MWAHA WOOSOMIYA 41
NCIPO 13 Kristu, Ntakiheryo Nahu
Itthu ineetthuceehu mahuku 40 Yesu hinaaya urwaa wiirimu
“[Yesu] ahooniya mahuku 40 ni aanuuluma Nuulumo na Nluku.” — MITE. 1:3.
ITTHU INHALEEHU WIITHUCA
Ninaahala woona manannani ninhaleehu untakiha Yesu ni citthu caapankilyaawe mahuku 40 hinaaya urwaa wiirimu.
1-2. Isiyani yaawiirannyenle atthari eeli a Yesu ukati waarwaaya u Emaús?
NIHUKU 16 mweeri wo Nisã mwaakha wo 33 nawile Kristu, atthari a Yesu ari ooriipiya nrima cinene ni owoova. Vano atthari eeli anaakhuma u Yerusalemu arwaaka u Emaús, aliteeya yaattalivelanne ikiloometru 11 nu u Yerusalemu. Ayo attharyaayo yaari ooriipiya nrima kontha Yesu, nlopwana yanttharaaya, aheeviya. Citthu caawehereraaya wiira Mesiya anhala upanka, waakhala khampa khacaahala wiirannya-tho. Masi woohipica yaaheranya itthu yahaawehereraaya.
2 Woohicuwannyaaca, nlopwana mmoca yahancuwelaaya nawaattamela ni naapacera weettana nkhayi. Atthari ananhimyacera wiira ari ooriipiya nrima nlattu wo wiiviya Yesu. Vano uyo nlopwanooyo, naapacera waahimerya citthu caawiirihile urukunusa moopuwelelwaaya. “Apaceraka umuuluma Moceesi ni Maporofeeta akhwaawe,” uyo ahaahimerya kontha isiyani Mesiya aahalaawe uhuvihaciya ni wiiviya. Vano anari u Emaús, ayo yahocuwelela wiira uyo nlopwanooyo ari Yesu unwelelihiye ni Nluku! Unawoonannya wiira atthari yahokhala ootteeliya cinene nlattu woocuwela wiira Mesiya ahonwelelihiya!—Luka 24:13-35.
3-4. a) Manannani Yesu caakavihenryaawe attharyaawe ni isiyani yiirannyeele? b) Isiyani inhaleehu woona nhina ula mwahoola? (Miteko 1:3)
3 Anahanleene mahuku 40 Yesu hinaaya urwaa wiirimu, uyo ahaakhumelela attharyaawe ikwaha cinci. a (Nsome Miteko 1:3. b) Yooyo ukatyuuyo, uriipiya nrima ni woova wotheene waarinaaya atthari a Yesu wahomala. Iyo phiitthu yaawiirihile ayo ukhala anakhotto oolipa nrima yaalalyeeraka ihapari comaana co Mwene wa Nluku, ewiitthucihaka ikhweeli co mbiibiliyani atthu akhwaawe.
4 Uhihiyerera usoma citthu ciirannyeele ukati Yesu waaryaawe hinaaya urwaa wiirimu, unaahala unikavihera cinene. Nhina ula mwahoola, ninaahala woona manannani Yesu akhitinryaawe uvarela nteko saana ukati waarinaawe hinaaya urwaa wiirimu wiira (1) aalipihe attharyaawe, (2) akavihere wiiweeha saana cowantikhiya cowaarya ni (3) atthenkace uvaresesa mirintti cuulupale caahalaaya ukhalana wahoolo. Khula mphantte, ninaahala woona manannani ninhaleehu untakiha Yesu.
MWAALIPIHE AKHUNANINYU
5. Kontha isiyani atthari a Yesu waapheelaaya ulipihiya?
5 Atthari a Yesu yampheela cinene ulipihiya. Kontha isiyani? Kontha ayo yahohiya inupaaya, anakoswaaya ni amucyaaya wiira antthare Yesu. (Mat. 19:27) Atthari akhwaawe yaanthanyinya nlattu wontthara Yesu. (Joau 9:22) Ayo yaheekurumica upanka yotheene yaakhitiryaaya kontha yankupali wiira khweeliini Yesu phaari Mesiya aakhuluvelihiye. (Mat. 16:16) Masi ukati waakhwilyaawe Yesu, ayo yahovololaca ni yaahokhala ooriipiya nrima.
