Ezaya 14:1-32
14 Yeova aluvwila Yakobo uluse nu kusoolola Izlaeli nupya kwene. Alaleka ukuti yaikala umu mpanga yao, nupya antu ya ku mpanga zyuze yalaya uku ya mu ng’anda yakwe Yakobo nu kutandika ukwikala nayo.
2 Antu amu nko zyuze yalayawezya uku mpanga yao, nupya amu ng’anda yakwe Izlaeli yalaleka ukuti antu yayo yaye azya yao mu mpanga ino Yeova wayapeela; yalasenda aayasenzile umu uzya kuti yaye azya yao, nupya yalaatungulula aayapatikizyanga ukuomba imilimo.
3 Uwanda uno Yeova alalenga ukuti mupuuze uku macuzi inu nu ku ulanda alino nu ku uzya uwipisye uno mulimo,
4 mulatumfya umwene wa ku Babiloni muti:
“Iyee mwe vino uwapatikizyanga auze ukuomba imilimo watasila!
Imicuzyo yatisila!
5 Yeova watavuna intuwa ya muntu mwipe,Intuwa yakwe ya kateeka,
6 Aakauma antu icipisye nu mukota ukwaula ukuta,Aakacimvya inko nu kutwalilila ukuzicuzya sana.
7 Insi yonsi ikupuuza ukwaula icimvulunganya.
Antu yakupunda ni nsansa.
8 Nanti sile imiti ya yunipa ikusansamuka pa mulandu naawe,Pamwi ni mikedali iya ku Lebanoni.
Ikuti, ‘Kufuma sile pano wawila,Kusi ali wensi aakaiza umu kutukoma.’
9 Nanti sile a Malindi*Iyazanga uku kukukomenkanya lino umayako.
Pa mulandu naawe, malindi iyazyula yonsi aafwa,Kuli kuti intunguluzi zyonsi izya pano nsi izyacuzyanga antu.
Iyalenga ya mwene yonsi amu nko ukukatuka pa vilimba vyao ivya wene.
10 Yonsi yatandika ukuvwanga nu kukunena iyati,‘Uzye naawe kwene watuya umutonte wakwe sweswe?
Uzye i cumi kwene waya wakwe sweswe?
11 Cilumba cako iciya uku Malindi*Kumwi ni ciunda cako cakwe ya banjo.
Ingonyo iziya ali bedi wako,Na ya lyambi iyaya aali ca kuvimbala cako.’
12 Iyee vino watupona ukufuma umwi yulu,We lutanda ulukaaka uku maca!
Iyee vino watuputulwa nu kusumbilwa umu nsi,Wemuno wacimvizye inko!
13 Welenganyanga uti, ‘Ndaya ukwi yulu,
Ndaya nkike icilimba cane ica wene ukupuzya pa ntanda zyakwe,Nupya ndaya nkikale pa mwamba wa kukomaanilapo,Uku ncende zya kutali sana izya ku katutu.
14 Ndaya papela sana ukucila pa makumbi;Ndalingana nu wa Papelapela.’
15 Lelo ulasumbilwa uku Malindi,*Mu ciwina icizike sana.
16 Aalakulola yalakulolekesya;Yalakuceeceta nu kulanda iyati,‘Uzye wikwene ali muntu uwasunkanyanga insi,Uwalenganga mawene ukuzakaza,
17 Uwalenzile insi ukuya wa lwangaNu konona imisumba iyalimo,Uwalesyanga afungwa ukuswilila ukumwao?’
18 Ya mwene yauze yonsi amu nko,Yonsi kwene yaziisilwe umu mucinzi,Cila muntu waziisilwe umwi lindi lyakwe.
19 Lelo wemo watusumbwa ukwaula ukuziikwa,Wa musambo uwipe,Watuvimbilikiziwa ni vitumbi vya yantu aakomilwe uku lupanga,Aaponela umu ciwina ca mawe,Nupya wa citumbi icaticilyatolwa.
20 Utalaya nayo umwi lindi,Pano onona impanga yako,Nu kukoma antu yako.
Mazina ya yana yakwe ya kacita ya viipe yataliusiwa nupya.
21 Pekanyini pa kukomela ana yakwePa mulandu ni viipe vino ivikolwe vyao vyacita,Pakuti yataca yakatuke nu kupoka insiNu kuzuuzyamo imisumba yao.”
22 Yeova wa maumba walanda wati: “Ndayakatukila.”
Yeova walanda nu kuti: “Ndalovya izina umu Babiloni kumwi na antu asyalako ni ndupwa alino ni nkulo iziliza.”
23 Yeova wa maumba walanda wati: “Ndalenga ukuti aye ica kwikalamo ivinunji nu kuya incende ya matipa, nupya ndamupyela ni cisanzi ca wononyi.”
24 Yeova wa maumba watalapa ati:
“Vino napanga i vilacitika,Nupya vino napingula vilafikiliziwa.
25 Ndalovya Aina Asilya umu mpanga yane,Ndayalyatolela pa myamba yane.
Iyoko lyao ndalifumya pa yantu yane,Ni cisendo cao ndacifumya pa viye vyao.”
26 Yaa ali maka yano alaomvya pa kufulula inko zyonsi,Vikwene avino watapingula ukulozya uku nko zyonsi.
27 Pano Yeova wa maumba u watapingula,Nupya uzye a weni aangamulesya?
Ikasa lyakwe ilikonzololwa,Nupya uzye a weni angaliwezya?
28 Mu mwaka uno Umwene Ahazi wafwile, Leza watumile mazwi yakuti:
29 “Mutaleka nanti aumwi asansamuke muli mwemwe mwe Ina Filisti,Pa mulandu sile wakuti intuwa yakwe wino akumuma yatikontoka.
Pano umu musisi wa nzoka mulafuma inzoka ya usungu,Nu mu yana ya iko mulafuma inzoka ya moto iikupapuka.*
30 Ana ya muntu umusuulwe yalalya nu kwikutaNa apiina yalalaala acingililwe,Lelo ndalenga antu yako ukufwa uku cipowe,Yauze nayo aalasyalako yalakomwa.
31 Lila we mpongolo! Loosya we musumba!
Mwensi kwene mulatoovoka mwe Ina Filisti!
Pano icunsi cikwiza ukufuma uku katutu,Nupya kusi aakuipaatula pa yasilika yakwe.”
32 Uzye yalasuka uli inkombe izifumile uku luko?
Yalazyasuka yati Yeova wika umufula wa Zioni,Nupya mumu kwene amuno antu yakwe aasuulwe yalikala.
Mafutunoti
^ Nanti “Syeo.” Lolini Ulondolozi wa Mazwi.
^ Nanti “Syeo.” Lolini Ulondolozi wa Mazwi.
^ Nanti “Syeo.” Lolini Ulondolozi wa Mazwi.
^ Nanti “inzoka ya usungu iikusimula.”
