1-2. (a) U mulandu ci uno umutumwa Paulo walandiile ukuti ukutemwa ali miyele iyacindamisya? (b) A mauzyo ci yano tumaasuka?

 LINO umutumwa Paulo walandanga pa utailo, upaalilo, nu kutemwa, wasyalikizye na mazwi akuti ‘icikalamba sana pa [miyele] ii u kutemwa.’ (1 Kol. 13:13) U mulandu ci uno Paulo walandile vii? Uku nkoleelo, tutalalondekwa utailo umu malayo yakwe Leza aakalanda pa kuleta insi ipya pano ala ivintu vino tukapaalila vyafikiliziwa. Nomba tulalondekwa ukutwalilila ukutemwa Yeova na antu. Alino, ukutemwa kuu kulatwalilila ukulakulilako sile amanda pe.

² Pa mulandu wakuti tulalondekwa ukutwalilila ukuya nu kutemwa, tumaasuka mauzyo yatatu. Lya kutandikilapo, u mulandu ci uno tulinzile ukulatemwana? Lyakwe ciili, tukalanga uli ukuti twatemwana? Lyakwe citatu, Tungatwalilila uli ukulatemwana sana?

3. I vyani ivikalenga twatemwa aina na ya nkazi?

³ U mulandu ci uno cacindamila ukulatemwana? Ndi cakuti tukutemwa aina, tukalanga ukuti sweswe Aina Klistu ya cumi. Yesu wanenyile atumwa yakwe ukuti: “Nga mukutemwana, alino yonsi yalamanya ukuti mwemwe yasambi yane.” (Yoa. 13:35) Nupya, kutemwa kukatwazwa ukutwalilila ukuya alemane.  Paulo walanzile ukuti ukutemwa “kukalemanya ningo sana antu.” (Kolo. 3:14) Lelo kwaya umulandu nauze ucindame uulinzile ukutulenga twatemwana. Umutumwa Yoani walembiile Aina Klistu yauze ukuti: “Wensi uwatemwa Leza alinzile ukutemwa nu mwinakwe kwene.” (1 Yoa. 4:21) Ndi cakuti tukulanga ukuti twatemwa yauze, ala tukulanga ukuti twatemwa Leza.

4-5. Langililini vino ukutemwa Leza kwalemana nu kutemwa yauze.

⁴ U mu nzila ci muno ukutemwa Leza kwalemana nu kutemwa aina na ya nkazi? Katulangilile; elenganyini pali vino umwenzo ukaombela pamwi ni vilundwa vyuze ivya mwili. Ndi cakuti dokota walema api kasa litu pakuti alole vino umwenzo witu ukutunta, angamanya ndi cakuti umwenzo witu uli ningo nanti foo. I vyani vino tungasambililako uku cilangililo cii apa kutemwana?

⁵ Wakwe vivi kwene vino dokota angamanya ndi cakuti umwenzo witu uli ningo nanti foo kupitilila mukuvwa vino ukutunta, ali vino naswe kwene tungamanya vino ukutemwa kwitu kuli Leza kuli, kupitila umukulola vino ukutemwa kwitu kuli yauze kuli. Ndi cakuti twazana ukuti ukutemwa kwitu kuli ya kapepa yanji ikutandika ukucepa, ala nu kutemwa kwitu kuli Leza ikutandika ukucepa. Ndi cakuti lyonsi tukulanga ukutemwa kuli ya kapepa yanji, tulamanya ukuti ukutemwa kwitu kuli Leza u kukome.

6. U mulandu ci uno tulinzile ukwikilako mano ukulola ndi cakuti ukutemwa kwitu uku ina na ya nkazi ikutandika ukucepa nanti foo? (1 Yoani 4:​7-9, 11)

⁶ Tulinzile ukwikako sana mano ukulola ndi cakuti ukutemwa kwitu uku ina na ya nkazi ikutandika ukucepa nanti foo. U mulandu ci? Apa mulandu wakuti ucuza witu na Yeova nao kwene ungatandika ukucepa. Umutumwa Yoani walenzile ukuti icisinka cii cuvwike lino watwiwisyeko ukuti: “Aatatemwa umwinakwe wino akalola, atanga atemwe Leza, wino atalolapo.” (1 Yoa. 4:20) I vyani vino tukusambililako? Yeova akauvwa ningo ndi cakuti tukulanga ukuti ‘twatemwana.’—Belengini 1 Yoani 4:​7-9, 11.

