1. Kontha isiyani aswali ookhuluvelya okhalayi yaakhitiryaaya ulipa?

 IBIIBLYA ikwaha cinci inawuuluma atthu ookhuluvelya okhalayi khampa oolipa ni okuru. Masi hataa ale yaari oolipa, ikwaha cikhwaawe khayeecoona commo. Wootakihera, ikwaha imoca mwene Davidi aheecoona “ukhala oolipa khampa mwaako”, masi ikwaha cikhwaawe uyo “ansankaka.” (Isaa. 30:7) Vano Sansau aari nakuru cinene nlattu wo nnepa wowaarya wa Yehova, uhookhalaru commo, uyo ancuwela wiira woohikaviheriya ni Yehova, “khaahala ukhalana ikuru, anhala ulolovaca ni anhala waalikanana atthu akiina”. (Masuw. 14:5, 6; 16:17) Ayo alopwanaayo yaalipa kontha Yehova phaavaha ikuru.

2. Kontha isiyani Paulu wenryaawe wiira aari oololovaca ukati yooyo nakuru? (Nweha 2 Akorintu 12:9, 10.)

² Apostolu Paulu ciicammo ancuwela wiira ahaana akhalanaka ikuru ca Yehova. (Nsome 2 Akorintu 12:9, 10. b) Woolikanaca ni hiiva Paulu anwerennya. (Akalas. 4:13, 14) Ni ikwaha cinci uyo ahaana wiikurumica wiira apanke citthu comaana. (Aroo. 7:18, 19) Ikwaha cikiina uyo anawoova citthu caahala umwiirannyeela. (2 Akor. 1:8, 9) Uhookhalaru commo, Paulu waakhalaawe oololovaca, uyo pheecoonaawe ukhala oolipa. Eecoona commo kontha Yehova ahonvaha ikuru caapheelaawe wiira aanane marikarikwaawe.

3. Makohoni anhaleehu woopela mwaha?

³ Yehova naanikhuluveliha wiira naahala univaha ikuru hiiva ciicammo. (1 Pet. 5:10) Masi wiira nikaviheriye nihaana upanka mphantteehu. Wootakihera, moothooru phineeriha ikaaro weetta.  Masi motorista aahinyakeleke wiira ikaaro yeette, iyo khinhala weetta. Woolikanaca, Yehova naapheela univaha ikuru cimpheeleehu, masi cihaavo citthu cinlamuliyeehu upanka. Isiyani Yehova nonivahaawe wiira anilipihe? Ni isiyani ninlamuliyeehu upanka napheelaka waakhela ikuru ca Yehova? Ninaahala woona waakhuliya waya ala makohwaala noopelaka mwaha mananna Yehova canlipihalyaawe Jonas, Maria anumwaane Yesu, ni apostolu Paulu. Ciicammo, ninaahala woona mananna Yehova naalipihaawe aswalyaawe ala mahukwaala.

4. Manannani ninhaleehu waakhela ikuru novahaawe Yehova?

⁴ Inanna imoca yowaakhela ikuru cinwa wa Yehova ukhanle umwaattamela uyo nanlompaka. Yehova naahala waakhula ulompa wihu “ni univaha ikuru cinci.” (2 Akor. 4:7) Ciicammo hiiva pooti waakhela ikuru cimpheeleehu, nasomaka Ibiiblya ni wuupuwela itthu insomeehu. (Isaa. 86:11) Ihapari nonivahaawe Yehova, ciri mbiiblyani, “cihaana ikuru.” (Mabere. 4:12) Nyuuva mwanlompaka Yehova ni mwasomaka Nuulumo nawe, nnawaakhela ikuru cimpheeleenyu wiira nkhitiri uvilela, uhihiyerera ukhala ootteeliya ni uvara ntekweenyu woorika. Moone vano mananna Yehova canlipihilyaawe porofeeta Jonas.

