni nsita ino umwineco watatantika. Uzye ndi cakuti imutaila ulayo wa monsi wiyo, mungacita vino wamunena? Kwaula ukutwisika mungacita vivyo kwene. Mungalondolwelako na ya lupwa inu ni vyuza pakuti nayo yakapeelweko. Nomba ukucita vino umonsi wiyo watamunena, asi u kungalenga kuti mupoke upe. Pano ala umonsi wiyo wataitemelwa sile ukupeela uwila.

 Fwandi ya Nte Yakwe Yeova nayo yazumila ukuti Leza alapeela umi wa pe ku yantu ya cuvwila. (Loma 6:23) Tukaezya na maka ukulondolwela antu pali vino twataila, pano tukalonda ukuti nayo kwene yakapeelwe umi uwo uno Leza walaya. Nomba tutaazumila ukuti kusimikila u kungalenga kuti tukapusuke. (Loma 1:17; 3:28) Kutaaya ivintu vino umuntu angacita ivingamupeela insambu zyakuti nanti ciye uli Leza alamupususya. “Wene watutuzile. Citali apa mulandu wa vicitwa visuma vino twacita, lelo a pa mulandu wa mizu yakwe umwisikulu acino watutulile.”—Tito 3:5.