6. Isiyani Yesu yaapankilyaawe ukati wonwelelihiyaawe?
6 Yesu ancuwela wiira ulolovaca atthari waarinaaya khawaari nlattu woohilipa nhina mminepani. Masi waari nlattu wookhweliya nintthu yanfentaaya cinene. Phimaana, ikhumelo nihuku nunwelelihiyaawe, uyo ahopacera waalipiha asipatthannyaawe. Wootakihera, Yesu ahonkhumelela Maria Madalena onlaka ukati waaryaawe umahiye waavithiyaawe Yesu. (Joau 20:11, 16) Uyo ciicammo ahaakhumelela attharyaawe eeli aromoliye wiipaceroni ula mwahoola ni ciicammo apostolu Peturu. (Luka 24:34) Isiyani ineetthuceehu nintakihero na Yesu? Nttwee noone citthu caakhumelenle ukati wankhumelenlyaawe Maria Madalena.
7. khampa cinthoonyeraaya Joau 20:11-16, isiyani Yesu amoonnyaawe Maria Madalena apankaka ni isiyani yaapankilyaawe? (Nwehe ciicammo ilatarato.)
7 Nsome Joau 20:11-16. c Wicisu nihuku 16 mweeri wo nisã, athiyana akhwaawe yaahorwaa mpaka umahiye waavithiyaawe Yesu. (Luka 24:1, 10) Athiyana amoca yeehaniya Maria Madalena. Uphiya waya umahiye, yaahonenela wiira irutthu ya Yesu khayaarivo. Ayo yaahorwaa unhimerya Peturu ni Joau itthu yonnyaaya ni yahattharaca mpaka umahiye. Vano ayo alopwanaayo woona waya wiira khweeliini irutthu ya Yesu khayaarivo, yahohokoleelaca uwaani. Masi Maria khaatthanre. Uyo ahohala wonwo onlaka ni khoopuwela wiira Yesu anoona cotheene ciirannya. Yesu umoona wawe Maria Madalena onlaka, uyo ciicammo ahokhala ooriipiya nrima. Vano Yesu ahomuulumana wiira anlipihe. Ni ahonvaha nteko wo wofayita cinene, wowaahimerya mayamunnaawe wiira Yesu ahonwelelihiya.—Joau 20:17, 18.
Muntakihe Yesu nwehaka isiyani mayamunna inoopuwelaaya ni mpanke yotheene inkhitiriinyu wiira mwaalipihe (Nwehe iparaagarafu 7.)
8. Ninhala untakiha cani Yesu?
8 Ninhala untakiha cani Yesu? Otheene cihu, nihaana iparakha yo waalipiha mayamunneehu ni mayanuunwiihu wiira ahihiyerere unswalela Yehova. Ninaapanka iyo, naaviriyanaka saana ukati unhimyaaya mananna aneecoonaaya ni waakavihera khampa Yesu caapankilyaawe. Moone itthu yaawiirannyenle anuunu aneehaniya Jocelyn. Anuunwaaya yahaakhumelela asitente ni yahokhwa. Anuunu Jocelyn aneera: “Cahovira myeeri cinci ukiriipaka nrima.” Masi amunna amoca nkhayi naamwaaraya yahaalattula anuunu Jocelyn uwannyaya; naayo manannaayo yahaawacera ninifento ni yahathonyihera mananna Yehova cinaavahaawe ifayita. Anuunu Jocelyn aneera: “Mi kaari ooriipiya nrima cinene ni waakhala khampa kinneela mmaacini wowiisa cinene. Masi Yehova haavarela nteko ayo anamathelanaayo wiira akoopole. Kikaviheriyaka naayo, mi kihohokoleela onswalela Yehova ukitteelaka nrima.” Naaviriyanaka saana mayamunneehu ukati unhimyaaya mananna aneecoonaaya, ninaahala waamaliha ni waalipiha wiira ahihiye unswalela Yehova.—Aroo. 12:15.