5. Kontha isiyani Jonas waapheelaawe ikuru?

⁵ Porofeeta Jonas anaapheela ikuru. Uyo ahotthawela uttayi ukati waavahaceriyaawe nteko woorika ni Yehova. Nlattu wo iyo itthwiiyo, Jonas aahanle vakaani ukhwa nlattu wopula yuulupale ni mpaka ahowiiriha atthu akiina uhala vakaani ukhwa nkhayi nuuyo. Ukati ale yeettiha ikalawa wanvonyenryaaya mmaacini, uyo ahorwaa nipuro hataa nahoopuwelaawe—mmirimani wohopa. Nyuuva nnoopuwela wiira Jonas eecoona cani? Niireke wiira uyo oona wiira aahala ukhwa mmirimani wohopa? Niireke wiira uyo oona wiira ahonyanyaliya ni Yehova? Atthunaka, uyo aari nimasukhuli menci.

6. Toko cinhimyaaya Jonas 2:1, 2, 7, isiyan Jonas yanlipihile ukati waaryaawe mmirimani wohopa?

⁶ Isiyani Jonas yaapankilyaawe waaryaawe veekha mmirimani wo ile ihopeele? Itthu yoopacera yaapankilyaawe waari unlompa Yehova. (Nsome Jonas 2:1, 2, 7. c) Jonas khaamwiiwelenle Yehova, masi uyo ankupali wiira Yehova anhala wiiwelela ulompa wawe eeyevihaka ni ooniheraka uttharuwa. Uyo ciicammo, ahoopuwela moolumo o nnuulumoni na Nluku. Masi nincuwela cani iyo itthwiiyo? Kontha ukati waalompaawe, khampa cantikhiyaaya nhina ikapiitulu 2 yolivuru ya Jonas, uyo ahovarela nteko moolumo amphwanyannya nlivuruni yo Isaalimu. (Wootakihera, nlattanihe Jonas 2:2, 5 ni Isaalimu 69:1; 86:7.) Unawoonannya wiira Jonas ancuwela saana cowantikhiya cowaarya. Ni woopuwelaawe ayo moolumwaayo ukati waattehiyaawe, Jonas ankupali wiira Yehova anhala unkavihera. Yehova ahoopola ukumi wa Jonas ni wahoolo waya, ahokhalana ikuru yoopheela uvara nteko waavahaceriyaawe.—Jonas 2:10–3:4.

7-8. Waattehattehiyaawe Zhiming isiyani yankavihenre?

⁷ Ntakihero na Jonas pooti unikavihera naananaka masakha oorika. Wootakihera, munna mmoca nokhala u Taiwan, neehaniya Zhiming, d naaweryaaciya venci. Uhiya commo, amucyaawe akiina khanonwacera ratta nlattu wookhala Saahiti a Yehova. Masi nlattu woolompa ni usoma Ibiiblya phinvahiyaawe ikuru ni Yehova. Uyo neera: “Ikwaha cikiina, yakhalaka toko masakhaaka anawiira utepa, mi kinaakhala niiwasiwaasi mpaka akinkhitiri hataa wiitthenkaca saana wiira kipanke usoma wo veekha.” Uhookhalaru commo, uyo khanhiyerera. Uyo heera: “Itthu yoopacera, mi kinanlompa Yehova. Vano kinaawara ifooni caka ni kinawiiwelela macipo o mumphwinkoni. Ikwaha cikiina, mi mpaka kinawiipaca vakaani-vakaani  mpaka waneecoonaaka saana. Vano phinanceraka usoma.”

⁸ Usoma Ibiiblya wo veekha uhonkavihera venci munna Zhiming. Wootakihera, hinavoneeha nikhwatta nipuro nooperariyaawe, enfermeira amoca yahomwiirela wiira ahaana aheleliyaka iphome, kontha iphomyaawe yahovukuwa. Uhiyu, nihinaphiya nihuku naahalaawe wooperariya, Zhiming ahosoma ihantisi ya anuunu amoca yaananne itthu imocaaru. Eelattanihaka naayo, ahoona wiira iphomyaaya yaari vakaani cinene upwaha yaarinaawe uyova. Waahookhalaru commo, ayo khayaatthunne uheleliya iphome ni yahovona. Iyo ihantisiiyo yahonlipiha venci munna Zhiming ni ahokhitiri uhihiyerera unvaresesa wawe Yehova.

