BAIBO IKAAVWA ANTU UKUSENUKA

I CANI cino umonsi umwi uwa ku Scotland wazanyile ukuti i cali icicindamisye ukucila bizinesi ino waombanga? I vyani ivyavwilizye umonsi umwi uwa ku Brazil ukuta imiyele iipe nu kupeepa fwaka? I cani calenzile umonsi umwi uwa ku Slovenia ukuta ukumwa sana uwengwa? Belengini pakuti muvwe vino antu yaa yalanzile.

“Umi wane wazipa.”​—YA JOHN RICKETTS

UMWAKA UNO YAVILWE: 1958

KUNO YAVYALILWE: SCOTLAND

VINO UMI WAO WALI: BIZINESI INO YAOMBANGA YAPITIKANGA NINGO

VINO NAALI: Lino nakulanga ivintu vyali ningo sana. Ya tata yali aakalamba mu yasilika aa ku Britain, fwandi twakuukanga sana. Kufuma ku Scotland, twayile itwikalako uku England, ituya nu ku Germany, ku Kenya, ku Malaysia, ku Ireland, nu ku Cyprus. Ukufuma sile lino nali ni myaka 8, nikalanga pa sukulu kwene pano nasambilililanga umu Scotland. Lyene nizile imala isukulu pa Univesiti ya Cambridge.

Lino nafisizye imyaka 20, natandike umulimo wa kukazya amafuta. Pa kutandika, naombelanga uku South America, alino nu ku Africa, nu mukusyalikizya uku Western Australia. Lino nakukiile ku Australia, nayuzile kampani ino nizile inkazya pa cisila.

Impiya zino nakweti pa cisila ca kukazya kampani, zyali izingi icakuti nacisile na litaya ala indi ni myaka 40. Fwandi naomvizye insita yii ino nakweti ukulatandala. Nazingulwike impanga ya Australia imiku iili kuomvya Honda, nupya nasolwilepo ukuzinguluka umu nsi yonsi. Naweni ukuti umi wane wazipa.

VINO BAIBO YANGAZWILE UKUSENUKA: Lino ntatala nata ukuomba incito, nalondanga inzila ino ningataizizyamo Leza pa umi uno naipakizyanga. Natandike ukuya ku ceici cino yakati Anglican, muno nakuliile. Nomba ivingi vino yanenanga antu ukulondela, vitafumanga muli Baibo. Lyene nizile intandika ukusambilila na aaku ceici ca Mormons, nomba nayo kwene yatacitanga ivyaya muli Baibo.

Uwanda umwi, ya Nte Yakwe Yeova izile pa ng’anda. Lilyo kwene sile nailoliile ukuti vino yakasambilizya vikafuma muli Baibo. Ilembo limwi lino yambelengiile a 1 Timoti 2:3, 4. Ivikomo vivyo vikalangilila ukuti Leza akalonda “antu amisango yonsi yace yapusuke nu kumanya ningo icumi.” Nuvwile ningo pano ya Nte yalanzile sana pa kumanya ningo icumi ica muli Baibo.

Ukusambilila na ya Nte Yakwe Yeova kwangazwile ukumanya icumi cico. Wakwe, nasambilile ukuti Leza na Yesu yataya muli leza wino yakati wakwatamo ya leza aineco yatatu; lelo, yaya apusane. (Yoani 14:28; 1 Kolinto 11:3) Natemilwe sana ukusambilila icumi cico icangupale. Nasosile sana ukuzana ukuti nasumbanga sile insita ukwezya ukumanya icisambilizyo cii ca ufi icakuti muli leza wenga mwaya yatatu!

Patalengile natandike ukuzanwa ku kulongana kwako ya Nte Yakwe Yeova. Natemilwe sana vino yalanganga ucuza ni miyele isuma, yaya sile kwati aatakatifu. Vino yali nu kutemwa vyandenzile nsininkizye ukuti umu cumi nazanyile upefi wa cumi.—Yoani 13:35.

IVISUMA VINO NAZANA: Pa cisila ca kubatiziwa, nazanyile umwanaci umwi uno natemilwe sana. Wakuliile mu lupwa lwakwe ya kapepa, nupya wali ni miyele ino natemilwe sana. Nupya lino papisile insita twizile itutwalana. Vino ya Diani yaaya na ucuza nupya yakantungilila, nkalola ukuti ipaalo kufuma kuli Yeova.

Ya Diani nani twatemilwe sana ukuya uku kuombela uku kalondekwa ya kasimikila aingi. Umu 2010, twakukiile uku Belize, uku Central America. Kuu tukasimikila antu aatemwa Leza nupya aakalonda ukumanya icumi ca muli Baibo.

Lyene naaya nu mutende pali vino namanya icumi pali Leza ni Izwi lyakwe, kuli kuti Baibo. Vino nkaomba umulimo wa kusimikila lyonsi, naaya nu luzango pali vino nkaazwako na yauze ukusambilila Baibo. I cintu cisuma sana ukulola kuno icumi ca muli Baibo cikwazwa muntu ukuya nu umi usuma, wakwe nene kwene. Lyene nazana inzila isuma yakutaizizyamo Leza pa umi usuma uno nkaipakizya.

