Milimo ya Atumwa 1:1-26
1 Kuli Teofilo, umwi buku lya kutandikilako, nakulembiile pa vintu vyonsi vino Yesu wacitanga nu kusambilizya
2 ukufika na pa wanda uno wasenzilwe ukwi yulu pa cisila ca kupeela masunde uku yatumwa yano wasoolwile nu mupasi wa muzilo.
3 Pa cisila ca kucula, Yesu walolekiile kuli aliyo imiku iingi pakuti yasininkizye umu cumi ukuti wali nu umi. Yamuweni pa manda yonsi 40 nupya walandanga pa Wene wakwe Leza.
4 Lino Yesu wakomaanyile nayo, wayakonkomizye ati: “Mutafuma umu Yelusalemu lelo twalililini ukuloleela cino Tata wamulavile cino muvwile kuli nene;
5 pano Yoani wabatizyanga na manzi, lelo mwemo patalalengela, mulabatiziwa nu mupasi wa muzilo.”
6 Fwandi lino yakolongine yamuzizye iyati: “Mwene, uzye umawezezya uwene ku ina Izlaeli pa nsita kwene yii?”
7 Nawe wayaswike ati: “Usi umulimo winu ukumanya insita nanti amanda, pano Tata aliwe wakwata maka ya kucita vivyo.
8 Lelo mulapokelela maka lino umupasi wa muzilo uliza pali mwemwe, nupya mulaya inte zyane umu Yelusalemu, mu Yudeya monsi nu mu Samaliya alino nu kufika kuno insi yapela.”
9 Pa cisila ca kulanda ivintu vii, wasenzilwe ukwi yulu ala yakulola nako, nupya makumbi yamuvimbilikizye ata nu kuloleka.
10 Nupya lino yalolekesyanga umwi yulu ala Yesu akupita, lilyo kwene kwaloliike aonsi yaili aazwite ivitiswe ala yaimi umupiipi nayo
11 nupya yalanzile iyati: “Mwe yantu ya mu Galili, u mulandu ci uno imwimilila mukulolekesya umwi yulu? Wii Yesu uwali pamwi namwe uwatasendwa ukwi yulu, alawela umu musango uli umwi kwene na uno imulola wailamo ukwi yulu.”
12 Lyene yaswilile uku Yelusalemu ukufuma ku Mwamba wa Miolivi, uwali umupiipi na Yelusalemu, apaali sile umupiipi na kilomita wenga* ukufuma umu musumba.
13 Lino yafisile, yaile umu muputule wa papela muno iikalanga. Paali Petulo na Yoani, Yakobo na Andeleya, Filipi na Tomasi, Batolomeo na Mateo, Yakobo mwana Alufeo, na Simoni umucincile, na Yuda mwana Yakobo.
14 Yaa yonsi yali nu mwenzo onga uwa kupepa lyonsi, pamwi na anaci yamwi na Maliya nyina wakwe Yesu alino na ina yakwe.
15 Pa wanda umwi, Petulo wimilile apa nkoleelo ya ina (impendwa ya yantu yonsi yali apiipi na 120) nu kulanda ati:
16 “Mwe inane, umupasi wa muzilo walandiile muli Devedi pali Yuda uwatungulwile antu aalemile Yesu. Cali ningo ukuti ilembo lilyo lifikiliziwe.
17 Pano wali umwi umba litu nupya waombanga pamwi naswe.
18 (Fwandi umuntu kwene wii, wakazile impanga ukuomvya impiya zino yamulipiile pa viipe vino wacisile, nupya waponyile akolezya umutwe nu mwili wakwe walepwike pakasi ni vya mukasi vyonsi ivifuma.
19 Aikazi yonsi amu Yelusalemu yamanyile ilyasi lilyo, cakuti yamanga impanga iiyo mu lulimi lwao ukuti Akelidema kuli kuti “Mpanga ya Wazi.”)
20 Pano calembwa umwi buku lya malumbo ukuti, ‘Lekini ing’anda yakwe isyale icitotela, nupya mutikalamo umuntu ali wensi,’ nu kuti, ‘Lekini umuntu muze aliwe apyane umulimo wakwe.’
21 Fwandi icilinga ukuti umwi amupyane ukufuma pa yantu yano yaali naswe lino Umwene Yesu Klistu waombanga pamwi naswe,
22 ukufuma lino Yesu wabatiziwe kuli Yoani kufika na pa wanda uno wasenzilwe ukwi yulu kufuma kuli sweswe. Umuntu wiyo alinzile ukuya inte pamwi naswe pa kutuutuluka kwakwe Yesu.”
23 Lyene yasoolwile antu yaili, Jozefu wino yamanga yakuti Basabasi, nupya yamwamanga nu kuti Yusito, alino na Matiyasi.
24 Lyene yapefile iyati: “We Yeova, wemuno wamanya imyenzo ya yantu yonsi, tulange pa yantu yaa yaili wino watusoolola
25 ukuti aye umutumwa nu kukuombela umulimo uno Yuda wasiile nu kucita vino umwineco walondanga.”
26 Fwandi yapendozile pa yantu yayo, nupya kapendwilo kaponiile pali Matiyasi, nupya watandike ukupendelwa pa yatumwa 11.
Mafutunoti
^ Nanti “intamfu ino Ayuda yazumiliziwe ukupita pa wanda wi Sabata.”
