Kasesema Mose walanzile ukuti ndi cakuti tukuvwila masunde yakwe Leza, tulapaalwa. (Malango 10:13; 11:27) Tusiuvwila Leza pa mulandu wakuti tukatiina ukuti angatufulula. Imiyele isuma yakwe Leza ikalenga ukuti twamuvwila pa mulandu wakuti twamutemwa nupya tusilonda ukucita icili consi icingamusosya. “Swemo tukalanga kutemwa kuno twatemwa Leza pa kuyela masunde yakwe.”—1 Yoane 5:3.

Nomba uzye tungapaalwa uli ndi cakuti tuli ni cuvwila kuli Leza? Lekini tulande pa nzila ziili.

“Nene indi [Yeova], Leza winu, wiyo akamusambilizya vyakuti vyamuzipila, . . . nkamutungulula umu nzila ino mulinzile kupita mwenemo.”—EZAYA 48:17.

Yeova Leza, Kaumba witu watumanya ningo nupya akatulanga vino tulinzile ukucita. Ndi cakuti tukulonda vino akatusambilizya vitwazwe ukupingulapo ningo ivyakucita, tulinzile ukusambilila umu Malembelo ya Muzilo pakuti tumanye vino Leza akalonda twacita nu kucita ivintu kwene vivyo.

“Aansansa ayao akauvwa mazwi yakwe Leza nu kuyayela.”—LUKA 11:28, NWT.

Ndakai, antu aingi aakauvwila Izwi Lyakwe Leza yakaya ni nsansa zya cumi. Uvwini ivyacitikile umonsi umwi uwa ku Spain uwasokanga zuwa sana nupya uwacitilanga yauze iviipe ukwikako sile na mamakwe. Wanda umwi wabelenzile ivyalembwa vyakwe kasesema Mose ivyalandanga pa miyele ino Yosefu umwana wakwe Yakobo wakweti iya ufuuke. Yosefu yamukazizye umu uzya nupya yamunyefile apaula umulandu nomba watwalilile ukuya umufuuke, uwa mutende nu kweleela. (Utandiko, cipande 37-45) Umonsi wii uwa ku Spain walanzile ati: “Ukwelenganya pa miyele ino Yosefu wakweti kwalenzile inje umufuuke, uwa cikuuku nu kuikanya. Nupya cico calenga inje ni nsansa ndakai.”

Malembelo ya Muzilo yakatunena ivingi pali vino tulinzile ukucitila antu yauze. Lekini tulanda pali vii umu cipande icalondelelapo.