Leza walavile kasesema Abulaamu ukuti wenga uwa mu ana yakwe wali nu kuleta amapaalo ku antu “amu nko zyonsi.” (Utandiko 22:18) Uzye umuntu wiyo wali nu kuya a weni?

Imyaka umupipi na 2,000 ku cisila, Leza wapeezile Yesu uwafumile muli Abulaamu amaka ya kucita ivizungusyo. Vizungusyo vivyo vyalangililanga ukuti Yesu u wali nu kufikilizya ulayo uno Leza walavile Abulaamu.—Galatiya 3:14.

Ivizungusyo vino Yesu wacisile vyalenzile antu yamanye ukuti ali wino Leza wasoolwile ukupaala antu, nupya vyalangilile nu kuti Leza wali nu kumuomvya ukucita vivyo uku nkoleelo. Lolini vino ivizungusyo vino Yesu wacisile vikulangilila imiyele isuma ino wakwata.

Uluse—Yesu wapozyanga alwale.

Pa nsita imwi, uwalwile tembwe walenzile Yesu ukuti amupozye. Yesu wamulemile nu kumunena ati: “Nkasi, pola!” Nupya lilyo kwene wapozile.—Mako 1:40-42.

Ukapekape—Yesu wapeezile ali ni nzala ivyakulya.

Yesu atalondanga antu ukwikala ni nzala. Pa miku ukucila pali onga wacisile icizungusyo lino walisizye maumba ya antu ukuomvya mikate inono sile ni nswi. (Mateo 14:17-21; 15:32-38) Lino yaliile, yonsi ikwite nupya ivyakulya ivingi vyasyazile.

Cikuuku—Yesu watuutululanga afwe.

Pa mulandu wakuti Yesu wali sana na “mizu”, watuutulwile umwana mulumendo wenga mpo wakwe mukamfwilwa aatakweti ali wensi uwa kumusakamala.—Luka 7:12-15.