Umutumwa Paulo walembiile aina Klistu amu Tesalonika ukuti: “Ndi cakuti umwi asikuvwila mazwi aali muli kalata wii, mulinzile ukumumanya.” (2 Tesa. 3:14) Uku cisila ya eluda aliyo yalondelanga utunguluzi uu. Ya eluda yalandanga ilyasi ilyakucelula uku cilongano ndi cakuti umwi watwalilila ukukanalondela ukusunda ukwaya umwi Izwi lyakwe Leza. Lyene pa cisila ya kasimikila yangata ukulazanwa nu muntu wiyo.

Lelo, kuli kusenuka. Mazwi yano umutumwa Paulo walanzile yakalozya kuli vino Umwina Klistu umu cilongano alinzile ukupingulapo ukucita. Fwandi cisikulondekwa ukuti ya eluda yalanda ilyasi ilyakucelula. U mulandu ci uno ikuyela ukusenuka? Lolini vino Paulo walandangapo lino wapeezile ukusunda kuu.

Paulo wilwike ukuti yamwi umu cilongano yali ni “miyele iipe.” Yatalondanga ukuvwila isunde ilyaya umwi Izwi lyakwe Leza. Lino Paulo wafumileko wasiile wayanena ukuti: “Ndi cakuti umwi asikulonda ukuomba, nu kulya kwene ataalya.” Lelo yamwi yakananga ukuomba pakuti yaisakamala muli vino yakulondekwa, nanti cakuti yakweti amaka akucita vivyo. Nupya yayikanga umu malyasi aatayakumile. Uzye Aina Klistu yali nu kulalola uli antu yaa?—2 Tesa. 3:​6, 10-12.

Paulo walanzile ukuti, “mulinzile ukumumanya.” Izwi ilya Cigiliki ilyaomviwa paa likalozya nu ku kumanya umuntu alino nu kucenjela pakuti atalenga mwacita vino akacita. Paulo wapeezile utunguluzi kuli ya eluda alino na yonsi amu cilongano. (2 Tesa. 1:1; 3:6) Fwandi Umwina Klistu uwamanyile ukuti Umwina Klistu muze atuvwilanga ukusunda ukwaya umwi Izwi lyakwe Leza wali nu kusoololapo “kuta ukuvwana nawe.”

Uzye cii cikupiliula ukuti umuntu wiyo yamulolanga ngu muntu uwafumiziwe umu cilongano? Awe foo, Paulo wayanenyile nu kuti: “Twalililini ukumukomelezya wa mwina.” Fwandi Aina Klistu yali nu kutwalilila ukulazanwa nu muntu wiyo pa kulongana nu mu mulimo wa kusimikila, lelo yataali nu kusoololapo ukulalanzyanya nawe nanti ukwizizya pamwi. U mulandu ci? Paulo watiile, “pakuti auvwe insonyi.” Ndi cakuti twata ukuvwana nawe umu nzila yii, cilalenga auvwe insonyi pali vino akacita nu kusenuka.—2 Tesa. 3:​14, 15.

Uzye Aina Klistu ndakai yanguvwila uli ukusunda kuu? Ica kutandikilapo tulinzile ukusininkizya ukuti umuntu wiyo ali ni “miyele iipe” wakwe vino Paulo walanzile. Paulo atalandanga pali vino umuntu angacita ivingapusanako na vino kampingu itu ingatunena ukucita ivisikupusana na vino Baibo ikalanda. Nupya atalandanga pali vino cila muntu angasoololapo ukucita. Alino atalandanga pali yayo atiyatusosya. Lelo Paulo walanzile pa muntu wino yasunzile ukuomvya Izwi lyakwe Leza, lelo uwasoolwilepo ukukanauvwila.

Na ndakai kwene, ndi cakuti twalola kapepa munji asi ni cuvwila, a tulasoololapo ukukanalanzyanya nu muntu wiyo nanti ukwizizya pamwi nawe. Pa mulandu wakuti tukuipingwilapo ukucita vii, tutalinzile ukunenako aliwensi ndi cakuti asi lupwa witu umupalamisye. Lelo tulatwalilila ukulanzyanya nu muntu wiyo lino tuli pa kulongana nanti umu mulimo wa kusimikila. Ndi cakuti wasenuka muli vino akacita, tulatandika ukwizizya pamwi nawe nupya.