“Yali sana ni cikuuku kuli nene.”​—YA MAURÍCIO ARAÚJO

MWAKA UNO YAVILWE: 1967

KUNO YAVYALILWE: BRAZIL

VINO UMI WAO WALI: YALI SANA NI MIYELE IIPE

VINO NAALI: Nakuuliile umwi tauni ilinono ilya Avaré, mu São Paulo. Aingi aakaikala umwi tauni lii yakaomba incito.

Ya tata yafwile ala indi piipi nu kuvyalwa. Lino na ali umwance, nazwalanga ivyakuzwala vyakwe ya mayo nga yasipo. Natandike ukucita ivintu kwati nene mwanaci, na cii calenzile antu yandola kwati nkalala na onsi yanji. Nu mukuya kwa nsita natandike ukucita uzelele na onsi yanji.

Lino nafisizye imyaka ku ma 19, alino natandike ukulondesya sana ukucita uzelele, (na onsi yanji na anaci) konsi kuno ningayazana, mu vikulwa vya kumwela uwengwa kasanya nu usiku, nu ku maceici sile. Nga kuli ivyangalo vya kucimvyanya, nazwalanga wa mwanaci nu kutandika ukucina na anaci. Nizile imanyikwa sana.

Pali ya cuza yano nakweti pali aonsi aakalala na onsi yauze, ya cizelele, na aomvyanga imilembo ikavulunganya uwongo. Yamwi yalenzile nu kuti ntandike kupeepako fwaka iipe, nupya natandike ukulondesya sana ukupeepa. Insita zimwi twapeepanga usiku onsi. Insita zyuze nazyo, nayanga sile nenga nupya napeepanga uwanda onsi. Nizile inonda sana icakuti na antu yatandike ukulanda ukuti nalwile AIDS.

VINO BAIBO YANGAZWILE UKUSENUKA: Apa nsita kwene yii, twizile itulolana na ya Nte Yakwe Yeova. Yali sana ni cikuuku kuli nene. Ilembo limwi lino yambelengile a Loma 10:13, apakati: “Wensi aakaama api zina lyakwe Yeova alapusuka.” Amazwi yaa yangavwile ukumanya umulandu uno cacindamila ukuomvya izina ilyakuti Yeova. Insita zingi, pa cisila ca kupeepa usiku onsi, nayulanga iwindo alino indolekesya ukwi yulu, nu kupepa kuli Yeova ala nkulila nu kulila ukuti angazwe.

Pa mulandu wakuti nasakamikwe pali vino ya mayo yuvwanga uyi ukulola vino nononekanga ku milembo iikavulunganya uwongo, napingwilepo ukuta ukuomvya imilembo iyo. Lino papisile insita inono nazumile ukutandika ukusambilila Baibo na ya Nte. Yankomelizye ukuti, ukusambilila Baibo kulangavwa ukuta ukuomvya imilembo iikavulunganya uwongo, nupya vikwene avino caali!

Lino natwalilile ukusambilila Baibo, nizile iniluka ukuti ndinzile ukusenuka. Lelo imiyele iyantalile sana ukuta, u kulalana na onsi yatupu, pano natandike ukucita vivyo mpiti sana. Conga icangavwile, uukuta ukuzanwa ni vyuza viipe, nu kuta ukulazanwa mu vikuulwa vya kumwelamo uwengwa.

Nanti icakuti citangupiile ukusenuka, nateekeziwe ukusambilila ukuti Yeova wansakamalanga nupya wamanyile intazi ino nakweti. (1 Yoani 3:19, 20) Lino umwaka wa 2002 wafikanga, ala naata ukulala na onsi yatupu, nupya umu mwaka kwene uu amuno nabatiziwe nu kuya Inte Yakwe Yeova.

IVISUMA VINO NAZANA: Ya mayo yatemilwe sana vino nasenwike nupya nayo kwene yatandike ukusambilila Baibo. Ica ulanda icakuti pa nsita yii ala yalwala situlooko. Lelo usi mulandu na vii, yatwalilile ukutemwa Yeova ni cumi ca muli Baibo.

Pa myaka 8 iyatipita, nkaomba umulimo wa nsita yonsi uwa kusimikila nupya nkaomvya insita ikulu ku kwazwa yauze ukusambilila Baibo. Ningalanda sile icisinka ukuti, insita zimwi nkalwisyanya ni miyele iipe. Nomba nkasipa nu kumanya ukuti pakuti nzanzye Yeova ndinzile ukutaluka imiyele iipe.

Ukupalama kuli Yeova, kwalenga nailola ukuti nacindama. Ndakai lyene, naya ni nsansa.

