Ihapari Comaana Cantikhiye ni Luka 12:1-59
-
Ifermentu yo Mafariseu (1-3)
-
Mmoove Nluku, kahi apinaatamu (4-7)
-
Uhimya uhoolo waapinaatamu wiira ri nkhayi ni Kristu (8-12)
-
Nlattanihero na thaciri ari nlolo (13-21)
-
Nhiye utepa ukhala nimasukhuli (22-34)
-
Nikhoto nankaani (32)
-
-
Nhiitthaale (35-40)
-
Ipottha yookhuluvelya ni yoohikhuluvelya (41-48)
-
Kahi nnema, masi uhiiwananiya (49-53)
-
Nreerelonaya ucuwela itthu ineerannya khula ukati (54-56)
-
Mwaamalihe ananrokottole (57-59)
12 Uyo ukatyuuyo, yaahothukumana atthu imiliyau cene, mpaka wancera uphunyaana. Vano, Yesu ahuuluma awaacaka attharyaawe, eeraka: “Ratta niifermentu yo mafarisewu, ukhanle wootha.
2 Khiivo itthu ivithiye saana inhala uhooneleliya ni khiivo isiiri ihinhala ucuweleliya.
3 Citthu nnohimyeenyu wapiphini cinaahala wiiwiya waatthuni, itthu inuulumeenyu mpaani, inaahala wiiwiya waculu inupa.
4 Uhiya commo, kinoohimyeerani ikhweeli, apatthannyaaka: Nhiwoove ale ankhitiri uwiivani ni yawiivakani vale ahinkhitiri yuupankakani-tho itthu ikiina.
5 Masi mi kinaahala wuuthoonyiherani tipani nyuuva nnolamuliyeenyu umoova: Mmoveke Ule niira, eevaka vale, akhitiriki unrihela ntthuuyo Ncehena.*
6 Khacintumihiya iphera 5 nimisurukhu cirina ifayita vakaani? Kinoohimeeryani ikhweeli wiira, khiivo nanka iphera imoca inliyaliye ni Nluku.
7 Masi, hataa ikharari cotheene commuru winyu cihaalikeliya. Nhoove, nyuuva nhaana ifayita cinene uvikana iphera cinci
8 “Kinoohimyeerani wiira: Ule nohala uhimyaca uhoolo waapinaatamu wiira ri nkhayi ni miiva, mwaana a pinaatamu ciicammo naahala uhimya uhoolo wo malayikha a Nluku wiira ri nkhayi nuuyo.
9 Masi, ule nohala ukikhotta uhoolo waapinaatamu, ni miiva kinaahala unkhotta uhoolo wo malayikha a Nluku.
10 Ule nohala umuuluma pusya mwaana apinaatamu, naahala uleveleliya; masi ule nohala wuuluma pusya nnepa wowaarya khanhala uleveleliya.
11 Mwarwaaniyaka waatthuni, waahooleli okuvernu ni waakhulupale, nhikhale niiwasiwaasi niitthu yoohala wuuluma ni mananna owuuluma wiira mwiicaakihe,
12 kontha uyo ukatyuuyo, nnepa wowaarya unaahala uwiitthucihani itthu yoohala uhimya.”
13 Ntthu mmoca aari nne nipuronne, aaheera: “Mwiitthucihi, mmwiirele munnaaka akimeele mihakhu cihiyeriyeehu.”
14 Vano Yesu ahomwaakhula, eeraka: “Nlopwana, tipani kirumile ukhala suwiisiinyu ni kivahile ukhulupale wiira kikawanihe mihakhu cinyu?”
15 Vano, Yesu ahowiirela atthu otheene: “Ratta, ni nhiitthaale, wiira nnyeme ukhala atthu ookhalana ikhwilu, kontha hataa ukhalaka wiira ntthu haana mihakhu cinci, khankhalana ukumi nlattu wo citthu cirinaawe.”
16 Vano, Yesu aahaahimyeera nlattanihero nimoca, eeraka: “Nlopwana mmoca thaciri, aahoruwerya venci.
17 Vano, uyo nlopwanooyo ahopacera wuupuwela, eeraka: ‘Akirina nipuro noosunka icoolya caka, kinhala upankani?’
18 Uyo aheera: ‘Kinaahala ukwanyulaca makhupi otheene kirinaakaayo ni kinaahala uteka moolupale oovikana ala, kinaahala uhela icoolya cotheene kiruwenryaaka nimihakhu caka cotheene,’
19 ni kinaahala wiiciirela: Weeva uhaana citthu cinci cinhala utosera myaakha cinci. Umumuleke, ulyeeke, uwuryeke ni wiilaweke.’