9. Mwakhalaka ni masukhuli nlattu wo masakha nnaananeenyu, isiyani nyuuva nnolamuliyeenyu upanka? (Nwehe ciicammo ilatarato.)

⁹ Nyuuva nhotoko waanana masakha oorika ni woohikhitiri unhimerya Yehova inwiirani? Nyuuva nhotoko woocya mpaka wahinkhitiriinyu usoma? Nhiliyale wiira Yehova naacuwela itthu nnaananeenyu. Phimaana, hataa nyuuva nlompaka vakaani paahi, pooti wankupaliinyu wiira Yehova naahala wuuvahani itthu nnopheeleenyu. (Efesu 3:20) Mwaahikhitiriki usoma nlattu wowuuriipani nrima awula wowuuweryaani irutthu, mmananihe wiiwelela Ibiiblya yookaravariya awula ilivuru cikhwaawe co mbiiblyani. Ciicammo, pooti wuukaviherani wiiwelela macipo awula woona ividiyu nsayitini jw.org. Mwanlompaka Yehova ni waavya waakhuliya makohweenyu mbiiblyani ni mmalivuruni cihu, unkhala toko nnonlattula Yehova wiira oolipiheni. Ni uyo naahala upanka iyo itthwiiyo.

10. Manannani mayamunneehu ni mayanuunwiihu annilipihaaya?

¹⁰ Yehova pooti waavarela nteko mayamunneehu ni mayanuunwiihu wiira anilipihe. Ayo pooti ukhala ‘unilipiha venci’ naananaka masakha awula wanirikarikaka uvara nteko uvahaceriyeehu. (Akol. 4:10, 11) Hi ninaapheela ukhalana apatthani, venci-venci “ukati womasankiho” (Miru. 17:17) Nalolovacaka, mayamunneehu pooti unikavihera, naweryaaciyaka, nakhalanaka moopuwelelo oohiloka ni nhina mminepani. Nttwee noone mananna Maria anumwaane Yesu, yaalipihiyaaya naatthu akiina.

11. Kontha isiyani Maria waapheelaawe ikuru?

¹¹ Maria ahaana akhalanaka ikuru wiira apanke itthu Yehova yaapheelaawe. Muupuwele mananna Maria caakhanlyaawe niiwasiwaasi waakhela  wawe nrintti waahimeriyaawe ni nlayikha Gabriel. Uyo aari hinatheliya, masi anhala urupala irukulu. Uyo aari hinatoko waakhalana asaana, masi ahaana anwacera mwanhima aahala ukhala Mesiya wahoolo. Ukhala wiira uyo aari mwaaruusi, isiyani yaahalaawe unhimerya Yusufu ampakanenle?—Luka 1:26-33.

12. Toko cinhimyaaya Luka 1:39-45, manannani Maria waakhitinryaawe ukhalana ikuru caapheelaawe?

¹² Manannani Maria caakhitinryaawe ukhalana ikuru wiira apanke nteko waavahaceriyaawe woorika? Uyo ahaavya ukaviheriya naatthu akiina. Wootakihera, uyo aholepela nlayikha Gabriel wiira ninhimerye citthu cikiina nhina nrintti waakhenlyaawe. (Luka 1:34) Woohipica wahoolo waya, Maria ahopanka ikwaha mpaka “ncoko caari myaako cinci” u Yuuta wiira anthotole Elisapete aari nlokwaawe. Wahoreera upanka wawe iyo ikwaheeyo. Elisapete ahonttottopela Maria ni ahovareliya nteko wiira ampankele inatiri mwaana aahalaawe unyara Maria. (Nsome Luka 1:39-45. e) Maria aheera wiira Yehova “ahoonihera ikuru cawe anvarelaka nteko.” (Luka 1:46-51) Yehova ahovarela nteko nlayikha Gabriel ni Elisapete wiira anlipihe Maria.