7-8. Tungalanga uli ukuti twatemwana?

⁷ Isunde ilyakuti “mwatemwana” tukalizana imiku ingi muli Baibo. (Yoa. 15:​12, 17; Loma 13:8; 1 Tesa. 4:9; 1 Pet. 1:22; 1 Yoa. 4:11) Lelo tutanga tulole ukutemwa na manso pano ukutemwa a vino tukayuvwa umukasi. Nomba tungaleka uli yauze ukumanya ukuti twayatemwa? Tungacita vivyo ukupitila muli vino tukalanda nu kucita.

⁸ Kwaya ivingi vino tungacita pa kulanga ukuti twatemwa aina na ya nkazi. Wakwe: ‘Mwalanda ivyacumi.’ (Zaka. 8:16) “Mwaikala umu mutende na auzo.” (Mako 9:50) “Mwatandikilapo ukucindika auzo.” (Loma 12:10) “Mwapokelelana.” (Loma 15:7) “Twalililini . . . “ukwelelana.” (Kolo. 3:13) “Mwasendelana ivisendo ivinyome.” (Gala. 6:2) “Twalililini ukuteekezyanya.” (1 Tesa. 4:18) ‘Mwaazwana.’ (1 Tesa. 5:11) ‘Mwapepelana.’—Yako. 5:16.

9. U mulandu ci uno ukuteekezya yauze kukalangila ukuti twayatemwa? (Loliniko ni cikope.)

⁹ Lekini tulande pa cintu conga cino tukalangilamo ukuti twatemwana cino itulandapo muli palaglafu iyafumako. Tumalanda pa kusunda kuno Paulo wapeezile ukwakuti: “Twalililini ukuteekezyanya.” U mulandu ci uno ukuteekezya yauze kukalangila ukuti twayatemwa? Kulingana nu lupapulo lumwi ulwa kulondelezyamo ivyeo ulukalanda pali Baibo, izwi lino Paulo waomvizye  ilyakuti “kuteekezya” likapiliula “ukuya umupipi nu muntu umwi lino akuzizimizya intazi.” Fwandi ndi cakuti twazwa kapepa munji lino ali ni ntazi, ala tukumwazwa ukutwalilila ukupita umu nzila ya ku umi. Fwandi lyonsi lino twateekezya umwina nanti nkazi, ala tukulanga ukuti twamutemwa.—2 Kol. 7:​6, 7, 13.

10. Uzye uluse nu kuteekezya vyalemana uli?

¹⁰ Uluse nu kuteekezya vyalemana sana. U mu nzila ci? Uluse u lukalenga umuntu ukuteekezya umwi nu kumwazwa lino akucula. Fwandi tukatandikilapo ukuvwila umwi uluse, alino itumuteekezya. Paulo walanzile ukuti uluse luno Yeova wakwatila antu u lukalenga ukuti ayateekezya. Paulo walondolwile Yeova ukuti a “Tata uwaya nu luse nupya Leza aakateekezya muli vyonsi.” (2 Kol. 1:3) Paulo paa waomvizye izwi lyakuti “uluse” pa kulondolola vino tukayuvwa pali yauze. Fwandi, Leza akaamwa ukuti Tata nanti Intulo ya luse pano wakwata sana uluse. Nupya uluse kwene luu u lukalenga ukuti atuteekezya “umu macuzi itu yonsi.” (2 Kol. 1:4) Wakwe vivi kwene vino amanzi asuma akupita umu mufolo yakalenga umuntu aali nu lusala ukuvwa ningo, ali vino na Yeova akalenga umuntu aali ni ntazi ukuvwa ningo nu kuteekeziwa. Tungakolanya uli Yeova lino tukuvwila yauze uluse nu kuyateekezya? Inzila yonga ino tungacitilamo vivyo, u kukwata imiyele ingatwazwa ukulauvwila yauze uluse nu kuyateekezya. I miyele ci imwi iyo kwene?

