1 Yamwene 19:1-21
19 Ahabu wanenyile Yezebele vyonsi vino Eliya wacisile, na vino wakomile ya kasesema yonsi ukuomvya ulupanga.
2 Lyene Yezebele watumile uwa kuyanena Eliya ati: “Si ya leza yamfulule sana, ndi cakuti mutondo cilafika pa nsita wakwe ikwene ukwaula kuti nkukome wakwe vino wakomile ya kasesema!”
3 Eliya uvwile intete, nupya utwike pakuti apusuke. Waile uku Belisyeba mu mpanga iya Yuda nupya kuuku kwene akuno wasile umuomvi wakwe.
4 Wapisile ulwendo lwa wanda onga umu lwanga, aya aikala umwisika lya muti umwi, nupya walenzile ukuti afwe. Walanzile ati: “Cacilamo sile! Nkome we Yeova pano ntacindime ukucila ivikolwe vyane.”
5 Lyene walaazile umwisika lya muti nu kukasula. Lelo umu kupumikizya malaika wamulemilemo nu kumunena ati: “Katuka ulye.”
6 Lino wazyusile waweni umukate uulungane pa mawe akaye na kasembo ka manzi ale vili kuno walozizye umutwe. Waliile nu kumwa alino alaala nupya.
7 Nupya kwene malaika wakwe Yeova wawezile amulemamo, alino ati: “Katuka ulye pano ukweti ulendo utali.”
8 Fwandi wakatwike alya nu kumwa, nupya vino waliile vyamupeezile maka icakuti wapisile manda 40 umusanya nu usiku, mpaka aya afika uku Holebu uku mwamba wakwe Leza wa cumi.
9 Lino wali kuuku, wingile umwi cele amuno alaala usiku; lyene Yeova wamuzizye ati: “Eliya, i cani cino ukucita kuno?”
10 Nawe waswike ati: “Nacincila sana ukukuombela we Yeova Leza wa maumba; nomba Aina Izlaeli yatama upangano wako, na maulambo yako yonona, nupya ya kasesema yako yakomwa uku lupanga, nsile sile nenga. Lyene nani kwene yakulonda ukunkoma.”
11 Lelo Leza wamunenyile ati: “Fuma umwi cele, yanga pa mwamba ukimilile pa nkoleelo yakwe Yeova.” Lyene Yeova wapisile umupiipi na paali Eliya. Lyene kwizile icimuza icikalamba icalepozile imyamba na mawe pa nkoleelo yakwe Yeova, lelo Yeova ataali umu cimuza, pa cisila ca cimuza, kwali cilundumusi, lelo Yeova ataali umu cilundumusi.
12 Pa cisila ca cilundumusi kwali umoto, lelo Yeova ataali umu moto, pa cisila ca moto kuvwisile izwi iliteekele ilya pansi.
13 Lino Eliya uvwile sile izwi lilyo, waivimvile pa manso ni ca kuzwala cakwe, nupya wafumile aya aimilila pa mulyango wi cele. Lyene uvwile izwi likuti: “Eliya i cani cino ukucita kuno?”
14 Nawe waswike ati: “Nacincila sana ukukuombela we Yeova Leza wa maumba; nomba Aina Izlaeli yatama upangano wako, na maulambo yako yonona, nupya ya kasesema yako yakomwa uku lupanga, nsile sile nenga. Lyene nani kwene yakulonda ukunkoma.”
15 Yeova wamunenyile ati: “Swilila umu lwanga uku Damasika. Nupya nga wafika ukasonte Hazaeli ukuya umwene umu Silya.
16 Ukasonte na Yeu umwizikulu wakwe Nimisyi ukuya umwene umu Izlaeli, nupya ukasonte na Elisya* mwana Syafati uwa ku Abeli-mehola kuti akupyane pali ukasesema.
17 Muntu wensi aalutuka ulupanga lwakwe Hazaeli, Yeu alamukoma, nupya umuntu wensi aalutuka ulupanga lwakwe Yeu, Elisya alamukoma.
18 Nupya ncili nkweti antu 7,000 umu Izlaeli aatafukamileko Baali nanti ukumutonsola.”
19 Fwandi wapisile ayazana Elisya mwana Syafati akulima, kwali ing’ombe izyanyefilwe umu mayoko 12. Nupya walimilanga ni ng’ombe izyali umwi yoko ilyalenga 12, Eliya waile kuli aliwe nu kumusumbilila icakuzwala cakwe.
20 Lyene Elisya wasile ing’ombe asimula aya kuli Eliya nupya walanzile ati: “Napaapata leka nkatonsole ya tata na ya mayo nu kuyapakasya. Lyene nizakulondela.” Eliya nawe wamunenyile ati: “Pitanga, pali sile ningo ntakukulesya.”
21 Fwandi waswilile aya asenda ya cipambasi nu kuyapeela ngi lambo, nupya waomvizye vino walimilangako pa kweleka ya cipambasi, lyene wapeezile antu nayo yaliile, nupya walondiile Eliya atandika nu kumwazwilizya.
Mafutunoti
^ Icikapiliula ukuti “Leza ali kapususya.”
