• MWAKA UNO YAVIILWE: 1963

• KUNO YAVYALILWE: BRITAIN

• VINO UMI WALI: YAIPAKIZYANGA UKUOMBA INCITO ISUMA

IVYANCITIKILE MPITI: Navyalilwe umu Croydon, uku South London, nene umwana uwalenga 6 umu yana 9. Avyazi yane yafumile uku Caribbean island of St. Vincent. Ya mayo yapepanga uku Methodist. Nanti cakuti nalondesyanga ukusambilila pa vintu, ntalondanga ukusambilila pali Leza. Pa manda yano ntayanga ukusukulu, nayanga uku luzi, kuno nabelengelanga mabuku yano nazimanga uku laibulale.

Lino namazile isukulu, nizile imanya ukuti nalondanga ukwazwa antu akweti intazi umu umi. Natandike ukwazwa apiina alino ni vilema. Lyene nizile inja uku univesiti kuno naile insambilila pa vya umi. Lino namazile isukulu lii, nizile inkwata incito isuma sana nupya natandike ukwikala ningo sana. Incito yane yali iyakulondela antu vino yakulondekwa alino ni kulondelezya pali vino antu ikala (freelance management consultant and social research), nupya naombelanga sile pali kompyuta. Pa milungu imwi, nayanga uku mpanga zyuze ni ndeke, naipakizyanga ukutandala uku ncende izisuma, nupya nayanga nu ku ncende kuno yakatukusizya umwili. Nalolanga ukuti vyonsi vyali sile ningo. Nomba masakamika yatasizile.

VINO BAIBO YASENWILE UMI WANE: Pa myaka iingi, nayuzyanga ukuti ‘umulandu cii uno twayelako?’ Nomba ntatazile ndonde ivyasuko muli Baibo. Wanda umwi umu 1999, umutowane Margaret, wino wali a Nte, wantandalile ale yali na Nte muze wino walangilile ukuti wanjisileko sana mano. Nazumile ukutandika ukusambilila Baibo na nte wiya uwali cuza wakwe Margaret, nomba ntalundulukanga zuwa pa mulandu ni ncito ino naombanga alino ni vintu vyuze vino nacitanga umu umi.

Umu nsita ya cisanya umu 2002, nakukiile uku southwest England. Kuku akuno naile intandika ukulundulula masambililo yane aakulondelezya pali vino antu iikala (social research), pakuti inkwate icipepala cino yakaama ukuti doctrate. Natandike ukuzanwa umu kulongana lyonsi nu mwanane umulumendo. Nanti cakuti naipakizyanga masambililo ya papela, ukusambilila Baibo kwalenzile nuvwikisye intazi zino antu yakapitamo alino ni cingalenga intazi zizyo ukusila. Nilwike ukuti amazwi aya pali Mateo 6:24, aakalondolola ukuti utanga uombele aene yaili acumi. Nalinzile ukusoololapo pa vyuma na Leza. Namanyile ukuti nalinzile ukusoololapo vino nali nu kucindikisya umu umi.

umu mwaka uwafumileko, nayanga pi iumba lyakwe ya Nte aasambililanga umwi buku lyakuti Is There a Creator Who Cares About You? a Nizile insininkizya ukuti kaumba witu Yeova, uwakwata sile amaka akusisyapo intazi zino antu yakakwata. Nomba uku univesiti nasambililanga ukuti citacindama ukuzumila muli Leza pakuti umuntu amanye umulandu uno twayelako. Cii calenzile insoke sana. Lino papisile imyezi ili, napingwilepo ukuta ukusambilila pa univesiti nu kwika vyakwe Leza inkoleelo.

Ilembo ilyankomelizye ukusenuka a Mapinda 3:5, 6, apakati: “Uwataila muli Yawe nu mwenzo wako onsi, utaezya ukutaila amano yako foo. Waiusya Yeova muli vyonsi vino ukucita, nga nawe alalenga inzila zyako ukuya izyololoke.” Ukusambilila pali Leza witu uwaya nu kutemwa kwacindime sana ukucila ivyuma nanti umucinzi, vino masambililo ya papela yangaleta. Ukusambilila pa kulonda kwakwe Yeova ukwa pano nsi, alino na pali vino Yesu wacisile kuli kuti ukupeela u umi wakwe, kwalenzile nalondesya ukuipeela nu kubatiziwa. Nabatiziwe umu Epuleo 2003. Pa cisila cakwe vii, nangupizye umi.