11. Ukulingana na Kolose 3:12; na 1 Petulo 3:8 i miyele ci nayuze ino tulinzile ukukwata iingatwazwa ukutwalilila ukuya nu kutemwa alino nu kuteekezya yauze?

¹¹ I vyani ivingatwazwa ukutwalilila ukutemwana nu kuteekezyanya cila wanda? Tulinzile ukukwata imiyele wakwe ukulangulukilana, kutemwana wa ina, ni cikuuku. (Belengini Kolose 3:12; 1 Petulo 3:8.) Uzye imiyele ii ingatwazwa uli? Ndi cakuti tukuvwila ana itu uluse nu kuikako sana mano, tulalondesya ukuyateekezya lino yakucula. Wakwe vino Yesu walanzile, “umuntu akalanda ivyaya umu mwenzo wakwe. Umuntu umusuma akalanda ivisuma pano i vyazuula umu mwenzo wakwe.” (Mate. 12:​34, 35) Ukuteekezya aina na ya nkazi aakulondekwa ukuteekeziwa i nzila isuma sana ino tungalangilamo vino twayatemwa.

12. (a) U mulandu ci uno tulinzile ukwikila mano kuli vino twatemwa yauze? (b) Iiuzyo ci lyene lino tumaasuka?

¹² Swensi kwene tukalonda ‘ukutwalilila ukutemwana.’ (1 Yoa. 4:7) Nomba cacindama ukwiusya vino Yesu watucelwile ukuti “ukutemwa kwa yantu aingi kulacepa.” (Mate. 24:12) Yesu atalandanga ukuti asambi yakwe aingi yali nu kuta ukutemwana. Lelo tulinzile ukucenjele pakuti tutaleka vino amu nsi aataya nu kutemwa yakacita vitulenge ukuta ukutemwa aina itu. Lino tukwelenganya pali vii, lekini twasuke iuzyo lii ilicindame: I vyani ivingatwazwa ukumanya ndi cakuti twatemwa sana aina itu na ya nkazi?

13. I vyani ivilatwazwa ukumanya ndi cakuti twatemwa sana aina itu na ya nkazi?

¹³ I nzila yonga ino tungamanyilamo ndi cakuti twatemwa sana aina itu na ya nkazi, u kulola vino tukacita nga vimwi vyacitika. (2 Kol. 8:8) Conga icingatwazwa ukucita vivyo aeci cino umutumwa Petulo walanzile, watile: “Ni cikalamba pali vyonsi i cakuti, mwatemwana sana, pano ukutemwa kukavimba pa membu izingi.” (1 Pet. 4:8) Fwandi  vino tukacita lino aina itu yaluvyanya nanti yacita vimwi ivya kutusosya, vingatwazwa ukumanya ndi cakuti twayatemwa sana nanti foo.

14. Ukulingana na 1 Petulo 4:​8, tulinzile ukutemwa uli ya kapepa yanji? Langililini.

¹⁴ Lekini twelenganye sana pa mazwi yano Petulo walanzile. Amazwi akutandikilapo umu cikomo 8 yakalanda ukuti tulinzile ‘ukutemwana sana.’ Izwi lino Petulo waomvizye ilyakuti ‘ukutemwana sana’ likapiliula nu kuti ‘kukuzya ukutemwa.’ Amazwi alondelelapo umu cikomo cii yakalondolola vino ukutemwana sana kukatulenga ukucita. Ukutemwa kukavimba pa membu zya ina itu. Cii tungacikolanya kuli vino tungatoola insalu ituikonzolola nu kuivimba pali vino tusikulonda vyalolekela ku antu, ali vino nu kutemwa “kukavimba pa membu izingi” izya ina na ya nkazi asi sile izinono. Izwi lyakuti ‘ukuvimba’ lyaomviwa pa cikomo cii ku kulozya uku kwelela. Wakwe vivi kwene vino insalu ingavimba pali vino tusikulonda vyalolekela ku antu, ali vino nu kutemwa kukavimba pa utonte nu kukanamalilika ukwa ina itu na ya nkazi.

