ISAMBILILO 34

Tungalanga Uli Ukuti Twatemwa Yeova?

LIZYINI

Uzye mwatemelwako Leza ukufuma pano mwatandikila ukusambilila Baibo? Uzye mungatemwa ukutwalilila ukukomya ucuza winu na aliwe? Nga vino cili, mwaiusya ukuti nga Yeova walola vino ukutemwa kuno mwamutemwa kukulilako, alamutemwa sana nupya alaamusakamala. Mungalanga uli ukuti mwamutemwa?

1. Tukalanga uli ukuti twatemwa Yeova?

Tukalanga ukuti twatemwa Yeova nga tukumuvwila. (Belengini 1 Yoani 5:3.) Asipatikizya ali wensi ukulamuvwila. Lelo watupeela isyuko lya kusoololapo nampo nga tukulonda ukumuvwila nanti foo. U mulandu ci? Yeova akalonda twamuvwila “nu mwenzo onsi.” (Loma 6:17) Cii cikupiliula ukuti, asilonda twamuvwila sile pa mulandu wakuti avino tulinzile ukucita, lelo a pa mulandu wakuti twamutemwa. Iviputulwa 3 na 4 umwi buku lii i vya kumwazwa ukulanga ukutemwa kuli Yeova lino mukucita ivikamuzanzya nu kukanacita ivisimuzanzya.

2. U mulandu ci uno cingatalila ukulanga vino twatemwa Yeova?

“Ivikacula umuntu musuma ala ivingi wakwe cimwi.” (Masamu 34:19) Swensi kwene tukalwisyanya nu kukanamalilika kwitu. Nupya tungakwata intazi zya kuliizya impiya, ukufyengwa alino ni ntazi zyuze. Nga twakwata intazi, cingatutalila ukucita vino Yeova akulonda tucite. Na cii cingacitika pa mulandu wakuti cingatwangukila ukukanauvwila Yeova. Nomba ndi cakuti mwacita vino Yeova akulonda mucite, mulalanga ukuti mwamutemwa ukucila icintu icili consi. Nupya mulalanga ukuti mwaya acisinka kuli aliwe. Nawe alaya uwa cisinka kuli mwemwe. Atalatala amusye.—Belengini Masamu 4:3.

LONDELEZYINI NA VYUZE

Sambililini umulandu uno Yeova akayela ni nsansa nga mukumuvwila, ni cingamwazwa ukumuvwila.

3. Umulandu uwamukuma

Ukulingana ni buku lya muli Baibo lyakwe Yobo, Satana ataapeezile sile Yobo umulandu, lelo wapeezile na antu yonsi aakalonda ukuombela Yeova. Belengini Yobo 1:1, 6–2:10, alino mulanzyanye mauzyo yaa:

Uzye Satana walanzile ukuti u mulandu ci uno Yobo uvwilanga Yeova?—Lolini Yobo 1:9-11.
Uzye Satana walanzile vyani pa yantu yonsi, ukwikako namwe kwene?—Lolini Yobo 2:4.

Belengini Yobo 27:5b, alino mulanzyanye iuzyo lii:

Uzye Yobo walangizye uli ukuti watemilwe sana Yeova?

Yobo walangizye ukuti watemilwe Yeova lino watwalilile ukuya uwa cisinka kuli aliwe

ukalanga ukuti twatemwa Yeova nga tukutwalilila ukuya ni cisinka kuli aliwe

4. Mwazanzya Yeova

Belengini Mapinda 27:11, alino mulanzyanye mauzyo yaa:

Uzye Yeova akauvwa uli ndi cakuti muli na mano nupya mukumuvwila? U mulandu ci?

5. Mungaya acisinka kuli Yeova

Ukutemwa Yeova kukalenga twanenako yauze pali aliwe. Ukuya acisinka kuli aliwe kukalenga twacita vivyo nanti icakuti icitala. Tambini VIDYO, alino mulanzyanye mauzyo atiyalondelelapo.

VIDYO: Mwalanda Pali Vino Mwazumilamo Asi Mulandu Yakumukanya (5:09)

Uzye cikamutalila ukunenako yauze pali Yeova?
I vyani ivyavwile ya Grayson muli vidyo ukuta ukuvwa intete?

Cikaanguka ukuya uwa cisinka kuli Yeova ndi cakuti twatemwa vino watemwa nu kupata vino wapata. Belengini Masamu 97:10, alino mulanzyanye mauzyo yaa:

Ukulingana na vino imusambilila, i vintu ci vimwi vino Yeova watemwa? Nupya i vyani vino wapata?
Mungasambilila uli ukutemwa ivisuma nu kupata iviipe?

6. Ivintu vikatuzipila nga tukuvwila Yeova

Ukuvwila Yeova kwazipa sana. Belengini Ezaya 48:17, 18, alino mulanzyanye mauzyo yaa:

Uzye mukwelenganya ukuti tungataila ukuti Yeova wamanya ivikatuzipila lyonsi? U mulandu ci?
Uzye ukusambilila Baibo nu kusambilila pali Leza wa cumi, Yeova, ikumwazwa uli?

YAMWI YAKALANDA UKUTI: “Vino nkacita vitacindama kuli Leza.”