VISUMA VINO NAIPAKIZYA: Kutaya cino ningalinganya kuli ucuza uno nakwata na Yeova. Ukumumanya kwalenga inje nu mutende alino ni nsansa zya cumi cumi. Nupya nkaya sana ni nsansa nga nkuombela pamwi na aomvi yakwe Yeova acisinka.

Nkauvwa ningo pali vino natwalilila ukusambilila muli Baibo alino na pa kulongana. Nkauvwa ningo ukunenako yauze pali vino nazumilamo. Uu wiza waya ali mulimo wane ukalenga nakwata isyuko lya kwazwa antu ukuya nu umi usuma ndakai alino nu kukwata upaalilo wa kwikala umu nsi ipya. Ukufuma umu Juni 2008, nkaipakizya ukuomba umulimo wa nsita yonsi, naya ni nsansa nupya nkayuvwa ukuti nakwata vino nkalondekwa ukucila vino cali mpiti. Namanya umulandu wa cumi uno twayelako, nupya nkataizya Yeova pali cii.

• MWAKA UNO YAVIILWE: 1973

• KUNO YAVYALILWE: AUSTRIA

• VINO UMI WALI: YASITIKANGA

IVYANCITIKILE MPITI: Nakuliile umwi tauni ilinono likaamwa ukuti Braunau, umu Austria. Uku ncende ii kwali sana ivyuma nupya kutali sana ivimvulunganya. Ulupwa lwane lwapepanga uku katolika nupya nani kwene akuno napepanga.

Vino vyancintikile ale ncili nene mwance vyalenzile nauvwa sana uyi. Mu 1984, lino nali umupipi ni myaka 11, nkaiusya ukuti uwanda umwi nateyanga bola na cuza wane wino natemilwe sana. Uwanda kwene uwa, waponyile na motoka nu kufwa. Vii ivyacitike vyalenzile nauvwa sana uyi. Pa myaka iingi ukufuma pano wafwilile, nasakamalanga pali vino vikacitika umuntu nga wafwa.

Lino namazile isukulu natandike ukuomba incito ya vya malaiti. Nanti cakuti nateyanga ivyangalo vya kusitika nupya naomvyanga impiya izingi, ntulizyanga impiya. Nasumbanga insita ikulu uku vyangalo nupya nizile intemwa inyimbo zya congo. Naipakizyanga ukuya umu vikulwa muno yakacinila nu ku mapaate. Nacitanga ivingi ivya kuizanzya nu kucita ivintu iviipe nomba nayuvwanga uwa silesile.

BAIBO YASENWILE UMI WANE: Umu 1995, Nte umwi uwacikolo wakonkonsizye uku cisasa nu kumpela ibuku ilyalandanga pali vino Baibo ikalanda pali vino vikacitika umuntu nga wafwa. Pa nsita ii ale ncili nkasakamala pali vino vikacitika umuntu nga wafwa. Ntabelenzile sile icipande icalandanga pali vino vikacitika umuntu nga wafwa lelo nabelenzile ibuku lyonsi.

Lino nabelenzile, nazanyile masuko uku mauzyo yano nakweti pa mfwa. Nomba nasambilile na vyuze ivingi. Vino napepanga uku Katolika, utailo wane wasintilile pali Yesu nupya ali wino nacindikisye. Nomba, ukuisambilizya sana Baibo kwalenzile nkwate ucuza usuma na Isi wakwe Yesu, kuli kuti Yeova Leza. Nazungwike sana ukumanya ukuti Yeova ataifisa nanti ukuitalusya kuli sweswe, lelo waisokolola nu kumanyikwa kuli yayo aakalonda ukumumanya. (Mateo 7:7-11) Nasambilile ukuti Yeova nawe kwene akayuvwa wakwe vino tukayuvwa. Nasambilile nu kuti akacita vyonsi vino walanda. Cii calenzile intemwe sana ukusambilila pa malayo aya muli Baibo alino nu kulola vino yafikiliziwe. Vino nasambilile vyakomizye utailo wane muli Leza.

Lyene nizile iniluka ukuti ya Nte Yakwe Yeova sile ali yano namanyile aakalondesya ukwazwa antu ukuvwikisya ivyaya muli Baibo. Nalolanga malembo yano yayanga umu mpapulo zyakwe ya Nte Yakwe Yeova nu kuyabelenga muli Baibo wa ku Katolika. Lino natwalilile ukulondelezya nazanilangako usininkizyo uwakuti inzana icumi.

