Uzye Mukalanzyanya na Leza?
ILYASI LYAKUTANDIKILAKO | MUNGAPALAMA KULI LEZA
Uzye Mukalanzyanya na Leza?
Ya cuza yakalanzyanya imiku iingi sana ukufika pano yangapezya, lino yali pamwi, ukuomvya foni, ukulembelana mazwi pa kompyuta nanti ukulembelana sile makalata. Fwandi, pakuya pali ucuza na Leza, tulinzile ukulanzyanya nawe lyonsi. Nomba, uzye tungacita uli vivyo?
Tungavwanga kuli Leza ukupitila umu kupepa kuli aliwe. Lelo ukupepa kuli Leza, kutaaya wakwe vino tukavwanga na cuza wa untunze. Tulinzile ukumanya ukuti lino tukupepa, ala tukuvwanga kuli Kaumba witu Uwakulisya umu uumbo onsi. Cii cilinzile ukutulenga ukuya sana nu mucinzi lino tukupepa kuli Leza. Pakuti Leza aauvwa mapepo itu, tulinzile nu kucita vino akatuneena ukucita. Ivintu vimwi vitatu vino Leza akaatuneena kuti twacita aevi:
Icakutandikilako icakuti, tulinzile ukupepa sile kuli Leza—tutalinzile ukupepa kuli Yesu, uku “yatakatifu,” nanti uku vinkolanya. (Kufuma 20:4, 5) Baibo ikatunena ukuti: “Pepini pamulandu wa vintu vyonsi, mule mukulenga Leza nu kutaizya mu myenzo.” (Filipi 4:6) Cakwe ciili icakuti, tufwile ukupepa kuli Leza ukupitila muli Yesu Klistu umwana wakwe. Yesu umwineco walondolwile ati: “Pasi umwi angiza kuli Tata suka wizila muli nene.” (Yoane 14:6) Na cakwe citatu icakuti, amapepo itu yalinzile ukuvwana nu kulonda kwakwe Leza. Baibo ikatunena ukuti: “Ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.” *—1 Yoane 5:14.
Kwene icisinka icakuti, ucuza usitwalilila ndi cakuti wenga pali ya cuza yoili aliwe sile akavwanga kuli cuza wakwe. Vivikwene vino cikazipa sana ndi cakuti ya cuza yoili yakulanzyanya, naswe tulinzile ukuzumilizya Leza ukulanda naswe nupya tufwile ukuvwa lino akulanda kuli sweswe. Uzye mwamanya inzila ino Leza akaomvya pa kuvwanga naswe?
Ndakai, Yeova “akavwanga” naswe ukupitila muli Baibo. (2 Timoti 3:16, 17) U mulandu ci uno twalandila vivyo? Lekini tulangilile: Elenganyini ukuti mwapokelela kalata ukufuma kuli cuza winu. Lino mwa welenga kalata wiyo, mungatandika ukunena antu yauze ni nsansa ukuti, “Inuvwa kuli cuza wane!” Lelo, cii cisikupiliula ukuti yali-yakuvwanzyanya, nomba vyali-vili ivilembwe sile. Fwandi, namwe ndi mukuwelenga Baibo, ala mukuzumilizya Yeova ukulanda kuli mwe-mwe. Acino, Gina, uwatalumbulwa umwilyasi lyakutandikilako, walanzile ukuti, “Ndi cakuti nkulonda Leza andola ukuti nene cuza wakwe, ndinzile ukuwelenga ‘kalata’ wino watulembela—kulikuti Baibo.” Walanzile nu kuti, “Ukuwelenga Baibo cila-wanda kwalenga ukuti inje cuza wakwe Leza.” Uzye namwe mukazumilizya Yeova ukulanda kuli mwe-mwe ukupitila umu kuwelenga Baibo cila-wanda? Ndi mukucita vivyo, cilamwazwa ukupalama sana kuli Leza.
[Futunoti]
^ pala. 5 Pakuti muvwilepo ivyeo navyuze pali vino tulinzile ukupepa kuli Leza, lolini icipande 17 umwibuku lyakuti Uzye Baibo Ikasambilizya Ukuti Uli? ilyapangwa ni Inte Zyakwe Yeova.
[Cikope api’fwa 5]
Ya cuza yakalanzyanya imiku iingi ukufika pano yangapezya