MWAAKAVIHERE AKHWINYU WIIWEEHA IBIIBILIYA
9. Marikarikoni eetthuci a Yesu yaananaaya ni manannani aakavihenryaawe?
9 Eetthuci a Yesu yankupali Nuulumo na Nluku ni yaaneekurumica cinene umwiiwelela Yehova. (Joau 17:6) Masi hataa ukhalaka commo, ayo wahaariipa nrima cinene ucuwela waya wiira Yesu aheeviya khampa nakhirini. Yesu ancuwela wiira atthari yahaana waamini ni yaananfenta Yehova, masi uyo ahonanela wiira ayo yahaana wiiweeha saana Nuulumo na Nluku. (Luka 9:44, 45; Joau 20:9) Vano, uyo ahaakavihera wiiweeha ratta ile yaasomilyaaya. Moone mananna aapankilyaawe iyo itthwiiyo ukati waakhumelenlyaawe attharyaawe eeli waarwaaya u Emaús.
10. Manannani Yesu aakavihenryaawe attharyaawe wiiweeha wiira khweeliini uyo aari Mesiya? (Luka 24:18-27)
10 Nsome Luka 24:18-27. d Waaphwanya wawe attharyaawe, Yesu khaakuvenle wiihimyaaca wiira ari phiyooyo. Uhiya commo, uyo ahaapanka makoho attharyaawe. Kontha isiyani? Atthunaka uyo apheela waavaha ukati wiira attonkace mananna cineecoonaaya. Niiyo phiitthu yeerannyeele. Ayo yaaweherera wiira Yesu phaahala ukhala Mwene o Isarayeli ni phaahala uwoopola Ayuuta mmatatani wa Arooma. Yesu ahaahiya ayo yuulumaka mananna ceecoonaaya. Vano, avarelaka nteko Nuulumo na Nluku ahaakavihera wiiweeha wiira inatiri cinci co mbiibiliyani caheerannya. e Nuuwakatyaaya, yoole uhiyuule, ahaaphwanya attharyaawe akhwaawe ni ciicammo ahaahimerya itthu yaataphulelaaya nnye inatirinnye. (Luka 24:33-48) isiyani ineetthuceehu?
11-12. a) Isiyani ineetthuceehu ni mananna Yesu awiitthucihilyaawe attharyaawe ikhweeli co mbiibiliyani? (Nwehe ciicammo ilatarato.) b) Amunna yansomiha Ibiibiliya Nortey ankavihenre cani?
11 Ninhala untakiha cani Yesu? Ukati woosomiha Ibiibiliya, mpanke makoho wiira munkavihere namasoma Ibiibiliya uhimya itthu immwiira. (Miru. 20:5) Vano mwacuwelaka itthu immwiira, mmoonihere mananna oophwanya iveerusu co mbiibiliyani cinhala unkavihera uvilela iyo itthwiiyo. Ni uhiya unhimerya itthu yoohala upanka, mmoonihere mananna oovarela nteko Ibiibiliya wiira acuwele itthu yoohala upanka. Moone ntakihero nimoca naamunna ankhala u Gana aneehaniya Nortey.
12 Narina myaakha 16, Nortey ahopacera usoma Ibiibiliya. Masi amucyaawe khawaacivenle. Isiyani yaapankilyaawe wiira hihiye usoma Ibiibiliya? Amunna yansomiha Ibiibiliya yahonsomela Matewus ikapiitulu 10 para umoonihera wiira nkristau eekhweeli haana alupatthiyaka. Nortey neera: “Upacera waka ulupatthiya, mi kahokupali wiira kihophwanya ikhweeli.” Amunna anonsomiha Ibiibiliya Nortey, yahonkavihera wuupuwela itthu inhimyaaya Matewus 10:16. Uyo aalamuliya waahisima, masi ciicammo, uwehacera saana mananna oowuulumana atthu ikhweeli co mbiibiliyani. Vano upattisiya wawe, Nortey aholakela ukhala piyoneeru. Masi athumwaane yaapheela wiira Nortey arwee asome icikola cuulupale. Ila ikwaheela amunna yansomiha Ibiibiliya khayanhimenrye itthu yoohala utthara. Uhiya commo, ayo yahompanka makoho wiira ankavihere Nortey wuupuwela mattharelelo o mbiibiliyani ni vano ulakela itthu yoohala utthara. Itthu yiirannyeele phiila: Nortey aholakela wiivaherera uvara nteko weepiyoneeru. Athumwaane yahoviruwa ni yahomoomola wapuwani va. Isiyani Nortey ihimilyaawe nlattu wo citthu cotheene cimwiirannyenle? Uyo neera: “Mi nkaatikhinaca hataa vakaani wiira kihothanla itthu yomaana.” Naakurumicaka akhunanihu wuupuwela itthu inhimyaaya Ibiibiliya, ninawaakavihera ukhalana waamini woolipa ni uhihiyerera unswalela Yehova.—Efesu 3:16-19.
