UMU MYAKA YA LIKWENE, YALONDELEZYANGA PALI VINO CIKAWAYA NDI MWAFWILWA MUTEMWIKWA. Nanti cali vivyo, vino alondelezyanga yazanyile, vyuvwana sana na mano akazanwa mwibuku lyampiti kulikuti Baibo, vino tulanzilepo nu kucisila. Vikwene vikalanda ningo pa utunguluzi ukaavwa sana uwaya muli Baibo. Nomba, muli Baibo mwaya kupanda mano ukwingi sana. Mwaya ivyeo vino mutanga muzane na kuuze, ivingavwa ningo nu kuteekezya sana yonsi akulosya.

• Usininkizyo wakuti atemwikwa itu afwa yasikucula

  Pali Kasambilizya 9:5, pakati: “Afwe yatamanya nanti acimwi,” nupya Baibo ikati “amapange yao yasililikila.” (Masamu 146:4) kulingana na mazwi kwene yaa, Baibo ikakolanya imfwa ku tulo.—Yoane 11:11.

• Ukuzumila muli Leza uwaya nu kutemwa kukatuteekezya

  Baibo ikalanda vii pali Masamu 34:15: ‘Yeova a aliwe ali kalinda wa yalungame, nupya wene akauvwa ni nkuta zyao.’ Ukupepa kuli Leza nu kumulondolwela vino tukuyuvwa, aali cintu cicindame kuluta nu kuteekeziwa konsi kuno tungapokelela kuli wino twalanda nawe. Nupya cingatwavwa ukukomya ucuza na Kaumba witu, wino angaomvya amaka yakwe kuti atuteekezye.

• Tukuloleela ivintu visuma ivilaya ku nkoleelo

  Tale elenganyini ku nsita ya ku nkoleelo lino yonsi ali mu malindi yalafumamo nu kuya nu umi pano nsi kwene! Baibo ikalandapo sana pa nsita kwene iyo. Ikalondolola na vino vintu vilaya pano nsi, ikati: “Wene alakumbula minsozi yonsi [ku manso itu]. Kutalaya imfwa nupya. Kutalaya kulosya nanti kulila, nanti kuvwa kuwaika.”—Umbwilo 21:3, 4.

Antu aingi yano yazumila muli Yeova, Leza umwineco wakwe Baibo, yateekeziwa sana, pano yasambilila ivyakutaila mu upalilo wakuti yalalola nupya atemwikwa yao afwa. Katulande pali ya Ann afwililwe yawao ala ikala imyaka 65 mu cupo, yatiile: “Baibo yankomelezya sana ukuti atemwikwa itu afwa, yasicula nupya Leza alatuutulula yonsi kwene yano akaiusya. Fwandi nganelenganyapo pali vii vikangavwa sana nga niusya pali cino naponzya nupya kucita vii kukangavwa kuzizimizya cintu cino cancitikiile.

Ya Tiina, yano itulandapo mpiti kucisila, yatiile: “Kufuma sile pano ya wane ya Timo yafwilile, nkauvya ukuti Leza akansakamala sana. Nkalola vino Yeova akangazwa ndi naya na maavya. Nupya ulayo wa muli Baibo wakuti aafwa yalatuutuluka waya uwa cumi kuli nene. Nupya ukankomelezya wakwe cimwi kufika sile na pa insita ino ndalolana nupya na ya wane ya Timo.”

Amelenganyo yaa yakalanga sile vino antu aingi sana yasininkizya ukuti vino Baibo yalanda, i vya cumi. Nanti icakuti mukauvwa ukuti vino Baibo ikalanda visi vya cumi nanti limwi iviloto sile, ale mufwile kulondelezya visinka ivikalanga ukuti Baibo ikasunda nupya mwaya malayo acumi. Limwi mulazana nu kuti Baibo aali ino ingavwa sana yonsi akulosya.

Tambini mavidyo akulanda pi lyasi kwene lii apa webusaiti, jw.org

 UZYE AFWE YAAYA ULI?

UZYE MUNGATEMWA KUVWAKO ILAYSI LISUMA