Nhokhweliya ntthu anfenteenyu cinene? Yawiirannyeelakani itthu toko iyo atthunaka nyuuva nnawiikohaka co: Ntthu akhwaaka immwiirannyeela isiyani? Ntthu anfentaaka kinaahala umoona-tho? Nhina ula mpanttoola ni unttharana ninaahala woona wiira mananna Ibiiblya cinaakhulaaya ala makohwaala inaanimaaliha cinene.

1. Ntthu akhwaaka immwiirannyeela isiyani?

Yesu holattaniha ukhwa nuurupa ikhove cowiiliyaliya. Ntthu norupa ikhove cowiiliyaliya khancuwela itthu ineerannya nipuro niryaawe. Manannani ukhwa unlikanacaaya niikhove? Ntthu akhwaaka khaneecuwela, uyo khanoona uweryaa ni khanhuvahuva. Ibiiblya ineera “atthu ookhwa khanoopuwela hataa itthu.” —Nsome Eklesyaste 9:5.

2. Ucuwela itthu inwiirannyeela atthu ookhwa unnikavihera cani?

Atthu enci anawoova ukhwa ni hataa anaawoova atthu ookhwa! Masi ucuwela itthu inhimyaaya Ibiiblya nhina atthu ookhwa unaanimaaliha. Yesu enre “ikhweeli inaahala wuutaphulani.” (Joau 8:32) Cihaavo ittiini cineera khula ntthu haana irooho awula nnepa uhinkhwa. Masi kahi phiitthu Ibiiblya ineetthucihaaya. Coo, ntthu akhwaaka khanhuva. Ciicammo atthu ookhwa khannipanka itthu yootakhala, ukhala wiira khiivo itthu incuwelaaya. Phimaana, hiiva khaninlamuliya umpanka hataa itthu wiira naatteelihe nrima awula naaswalele ni hataa waalompela.

Ahaavo aneera wiira anaakhitiri uwuulumana atthu ookhwa. Masi iyo itthwiiyo khineerannya. Kontha khampa conneehu, “atthu ookhwa khanoopuwela hataa itthu.” Ale aneera wiira anaawuulumana asipatthannya awula amucyaaya akhwile, khweeliini ayo atthwaayo anoolumana maciini aneekhaliha khampa ule khwilyoole. Phimaana, ucuwela itthu inwiirannyeela atthu ookhwa unaanikavihera unyema maciini. Yehova noniirelaa nihimananihe uwuulumana atthu ookhwa kontha uyo naacuwela wiira maciini itthu innipheelelaaya ukhanle unipanka pusya.—Nsome Deuteronomiyu 18:10-12.

3. Ncuwele isiyani inwiirannyeela atthu ookhwa

Ntuninyani motheene, atthu enci arina moopuwelelo oovirikana nhina itthu inwiirannyeela atthu ookhwa. Masi kahi wiira moopuwelelo otheene ayo akhanle okhweeli.

• Ncoko nyuuva unkhaleenyu, atthwaayo aneera wiira atthu ookhwa inwiirannyeela isiyani?

 4. Ucuwela itthu inwiirannyeela atthu ookhwa unaanikavihera venci cinene

Ucuwela itthu inwiirannyeela atthu ookhwa unaaniiriha uhiwoova atthu akhwile. Nsome Eklesyaste 9:10, ni mwamalihaka usoma, moopele mwaha nna nikohonna:

• Niireke atthu ookhwa anaakhitiri unipanka itthu yootakhala?

Nacuwelaka itthu inhimyaaya Ibiiblya nhina atthu ookhwa, hiiva khaninkupali citthu cowoothiya toko ile ineeriyeele wiira nihaana naapankelaka citthu wiira naatteelihe nrima awula nihaana nanswalelaka. Nsome Isaiya 8:19 ni Apokalipise 4:11. Mwamalihaka usoma, moopele mwaha nna nikohonna:

• Woonela winyu, Yehova nokhala cani amoonaka ntthu aaswalelaka atthu ookhwa awula anlepelaka itthu ntthu khwile?

5. Ucuwela itthu inwiirannyeela atthu ookhwa ninaakhala atthu ootaphuwa

Atthu enci yiitthucile wiira yakhwaakavale anaahala uttarusiya nlattu wo citthu cootakhala cipankilyaaya. Masi ninaakhala ootaphuwa ucuwela wiira nakhwaaka khaninhala uhuvihiya, hataa ukhala wiira nihopanka citthu cootakhala. Nsome Arooma 6:7, ni mwamalihaka usoma, moopele mwaha nna nikohonna:

• Ibiiblya ineera wiira ntthu akhwaaka holeveleliya itampi cawe, awula, uyo ntthuuyo holiva itampi cawe. Vano wakhala commo, nyuuva woonela winyu ntthu akhwaaka naahala uhuvihiya nlattu wo itampi civanryaawe naari nkumi?

Natepaka uncuweleeha Yehova, ninaatepa ucuweleeha wiira uyo khaahala waahiya nanka vakaani atthu ookhwa yahuvaka. Nsome Deuteronomiyu 32:4 ni 1 Joau 4:8. Mwamalihaka usoma, moopele mwaha ala makohwaala:

• Niireke Nluku rina makhalelo ahimiye nhina nnya iveerusunnya anhala waahuviha atthu ookhwa?

• Nyuuva nnawiicoona utaphuwa nlattu woocuwela itthu inwiirannyeela atthu ookhwa? Kontha isiyani?

 UTHIKILELA

Ntthu akhwaaka khiivo incuwelaawe. Atthu ookhwa khanhuvihaciya ni khaanaapanka itthu yootakhala atthu ahinakhwa.

Wuupuwela

• Isiyani immwiirannyeela ntthu ookhwa?

• Manannani cinnikaviheraaya ucuwela itthu inwiirannyeela atthu ookhwa?

• Kontha isiyani ucuwela itthu inwiirannyeela atthu ookhwa unaaniphwanyiha utaphuwa?