ATWALANE
2: Kuombela Pamwi
VINO CIKAPILIULA
Ndi cakuti iya nu muci yakuombela pamwi, cikaya wakwe vino kapisya wa ndeke na kazwa wakwe yakaombela pamwi. Nanti lino yakwata intazi, yalaelenganya ukuti “sweswe” kuluta kuti “nene.”
CISINTE CA MULI BAIBO: “Acino yatacili yaili, lelo umwili onga.”—Mateo 19:6.
“Iya nu muci yalinzile kuombela pamwi pakuti icupo cao citunguluke.”—Christopher.
CINO CACINDAMILA
Ndi cakuti iya nu muci asiombela pamwi yaya ni ntazi, yakasimwilila ku kupeelana imilandu kuluta kusumba mano ku ntazi. Nupya cingalenga nu tumilandu tunoono tukulilako.
“Kuombela pamwi kwacindama sana mu cupo. Ndi cakuti tutaombela pamwi na ya wane, nga twaya sile wa vyuza ivikaikala ing’anda yonga. Nupya nga twaya wa yantu akuti ikala pamwi nomba yasiombela pamwi lino yakupingula pa vintu vimwi vicindame.”—Alexandra.
VINO MUNGACITA
MWAYEZYA MWEISIKULU
-
Uzye nkalola impiya zino nkakwata ukuti zyonsi “izyane sile nenga”?
-
Uzye nkayuvwa ukuti ningapuuza sile ningo ndi cakuti insi nu wane?
-
Uzye nkaitalusya kuli ya lupwa yakwe ya wane nanti icakuti yene yakauvwana sana nayo?
MWALANZYANYA NA YA WINU MAUZYO YAA
-
Uzye ivyani vino tukaombela pamwi ningo mu cupo citu?
-
Uzye amuli vyani muno tungazifya?
-
I vyani vino tulinzile ukucita pakuti twaombela pamwi?
VYAKUCITA
-
Elenganyini pali vino kuteya isolo kwaya, wii akaaya ku lusansa luu nu muze ku lusansa luze. Nomba, i vyani vimwi vino mungacita pakuti muye ku lusansa longa na ya winu pakuti mwensi mwaombela pamwi?
-
Kuluta sile kulaelenganya ukuti, ‘ningacimvya uli?’ mwaelenganya ukuti ‘Uzye tungacimvya uli?’
“Mutalonda sile kumanya uwataluvyanya na aataluvyanyizye. Kucita vivyo kutangaleta umutende nu kulemenkana mu cupo cinu.”—Ethan.
CISINTE CA MULI BAIBO: “Mutacita vingamuzipila mwenga sile lelo mwacita vingazipila na auzo kwene.”—Filipi 2:3, 4.