Muntakihe Yesu waakavihera akhunaninyu wiiweha sana Ibiibiliya (Nwehe iparaagarafu 11.) i
MWAATTHENKACE MAYAMUNNA WIIRA AKHALE “ITTHUVO CEEPINAATAMU”
13. Isiyani Yesu yaapankilyaawe wiira nteko woolalyeera uhihiyereriya hataa arwaaka wiirimu? (Efesu 4:8)
13 Ukati waaryaawe watuninyani, Yesu ahopanka citthu cotheene caarumiyaawe ni Yehova. (Joau 17:4) Masi Yesu khanakhala ntthu eera co: “Wapheelaka woona itthwiiyo inapankiye saana, uhaana upankaka mwaaneennya.” Uhiya commo, myaakha miraru civirihilyaawe alalyeeraka, uyo ahaatthenkaca atthu akhwaawe. Yesu anaakhuluvela eetthucaawe ni hinaaya urwaa wiirimu, uyo ahaavaha nrintti woolalyeera, wiitthuciha ihapari comaana ni uwacera ikhontwaa cowaarya ca Yehova. Ni eetthuci akhwaawe, yaarina myaakha 30 yahopacera waya waakhela mirintti cuulupale. (Nsome Efesu 4:8. f) Masi, manannani Yesu aavarenlyaawe nteko mahuku 40 hinaaya urwaa wiirimu wiira aakavihere ayo alopwana ookhuluvelyaayo ni yeekurumica ukhala “itthuvo ceepinaatamu”?
14. Isiyani Yesu yaapankilyaawe wiira awiitthucihe attharyaawe nhina mahuku 40 hinaaya urwaa wiirimu? (Nwehe ciicammo ilatarato.)
14 Yesu ahaavaha attharyaawe ikano cikhwaawe ayo caalamuliyaaya wiiwa, masi apankile iyo nimananna omaana. Uyo ahocuwela wiira atthari akhwaawe yaaniikohaka ni nlattu wo iyo itthwiiyo, ahaavaha ikano. (Luka 24:25-27; Joau 20:27) Yesu ciicammo ahowiirela wiira yahaana wiikurumica waawacera apoovu a Yehova uhiya uwehaweha ukhalana nsurukhu. (Joau 21:15) Ni Yesu ahowuupusera ifayita urinaaya uhiilattaniha naatthu akhwaawe anvara nteko wa Yehova. (Joau 21:20-22) Uhiya commo, Yesu ahovaanyiha moopuwelelo oohiloka yaarinaaya nhina Umwene wa Nluku ni ahaakavihera wiikurumica uvara nteko woolalyeera. (Mite. 1:6-8) Isiyani mahumu inlamuliyaaya wiitthuca ninna ntakiheronna?
Muntakihe Yesu waatthenkaca alopwana wiira awacere mirintti cuulupale cinkhalanaaya wanlokoni (Nwehe iparaagarafu 14.)
15-16. a) Manannani mahumu anlamuliyaaya untakiha Yesu? b) Manannani Patrick aakaviheriyaawe?
15 Manannani mahumu anhalaaya untakiha Yesu? Mahumu ahaana waatthenkaca mayamunna, hataa akhalaka amirawo wiira awacere mirintti cinkhalanaaya wanlokoni. g Masi mahumu khanweherera wiira mayamunna anaatthenkacaaya akhale oohipahuwa. Ayo ahaana waatthenkaca amirawo nimananna omaana wiira yiitthuce ukhala atthu owiiyeviha, ookhuluvelya ni wiitthenkaca wiira yaakavihere atthu akhwaawe.—1 Tim. 3:1; 2 Tim. 2:2; 1 Pet. 5:5.