“Nali Kwati A Dulamu Umutuluke.”​—YA LUKA ŠUC

MWAKA UNO YAVILWE: MU 1975

KUNO YAVYALILWE: SLOVENIA

VINO UMI WAO WALI: YAMWANGA SANA UWENGWA

VINO NAALI: Navyalilwe umu Lubiana (Ljubljana), umusumba ukalamba mu Slovenia. Ivintu vyali ningo sana kufikila lino nizile imfisya imyaka 4. Ya tata izile iyaikulika nu kufwa. Lino cii cacitike, ya mayo yatandike ukuombesya pakuti yatulondela ivyakulya nene alino na tatalenzi.

Lino nali ni myaka 15. Naile umu kwikala na mama nupya naipakizyanga ukwikala nawe pano na ya cuza aingi ikalanga umupiipi na kuli mama. Nupya nali sana nu untungwa lino nali kuli mama kucila lino nali kuli ya mayo. Lino nali ni myaka 16, natandike ukuzanwa sana na antu aayanga umu kumwa uwengwa pa mpela ya mulungu. Natesile inyele, ntandika nu kuzwala wakwe cipondoka, nupya lino papisile insita nizile ntandika nu kupeepa.

Nanti cakuti naomvizyepo imilembo ikavulunganya uwongo iingi, natemilwe sana ukumwa, pano kwandenganga naya ni nsansa. Lino papisile insita inono natiile ukumwa uwengwa unono ntandika ukumwesya. Nakolekanga, lelo naipanganga sana pakuti kutaya aali wensi uwa kumanya ukuti inkoleka. Ilingi antu yamanyanga ukuti inkoleka nga yuvwa nkununka uwengwa. Nomba nalyo kwene kusi uwamanyanga uwingi wakwe waini nu wengwa uno mwile alino ni vyakumwa vyuze ivikali!

Insita izingi, nene nalemelelanga na anji nga yakoleka pakuti yatapona, nanti cakuti nene kwene natimwesya nu wengwa. Uwanda umwi nuvwile umunji akulanda pali nene ukuti naya wakwe dulamu umutuluke. Amazwi yaa, yakaomviwa ku Slovenia pa kulanda pa muntu wino akamwa sana ukucila auze. Amazwi yaa yansosizye sana.

Natandike ukwelenganya pali vino nacitanga umu umi. Natandike ukuyuvwa sana uwa sile sile. Nazanyile ukuti vyonsi vino naombanga mu umi vitangazwanga.

VINO BAIBO YANGAZWILE UKUSENUKA: Apa nsita kwene yii naweni ukuti umunji uno twasambililanga nawe wasenwike; wizile aaya ni miyele isuma. Natemilwe sana ukulola vino wasenwike, calenzile imunene ukuti tukaye umu kwizizya pamwi nawe. Lino twalanzyanyanga walanzile ukuti, wasambililanga Baibo na ya Nte Yakwe Yeova. Wanenyileko vimwi vino wasambililanga, nupya vyonsi vino waneenyile ntaatazile imvyuvwapo pano ntaali umu mipepele ili yonsi. Natandike ukuzanwa ku kulongana kwakwe ya Nte Yakwe Yeova nupya natandike nu kusambilila Baibo na ya Nte kwene.

Ukusambilila Baibo kwalenzile imanye icumi icicindame. Wakwe, nasambilile ukuti tukwikala mu manda yano Baibo ikaama ukuti “manda akusyalikizya.” (2 Timoti 3:1-5) Nasambilile nu kuti Leza alonona aipe yonsi pano nsi nu kupeela antu asuma isyuko lya kuipakizya umi wa manda pe umu Paladaise. (Masamu 37:29) Fwandi natandike ukuombesya pakuti nsenuke inje pa yantu asuma.

Natandike ukunenako antu apa cumi ca muli Baibo cino nasambililanga. Aingi yansekanga pali vino nayanenanga, lelo vino yansekanga vyangazwilizye umu nzila izingi. Vikwene vino yacisile vyangavwile ukumanya ukuti yataali aacuza ya cumi. Nizile iniluka nu kuti ya cuza kwene yano nakweti aalenzile nkwate ni ntazi iya kumwesya uwengwa. Lyonsi kwene yenekelanga ukuti pa mpela ya mulungu tumaya umu kumwa swensi.

Napingwilepo ukuta ukuya pamwi na ya cuza yaayo nu kutandika ukuya pamwi na ya cuza ankomelezyanga ukucita ivisuma. Ukuya pamwi na yacuza yaa kwankomelezyanga sana, pano yene yatemilwe sana Leza nupya yene yatwalililanga ukucita vino Leza akalonda. Umukuya kwa nsita natandike panono panono ukuta ukumwesya uwengwa.

IVISUMA VINO NAZANA: Nkataizya sana kuli Yeova pano ndakai lyene nsilondekwa ukumwa uwengwa pakuti inje ni nsansa. Ndi cakuti ntwalilila ni miyele kwene ino nali nayo, nga ntanzi na vino ivintu vyaya ndakai. Nomba nasininkizya ukuti paa lyene naya nu umi usuma.

Apa myaka 7, nakwata isyuko lya kuombela pi ofesi lya musambo lyakwe ya Nte Yakwe Yeova umu Slovenia. Ukumanya Yeova nu kulamuombela, kwangavwa ukuya nu umi usuma.