15. Uzye ukutemwa sana aina na ya nkazi kulatulenga ukucita vyani? (Kolose 3:13)

 ¹⁵ Ukutemwa kuno twatemwa aina na ya nkazi kulinzile ukuya ukukome cakuti twaitemelwa ukuyelela ndi cakuti yatuluvyanya, nanti cakuti insita zimwi ukucita vivyo kukalondekwa ukuombesya. (Belengini Kolose 3:13.) Ndi cakuti twelela yauze, tukalanga ukuti twayatemwa sana nu kuti tukalonda ukuzanzya Yeova. I vyani vyuze ivingatwazwa ukulaelela aina na ya nkazi alino nu kakanasoka zuwa lino yatuluvyanya?

16-17. I vyani na vyuze ivilatwazwa ukulaelela yauze nga yatuluvyanya? Langililini. (Loliniko ni cikope.)

¹⁶ Mwaika mano ku miyele isuma ino aina inu na ya nkazi yakwata, mutaika mano kuli vino yakaluvyanya. Elenganyini pali cii. Mwelenganye ukuti mukwizizya pamwi na ina na ya nkazi. Mukuipakizya ukuya pamwi, lyene pa cisila mwasoololapo ukukopelwa pamwi foto. Lyene mwakopelwapo na yauze yaili, limwi iyakutandikilapo itaali yaloleka ningo. Lyene paa mwakwata mafoto yatatu. Lelo pali foto yonga mwazana ukuti umwina wenga aali wifya uku manso. I vyani vino mungacita kuli foto iyo? Kwene mungafuta foto iyo pano ala imukwata mafoto yaili asuma pano mwensi imwamwentula, ukwikako sile nu mwina kwene wiyo.

¹⁷ Lekini tukolanye mafoto yano tukasunga uku vintu vino tukaiusya pa ina. Tukakwata utusita utusuma lino tukaipakizya ukuya pamwi  na ina na ya nkazi. Nomba tuti limwi lino mukwizizya pamwi, umwina nanti nkazi walanda nanti ukucita vimwi ivyakumisosya. Mungacita uli nga caya vivyo? Cingazipa ukwililako kuli vino iwacita wakwe vino tungafuta foto iisikuloleka ningo. (Mapi. 19:11; Efes. 4:32) Tungakwanisya ukwilila kuli vino aina na ya nkazi yakatuluvyanya nga tukwiusya ivisuma ivingi vino yakacita. Vikwene ali vino tukalonda ukulaiusya pa ina itu na ya nkazi.

18. I visinka ci ivikalamba vino itusambilila umu cipande cii pa kutemwa?

¹⁸ U mulandu ci uno tulinzile ukutwalilila ukutemwana sana? Wakwe vino itusambilila, nga tukulanga ukutemwa uku ina na ya nkazi ala tukulanga ukuti twatemwa Yeova. Tukalanga uli ukuti twatemwa aina na ya nkazi? Inzila yonga ino tukacitilamo vivyo, u kuyateekezya. Ndi cakuti tuli ni cikuuku uku ina na ya nkazi ‘tungatwalilila ukuteekezyanya.’ Tungacita uli pakuti tutwalilile ukulatemwana sana? Tungacita vivyo ndi cakuti tukuombesya ukwelela yauze.

19. U mulandu ci uno tulinzile ukutwalilila ukutemwana sana ndakai?

¹⁹ U mulandu ci uno cacindamila sana ndakai ukutwalilila ukutemwana? Petulo walanzile ukuti: “Impela ya vintu vyonsi yatipalama. Fwandi, . . . mwatemwana sana.” (1 Pet. 4:​7, 8) Vino impelelekezyo ya nsi ii ipe ikuya ikupalama, i vyani vino tungenekela? Yesu wanenyile alondezi yakwe ukuti: “Antu amu nko zyonsi yalamupata pa mulandu wi zina lyane.” (Mate. 24:9) Pakuti tutwalilile ukuya acisinka kuli Yeova asi mulandu nu kutupata, tulinzile ukutwalilila ukuya alemane. Ndi cakuti twatwalilila ukutemwana, Satana alavilwa ukutupatukanya pano “ukutemwa u kukalemanya ningo sana antu.”—Kolo. 3:14; Filipi 2:​1, 2.