LYASI LYAKUTANDIKILAKO UZYE UMUNTU NDI WAFWA—ANGAYA NU UMI NUPYA?
Aafwe Yalatuutuluka
Uzye tukatwisika ndi cakuti aafwe yalaya nu umi nupya? Mutumwa Paulo wene aatatwisikanga. Walemvile ukuti: “Ndi upalilo witu muli Klistu watuzipila sile umu umi uu, ale lyene sweswe ya ulanda ukuluta antu yonsi muno nsi. Lelo cumi Klistu wazyukuka ukufuma ku afwe! Nupya akusininkizya kunotuli ukuti yauze nao yalazyukuka ukufuma uku afwe.” (1 Kolinto 15:19, 20) Paulo wene wamanyile ukuti icumi kwene aafwe yalatuutuluka. Kutuutuluka kwakwe Yesu u kwalenzile Paulo asininkizye ukuti kulaya ukutuutuluka. * (Milimo 17:31) Ndi cakuti Yesu u watandikilepo ukutuutuluka, fwandi tungataila ukuti kwaya na yauze.
Yobo wanenyile Leza ati: “Ulandonda ne ciumbwa cako nu kundola.”—Yobo 14:14, 15
Nacuze icingalenga musininkizye ukuti afwe yalatuutuluka aeci: Yeova a Leza wa cumi. Baibo ikati: “Leza . . . asitumpoka.” (Tito 1:2) Yeova atatala wafwa nupya atalatala afwe. Uzye kwene angafilwa ukufikilizya vino walaya, lino watala walangizya nu kuti angatuutulula aafwe? Cico citanga cicitike!
U mulandu ci uno Yeova akalondesya ukutuutulula aafwe? Pano waya nu kutemwa. Yobo uziizye ukuti: “Uzye umuntu ndi wafwa angaya nu umi nupya? Lyene ali lino ungangama, nga nani inaasuke. Alino lyene ulandonda ne ciumbwa cako nu kundola.” (Yobo 14:14, 15) Yobo wasininkizye ukuti Isi uwaya nu kutemwa uwa mwiyulu wali nu kumutuutulula. Uzye ndakai Leza wasenuka? “Nene indi Yeova, nupya nsisenuka awe.” (Malaki 3:6) Yeova acili akalonda ukulola yonsi aafwa yatuutuluka, yaya nu umi usuma nupya ansansa. Nupya vikwene ali vino nu muvyazi uwaya nu kutemwa akalonda ndi cakuti wafwilwa umwana wakwe. Lelo upusano u wakuti Leza wene wakwata amaka aakucita vino akalonda.—Masamu 135:6.
Imfwa ali intazi iipisye sana, lelo Leza angaifumyapo
Yeova alapeela Umwanakwe amaka pakuti yonsi aakaloosya pa mulandu wa kufwilwa yakaye nu luzango wakwe cimwi. Nga Yesu wene akauvwa uli pa kutuutulula aafwe? Lino Yesu atatala watuutulula Lazalo, waweni vino yakaci yakwe Lazalo na ya cuza yakwe yali sana nu ulanda, lyene Yesu nawe kwene ‘walizile.’ (Yoane 11:35) Insita imwi, Yesu wakomaanyile nu mwanaci uwikalanga umu musumba wa Naini uwafwililwe umwana. Lyene lino Yesu wamuweni, waali na “mizu, nga amunena ati, ‘Utaalila.’” Lyene lilyo kwene Yesu watuutulwile umwana wiyo uwafwile. (Luka 7:13) Fwandi Yesu akauvwa sana uyi pa ulanda ni mfwa ivikacitika. Ala mwandi aluvwa ningo cuze lino alafumyapo iviipe vyonsi pano nsi ivikalenga antu yaaya nu ulanda!
Uzye vwilini mwatala muvwapo ulanda? Limwi mungelenganya ukuti imfwa ali intazi iipisye ino kusi angaicimvya. Lelo Leza alaicimvya lino alaomvya Umwanakwe uku kutuutulula aafwe. Mwaiusya ukuti Leza akalondesya ukuti muce muloleko lino alafumyapo imfwa. Akalondesya ukuti namwe mukayepo pakuti mukakuukule ya lupwa inu na ya cuza inu aalatuutuluka. Elenganyini vino cilaya lino mulaikala capamwi nayo amanda pe ukwaula nu kulanda ukuti awe lyene tukateni tutalatala tulolane!
Ya Lionel ati-yalandwapo, yaasimika nu kuti: “Mukuya kwa nsita nasambilile ukuti aafwe yalatuutuluka. Pakutandika cankomile sana ukuzumila, nupya intataile umuntu wiyo uwanenyile vivyo. Lelo nizile indondelezya muli Baibo nupya nazanyile ukuti fwandi vino wanenyile vyali ivya cumi! Fwandi inkalolela sile ukwizalola kuuku watuutuluka.”
Uzye mungatemwa ukumanyilapo na vyuze? Ya Nte Yakwe Yeova yangatemwa sana ukumulanga muli Baibo inu kwene umulandu uno yasininkizizya ukuti aafwe yalatuutuluka. *
^ par. 3 Pakuti musininkizye ukuti Yesu watuutulwike, mulole ibuku ilya Ciyemba ilyakuti, Baibolo—Cebo ca kwa Lesa Nelyo ca Muntu? pa mafwa 78-86, ilyapangwa na ya Nte Yakwe Yeova.
^ par. 9 Pakuti mumanyilepo na vyuze lolini cipande 7 umwibuku ilyakuti Uzye Baibo Ikasambilizya Ukuti Uli? ilyapangwa na ya Nte Yakwe Yeova.
