Uzye Ukupusuka I Cani?
Vino Baibo yalandapo
Amazwi yakuti “pususya” nanti “ukupusuka” yaomviwa na ya kalemba yakwe Baibo pakulondolola umuntu uwatakululwa ukufuma uku uzanzo nanti uononesi. (Kufuma 14:13, 14; Milimo 27:20) Nanti ciye vivyo ilingi amazwi ya yakalozya ukukukululwa ukufuma uku luyembu. (Mateo 1:21) Pa mulandu wakuti imfwa yayelako pa mulandu wa luyembu, antu aakululwa ukufuma uku luyembu yakwata upalilo wa kwiza ikala amanda pe.—Yoane 3:16, 17. a
I cani cino umuntu alinzile ukucita pakuti apusuke?
Pakuti mupusuke, mulinzile ukukwata utailo muli Yesu nu kulanga ukuti mwakwata utailo lino mukuvwila masunde yakwe.—Milimo 4:10, 12; Loma 10:9, 10; Ayebulai 5:9.
Baibo ikalanga ukuti mulinzile ukukwata imilimo nanti imilimo ya cuvwila pakuti mulange ukuti mwakwata utailo wa umi. (Yakobo 2:24, 26) Nomba cico cisikupiliula ukuti mungapusuka. Lelo u ku “wila wakwe Leza” uwemelela pa “cikuuku” cakwe nanti uluse lwakwe.—Efeso 2:8, 9.
Uzye mungapanya isyuko lya kupusuka?
Ee. Wakwe vivi kwene vino umuntu wino yapususya uku kumwela angaponela nanti ukutolokela umu manzi nupya, avino nu muntu uwatakululwa uku luyembu nomba avilwa ukutwalilila ukuya nu utailo angavilwa ukupusuka. Ali mulandu uno Baibo ikakomelezezya Aina Klistu aakululwa “kutwalilila mu ulwi wa kucingilila utailo.” (Yuda 3) Nupya ikacelula yonsi yano yakululwa ukuti: “Twalililini kuomba mu coopo nu kuzakaza kuti mufikilizye ufyusi winu.”—Filipi 2:12.
Uzye kapususya a weni pali Leza na Yesu?
Baibo ikalanda ukuti kuli Leza ali kuno kukafuma kupusuka, ilingi ikamwama ukuti ‘Katuula.’ (1 Samueli 10:19; Ezaya 43:11; Tito 2:10; Yuda 25) Nupya Leza waomvizye aonsi apusanepusane ukukulula aina Izlaeli ya mpiti, nupya Baibo ikaama antu yayo ukuti ‘yakapususya.’ (Neemiya 9:27; Yakapingula 3:9, 15; 2 Yamwene 13:5) b Vivyo kwene avino caya na kuli Yesu pa mulandu wakuti Leza akapususya antu ukupitila umu mpolelwa yakwe Yesu Klistu, Baibo ikaama Yesu ukuti “Katuula.”—Milimo 5:31; Tito 1:4. c
Uzye yonsi yalapusuka?
Awe, antu yamwi yatalapusuka. (2 Tesalonika 1:9) Lino Yesu yamuzizye ukuti “Uzye antu alatuulwa anono sile?” waswike ati, “Lwisini kwingilila pa mulyango ufyenkane. Pano namunena vino antu aingi yalalonda kwingila, lelo yalaposiwa.”—Luka 13:23, 24.
Ivya ufi pa kupusuka kwakwe yonsi umu nsi
Ufi: Ilembelo lyakwe 1 Kolinto 15:22 likasambilizya ukuti antu yonsi yalapusuka pano likati ‘muli Klistu amuno yonsi yalayela nu umi.’
Icisinka: Cikomo cii cikalanda pa kutuutuluka. (1 Kolinto 15:12, 13, 20, 21, 35) Fwandi amazwi yakuti ‘muli Klistu amuno yonsi yalayela nu umi’ yakapiliula ukuti yonsi alatuutululwa yalapolelelwa ukupitila muli Yesu Klistu.—Yoane 11:25.
Ufi: Ilembelo lyakwe Tito 2:11 likasambilizya ukuti antu yonsi yalapusuka pano likati Leza ‘akutuula antu onsi.’—International Standard Version.
Icisinka: Izwi lya Cigliki ilyasenulwa ukuti “onsi” umu cikomo cii lingapiliula nu kuti “amisango yonsi nanti apusanepusane.” d Fwandi vino ilembelo lyakwe Tito 2:11 likalandapo ivya kuti Leza akulenga antu amisango yonsi ukupusuka ukwikako sile na antu amu “nko zyonsi, mu mitundu ya antu nu mu ndimi zyonsi.”—Umbwilo 7:9, 10.
Ufi: Ilembelo lyakwe Petulo wakwe ciili 3:9 likasambilizya ukuti antu yonsi yalapusuka pano likati Leza “asyalonda kuti muntu umwi akononwe.”
Icisinka: Leza akalonda antu yonsi ukupusuka, nomba asiyapatikizya ukuzumila isyuko lino yapeelwa ilya kupusuka. Pa wanda wakwe “uwa upinguzi” palaya “nu kunonwa kwa antu asipepa.”—2 Petulo 3:7, NWT.
a Baibo ikalanda pa muntu ukuti ‘watulwa’ nanti icakuti umuntu wiyo atatala wapusuka.—Efeso 2:5; Loma 13:11.
b Umu malembelo atiyambulwa, mu Mabaibo yamwi yasenula ukuti “kacimvya” “kapususya” “mpalume” “ntunguluzi” nanti sile “umwi” ukucila ukuti “katuula.” Nomba umu lulimi lwa Ciyebulai luno Baibo yalembiilwemo, izwi ilililimwi likaomviwa sile nu ku yantu atiyatuula auze wakwe na vino likaomviwa mu malembelo yauze ndi cakuti Baibo ikulanda pali Yeova Leza ukuya Katuula.—Masamu 7:10.
c Izina lyakuti Yesu lyafuma ukwi zina lya Ciyebulai ilyakuti Yehoh·shuʹaʽ, ilikapiliula ukuti “Yeova Ali Kapususya.”
d Lolini ibuku lyakuti Vine’s Complete Expository Dictionary of Old and New Testament Words. Izwi ilililimwi ilya Cigliki likazanwa api lembelo lyakwe Mateo 5:11, apaya amazwi yano Yesu walanzile akuti antu yalalanda ivintu iviipe ivya misango yonsi pa yalondezi yakwe.—International Standard Version.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Baibo Ikasambilizya Ukuti ‘Ndi Wapusuka Lyonga Ala Casila Wapusikilila’?
Yesu wapeezile icilangililo icasuka iuzyo lii.
MASAMBILILO AA MULI BAIBO AACINDAME
U Mulandu ci Uno Yesu Wafwilile?
Baibo ikalanda sana pa mfwa yakwe Yesu ukuti yali icindame. Uzye imfwa yakwe yalondekwanga?