13. Isiyani yaawiirannyenle anuunu Dasuri ukati yaalepenlyaaya ukaviheriya ni mayamunna ni nimayanuunu?

¹³ Khampa Maria, nyuuva ciicammo pooti ukhalana ikuru naaswali akiina a Yehova. Anuunu amoca aneehaniya Dasuri o Bolívia, yampheela ikuru. Anuunu Dasuri yahaana yaawaceraka athumwanaya ni yaapanka iyo ninrimaaya wotheene. (1 Tim. 5:4) Masi waawacera ikwaha cikiina waanaarikelaka. Ayo anaattonka: “Ikwaha cinci mi kaaneecoonaka upheela uhiya waawacera.” Niireke ayo yaholepela ukaviheriya? Wiipaceroni mena. Ayo anaattonka: “Mi akaapheela waavaha miteko mayamunna. Mi kaanoopuwela: ‘Yehova phinhala ukivaha ikuru cimpheelaaka’. Vano mi kahoona wiira uhikhala ni mayamuuna khaamananiha umaliha itafaawuti caka veekha.” (Miru. 18:1) Anuunu Dasuri yaholakela uwantikhela iwarakha asipatthannyaaya yaahimeryaka itthu yaananaaya. Ayo anaattonka: “Mi akinoona yoowaahimerya mayamunna akilipihile. Ayo yankiwaanela iyoolya usipiritaali ni yankisomela iveerusu coolipiha. Iyo itthwiiyo yahokitteeliha nrima ucuwela wiira miiva akaariitthu veekha. Hi ninaapanka mphantte waamuci o ntuninyani motheene a Yehova—amuci ampheela wuuwacerani, uwunlanani ni wuukaviherani waanana masakheenyu.”

14. Kontha isiyani nihaana utthuna ukaviheriya n mahumu?

¹⁴ Yehova ilelo naavarela nteko mahumu wiira anivahe ikuru. Mahumu akhanle itthuvo Yehova inivahilyaawe wiira anilipihe ni anikavihere waanana masakha arineehu. (Isai. 32:1, 2) Phimaana, mwakhalaka niiwasiwaasi, mwaahimerye mahumu itthu inoohela iwasiwaasi. Nhuupuwele ikwaha piili, ntthune ukaviheriya ni mahumu yoolipihakani. Aavarelaka nteko mahumu, Yehova naahala wuulipihani.

15. Niwehereroni Makristau otheene arinaaya?

¹⁵ Niweherero Ibiiblya ninnivahaaya pooti univaha ikuru. (Aroo. 4:3, 18-20) Makristau otheene ahaana niweherero nomaana nookhala mpaka—hataa ukhalaka va watuninyani va awula muumweneni wo wiirimu. Niweherero nihu ninaanikavihera uvilela marikariko, ulalyeera ihapari comaana ni uvara miteko cotheene ninvahaceriyeehu wanlokoni. (1 Atesal. 1:3) Nno niwehereronno phanlipihile apostolu Paulu.

16. Kontha isiyani Paulu waapheelaawe ikuru?

¹⁶ Paulu ampheela ikuru cinci. Nhina iwarakha  caawantikhenlyaawe Akorintu, uyo aheelattaanihera ni mwaapu wooloko woohilipa. Uyo “ahosuphiya” ni “ahoova”, “aholupatthiya” ni aheecoona “utthemiya”. Ni ikwaha cinci uyo aahaleela vakaani ukhwa. (2 Akor. 4:8-10) Paulu antikhile ala moolumwaala ikwaha yaapankilyaawe yoneeraru yeemisiyonaariyu, ni uyo ancuwela wiira wahoolo anhala waanana masakha moolupale upwaha aanannyaawe. Uyo anhala waattakaciya niikhurupu yaatthu, anhala utthukiya, anhala uttittha mmaacini ni anhala utthukeliya nkhattya ukati mwinci.

17. Toko inhimyaaya 2 Akorintu 4:16-18, Isiyani yankavihera Paulu ukati waananaawe masakha?

¹⁷ Paulu ahaana ikuru caapheelaawe kontha aaweheeha paahi niweherero naarinaawe. (Nsome 2 Akorintu 4:16-18. f) Uyo ahowiirela Akorinto wiira hataa irutthwaawe “woocaacaaya”, masi uyo khaahala ulolovaca. Paulu aweheeha paahi citthu coohoolo. Niweherero nawe noorwaa ukhala wiirimu naari “nuulupale cinene”, phimaana, hataa ukati waananaawe marikariko ni masakha anlipa. Paulu aanoopuwela niweherero naarinaawe, phimaana uyo eecoona “uvahiya ikuru khula ikwaha.”