Lino naisambilizyanga Baibo, nasambilile ukuti Yeova akalonda ukuti nalondela masunde yakwe. Lino nabelenzile pali Efeso 4:22-24, nilwike ukuti nalinzile “ukuzuula untu wa mpiti,” uukatungululwa na vino nacitanga “mpiti” nu kuti nalinzile “ukuzwala untu upya uwaumvilwe ukulingana nu kulonda kwakwe Leza.” Fwandi natiile ukucita iviipe. Naweni nu kuti nalinzile ukuta ukuteya ivyangalo vya kusitika, pano ukucita vii kukalenga umuntu ukulalondesya ukukwata ivyuma alino nu kutemwa sana impiya. (1 Kolinto 6:9, 10) Nilwike ukuti pakuti indeke ukucita vii nalinzile ukuleka ukuzanwa na ya cuza yano nazanwanga nayo nu kutandika ukuzanwa na antu yano yakalondela masunde yano nani nkalondela.

Ukucita vii kutangupiile. Nomba natandike ukulongana na ya Nte Yakwe Yeova nu kutandika ukupanga ivyuza umu cilongano cino nalimo. Nupya natwalilile ukuisambilizya Baibo, nupya nikangako sana mano. Ukucita vii kwalenzile nsenuke nu kuleka ukukutika uku nyimbo zimwi zino nakutikangako mpiti, nu kusenula vino nalondanga ukucita umu umi, alino nu kusenuka muli vino nalolekanga. Umu 1995 nabatiziwe nu kuya Nte Wakwe Yeova.

IVISUMA VINO NAIPAKIZYA: Ndakai lyene ntatemwisya impiya nupya nsilondesya ukukwata ivyuma. Mpiti nasokanga sana, lelo ndakai nasenuka nupya nsisoka zuwa. Nupya nsisakamala sana pali vino vilacitika uku nkoleelo.

Natemwa ukuya umwi umba lya antu aakaombela Yeova umu nsi yonsi. Pa yantu yayo paya na yano yakapita umu ntazi lelo yatwalilila ukuombela Yeova na ucisinka. Nkauvwa ningo sana ndakai pano nsiomvya sile insita yane na maka kuli vino nkulonda, lelo nkaomvya ivintu vii uku ukupepa Yeova alino nu kwazwa antu yauze.

• MWAKA UNO YAVIILWE: 1963

• KUNO YAVYALILWE: ENGLAND

• VINO UMI WALI: YALOLANGA KWATI UMI WAO UTACINDIME

VINO NAALI: Navyalilwe uku England lelo lino nali ni myaka 7 twizile itukukila uku Australia . twikalanga uku ncende kuno antu aingi yatemilwe ukwiza umu kutandala uku Gold Coast, Queensland, umu Australia. Nanti cakuti tutakweti vyuma ivingi, twakwatanga vino twalondekwanga.

Nanti cakuti cali vivyo, ntakweti nsansa zya cumi. Natandike ukulola kwati umi wane utacindime. Ya tata yamwanga sana uwengwa. Ntayatemilwe sana pa mulandu wakuti yamwanga sana uwengwa nupya yacuzyanga ya mayo. Lino nizile imanya vino vyayacitikilanga lino yali asilika uku malaya, alino nizile imanya umulandu uno yayelile vivya.

Lino nali ukwi sukulu lya ku sekondali natandike ukumwa sana uwengwa. Lino nali ni myaka 16, natiile isukulu nu kwingila usilika. Natandike ukuomvya imilembo iikavulunganya uongo nupya nizile intemwa sana ukupeepa fwaka. Nayanga nkutemelwako sile ukumwa uwengwa. Nupya natandike ukumwa cila wanda.

Lino nali ni myaka muli ya 20, natandike ukutwisika ndi cakuti Leza akuno waya. Nayuzyanga ukuti, ‘ndi cakuti Leza akuno waya u mulandu ci uno wazumilizya ukuti antu yacula nu kufwa?’ nupya nizile indemba ni lyasi muno napeelanga Leza imilandu pa vintu vyonsi iviipe ivikacitika

Lino nali ni myaka 23 nalesile usilika. Lyene nizile ntandika ukuomba incito izipusane pusane nupya naile nu ku mpanga yuze pa mwaka onga, lelo cii citalenzile ukuti naya ni nsansa. Ntalondanga ukwimika mauyo nanti ukucita ivili vyonsi. Kutaali vili vyonsi vino naipakizyanga. Ukukwata ing’anda, incito isuma alino nu kupeelwa ivilambu kwali ukwa silesile kuli nene. Ukumwa uwenga alino nu kukutika uku nyimbo kwalenganga nateekeziwa.

