Mano Angazwa aa mu Lupwa Ukuya ni Nsansa
Icupo na ana u wila ucindamisye ukufuma kuli Kaumba. Akalonda ukuti twaya ni nsansa umu lupwa. Fwandi ukuomvya ibuku lyakwe ilya muzilo, watupeela utunguluzi ungazwa ulupwa ukuya ulusuma nupya ulwa nsansa. Elenganyini pa kusunda kuu ukusuma.
Mwe ya Iya, Mwatemwa Aci Inu
“Ya iya yalinzile ukutemwa aci yao wakwe vino yatemwa imili yao. . . . Pano kutatala kwaya umuntu uwapata umwili wakwe, lelo akaulisya nu kuusakamala.”—EFESO 5:28, 29.
Iya ali mutwe wa lupwa. (Efeso 5:23) Lelo iya umusuma asicuzya aa mu lupwa lwakwe nanti ukuyapatikizya ukucita sile vino akulonda. Akacindika umuci wakwe nu kwika amano kuli vino umuci akulondekwa na vino akuyuvwa. Nupya akaezya na maka ukumuzanzya nu kukanaika sile amano kuli vino umwineco akulonda. (Filipi 2:4) Akalanzyanya ningo nu muci wakwe nu kukutikisya lino akulanda. ‘Asisokela’ umuci wakwe, kumuuma nanti ukumuneena amazwi aipe.—Kolose 3:19.
Mwe Yaci, Mwacindika ya Iya Inu
“Umuci nawe alinzile ukucindika sana iya.”—EFESO 5:33.
Ndi cakuti umuci akucindika iya nu kutungilila vino wapingula, akalenga umu lupwa ukuya umutende. Ndi cakuti iya waluvyanya, asimusuula lelo akatwalilila ukuya umuteekele nupya uwa mucinzi. (1 Petulo 3:4) Ndi cakuti akulonda ukuneena iya pa ntazi imwi, akasoolola insita isuma nu kulanda nawe umu mucinzi.—Kasambilizya 3:7.
Mwaya Acisinka Kuli ya Winu
‘Monsi alailundanya uku muci wakwe, nga yonsi yoili yalaya umwili onga.’—UTANDIKO 2:24.
Ndi cakuti umonsi na mama yatwalana yakaya na ucuza upalamisye. Fwandi atwalane yalinzile ukuombesya pakuti icupo cao citwalilile ukuya icikome, ukupitila umu kulanzyanya ukufuma pansi ya mwenzo nu kulanga icikuuku nu muntu utunono. Nupya yalinzile ukuya na ucisinka kuli cila muntu ukupitila umu kukanapanga icupo nu muntu wino yatatwalana nawe. Kukanaya na ucisinka kukasosya atwalane. Kukalenga iyata ukutailana nupya kukaonona ulupwa.—Aebele 13:4.
Mwe Yavyazi, Mwasambilizya Ana Inu
“Sambilizya umwana inzila yakupitamo. Lino alakota atalafuma mwenemo.”—MAPINDA 22:6.
Leza wapeela avyazi umulimo wa kusambilizya ana yao. Mukucita vii mwaya ukuyasambilizya vino yalinzile ukucita alino nu kucita ivisuma vino ana yao yangakolanya. (Malango 6:6, 7) Ndi cakuti umwana waluvyanya, umuvyazi wa mano asisoka zuwa. Lelo ‘akauvwa zuwa, kulengela ukulanda, nu kulengela ukusoka.’ (Yakobo 1:19) Ndi cakuti umuvyazi walola ukuti akulondekwa ukusunda umwana, akaya nu kutemwa lino akucita vivyo, lelo asi kumusunda ala watasoka.
Mwe Yana, Mwauvwila Avyazi Inu
“Mwe yana, mwauvwila avyazi inu . . . ‘Uwacindika tata wako na mayo wako.’”—EFESO 6:1, 2.
Ana yalinzile ukuvwila avyazi yao nu kuyacindika sana. Ndi cakuti ana yakulanga umucinzi uku yavyazi yao yangalenga umu lupwa muye insansa nu mutende. Ana aikolo yakacindika avyazi yao ndi cakuti yakusininkizya ukuti ya kusakamalwa ningo. Mukucita vii mwaya ukuzifya amang’anda ya yavyazi alino nu kuyaazwa muli vino yakulondekwa.—1 Timoti 5:3, 4.
Limwi Mungatemwa Ukulolako na Vii
MUNGAYA NI NSANSA PA NG’ANDA
Mwaleenga Leza Pakuti Aamwazwa Ukuya ni Nsansa Umu Cupo
Cingamwavwa ukuzifya ivintu mu cupo cinu ndi mukuomvya amauzyo yaili angupale.
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.
