Nluku ahothotokaniha ucuulu wa humu okhalayi Abrahamu, ahaapanka nloko, ni ahaavaha malamulo. Uyo ahovaha nna nlokonna ncina neehaniya “Israyeli” ni ahaakhuluvela mitekocawe cowaakihera uswali wokhweeli ni moolumwaawe. (Isaalimu 147:19, 20) Coo, atthu olapo coothene, yanaahala waakhela iparakha nlattu wa Israyeli.​—Usome Uphattuwaca 22:18.

Nluku ahaathanla maisrayeli wiira akhale masaahityaawe. Ihantisi caya cinaanikavihera woona mananna atthu yahalaaya ukaviheriya yakhalaka owiwelela malamulo a Nluku. (Deuteronomiyu 4:6) Coo, yoonaka makhalelo omaisrayeli ni yeetthucaka, akinaku yaanaahala uncuwela Nluku eekhweeli.​—Unsome Isaiya 43:10, 12.

Uwakathi nkhwaawe, nloko no Israyeli nahohiya waaminiya ni Nluku, ni Yehova ahowaakakhaniha ni nloko no makristau. (Matewus 21:43; 23:37, 38) Ilelo, nipuro no maisrayeli, makristau eekhweeli anonswalela akhanlee masaahiti a Yehova.​—Usome Miteko 15:14, 17.

Yesu ahaathotokaniha attharyaawe wiira alalyee ni yaapanke eetthuci nlaponi moothene. (Matewus 10:7, 11; 24:14; 28:19, 20) Ula ntekoola urii moophiya vano unkhiconi, ukathi woomala ulumwenku wo mahukwaala. Ipacererwaaya ihantisi yapinaatamu, Yehova naalicera waathukumaniha atthu imiliyawucene nlaponi moothene muuswalini weekhweeli. (Apokalipise 7:9, 10) Makristau eekhweeli arii oothotokanihiya wiira akhale owaalipiha ni waakavihera akhwaaya. Ituniya yoothene, ayo ahaana iprokrama yoosomihana unthukumanaaya.​—Usome Maberewu 10:24, 25.

Ukhuma mwaakha wo 1870, Mphwinko mwankani wo asomi obiiblya waahopacera woonelela ikhweeli combiiblyani caaliyaliye khalayi. Yanaacuwela wiira Yesu ahothukumaniha nloko noolamula. Coo, yahoyiiraaniha wiira alalyee Umwene mwiilaponi. Mwaakha wo 1931 yaahocisa ncina no Masaahiti a Yehova.​—Usome Miteko 1:8; 2:1, 4; 5:42.

Iseekulu yoopacera, maloko omakristau mapuro menci yaanaaphwanyihiya ifaita ni mphwinko woweettiherera nloko no makristau, wancuwela Yesu ukhala Muru wo nloko no makristau. (Miteko 16:4, 5) Inanna imoca ilelo, Masaahiti a Yehova ntuniyani moothene anaaphwanyera ifaita Mphwinko Woweettiherera wo mahumo ororomelyaa. Ayo phanwehaweha ifiliyaali co Masaahiti a Yehova cintaphulela iluuka, cinemprimiri ni cinkawa citthu cinsomiheriya Ibiiblya ni iluuka coovikanaka 600. Coo, Mphwinko Woweettiherera unaakhitiri uvaha nlipihero nombiiblyani ni nlakihero mmalokoni oovikanaka 1.000, ntuniyani moothene. Khula nloko no makristau, alopwana owaaminiya ukhitiri, anaathanliya wiira akhale mahumu. Ala alopwanaala anawiinanela nikhoto na Nluku ni nifento.​—Unsome 1 Peturu 5:2, 3.

Masaahiti a Yehova arii oothotokaneene wiira alalyee ihapari comaana ni yaapanke eetthuci. Khampa caapankaaya maapostolu, ayo anaalalyaa khula inupa. (Miteko 20:20) Ciicammo anawiivaherera wiira asome Ibiiblya ni atthu ootthuna ninrima, anfenta ikhweeli. Masi Masaahiti a Yehova khakhanlee mphwinko woothotokana paahi. Akhanlee amuci arina Paapaaya oofenta. Akhanlee nloko naasunna oofentana. (2 Atesalonika 1:3) Ukhala wiira ale anonswalela Yehova athotokanihiyee wiira ancivihere Nluku, akhanlee amuci ootepesa utteeliya nlaponi moothene.​—Unsome Isaalimu 33:12; Miteko 20:35.