20 Masi Nluku ahomwiirela: ‘Nlolo, ula uhiyuula unaahala ukhwa, vano tipani nohala uhalana mihakhu caa?’
21 Iyo phiitthu immwiirannyeela ntthu khanle thaciri ni citthu cowatuninyani, masi hikhanle thaciri wamiithoni wa Nluku.”
22 Yesu ahowiirela attharyaawe co: “Nhiye utepa ukhala nimasukhuli muukumini winyu, moopuwelaka itthu yoohala ulya, ni niirutthwiinyu, moopuwelaka itthu yoohala uwara.
23 Kontha ukumi uhaana ifayita uvikana iyoolya, ni irutthu ihaana ifayita uvikana ikuwo.
24 Mwaawehe anakhuku, ayo khaanaala, khanhepha ni khaarina nipuro nikhwaawe noohela iyoolya, masi Nluku nawaaliha. Niireke nyuuva, khantepile ukhalana ifayita waavikana asaanuni?
25 Iriyariinyu, tipani nokhitiri wuncerera ukumyaawe, nanka vakaani nlattu wookhala nimasukhuli?
26 Vano, ukhala wiira khannokhitiri upanka itthu yankaani cinene, vano nlattuni nnokhaleenyu niiwasiwaasi mpheelaka upanka citthu cikiina?
27 Moone ithutu mananna cinoonuwaaya: Nnyo khacinvara nteko, khacinttottha ikuwo wiira ciware, masi kinoohimyeerani ikhweeli wiira, hataa Salomau yooyo, uhookhalaru wiira aawara citthu cinci cooreera, khaawara waalikananaawe nanka ifoloore imoca.
28 Vano, wakhala wiira Nluku naawariha malasi ontakhwani ankhala mahuku vakaani nuupahiya, niireke khanhala wuuwarihani nyuuva alopwana owaamini vakaani?
29 Nhiye ukhala nimasukhuli nlattu wo itthu yoolya awula yoowurya, ni nhiye ukhala nimasukhuli venci,
30 Kontha citthu cotheene nnyo, phi citthu atthu owatuninyani cineekurumicaaya cinene waavya. Athumwaninyu owiirimu, anaacuwela wiira nyuuva nnaapheela citthu cotheene nnyo.
31 Uhiya commo, mpacereke uhoolelihera umwene wa Nluku muukumini winyu, ni citthu cikhwaawe cotheene cimpheeleenyu, uyo naahala wuuphwanyihani.
32 Nhoove, nyuuva nkhanle nikhoto nankaani nokhontwaa, kontha Apaapeenyu owiirimu uhaacivela wuuvahani Umwene.
33 Ntumihe mihakhu cinyu ni nsurukhuuyo mwaakawele amasikhini. Vano, mwiipankele mirupa co nsurukhu cihinthaala, nkhalane mihakhu cihinhala umala, wiirimu, nipuro latarawu ni ciicammo oweese uhimphiyaaya.
34 Kontha nipuro uri nhakhwiinyu, vaava phinhalaaya ukhala nrimeenyu.
35 Nwarace ikuwo cinyu ni mwiitthenkace, ni mithuko cinyu cikhale coopharela.
36 Nkhale khampa alopwana, anwaareriha apwiiyaaya uturuwa ukacamentuni, wiira ukati unhalaaya waatta nkhora, yaahulele woohipica.
37 Cootteeliya cikhanle ipottha cinhala uphwanyiya naapwiiyaaya woohiitthaala. Kinoohimeeryani ikhweeli wiira: Apwiiyaayaayo anaahala uwaraca ikuwo caya conteko wiira yancere uvara ntekwaaya, anaahala uwiirela wiira conkome wameeca, ni waavarela nteko.
38 Kontha, hataa apwiiyaaya yawaaka uhiyu awula uhiyu iriyari ni yaaphwanyaka owiitthenkaceene, nnyo ipotthannyo cinaahala utteeliya.
39 Masi ncuwele ila itthwiila: Unari wiira mwaneene inupa aanaacuwela nihuku ninwaawe latarawu, khaahala uhiya winnyaciyaka mpaani wawe.