Nkaiusya ivyacitike ivyalenzile ukuti nalondesya ukumanya umulandu uno nayelako. Nali uku Poland, uku nkambi ino yacuzizyangako antu uku Auschwitz. Pa nsita iya ale nabelengapo pa viipe ivyacitike uku ncende ii. Nomba lino naile kuku ni kulola vino inkambi yali ikulu, nuvwile sana uyi. Ntuvwikisyanga umulandu ungalenga ukuti antu yacuzya antu yauze. Nkaiusya lino napitanga umu nkambi ala nkulila nu kuyuzya ukuti, ‘U mulandu ci uno antu yakuculila?’

VINO BAIBO YASENWILE UMI WANE: Mu 1993, lino naswilile uku mwitu, natandike ukubelenga Baibo pa kuti nzane ivyasuko. Lino papisile sile insita inono, ya Nte Yakwe Yeova yaili yakonkonsizye uku cisasa nupya yandalike ukuti ince nzanweko uku ukongano uwali nu kuyela umu cibansa icali umupipi na kuno nikalilanga. Nupya nazumile ukuya.

Pa nsita ii ala natala nayapo umu cibansa cica umu kutamba bola, nomba ukongano uu wapusineko sana. Ya Nte yali nu mucinzi nupya yazwite ningo, nupya ana yao yali ni miyele isuma. Nupya ivyacitike lino insita ya kulya yafisile vyanzungwisye sana. Ya Nte aingi yaile umu kulila pamwi ivyakulya pa ncende ino yakateyela bola, lelo lino yaswilile nu kuyaikala pa vilimba, Ntaweni ivikoona ivili vyonsi ivyasiile pano yalilanga. Ni cacindamisye icakuti antu yaa yalolekanga ukuti yateesile imyenzo kuli vino yakweti nupya yali nu mutende, nupya vikwene ali vino nani kwene nalondesyanga. Nsiiusya ilyasi ilili lyonsi ilyalanzilwe uwanda uwa, lelo imiyele isuma ino ya Nte yakweti yene ntalatala nilile.

Uwanda uwa manguzi niwisye umuvyala wane wino wabelenganga Baibo alino nu kusambilila pa vya mipepele ipusane pusane. Uku cisila wanenyilepo ukuti, Yesu walanzile ukuti ungamanya imipepele ya cumi ukupitila umu kulola imiyele yao. (Mateo 7:15-20) Nelenginye ukuti ndinzile ukumanya ivyalenga ya Nte Yakwe Yeova yapusaneko. Nizile inja nu upaalilo pa muku wa kutandikilapo umu umi wane .

Umulungu uwalondelilepo ya Nte aizili iyandalika uku ukongano yawezile. Yanenyile ukuti tungatandika ukusambilila Baibo, nupya nazumile. Nupya natandike nu kuzanwa umu kulongana.

Lino natandike ukusambilila Baibo natandike ukusenuka muli vino nalolanga Leza. Nasambilile ukuti asi aliwe aakalenga ukuti iviipe vyacitika nupya akauvwa uyi ndi cakuti antu yakucita iviipe. (Utandiko 6:6; Masamu 78:40, 41) Natandike ukwezya na maka ukukanasosya Yeova. Nalondanga ukulamuzanzya. (Mapinda 27:11) Natiile ukumwesya uwengwa, ukupeepa fwaka alino nu kucita ivintu vyuze iviipe. Mu Maaci 1994, Nabatiziwe nu kuya Nte wakwe Yeova.

IVISUMA VINO NAIPAKIZYA: Nakwata insansa zya cumi nupya nkateeka umwenzo kuli vino nkweti. Ndakai nsimwa uwengwa pakuti imale intazi zino nkweti. Lelo nasambilila ukutuula masakamika yane kuli Yeova.—Masamu 55:22.

Pa myaka 10 ukucisila, natwala mama musuma nupya Nte Wakwe Yeova uwizina lyakuti Karen, nupya nakwata nu mwana uwa kuzanamo Nella uwaya ningo sana. Swensi kwene tukaipakizya ukuombesya umu mulimo wa kusimikila uwa kwazwa antu ukumanya icumi pali Leza. Lyene ndakai umi wane wacindama.