Usesemo 4. Kukaanaya nu Kutemwa

“Antu . . . yatalatemwa indupwa zyao.”​—2 TIMOTI 3:1-3, God’s Word Bible

● Ya Chris yakaomba umwi umba lya ku North Wales ilikaazwilizya yano amu ndupwa zyao yakacitila unkalwe. Ya Chris yalanzile ukuti: “Wanda umwi kwizile umwanaci wino yumile sana icakuti nafizilwe nu kumumanya nanti icakuti namuwenipo pa nsita imwi. Anaci yauze nayo yakacula sana umu melenganyo icakuti yatanga yakatusye na manso kuti yakulole.”

UZYE IVISINKA VIKALANGILILA CANI? Umu mpanga imwi umu Africa, umupiipi nu mwanaci wenga nga mwapenda anaci yatatu ala yaizi nawe uku maka lino wali umwance. Umu kulondelezya ukwacitike umu mpanga ili imwi kwene cazanyilwe ukuti nga mwapenda aonsi yatatu ale wenga wazumila ukuti ukuma mamakwe kwaya sile ningo. Nomba asi yanaci sile yano yakacitila unkalwe umu ndupwa. Umu Canada, nga mwapenda aonsi 10 ala yatatu yayumapo nanti ukuyacuzya kuli ya mama yao.

I VYANI VINO ANTU YAKALANDA ILINGI? Uunkalwe umu ndupwa akuno waya ukufuma na mpiti. Ndakai antu yakasumbako sile sana mano ukucila vino cali mpiti.

UZYE VIKWENE VINO YAKALANDA I VYA CUMI? Pa myaka iingi iyapitapo antu yalandapo sana pa unkalwe ukacitika umu ndupwa. Nomba uzye ukumanya ivingi pa ntazi kwene ii kwalenga ukuti unkalwe ucepeko umu ndupwa? Awe, asi vino caya. Ukukaanaya nu kutemwa umu ndupwa kukuvulilako sile.

UZYE MUKWELENGANYAPO ULI? Uzye ilembelo lyakwe 2 Timoti 3:1-3 likufikiliziwa? Uzye antu aingi yataya nu kutemwa umu ndupwa zyao ukulinzile ukuyako sile umu civyalilwa?

Usesemo uwalenga 5 uno mukulola ukufikiliziwa ukalanda pa nsi ino tukaikalamo. Lolini vino Baibo ikalanda pi lyasi kwene lii.

[Amazwi umu vilembo vikulu]

“Unkalwe wa mu ndupwa ali uno usimanyikwa sana umu wikazi pano antu yakasuulako sile. Limwi umwanaci yangamuma ukufika nu ku miku 35 kuli iya ukwaula ukutwala ilyasi ku kapokola.”​—AAKAVWANGILAKO YANO YAKACITILA UNKALWE UMU NDUPWA UKU WALES.