WAAMINI weekhweeli khunakhala ukupali paahi wiira Nluku haavo. Atthu ookhalaka imiliyawucene anaakupali wiira Nluku haavo, masi arii moopanka citthu coohiloka imweeni. “Waamini” toko coo, urii khampa nsurukhu woohikhweeli; unkhala toko wokhweeli, masi khurina ifayita. Vano, waamini weekhweeli isiyani?

Waamini weekhweeli unlipiherera ucuweleeheeha Cowantikhiya Cowaarya. Cila Cowantikhiya cila, ciphattuwale wa Nluku, cinaanihimerya ikhweeli ya Nluku ni cinaanikavihera uncuwela. Cinaanitaphulela malamulo, coolakela ca Nluku ni meetthuciherwaawe. Nhina waya cimphwanyannyaa citthu toko:

• Nluku rii mmoca paahi. Khaavo nonlikanana.

• Yesu khanakhala Nluku Okuru-Coothene. Uyova Profeta a Nluku.

• Waaswalela anluku eettontto wokhula inanna, itthu inonrusa Nluku.

• Woohipica ninaaphiya nihuku ninhala uhukhumwiya apinaatamu.

• Atthu enceene akhwale anaahala wunwelelihiya wiira yakhale upeephoni.

Waamini weekhweeli phinnivariha miteko comaana. Nnyo miteko nnyo cinanlemeliha Nluku, cinaanivaha ifayita naasineeneehu ni cinawaavaha ifayita akhunanihu. Nhina waya cimphanyannyaa citthu toko:

• Unswalela Nluku.

• Wuunuwihaca makhalelo anonciveliha Nluku, toko nifento.

• Wiikhottiha wuupuwela coohiloka, ni uhipheela coohiloka.

• Ulipihaca umwamini Nluku, hataa wariyari wo masankiho.

• Weetthuciha atthu myaha ca Nluku.

Unlepele Nluku wiira ookavihere. Profeta Moses ahonlepela Nluku eeraka: “Sontte, ukicuwelihe iphiro caa, wiira miiva kuucuwele, wowiira kikhaleke ooloka wa miithoni waa.” * Nluku aheewa ni ahaakhulela ulompa waawe. Moses hoonihera ukhala ntakihero wo waamini. Ciicammo Nluku naahala wuukavihera wuunuwihaca waamini weekhweeli.

Wiivahe ukathi woosoma Cowantikhiya Cowaarya. Cowantikhiya Ciphattuwale wa Nluku, utakanihera nhina Torá, Isaalimu ni Evangelho, cirii mbiiblyani, ilivuru yooverihela ukawiya ntuniyani moothene. Weeva uhaana yeeyo ilivuru iyo?

Uvarele nteko ikano ciri nhina mu Cowantikhiya Cowaarya muukumini waa. Waamini urii toko ntinka, unkhomaala nuuvareliya nteko. Wavarelaka nteko, waamini waa unaahala ukhomaala. Unaahala woona wiira ikano ca Nluku cihaana ifayita. Wowoonannyaa, ikano coovareliya nteko cimphwanyannyaa nhina mu Cowantikhiya Cowaarya cinnolokihaca makhalelo aatthu enceene. Uhihiyerere usoma ila ilivuru ila ni woone matakihero anttharana.