Nkulonda Kufwa—Uzye Baibo Ingangazwa Ndi Cakuti Nkwelenganya pa Kuikoma?
Vino Baibo yalandapo
Ee! Baibo yafuma kuli “Leza aakateekezya aali nu ulanda.” (2 Kolinto 7:6) Nanti cakuti Baibo asi ibuku ilikalanda pa myelenganyizizye ya yantu, yazwa antu aingi sana ukuta ukwelenganya pa kuikoma. Vino Baibo ikalanda namwe kwene vingamwazwa.
U kupanda mano ci ukwaya muli Baibo?
● Mwalanda vino mukuyuvwa.
Vino Baibo Ikasambilizya: “Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?”—Mapinda 17:17.
Vino cikapiliula: Tukalondekwa ukwaziwa na yauze lino tuli sana na masakamika.
Ndi cakuti musikunenako yauze vino mukuyuvwa, cingamutalila ukumala intazi iyo. Lelo nga mwanenako yauze vino mukuyuvwa, mungata ukusakamikwa sana nupya mungateekeziwa.
Ezyini ukucita vii: Neniniko umwi, limwi angaya lupwa winu nanti cuza wino mwataila pa ntazi ino mukweti. a Nupya mungalemba na vino mukuyuvwa.
● Mwalenga uwazwilizyo uku ya kucipatala.
Vino Baibo ikasambilizya: “Antu apuma yasilondekwa uwa kuyapozya, suka alwale.”—Mateo 9:12.
Vino cikapiliula: Tukalondekwa ukuya uku cipatala lino itulwala.
Kwelenganya pa kuikoma kungalangilila ukuti limwi muntu walwala ulwale wa mu melenganyo. Mutalinzile ukuvwa insonyi pa ulwale uu, pano nao kwene waya wa ndwala zyonsi. Indwala zya mu melenganyo nazyo kwene zingapoziwa.
Ezyini ukucita vii: Landini na dokota zuwa.
● Mwaiusya ukuti Leza akamusakamala.
Vino Baibo ikasambilizya: “Uzye utunyi 5 utunono tusikalwa nu tupiya twili utunono sana? Nomba kusi nanti konga kano Leza akailila. . . . Mutaatiina; pano mwacindama ukucila utunyi utwingi.”—Luka 12:6, 7.
Vino cikapiliula: Mwacindama kuli Leza.
Limwi mungayuvwa ukuti kusi uwamwikako mano, nomba Leza akalola vino mukupitamo. Akamusakamala na lino mukuyuvwa ukuti cazipa ukufwa. Pa Masamu 34:18 pakati: “Yawe [Yeova] akaya umupipi sana na yayo ati yaputuka imisana. Wene akapususya antu yano yati yapelelwa amano.” Leza akalonda ukuti mutwalilile ukuya nu umi pano wamutemwa.
Ezyini ukucita vii: Londelezyini usininkizyo muli Baibo ukalanga ukuti Yeova wamutemwa. Wakwe, lolini Lupungu Lwa Mulinzi Na. 3 2018.
● Mwapepa kuli Leza.
Vino Baibo ikasambilizya: ‘Mwasumbila masakamika inu pali Leza, pano wene akamusakamala.’—1 Petulo 5:7.
Vino cikapiliula: Leza akalonda ukuti mwamunena vyonsi ivikumusakamika.
Leza angamwazwa ukuya nu mutende nu kutwalilila ukuzizimizya. (Filipi 4:6, 7, 13) Ikwene, ali nzila ino Leza akaazwilamo aakapepa kuli aliwe nu mwenzo onsi.—Masamu 55:22.
Ezyini ukucita vii: Mupepe kuli Leza ilelo. Muomvye izina lyakwe ilyakuti Yeova, nu kumunena vyonsi vino mukuyuvwa. (Masamu 83:18) Mumulenge ukuti amwazwe ukutwalilila ukuzizimizya.
● Mwaelenganya pali vino Baibo yalanda ukuti vilacitika uku nkoleelo.
Vino Baibo ikasambilizya: “Tukweti upaalilo uu uwaya wa nanga apasintilila umi witu.”—Aebele 6:19.
Vino cikapiliula: Vino mukayuvwa vingaasenukasenuka wakwe vino uwato ukasenula imipitile nga kuli maimbi, lelo upaalilo wa muli Baibo ungamwazwa.
Upaalilo uu asi wa kwelenganya sile lelo wasintilila pali vino Leza watulaya ukuti alafumyapo ukucula konsi.—Kusokolola 21:4.
Ezyini ukucita vii: Belengini isambililo 5 mu kabuku kakuti Ilyasi Lisuma Lino Leza Akutuneena! pakuti musambilile na vyuze pa upaalilo wa muli Baibo
● Mwacita ivintu vino mukaipakizya.
Vino Baibo ikasambilizya: “Umwenzo wa nsansa umulembo usuma sana.”—Mapinda 17:22.
Vino cikapiliula: Nga tukucita ivintu ivikalenga tuye ni nsansa, cingalenga tuye na melenganyo asuma.
Ezyini ukucita vii: Citiniko vimwi ivikamulenga ukuya ni nsansa. Wakwe, mukutike uku nyimbo nanti ukubelenga vimwi ivikamukomelezya, nanti muciteko vimwi vino mwatemwa sana. Mulaya sana ni nsansa lino mukwazwilizyako yauze, nu mu tuntu utunono.—Milimo 20:35.
● Mwasakamala uumi winu.