40 Ni nyuuva ciicammo mwiitthenkace, kontha Mwaana Apinaatamu nohala uwa nihuku nahaaweherereenyu.”
41 Vano, Peturu ahonkoha Yesu, eeraka: “Pwiiya, nno nlattaniheronno nnonaaca hiiva awula atthu otheene?”
42 Ni Apwiiya yaahomwaakhula, yeeraka: “Tipani khanle khweeliini ipottha yookhuluvelya ni yaankhili, ivahaceriye naapwiiyaaya waawacera apoovu ni waavaha iyoolya woohihiyerera ukati umpheelaaya?”
43 Ikhale yootteeliya iyo ipottheeyo, wakhalaka wiira ukati unhalaaya uwa Apwiiyaaya inaahala uphwanyiya yapankaka nnyo citthunnyo.
44 Kinoohimeeryani ikhweeli wiira: Ayo anaahala uvahacera iyo ipottheeyo mihakhu caya cotheene.
45 Masi, ipottheeyo yuupuwelaka co: ‘Apwiiyaaka anaapica uwa,’ ipaceraka uwaattakaca ananteko aapwiiyaayaayo, yawuryaka, yalyaaka ni yahapaliyaka,
46 apwiiyaaya iyo ipottheeyo anhala uwa nihuku nahaawehereraaya ni iwoora ihincuwelaaya, ni iyo inaahala uttarusiya venci ni inaahala urwaaniya nipuro naatthu oohikhuluvelya.
47 Vano, ipottha inhala wiiweeha itthu apwiiyaaya impheelaaya, masi ihiitthenkacaka, hataa ihipankaka itthu ilepeliyaaya, inaahala waattiya ikwaha cinci.
48 Masi ile inhala uhiiweeha itthu ilepeliyaaya ni ipankaka citthu cimphwanela uttarusiya, inhala waattiya ikwaha vakaani. Khweeliini, ule vahiye citthu cinci, naahala ulokihiya citthu cinci, ni ule vahaceriye citthu cinci naahala utepa ulokihiya citthu cinci.
49 Mi kiwile wiira kiparihele mooro watuninyani ni, ukhala wiira moorooyo uhopharela, vano kinhala upheelani-tho?
50 Khweeliini, mi kihaana mpattiso unhalaaka upattisiya, ni nanlelo mi kihoosanka mpaka nihuku unhalaaya umala!
51 Nyuuva nnooniha wiira miiva kaawaanile nnema watuninyani? Miiva akaawaanile nnema! Kaawaanile uhiiwananiya.
52 Ukhuma nenna coo, anaahala ukhala atthu athanu itthoko imoca anhala uhiiwanana, atthu araru anhala uhiiwanana naatthu eeli ni atthu eeli anhala uhiiwanana naatthu araru.
53 Unaahala uhiiwananiya nlopwana nimwanawe mwanlopwana, ni mwaana mwanlopwana naathumwaane, nthiyana nimwanawe mwanthiyana ni mwaana mwanthiyana naanumwaane, amaathi uhiiwanana ni amwaramwanaya, ni amwaramwanawe uhiiwanana naamaathyaya.
54 Vano, Yesu aahowiirela ciicammo atthwaayo co: “Nyuuva moonaka nikhumelelaka nihutte unkhumaaya ncuwa, woohipica nneera: ‘Inaarupa ipula yophyoo yuulupale’, ni iyo inawiirannya.
55 Nyuuva moonaka ikhumelelaka iphyo uhitto ilapo, nneera: ‘Unaahala uviha’, ni iyo inawiirannya.
56 Mafaalusu, nyuuva nnaakhitiri ucuwelela citthu cineerannya watuninyani ni wiirimu, masi khannokhitiri ucuwelela citthu cineerannya ula ukatyuula?
57 Vano, kontha isiyani uhincuweleenyu upanka itthu yosariya?
58 Ukati nnorweenyu utiripunaali nintthu muntthekenleenyu, mwiikurumice ummaliha nanrokottole nrineenyu nuuyo ntthuuyo, wiira huupiiheni wasuwiisi ni suwiisi amwiihanaka kwaarta okhattya ni uyo ootthukelakani nkhattya.
59 Mi kinoohimeeryani ikhweeli wiira: Mwatthukeliyaka vale, khannohala ukhuma mmo nkhattyammo, nhilivile isinku yoomalela”
