Isamu 89:1-52
Masikiu.* Lwimbo luno Etani Umwina Ezala wimvile.
89 Ndimba pa kutemwa kwakwe Yeova ukwa cumi manda pe.
Ndamanyisya ucisinka wakwe uku nkulo zyonsi.
2 Pano nalanda ukuti: “Ukutemwa kwako ukwa cumi kulatwalilila ukuyako manda pe,Nupya walenga ucisinka wako ukuyako umu mayulu.”
3 “Napangana upangano nu musoololwe wane;Nalapa kuli Devedi umuomvi wane ukuti:
4 ‘Ndalenga umwanako ukutwalilila ukuyako manda pe,Nupya ndalenga icilimba cako ica wene ukutwalilila ukuyako uku nkulo zyonsi.’” (Selah)
5 Mayulu yakakulumbanya we Yeova pa mulandu ni vizungusyo vyako,Yakakulumbanya umwi umba lya ya muzilo pa mulandu na ucisinka wako.
6 Pano a weni umwi yulu aangalingana na Yeova?
A weni pa yana yakwe Leza uwaya wakwe Yeova?
7 Iumba lya ya muzilo likaopa Leza;Wene wakulisya nupya waya u wakuzungusya kuli yonsi aamuzinguluka.
8 We Yeova Leza wa maumba,A weni uwakwata amaka wakwe wewe we Jah?
Ucisinka wako wakuzinguluka.
9 Wewe ukatungulula yemba wa maka;Ndi cakuti mayimbi yakatuka, ukayalesya.
10 Watucimvya Lahabu nu kumukoma.
Watusalanganya alwani yako ukuomvya ikasa lyako ilya maka.
11 Mayulu aako ni insi i yako;Wewe wapanzile insi kumwi na vyonsi ivyayamo.
12 Wewe wapanzile incende iya ku kaeya ni ya ku katutu;Umwamba wa Taboli nu wa Helimoni vikalumbanya izina lyako ni nsansa.
13 Ikasa lyako i lya maka;Ikasa lyako lyakoma;Ikasa lyako ili lunji lyaya papela.
14 Ulungami nu mulinganya aali mufula wa cilimba cako ica wene;Kutemwa kwako ukwa cumi na ucisinka vyaya pa nkoleelo yako.
15 Aansansa aantu aamanya ukuti yakakulumbanya ni nsansa.
We Yeova, yakapita umu luswepo lwa cinso cako.
16 Yakasansamukila umwi zina lyako uwanda onsi,Nupya yakacindamikilwa umu ulungami wako.
17 Pano wewe uli lulumbi lwa maka yao,Nupya ndi cakuti wazumilizya, maka itu yakacindamikwa.
18 Pano icisyangu citu i cakwe Yeova,Uwa Muzilo wakwe Izlaeli aali mwineco wa mwene witu.
19 Pa nsita iiya walanzile umu cilolwa uku yantu yako aacisinka uti:
“Iimpeela amaka uku muntu wa maka;Incindamika musoololwe ukufuma umu yantu.
20 Inzana Devedi umuomvi wane;Iimusonta ukupitila umu kumwitila mafuta yane aamuzilo.
21 Ikasa lyane lilakutungilila,Nupya lilakukomya.
22 Kusi umulwani aalapoka umusonko kuli aliwe,Nupya kusi umuntu aatalungama aalamucuzya.
23 Ndasandoola aalwani yakwe pa nkoleelo yakweNupya ndakoma yayo aamupata.
24 Ucisinka nu kutemwa kwakwe ukwa cumi vyaya nawe,Nupya maka yakwe yalacindamikilwa umwi zina lyane.
25 Ndika ikasa lyakwe pali yembaNi kasa lyakwe ilya kwi lunji apa nguzi.
26 Alapunda kuli nene nu kuneena ati: ‘Wewe Tata,Leza wane nupya iciliwe cane ica kupusukilamo.’
27 Nupya ndamulenga ukuya iyeli,Alaya ali mukalamba sana pa ene ya mu nsi.
28 Ndatwalilila ukulanga ukutemwa kwa cumi kuli aliwe manda pe,Nupya icipangano cane na aliwe citalasila.
29 Ndalenga umwanakwe ukutwalilila ukuyako manda peNupya ndalenga icilimba cakwe ica wene ukutwalilila ukuyako wakwe vino mayulu yatwalilila ukuyako.
30 Ndi cakuti anakwe yata ukulondela masunde yaneNupya yata ukucita ukulingana na vino nayanena,
31 Ndi cakuti yata ukuvwila masunde yaneNu kuta ukuyalondela,
32 Lyene ndayafululula pa mulandu na ucintuvwa wao ukuomvya intuwaNupya ndayacapa pa mulandu nu kuluvyanya kwao.
33 Lelo ntalata ukulanga ukutemwa kwa cumi kuli aliweNanti ukuta ukuya ni cisinka uku ulayo uno nalaya.
34 Ntalatama icipangano caneNanti ukusenula vino imilomo yane yativwanga.
35 Indapa sile umuku onga muli umuzilo waneNtalabepa kuli Devedi.
36 Umwanakwe alatwalilila ukuyako manda pe;Cilimba cakwe ica wene cilatwalilila ukuyako wakwe vino ilanzi lyaya pa nkoleelo yane.
37 Cilatwalilila ukuyako manda pe wa mweziWakwe kamboni wa cumi umwi yulu.” (Selah)
38 Lelo wemo watazyela nu kukana umusoololwe wako;Wasokela umusoololwe wako.
39 Watutama icipangano cino wapangiine nu muomvi wako;Wakowezya icisote cakwe ica wene ukupitila umu kucisumbila pansi.
40 Watuongolola iviumba vyakwe ivya maka vyonsi;Nupya watuponya malinga yakwe.
41 Aapitanzila yonsi iyamwiyila vino wakwata;Akusaalulwa uku inamupalamano yakwe.
42 Watulenga aalwani yakwe ukucimvya;Watulenga alwani yakwe yonsi ukusansamuka.
43 Watuwezya nu lupanga lwakwe,Nupya utamwavwile umu ulwi.
44 Watufumyapo ucindami wakweNupya watusumba icilimba cakwe ica wene pansi.
45 Watucefya manda ya ulumendo wakwe;Watumulenga ukuvwa insonyi. (Selah)
46 We Yeova uzye ulatwalilila ukufisama ukufika lilaci? Uzye a manda pe?
Uzye ukali wako ulatwalilila ukwaka wa moto?
47 Iusya vino umi wane wipimpala.
Uzye waumvile antu yonsi apaula umulandu?
48 U muntu ci aangikala ukwaula ukufwa?
Uzye angaipususya uku maka yi Lindi?* (Selah)
49 We Yeova, uzye ukutemwa kwa cumi kuno walanzile umu manda ya ku cisila kuli kwi,Kuno walafile kuli Devedi pa mulandu na ucisinka wako?
50 We Yeova, iusya vino antu yakapontela aomvi yako;Vino nkazizimizya imiponto ya yantu yonsi;
51 We Yeova, iusya vino alwani yako yakatukana;Vino yakatuka umusoololwe wako monsi muno akupita.
52 Si Yeova alumbanyiziwe manda pe. Ameni, Ameni.