Vino Baibo ikasambilizya: “Ukutukusya umwili kukaavwa.”—1 Timoti 4:8.
Vino cikapiliula: Tukaya nu umi usuma nga tukutukusya umwili, ukulaala insita ilinge, nu kulya ivyakulya visuma.
Ezyini ukucita vii: Simuliniko panono, nanti sile apa mamineti 15.
● Mwaiusya ukuti vino tukayuvwa alino ni vintu vyuze umu umi vikasenuka.
Vino Baibo ikasambilizya: “Musimanya vino umi winu ulaya mutondo.”—Yakobo 4:14.
Vino cikapiliula: Intazi izikaleta masakamika nanti zyaloleka ukuti mutanga muzicimvye, izya pa kasita sile.
Nanti cakuti intazi zino mukweti zingaloleka ukuti mutanga muzicimvye, vintu vingasenuka. Fwandi mwalonda inzila zimwi izingamwavwa ukuzizimizya. (2 Kolinto 4:8) Intazi zino mukweti limwi zingaca zisenuka, nomba nga mwaikoma ala casila.
Ezyini ukucita vii: Belengini malyasi aa muli Baibo aakalanda pa yantu auvwanga sana uyi icakuti iyalonda nu kufwa, alino mulole vino ivintu vizile iviyazipila nupya insita izingi vivyo vyacitikanga umu nzila zino yatenekelanga. Lolini yamwi yano vii vyacitikiile.
Uzye Baibo yalandapo pa yantu yamwi aalondanga ukufwa?
Ee. Baibo ikalanda pa yantu yamwi aalanzilepo mazwi aakolineno na akuti, “nkulonda ukufwa.” Leza atayakalipile, lelo wayazwilizye. Namwe kwene alamwazwa.
Eliya
● Uzye wali a weni? Eliya wali a kasesema umusipe. Nomba nawe kwene pa nsita imwi watoovwike. Pali Yakobo 5:17 pakati: “Eliya wali u muntu wakwe sweswe kwene.”
● U mulandu ci uno walondelanga ukufwa? Pa nsita imwi, Eliya wayuvwile ukuzukilwa, uwa ntete, nupya uwa sile sile. Fwandi wapaapasile Yeova ati: “Ala cacilamo sile! Awe cumi ni mfwa yazipa.”—1 Yamwene 19:4.
● I cani camwazwilizye? Eliya wanenyile Leza vino wayuvwanga. Uzye Leza wamukomelizye uli? Leza wamulangilile ukuti wamwikako mano nupya wamulangilile ukuti a Leza wa maka. Wazwilizye Eliya ukumanya ukuti wacindama nupya wamupeezile umuntu wa kumwazwa nu kumusakamala.
▸ Belengini lyasi ilikalanda pali Eliya pali 1 Yamwene 19:2-18
Yobo
● Uzye wali a weni? Yobo wali umukankala nupya wakweti ulupwa uluku, alino waombelanga Leza wa cumi na ucisinka.
● U mulandu ci uno walondelanga ukufwa? Ukwaula ukwenekela, ivintu ivingi iviipe vyacitikile Yobo. Waponzizye ivyuma vyakwe vyonsi. Ana yakwe yonsi yafwile umu uzanzo. Walwile ulwale uwipisye. Nu mukusyakizya, yamubepizye ukuti wailetiile intazi zizyo umwineco. Yobo watiile: “Nemo napata umi wane, nsilonda ukwikalilila pano nsi.”—Yobo 7:16.
● I cani camwazwilizye? Yobo wapefile kuli Leza nu kulanzyanyako na yauze. (Yobo 10:1-3) Cuza wakwe uwali ni cikuuku Eliu wamukomelizye, nu kumwazwa ukulaelenganya ivipusaneko pa ntazi ino wakweti. Ni cicindamisye icakuti, uvwilile vino Leza wamwazwilizye nu kumulungika.
▸ Belengini lyasi ilikalanda pali Yobo, pali Yobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mose
● Uzye wali a weni? Mose wali intunguluzi iya Ina Izlaeli nupya kasesema wa cisinka.
● U mulandu ci uno walondelanga ukufwa? Mose wakweti imilimo ingi, antu yamukaanyanga sana, nupya wayuvwanga umutonte. Wapaapasile ni izwi lyuvwike nu kunena Leza ati: “Cazipa sile nu kunkoma.”—Mpendwa 11:11, 15.
● I cani camwazwilizye? Mose wanenyile Leza vino wayuvwanga. Leza wazwilwizye Mose ukucefyako masakamika ukupitila umu kumupokako imilimo imwi.
▸ Belengini lyasi ilikalanda pali Mose pa Mpendwa 11:4-6, 10-17
a Ndi cakuti mwatandika ukwelenganya pa kuikoma nupya mutakweti wino munganenako pa ntazi iyo, tumilini akaazwilizya ali ni ntazi nga kuno yaya uku ncende inu.
Limwi Mungatemwa Ukulolako na Vii
LUPUNGU LWA MULINZI
Uzye Umi Wacindama?
Uzye intazi imwi iipisye yatala yamulengapo ukuyuzya mweineco ndi cakuti umi wacindama?
MASAMBILILO AA MULI BAIBO AACINDAME
U Mulandu ci Uno Leza Atalesezya Ucuzi?
Antu aingi yakauzya umulandu uno umu nsi mwavulila ulupato nu ucuzi. Vino Baibo ikaasuka vikatukomelezya nu kututeekezya.
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.