Uzye Mungikala Uli Manda pe?

LIZYINI

Vino Baibo yalandapo

Baibo yatulaya ukuti: “Umuntu wino akacita kulonda kwakwe Leza akaikalilila manda pe.” (1 Yoane 2:17,Holy Bible—Easy-to-Read Version) I vyani vino Leza akalonda ukuti mwacita?

Ukusambilila pali Leza na pa Mwanakwe Yesu. Lino Yesu wapeefile kuli Leza walanzile ukuti: “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.” (Yoane 17:3) I vyani ivyaya mu “kumanya” Leza na Yesu? Mungayamanya ndi cakuti mukusambilila Baibo nu kuomvya vino mukusambilila mu umi winu. a Muli Baibo mwaya amelenganyo yakwe Kaumba witu Yeova wino ali Kapeela wa Umi. (Milimo 17:24, 25) Nupya Baibo kwene ikatunena na pa mwanakwe Yesu, uwasambilizyanga ‘amazwi akapeela umi.’—Yoane 6:67-69.
Mulinzile ukutaila mu mpolelwa yakwe Yesu. Yesu wizile pano nsi “kuti atumikile yauze nu kupeela umi wakwe.” (Mateo 20:28) Impolelwa yakwe Yesu yalenga antu yaye nu upaalilo wa kwikala mu Paladaise pano nsi amanda pe. b (Masamu 37:29) Yesu watile: “Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wa pe.” (Yoane 3:16) Mulinzile ukumanya ukuti kwaya ivingi ivikalondekwa, asi ukuzumila sile muli Yesu foo. Tulinzile ‘kumutaila,’ ukulaomvya vino akatusambilizya alino nu kucita vino Isi akalonda.—Mateo 7:21; Yakobo 2:17.
Mulinzile ukukomya ucuza winu na Leza. Leza akalonda ukuti tupalame kuli aliwe nu kuya ya cuza yakwe. (Yakobo 2:23; 4:8) Leza wayako amanda pe. Atalatala afwe, nupya akalonda ukuti na aomvi yakwe kwene yakikale amanda pe. Muli Baibo Leza walondolola vino akalonda yonsi amutaila yaye, wati: “Si angala yaye nu longo amanda pe!”—Masamu 22:26.

Ivya Ufi Vino Antu Yakalanda pa Kwikala Manda Pe

Ivya ufi: Ngi cakuti antu yaombesya yangaca yaikala manda pe.

Icisinka: Nanti icakuti aomvi ya mu vipatala yalaya ukuti yamaombesyanga pakuti yalenga umi wa yantu wazipilako, ukuombesya kwao kutalalenga antu yaikala manda pe. Leza sile aliwe angatupeela umi wa pe, pano ali “ntendekelo ya umi.” (Masamu 36:9) Watulaya ukuti, ‘alonona imfwa manda pe’ nu kuti antu yakwe acisinka yalikala amanda pe.—Ezaya 25:8; 1 Yoane 2:25.

Ivya ufi: Antu sile ankanda zimwi aliyo yalikala manda pe.

Icisinka: Leza ataya na kasoozi. Lelo “wensi akamoopa nu kucita vyawololoke, wene akazengelwa nawe nanti angala uwamu mutundu uze.” (Milimo 10:34, 35) Antu ankanda ni nkulilo zipusanepusane akauvwila Leza yonsi yangikala amanda pe.

Ivya ufi: Ukwikala amanda pe kulauvwisya ukasu.

Icisinka: Leza uwaya nu kutemwa nupya akalonda twaya ni nsansa aliwe akalonda twaikala manda pe. (Yakobo 1:17; 1 Yoane 4:8) Wamanya ukuti pakuti tuye ni nsansa, tukalondekwa ukukwata mulimo wa mpomvu wa kuomba. (Kasambilizya 3:12) Leza walaya ukuti yayo yonsi alikala manda pe yalikala ningo, yalakwata incito zya kuomba zino yalaipakizya kuomba pamwi ni ndupwa zyao.—Ezaya 65:22, 23.

Nupya, yayo yonsi alikala amanda pe yalatwalilila ukusambilila ivintu ivipya pali Kaumba wao alino na pa milimo yakwe iya kuzungusya. Wapanzile antunze nu mwenzo wa kulondesya ukuya nu umi wa pe alino nu kusambilila pali aliwe, nanti icakuti atayapeela “ukumanya kumalilike ukwakumanyikisya vino wene akacita.” (Kasambilizya 3:10, 11) Fwandi yayo alikala manda pe lyonsi yalakwata ivintu ivisuma ivya kusambilila nu kucita.

a Ya Nte Yakwe Yeova yakasambilizya antu Baibo uwila sile. Pakuti mumanyilepo na vyuze mutambe vivdyo wakuti Ivyani Ivikacitika pi Sambililo Lya Baibo?

b Lolini icipande cakuti “Yesu Watuuzile Antu—Wayatuuzile Uli?”