1 Samweli 16:1-23
16 Mu kuya kwa nsita Yeova wanenyile Samweli ati: “Ulatwalilila ukuya nu ulanda kufika lilaci pa mulandu wakuti lyene inkana Saulo ukuya umwene wa Ina Izlaeli? Ika mafuta umu lupembe nu kupita. Namakutuma kuli Yese Umwina Betelemu pa mulandu wakuti insoolola wenga pa yanakwe ukuya umwene.”
2 Nomba Samweli watiile: “Ningapita uli? Ndi cakuti Saulo uvwa ukuti injako, alankoma.” Yeova wamwaswike ati: “Senda umwana wa ng’ombe nupya ukalande uti, ‘Iniza umu kupeela ilambo kuli Yeova.’
3 Uce ukaame Yese lino ulaapeela ilambo; lyene ndakunena ivyakucita. Ulinzile ukunsoolwela wino ndakulanga.”
4 Samweli wacisile vino Yeova wamunenyile. Lino wafisile uku Betelemu, akalamba ya mu musumba yatandike ukuzakaza lino yamukomenkinye, nupya yatiile: “Uzye watuwiza umu mutende?”
5 Waswike ati: “Iniza umu mutende. Iniza umu kupeela ilambo kuli Yeova. Isangululini nu kuya nani kuno nkupeelela ilambo.” Lyene waile kuli Yese nu kumusangulula pamwi na anakwe aonsi, pa cisila wayanenyile ukuya kuno wapeelelanga ilambo.
6 Lino Samweli waweni Eliabu, watiile: “Cumi kwene wikwene awino Yeova watasoolola.”
7 Nomba Yeova wanenyile Samweli ati: “Utika mano kuli vino akuloleka na kuli vino watalimpa, pano imukana. Pano vino muntu akalola asi vino Leza akalola, umuntu akalola imilolekele ya kunzi, lelo Yeova wene akalola umu mwenzo.”
8 Lyene Yese wamile Abinadabu nu kumuleka ukuti apite pa nkoleelo yakwe Samweli, lelo Samweli watiile: “Na wikwene Yeova atamusoolwile.”
9 Lyene Yese wamile Syama, lelo Samweli watiile: “Na wikwene Yeova atamusoolwile.”
10 Fwandi Yese walesile ukuti ana yakwe 7 yapite pa nkoleelo yakwe Samweli, nomba Samweli wanenyile Yese ati: “Pasi wino Yeova watasoolola pali yonsi yaa.”
11 Lyene Samweli uzizye Yese ati: “Uzye yakwene ali yana yako aonsi yano wakwata?” Nawe watiile: “Apano ali na muze umunono pali yonsi; akucema imfwele. Lyene Samweli wanenyile Yese ati: “Tuma aakuyamusenda, pano tusikutala twikale nu kulya kufikila lino amaiza.”
12 Fwandi watumile aakuyamusenda nayo yamuleesile. Umwili wakwe walolekanga ningo, wakweti na manso asuma, nupya wali umuyembe. Lyene Yeova watiile: “Ali wikwene, mwitulwile mafuta pa mutwe!”
13 Lyene Samweli watozile ulupembe umwali amafuta nu kumwitulwila pa mutwe ala na ina yakwe yonsi yakulolako. Nupya umupasi wakwe Yeova watandike ukuya pali Devedi kufuma uwanda kwene uuwa. Pa cisila Samweli waswilile uku Lama.
14 Lyene umupasi wakwe Yeova walanga wafuma pali Saulo, nupya umupasi uwipe ukufuma kuli Yeova wamucuzyanga.
15 Aomvi yakwe yamunenyile iyati: “Musambazi, watulola ukuti umupasi uwipe ukufuma kuli Leza ukukucuzya.
16 Nena aomvi yako yalonde umonsi uwamanya ukulizya izeeze. Lyonsi lino umupasi uwipe kufuma kuli Leza wiza pali wewe, alalizya, nupya ulauvwa ningo.
17 Saulo wanenyile aomvi yakwe ati: “Ndondelini umonsi uwamanya ukulizya ningo, nu kumuleta kuli nene.”
18 Umuomvi wenga watiile: “Nalola vino mwana Yese Umwina Betelemu akalizya ningo, wasipa nupya u musilika wa maka. Akavwanga ningo, wayemba, nupya Yeova waya nawe.”
19 Lyene Saulo watumile akuyanena Yese ukuti: “Ntumile umwanako Devedi kacema wa mfwele.”
20 Fwandi Yese watozile punda nu kwikapo umukate, ni nyambi umwali waini, atola ni mbuzi nu kupeela Devedi umwanakwe kuti atwalile Saulo.
21 Lyene Devedi waile kuli Saulo nu kutandika ukumuombela. Saulo wizile amutemwa sana, nupya Devedi watandike ukumusendela ivyanzo.
22 Saulo watumile amazwi kuli Yese akuti: “Napaapata, leka Devedi atwalilile ukumbombela, pano imutemwa.”
23 Lyonsi lino umupasi uwipe ukufuma kuli Leza wiza pali Saulo, Devedi watolanga izeeze nu kumulizizya, nupya Saulo uvwangako ningo, nu mupasi uwipe wafumanga pali aliwe.