16 Moone mananna munna mmoca neehaniya Patrick aakaviheriyaawe upanka marukunuso. Ukati waaryaawe mmirawo, uyo aanaatafiti atthu akhwaawe nimananna oohiloka ni aanaapankaca iyo hataa mayanuunu. Vano humu mmoca ahoonenela wiira Patrick ahaana upanka marukunuso ni uyo ahonvaha ikano wiira ankavihere, masi nimananna omaana. Patrick neera: “Uhokicivela venci uvahiya waka iyo ikanweeyo! Khweeliini, mi wankiriipa nrima cinene kaawoonaka mayamunna yaakhelaka mirintti co wanlokoni caapheelaaka. Masi iyo ikanweeyo yahokikavihera woona wiira kahaana kikhalaka owiiyeviha kavaraka nteko nimayamunna ni mayanuunu, uhiya upheela ukhalana mirintti cinci awula upheela uhimiya wanlokoni.” Itthu yiirannyeele phiila, Patrick khanle humu naarina myaakha 20.—Miru. 27:9.
17. Manannani Yesu oonihenryaawe wiira anaakhuluvela attharyaawe?
17 Yesu ahaavaha nrintti attharyaawe uhiya paahi woolalyeera, masi ciicammo wo wiitthuciha. (Mat. 28:20.) Atthunaka ayo attharyaayo yoopuwela wiira khayaahala uwacera saana uyo nrinttyuuyo. Masi Yesu ankhuluvela wiira attharyaawe yanhala uwacera saana uyo nrinttyuuyo. Uyo ankupali cinene iyo itthwiiyo mpaka aheera: “Khampa apaapa cikirumilyaaya, miiva ciicammo kinawuurumani.”—Joau 20:21.
18. Manannani mahumu anlamuliyaaya untakiha Yesu?
18 Manannani mahumu anlamuliyaaya untakiha Yesu? Mahumu anaacuwela ifayita irinaaya waavahacera mirintti mayamunna antthenkaciya. (Afili. 2:19-22) Wootakihera, mahumu pooti waatthenkaca amirawo wiira akwecakwece ni ulokihaca Isalau Yoomwene. Mahumu pooti unvahacera nrintti munna mmoca wiira awacere ni untthenkaca wiira awacere saana uyo nrinttyuuyo. Munna mmoca neehaniya Mateus khanle humu phiyaaru, naahimya itthu inkavihenre cinene. Uyo neera wiira uhiya paahi utthenkaciya, mahumu yankhuluvela wiira uyo anhala ukhitiri uwacera saana uyo nrinttyiiyo hataa nari veekha. Uyo neera: “Miiva kavirikanihaka itthu, ayo yankikavihera woona mananna caahalaaka upanka ikwaha ikhwaaweeyo.” h
19. Isiyani inlamuliyeenyu upanka?
19 Yesu ahovarela nteko mahuku 40 hinaaya urwaa wiirimu wiira aalipihe, eetthucihe ni atthenkace atthu akhwaawe. Ni hiiva ciicammo nihaana utthara ntakihero na Yesu. (1 Pet. 2:21) Mwaneene Yesu naahala unikavihera, kontha uyo honikhuluveliha co: “Mi kinaahala ukhala ni nyuuva mpaka umwiisoni wo citthu cotheene.”—Mat. 28:20.
NCIPO 15 Munttitthimihe mwaana a Yehova!
a Miteko 1:3 Ni ahomwiirela: ‘Uhiye ilapwa, amucyaa ni urwee ilapo inhalaaka wuuthoonyera.’
b Ivangeeliyu ni ilivuru cikhwaawe co mbiibiliyani cinawuuluma ikwaha cinci Yesu aakhumelenlyaawe atthu wunwelelihiya wawe. Wootakihera, uyo ahonkhumelela Maria Madalena (Joau 20:11-18); athiyana akhwaawe (Mat. 28:8-10; Luka 24:8-11); attharyaawe eeli (Luka 24:13-15); Peturu (Luka 24:34); attharyaawe unhiya Tomee (Joau 20:19-24); attharyaawe unhela nhina Tomee (Joau 20:26); attharyaawe 7 (Joau 21:1, 2); attharyaawe oopwahaka 500 (Mat. 28:16; 1 Akor. 15:6); nyeenyaawe neehaniya Tiyaago (1 Akor. 15:7); maapostolu otheene (Miteko 1:4); ni maapostolu waattamela Upetaniya. (Luka 24:50-52) Ukati nkhwaawe waakhumelenlyaawe atthu enci khawantikhiye mbiibiliyani.—Joau 21:25.
