U Mulandu ci Uno Tukalondela Uwene Wakwe Leza?
Lino antu yakutandikilapo yaumvilwe, Kaumba witu uwakwata izina lyakuti Yeova u wali ali Kateeka wenga mpo. Mu miteekele yakwe mwali ukutemwa. Wapanzile icalo icisuma ica Edeni pakuti antu yaikala mwenemo. Nupya wisilemo ivyakulya ivingi. Nupya wapeezile antu incito isuma iya kuomba. (Utandiko 1:28, 29; 2:8, 15) Ndi cakuti antunze iyasoololapo ukulateekwa na Leza, nga yacili yakaipakizya umutende.
Antu ya kutandikilako yakanyile ukateeka wakwe Leza
Baibo ikatunena ukuti umungeli wenga uwizile apondoka nu kutandika ukwamwa ukuti Satana Ciwa, watwisike ukateeka wakwe Leza. Walanzile ukuti antu yangaya ni nsansa ndi cakuti yasikutungululwa nu kuteekwa na Leza. Icaulanda i cakuti, avyazi itu akutandikilako, Adamu na Eva yalondiile Satana nupya yapondokiile Leza.—Utandiko 3:1-6; Umbwilo 12:9.
Pa mulandu wakuti Adamu na Eva yakanyile ukateeka wakwe Leza, yaponzizye Paladaise wa kwikalamo nu upalilo wa kwikala amanda pee nu umi umalilike. (Utandiko. 3:17-19) Vino yacisile vyaletelile na ana yano yali nu kukwata. Baibo ikalanda ukuti pa mulandu wakuti Adamu wayembwike, “Iifyo lingile muno nsi pa mulandu wa muntu wenga, nga ni iifyo lyakwe ilyaleta imfwa.” (Loma 5:12) Uluyembu lwalesile icintu na cuze cipisye, cintu cico i cakuti: “Antu yamwi a maka yakateeka auze mu unkalwe.” (Kasambilizya 8:9) Mu mazwi yauze tungati, ndi cakuti antu yakuiteeka ivintu vikaipa.
UTEEKO WA ANTUNZE WATANDIKA
Nimulodi wapondokile ukateeka wakwe Yeova
Kateeka wa kutandikipo pano nsi uwalumbulwa muli Baibo wali a Nimulodi. Nupya umuntu wii wakanyanga ukateeka wakwe Yeova. Kufuma umu manda yakwe Nimulodi, antu aingi aakwata amaka yasiomvya ningo amaka yano yakwata. Umupipi ni myaka 3,000 iyapitapo, Umwene Solomoni walemvile ukuti: “Antu yano yatitikiziwa yakulosya nga kusi nanti aumwi uwakuti angayazwa. Kusi nanti aumwi uwakuti ayazwe pano antu yano yakuyatitikizya yakwatisya maka.”—Kasambilizya 4:1.
Ivintu vitasenuka ndakai. Umu 2009, lupapulo lwakwe ya United Nations lwalanzile ukuti “imiteekele iipe ikuvulilako sile, ali umulandu onga uno ivintu viipe vikuvulilako sile ndakai.”
INSITA YAKUCITAPO CIMWI!
Antu yakalondekwa ya kateeka asuma na mauteeko asuma. Nupya vivyo avino Kaumba witu walaya!
Nanti aakateeka ya antunze acenjela sana yafilwa ukufumyapo intazi zyonsi zino antu yakakwata
Leza wikako Uwene nanti uteeko ulafumyapo mauteeko ya antunze, nupya ‘ulikalilila amanda pe.’ (Danieli 2:44) Uwene uno antu aingi yakapepela ukuti wize. (Mateo 6:9, 10) Nomba Leza umweneco atalateeka umu uteeko uu. Fwandi wasonta umwi uwatazile ayapo umuntunze ukuya Kateeka. Uzye a weni wino Leza wasoolola?
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Uwene Wakwe Leza Waya Umu Mwenzo?
Uzye Baibo ikapiliula cani nga yalanda ukuti “uwene wakwe Leza waya muli mwemwe”?
