ISAMBILILO 16

I Vyani Vino Yesu Wacisile Lino Wali Pano Nsi?

LIZYINI

Antu aingi yakaelenganya ukuti Yesu a kanya akakulondekwa uwazwilizyo, kasesema uwa mano nanti umuntu aali umu kufwa. Nomba, uzye tungasambilila ivingi pali aliwe nga twalola vino umi wakwe wali lino wali pano nsi? Mwi sambililo lii, tumalanda pa vintu vimwi ivicindame vino Yesu wacisile na vino vingamwazwa.

1. U mulimo ci uwali ucindame sana kuli Yesu?

Umulimo uwali ucindame kuli Yesu, u wa kusimikila “ilyasi lisuma ilya Wene wakwe Leza.” (Belengini Luka 4:43.) Wasimikilanga ilyasi lisuma ilyakuti Leza alimika uwene nanti uteeko uulasisyapo intazi zyonsi zino antu yakakwata. a Pa myaka itatu na afu, Yesu waombisye ukusimikila antu api lyasi lii ilyakukomelezya.—Mateo 9:35.

2. U mulandu ci uno Yesu wacitilanga ivizungusyo?

Baibo ikalondolola “milimo ya maka ni vizungusyo ni vimanyililo vino Leza wacisile” ukupitila muli Yesu. (Milimo 2:22) Leza wapeezile Yesu amaka ya kutungulula imiceele, ukulisya antu aingi, ukupozya alwale nu kutuutulula afwe. (Mateo 8:23-27; 14:15-21; Mako 6:56; Luka 7:11-17) Ivizungusyo vino Yesu wacitanga vyalangililanga sile apaswe ukuti Leza u wamutumile. Vyalangililanga nu kuti Yeova wakwata amaka aakufumyapo intazi zyonsi zino tukakwata.

3. I vyani vino tungasambilila kuli vino Yesu wacitanga?

Yesu uvwilanga Yeova muli vyonsi. (Belengini Yoani 8:29.) Yesu wacisile vyonsi vino Isi wamunenyile ukucita, wacisile vii umi wakwe onsi lino wali pano nsi, nanti cakuti yamwi yamulesyanga ukucita vivyo. Walangilile ukuti antu yangatwalilila ukuombela Leza, nanti cakuti ivintu ivitala. Fwandi tungakolanya Yesu “nu kulondela umu ntampulo zyakwe.”—1 Petulo 2:21.

LONDELEZYINI NA VYUZE

Sambililini vino Yesu wanenanga antu ilyasi lisuma nu kucita ivizungusyo.

4. Yesu wanenanga antu ilyasi lisuma

Yesu wapitanga intamfu itali umu miseo iyakweti sana ulukungu pakuti sile asimikile antu aingi ilyasi lisuma. Belengini Luka 8:1, alino mulanzyanye mauzyo yaa:

Uzye Yesu wasimikilanga sile kuli yayo aizanga umu kuvwa kuli aliwe?
I vyani vino Yesu wacitanga pakuti azane antu?

Leza wasoowile ukuti Mesiya alaasimikila antu ilyasi lisuma. Belengini Ezaya 61:1, 2, alino mulanzyanye mauzyo yaa:

Uzye Yesu wafikilizye uli usesemo uu?
Uzye mukwelenganya ukuti antu ndakai yafwile ukuvwa ilyasi lisuma?

5. Yesu wasambilizyanga masambililo acindame

Ukulunda pa kusimikila ilyasi lisuma ilya pa Wene wakwe Leza, Yesu wasambilizyanga na masambililo acindame. Sambililiniko vimwi vino wasambilizye umwi lyasi lya pa mwamba ilyamanyikwa sana. Belengini Mateo 6:14, 34 na 7:12, alino mulanzyanye mauzyo yaa:

U kusunda ci ukucindame kuno Yesu walanzile umu vikomo vii?
Uzye mukwelenganya ukuti ukusunda kuu kungazwa antu ndakai?

6. Yesu wacitanga ivizungusyo

Yeova wapeezile Yesu aamaka akucita ivizungusyo ivingi. Pakuti mulole icizungusyo conga cino wacisile, belengini Mako 5:25-34 nanti tambini VIDYO. Lyene mulanzyanye mauzyo atiyalondelelapo.

VIDYO: Umwanaci Umulwale Wapoziwa (5:10)

I vyani vino umwanaci umulwale uwalali muli vidyo wataile?
I vyani vino mwatemwa pa cizungusyo cii?

Belengini Yoani 5:36, alino mulanzyanye iuzyo lii:

Uzye ivizungusyo vino Yesu wacitanga vyalangililanga cani pali aliwe?

Uzye imumanya?

Ivingi vino twamanya pali Yesu vyafuma umu mabuku 4 aamuli Baibo yano yakaama ukuti mabuku ya malandwe kuli kuti Mateo, Mako, Luka, na Yoani. Cila kalemba wi landwe walemvile ivipusanepusane pali Yesu. Nga twabelenga mabuku yonsi 4, tukamanya vino umi wakwe Yesu wali.

MATEO

walemvile ibuku lya kutandikilapo ililandwe. Likalanda sana pali vino Yesu wasambilizyanga. Sana sana vino wasambilizyanga pa Wene wakwe Leza.
MAKO

walemvile ibuku ilinono sana ililandwe. Likalanda pa vintu ivicindame ivyacitikanga.
LUKA

walondolola vino ipepo lyacindiime kuli Yesu na vino Yesu wacindike sana anaci.
YOANI

walanda pali vino Yesu walandanga na ya cuza yakwe nantu yauze. Nupya vii vikatwazwa ukumanya vino Yesu wali.