c Joau 20:11 Masi, Maria ahokhala neemenle vate waattamela mahiye, onlaka. onlakoono, uyo ahooroma uhoolo waya awehaka nhina mahiye 12 ni aahoona malayikha meeli yaawanre ikuwo cootteela anonkomile nipuro neesiyaaya irutthu ya Yesu, nlayikha nimoca wiimuru ni nikhwaawenno wiimwetto. 13 Malayikhaayo, yahonkoha wiira: “Nthiyana, unonlelani?” Maria ahaakhula: “haavo ntthu nkusile Pwiyaaka, ni akincuwela nipuro nimwesilyaawe.” 14 Vano wuuluma wawe commo, Maria ahorukunuwa ni ahomoona Yesu neemenle, masi woohincuwela wiira aari Yesu. 15 Yesu ahonkoha: “Nthiyana, unonlelani? Ummwavyavya tipani?” Maria, oopuwela wiira aari ntthu nlokihaca ijardim, aahomwiirela: “Oolupale, waakhala wiira phinyu muntamihile va, nkihimeerye nipuro mweesileenyu, mi kinaarwaa uncisa.” 16 Yesu aahomwiirela wiira: “Maria!” ukati Maria waarukunuwilyaawe, ahomwaakhula ni iheperewu: “Rabôni!”(nintaphulela: “Mwiitthucihi”).
d Luka 24:18 Nlopwana mmoca eehaniya Kleyopa, ahomwaakhula eeraka: “Niireke u Yerusalemunwo weeva unletto nkhala veekha, uhincuwelaa citthu ciiranyaale ala mahukwaala?” 19 Uyo ahaakoha: “Citthuni?” Ayo yahaakhula: “Ca Yesu, Nnasareeno, aari porofeeta okuru ni citthu caapankaawe ni moolumacerwaawe uhoolo wa Nluku ni waapoovu, 20 ni ahoolelihu aanankuttho ni anamalamulela ahonleva wiira eeviye akhomeliyaka wanipottoni. 21 Masi hi, naaweherera wiira uyo nlopwanooyo paahala uwoopola Asarayeli. Uhiya commo, ciniiranyeeleene nnyo citthunnyo, ileelo ninaapihera nihuku noneeraru. 22 Uhiya commo, athiyana yaari nkhayi nihiiva ahonitikhiniha cinene kontha yahopeherya umahiye, 23 ni uphiya waya nwo, khayaaphanyale irutthu ya Yesu, ni yaahoturuwa yeeraka wiira yaahoona malayikha yaawiirenle wiira Yesu ri nkumi. 24 Vano, atthu akina ari nkhayi ni hiiva, yaahorwa umahiye ni yaahophwanya ciicammo toko ayo athiyanaayo caahimalyaaya, masi khayaamoonale Yesu. 25 Vano, uyo ahowiirela: “Nyuuva nkhanle atthu oohankhili ni nnaapica waamini citthu cuulumiye ni maporofeeta! 26 Niireke Kristu khaalamuliya upankiya nnyo citthunnyo wiira aphwanye uttitthimihiya wiirimu?” 27 Ni ahopacera waataphulela citthu cotheene cantikhiye cimwaacaka uyova, upacera Moocesi, mpaka maporofeeta otheene.
e Wiira moone ilista co inatiri cimmuuluma Mesiya, nwehe mwaha “Será que as profecias da Biblia provam que Jesus era Messia?” Nhina isayiti jw.org
f Efesu 4:8 Kontha Cowantikhiya cineera: “Ukati uwenlyaawe wiirimu, haacisa atthu ootthukiya hovaha itthuvo ceepinaatamu.”
g Mahumu akhwaawe amirawo pooti uthanliya ukhala mamootoli osirikwiitu hataa anarina myaakha 25 awula 30. Yoopacera, ahaana ucuwela mananna humu cinvaraawe nteko.
h Wiira moone mananna mahumu anhalaaya waakavihera amirawo ukhalana mirintti cuulupale wanlokoni, nwehe irevista Sentinela ya Agosto yo 2018 ipaagina 11-12, iparaag. 15-17, ni ciicammo 15 yo Abril yo 2015 ipaagina 3-13.
i ILATARATO YO : Namasoma mmoca o Ibiibiliya wiiweha wawe sana itthu inhimyaaya Ibiibiliya, naalakela uriha iwarakha co natali.