18. Manannani niweherero ninaalipihaaya amunna tihomir naamucyaaya?

¹⁸ Niweherero noohoolo, phiitthu inonlipiha munna o Bulgária, neehaniya Tihomir. Myaakha vakaani uttuli, mwaamunnawe neehaniya Zdravko, hokhwa nlattu waasitente. Nlattu wo iyo itthwiiyo munna Tihomir aariipiya nrima venci. Wiira akhitiri waanana itthu yaamwiiranyenle munna Tihomir ahopacera wuupuwela nkhayi naamucyaawe mananna cinhalaaya ukhala wunwelelihiya waatthu ookhwa. Uyo neera: “Wootakihera, hi ninawuupuwela nipuroni ninhaleehu umphwanya Zdravko, iyoolyani ninhaleehu umwaapyeela, tipani ninhaleehu unlattula ukati ninhaleehu upacera uthukathuka ukati unhalaawe wunwelelihiya ni isiyani ninhaleehu unttonkacera nhina citthu ciirannyeele mmahuku  ookhicera.” Munna Tihomir enre uweheeha nno niwehereronno phiitthu inaalipiha amucyaawe uhihiyerera uvilela ni uweherera ukati Yehova nohalaawe umunweleliha mwaamunnawe.

19. Isiyani Nyuuva nnolamuliyeenyu upanka wiira nlipihace niweherero ninyu? (Nwehe ciicammo ilatarato.)

¹⁹ Manannani nyuuva nnohaleenyu ulipihaca niweherero ninyu? Wakhala wiira niweherero ninyu ukhanle ukhala va watuninyani va, nsome ihantisi co mbiiblyani cinooluma ipeephoni ni muupuwele. (Isai. 25:8; 32:16-18) Muupuwele mananna cinhalaaya ukhala ukumi upeephoni. Nyuuva nhopacera wiicuupuwela nwo? Wootakihera, tipani nyuuva nnomooneenyu? Nneewelela isiyani? Isiyani nyuuva nnooneenyu? Wiira muupuwele ipeephoni, nwehe ilatarato mmalivuruni cihu awula moone ividiyu co macipo toko Nnema neekhweeli niri wakhiviru!, Tthiri ehaattamela! awula Koopuwelaka ipeephoni. Mwakhalaka muupuwelaka ukati wotheene mananna cinhalaaya ukhala upeephoni, masakheenyu anhala ukhala oohipica uvira ni “oorikarika.” (2 Akor. 4:17) Niweherero Yehova nonivahaawe phinhala unilipiha.

20. Hataa hiiva niicoonaka ukhala oololovaca, manannani ninhaleehu ukhalana ikuru?

²⁰ Hataa hiiva niicoonaka ukhala oololovaca, ninaacuwela wiira ni “Nluku ninaahala ukhalana ikuru.” (Isaa. 108:13) Yehova naanivaha citthu cotheene nimpheeleehu wiira naakhele ikuru novahaawe. Phimaana, mwapheelaka ukaviheriya wiira nkhitiri uvara nteko nvahaceriyeenyu, waanana marikariko awula uhihiya ukhala ootteeliya munhulele nrimeenyu Yehova munlompaka ni mwaavye ikano cawe mpankaka usoma wo veekha. Ntthune ukaviheriya ni ulipihiya nimayamunneenyu. Nhihiyerere ukumiha ukati wiira muupuwele mananna cinhalaaya ukhala ukumi wahoolo. Naayo manannaayo, khampa Akolosu 1:11 cineeraaya, “Nyuuva nnaahala ukhala oolipihiya niikuru cotheene. Yonayeeli niikuru cowaarya ca Yehova, wiira nyuuva nvilele mpisaka nrima ni ntteeliyaka.”—Akol. 1:11.