Kutatala kwaya umuntunze uwalolapo Leza na manso yakwe. (Kufuma 33:20; Yoane 1:​18; 1 Yoane 4:​12) Baibo ikati “Leza u mupasi,” kuli kuti wene atanga aloleke ku manso ya antunze.​—Yoane 4:​24; 1 Timoti 1:​17.

 Lelo angeli yene yangamulola, pano nayo kwene yaaya umu mupasi. (Mateo 18:10) Nakapya, antu yamwi ndi yafwa yalatuutulukila ukwi yulu nu mwili wa mupasi fwandi nayo kwene yalaya yakaalola Leza.​—Filipi 3:​20, 21; 1 Yoane 3:2.

 Ilingi Baibo ikaomvya izwi ukulola mu unkolanya ndi ikulanda pa kwiluka cimwi. (Ezaya 6:​10; Yelemiya 5:​21; Yoane 9:​39-​41) Fwandi kuli kuti, umuntu angalola Leza ukuomvya ‘umwenzo wakwe’ ndi waya sana nu utailo wa kulondesya ukumanya Leza nu kutemwa imiyele yakwe. (Efeso 1:​18) Baibo yatulondolwela ivyakulondela pakuti tuye nu utailo wa musango uwo.

•   Sambililini mumanye imiyele yakwe, wakwe ukutemwa, na ukapekape, alino na amano, na amaka, ivikalolekela muli vino waumba. (Loma 1:​20) Lino Yobo yamwazwile ukwiusya vino Leza waumba, Yobo wayuvwile ungati walola Leza na manso yakwe.​—Yobo 42:5.

•   Mungamanya Leza Ndi Mukusambilila Baibo. Baibo Ikatunena iti, “Ndi cakuti wamulondalonda [Leza], ulamuzana.”​—1 Milandu 28:9; Masamu 119:2; Yoane 17:3.

•   Mungasambilila pali Leza ndi mwalola vino Yesu wacitanga. Vivi kwene sile vino Yesu wali ali vino na Isi, Yeova Leza, waya, ali cino Yesu walandiile ati: “Wino wandola, walola na Tata kwene.”​—Yoane 14:9.

•   Mwaya ni miyele ino Leza watemwa, nga alino mulalola vino alamwazwa. Yesu walanzile ati: “Alongo antu amyenzo iswepe. Pano yalalola Leza.” Wako vino itulanda mpiti, antu yamwi aakazanzya Leza yalatuutulukila ukwiyulu, fwandi ‘yalalola Leza’ kuku kwene.​—Mateo 5:8; Masamu 11:7.

 Mu malyasi akuti ndi twawelenga iyuvwika kwati antu yaweni Leza na manso yao kwene, ndi mwalondela ningo ilyasi, ala mumazana ukuti umungeli ali wino yaweni, nanti ala yaweni sile icilolwa.

 Angeli

. Mpiti, Leza watumanga angeli ukumwimililako nu kuyalolekela nu kumuvwangilako ku yantu. (Masamu 103:20) Wakwe, insita imwi Leza wavwanzizye Mose mu cimpuza icapyanga, napya Baibo ikati “Mose aivimba pa manso pa mulandu wa koopa kulola Leza.” (Kufuma 3:​4, 6) Lelo Mose ataaweni Leza na manso yakwe, pano ndi mwalondela ilyasi mumazana ukuti uno mose waweni u ‘mungeli wakwe Yeova.’​—Kufuma 3:2.

 Alino nupya, ndi Baibo yati Leza “wavwanganga na Mose manso na manso,” ala cikupiliula ukuti Leza walolanga Mose ukuya a cuza wakwe napya na pa kulanzyanya nawe cali sile kwati u muntu muze. (Kufuma 4:​10, 11; 33:11) Mose ataaweni icinso cakwe Leza, pano ivyeo vino wapokeeliile kufuma kuli Leza “angeli ayano yalesile.” (Galatiya 3:​19; Milimo 7:​53) Nomba utailo uno Mose wakweti wali ukome sana icakuti Baibo ikamulondolola ukuti “cali kwati waweni Leza wino asyaloleka.”​—Ayebulai 11:27.

 Vivi kwene vino walanzyanyizye na Mose kuomvya angeli, avino Leza walanzyanyizye na Abulaamu. Ukuya kwene, ndi umwi wawelenga sile ilyasi lya muli Baibo ukwaula ukwikisyako mano, anguvwa kwati yakuti Abulaamu waweni Leza na manso yakwe. (Utandiko 18:​1, 33) Lelo ndi twalondela ningo ilyasi tukamanya ukuti “aonsi yatatu” aizile kuli Abulaamu yaali aangeli yano Leza watumile. Abulaamu wayamanyile ukuti yimililangako Leza, fwandi pa kuyavwanzya walandanga ungati akulanda na Yeova umwisikulu.​—Utandiko 18:​2, 3, 22, 32; 19:1.

 Vilolwa

. Leza waloliikepo nu ku yantu mu vilolwa, ivikaloleka sile kwati vikucitika fwandi ala u mu melenganyo ya muntu sile. Wakwe vino Baibo yati Mose na ina Izlaeli “yalola Leza wino aina Izlaeli yapepanga,” i cisinka i cakuti “yaweni cilolwa cakwe Leza”. (Kufuma 24:​9-​11, NWT) Napya, insita zimwi Baibo yati ya kasema ‘yaweni Yeova.’ (Ezaya 6:1; Danieli 7:9; Amosi 9:1) Ndi mwalondela ningo ilyasi lyonga na lyonga, munguvwikisya ukuti cali i cilolwa cino yaweni asi Leza kwene mu cumi.​—Ezaya 1:1; Danieli 7:2; Amosi 1:1.