Ya Russia Yazanza Impanga ya Ukraine
Katondotondo pa 24 Febuluwale, 2022, ya Russia yatandike ukuzanza impanga iya Ukraine nanti icakuti intunguluzi izya mu mpanga izingi zyalesizye ukuti yatacita vivyo. Uzye ukuzanza kuu kumakuma uli insi yonsi? Umu manda anono aapitapo, kalemba uwa mu kaungwe ka United Nations uwi zina lyakuti Antónyo Gutelesi walanzile ukuti: “Inkondo yii imalenga antu yacule sana nu kuti kutaya ukucingililwa umu mpanga izya mu Europe nu mu mpanga zyuze umu nsi yonsi.”
Uzye Ivintu Vyamusango uu Vikalangilila Cani Ukulingana na Vino Baibo Ikalanda?
Yesu Klistu wasoowile pa nsita ino “uluko lulakatukila uluko luze nu wene ulakatukila uwene uze.” (Mateo 24:7) Belengini icipande icakuti “I Vyani Vikalangilila ‘Manda ya Kusyalikizya’ Nanti ‘Insita ya Mpelelekezyo’?” pakuti mulole vino Baibo ikalanda ukuti inkondo izikucitika ndakai zikafikilizya usoowelo uno Yesu walanzile.
Ibuku lya Kusokolola likalanda pa nkondo iikaimililwako umonsi uwakwela pa “mfwalasi iyenzu” nupya ‘aakafumya umutende pano nsi.’ (Kusokolola 6:4) Belengini cipande icakuti “Aonsi Yani Akwela pa Mfwalasi—Aaweni?” pakuti mulole vino usesemo uu ukalozya uku nkondo izikucitika ndakai.
Umwi ibuku lyakwe Danieli mwaya usoowelo uukalanda pa kuzanzana kwa “mwene uwa ku katutu” nu “mwene uwa ku kaeya.” (Danieli 11:25-45) Tambini vidyo iyakuti Usesemo Ukufikiliziwa Uwaya Umu Cipande 11 Cakwe Danieli, pakuti musambilile umulandu uno tungalandila ukuti impanga iya Russia ni mpanga izikaitungilila zikaamilwa ukuti umwene uwa ku katutu. a
Ibuku lya Kusokolola lyalanda na pa “nkondo iya pa wanda ukalamba wakwe Leza wa Maka Yonsi.” (Kusokolola 16:14, 16) Nomba yii asi nkondo zya nko wakwe zino tukulola zikucitika ndakai. Pakuti mumanyilepo na vyuze pali vino vili nu kucitika uku nkoleelo, lolini cipande icakuti “Uzye Inkondo ya Amagedoni Icani?”
U mulandu ci Uno Mungatailila Ukuti Uku Nkoleelo Kulacitika Ivisuma?
Baibo ikati Leza alalenga “inkondo pano nsi yonsi” ukusila. (Masamu 46:9) Pakuti mumanyilepo na vyuze pali vino Leza watulaya uku nkoleelo, belengini icipande cakuti “Upaalilo Uwa Cumi Cumi pa Visuma Ivilacitika Uku Nkoleelo.” b
Yesu wasambilizye alondezi yakwe ukulapepa ukuti Uwene Wakwe Leza Wize. (Mateo 6:9, 10) Uwene uwo uteeko uwa kwi yulu uulafikilizya vino Leza akalonda ukucitila antunze, nupya Leza alalenga kukaye umutende mu nsi yonsi. Pakuti mumanye vino Uwene uwo ungamwazwa, mukatambe vidyo iyakuti Uzye Uwene Wakwe Leza I Cani?
Umu Ukraine mwaya ya Nte Yakwe Yeova ukucila pali 129,000. Wakwe vino ya Nte Yakwe Yeova yonsi yaaya, na ya Nte kwene aa mu Ukraine yakakolanya Yesu pa kukanaika umu vikanza ivya miteekele nupya yasilwako inkondo. (Yoani 18:36) Umu nsi yonsi, ya Nte Yakwe Yeova yatwalilila ukusimikila “ilyasi lisuma ilya Wene” ilyakuti, Uwene wakwe Leza ulafumyapo intazi zyonsi zino antunze yakakwata, ukwikako sile ni nkondo. (Mateo 24:14) Mukwai pakuti musambilile na vyuze pa upaalilo uwa ku nkoleelo mungatunena.
a Ivyeo ivingi ivikalanda pa usesemo uu, mungavizana pa cipande icakuti “‘Umwene wa ku Katutu’ mu Manda Akusyalikizya” ni cakuti “Uzye Ndakai ‘Mwene wa ku Katutu A Weni?’”
b Mungabelenga icipande cii mu Ciyemba nu mu Ciswahili
Limwi Mungatemwa Ukulolako na Vii
TWALILILINI UKUYA AITEYANYE!
Imbutusi—Vino Baibo Ikalanda
Baibo ikalondolola icikalenga ukuti antu yafume uku mpanga zya kumwao ni cilalenga ukuti intazi ii isile.
MASAMBILILO AA MULI BAIBO AACINDAME
Uzye Uwene Wakwe Leza I Cani?
Mu mulimo wakwe onsi, Yesu wasambizyanga antu pa Wene Wakwe Leza kucila vino wasambizya pa vintu vyuze. Pa myaka iingi, alondezi yakwe yakapepa ukuti Uwene uwo wize.
